ཨེ་ཤེ་ཡ་ཤར་ལྷོའི་མནའ་འབྲེལ་དང་ཀྲུང་གོའི་རང་མོས་ཚོང་དོན་ཁུལ་གྱི་པར་གཞི་3.0དེ་ཉིད་ཨེ་ཤེ་ཡ་ཤར་ལྷོའི་མནའ་འབྲེལ་དང་ཀྲུང་གོའི་དཔལ་འབྱོར་ཚོང་དོན་མཉམ་ལས་རྒྱུན་མཐུད་འཕེལ་རྒྱས་ཕྱིན་ནས། ཨེ་ཤེ་ཡ་ཤར་ལྷོའི་མནའ་འབྲེལ་དང་ཀྲུང་གོའི་རང་མོས་ཚོང་དོན་འབྲེལ་བ་མུ་མཐུད་འཕེལ་རྒྱས་འགྲོ་བར་སྐུལ་འདེད་གཏོང་བའི་སྟོབས་ཤུགས་གལ་ཆེན་ཞིག་ཏུ་འགྱུར་རྒྱུ་རེད། ཀྲུང་གོའི་དུས་ཡུན་རིང་པོའི་དཔལ་འབྱོར་རོགས་ཟླ་གལ་ཆེན་ཡིན་པའི་ཧིན་རྡུ་ཉི་ཞི་ཡ་དེ་ཉིད་ཨེ་ཤེ་ཡ་ཤར་ལྷོའི་མནའ་འབྲེལ་དང་ཀྲུང་གོའི་རང་མོས་ཚོང་དོན་ཁུལ་གྱི་པར་གཞི་3.0གྱི་འཕེལ་རྒྱས་ཀྱི་གོ་སྐབས་ཐོབ་པར་བྱེད་པ་ནི་རང་ངོས་ཀྱི་དཔལ་འབྱོར་གྱི་མཉེན་ཤུགས་ཆེ་རུ་དང་རྒྱལ་སྤྱིའི་འགྲན་རྩོད་ནུས་པ་ཆེ་རུ་གཏོང་རྒྱུའི་ངོས་ནས་བརྗོད་ན་གལ་འགངས་ཧ་ཅང་ཆེན་པོ་ཞིག་རེད།

མིག་སྔར། ཨ་རིའི་ཕྱི་ཕྱོགས་སྲིད་ཇུས་ལ་འགྱུར་ལྡོག་མྱུར་པོ་འགྲོ་བ་དང་། གནམ་གཤིས་འགྱུར་ལྡོག་ལ་ཁ་གཏད་གཅོག་པའི་སྐར་ཁུང་དུས་རིམ་ཐུང་དུ་ཕྱིན་པ། དེ་བཞིན་མི་ཐབས་རིག་ནུས་སོགས་གསར་དར་ལག་རྩལ་འཕེལ་རྒྱས་མྱུར་པོ་ཕྱིན་པ་བཅས་ལས་བྱུང་བའི་འགྲན་སློང་གསར་པ་ལས་འཛམ་གླིང་ལ་ངེས་གཏན་མིན་པའི་རང་བཞིན་མང་པོ་འཕྲད་ཡོད། རྒྱབ་ལྗོངས་དེ་འདྲའི་འོག་ཨེ་ཤེ་ཡ་ཤར་ལྷོའི་མནའ་འབྲེལ་དང་ཀྲུང་གོའི་རང་མོས་ཚོང་དོན་ཁུལ་གྱི་པར་གཞི་3.0གྱི་གལ་ཆེའི་རང་བཞིན་སྔར་བས་མངོན་གསལ་དོད་པོ་ཡོད། ཨེ་ཤེ་ཡ་ཤར་ལྷོའི་མནའ་འབྲེལ་དེ་ལོ་ལྔ་བསྟུད་མར་ཀྲུང་གོའི་ཚོང་དོན་རོགས་ཟླ་ཆེ་ཤོས་སུ་བརྟན་པོར་གནས་ཡོད། དེ་ལས་གོ་ལ་ཧྲིལ་པོའི་དཔལ་འབྱོར་མ་ལག་ཁྲོད་ཀྱི་ཀྲུང་གོའི་ཤུགས་རྐྱེན་ཐེབས་ཤུགས་རྒྱུན་མཐུད་ཆེ་རུ་འགྲོ་བ་མཚོན་ལ། ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་དང་ཀྲུང་གོའི་དབར་དཔལ་འབྱོར་གསབ་རེས་རང་བཞིན་ཡང་ཉིན་བཞིན་ཆེ་རུ་འགྲོ་བ་མཚོན་གྱི་ཡོད།

མིག་སྔར་ཀྲུང་གོ་ནི་ཧིན་རྡུ་ཉི་ཞི་ཡའི་ཕྱིར་གཏོང་བྱེད་ས་ཆེ་གྲས་ཨང་དང་པོ་དེ་རེད། ཀྲུང་གོའི་ཚོང་དོན་གྲུབ་ཆའི་ཁྲོད་ཀྱི་ཧིན་རྡུ་ཉི་ཞི་ཡ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་གནས་བབ་ཀྱང་རྒྱུན་ཆད་མེད་པར་མཐོ་རུ་ཕྱིན་ཡོད། ཨེ་ཤེ་ཡ་ཤར་ལྷོའི་མནའ་འབྲེལ་གྱི་དཔལ་འབྱོར་སྡེ་གཞི་ཆེ་ཤོས་ཡིན་པའི་ཧིན་རྡུ་ཉི་ཞི་ཡར་ཀྲུང་གོ་དང་དཔལ་འབྱོར་ཚོང་དོན་མཉམ་ལས་བྱེད་ཚད་ཆེ་རུ་གཏོང་བའི་ཐད་སྔར་བཞིན་མི་མངོན་པའི་སྟོབས་ཤུགས་ཆེན་པོ་ལྡན་ཡོད། ཕྱིར་གཏོང་གྲུབ་ཆ་ལེགས་སུ་གཏོང་རྒྱུར་དམིགས་ནས། ཧིན་རྡུ་ཉི་ཞི་ཡས་གོམ་སྟབས་རྗེས་མར་ཨེ་ཤེ་ཡ་ཤར་ལྷོའི་མནའ་འབྲེལ་དང་ཀྲུང་གོའི་རང་མོས་ཚོང་དོན་ཁུལ་གྱི་པར་གཞི་3.0གྱི་སྲིད་ཇུས་ཀྱི་ཁེ་སྤོགས་བེད་སྤྱོད་གང་ལེགས་བཏང་ནས་ཕན་ཡོད་ཀྱི་ཆ་རྐྱེན་བསྐྲུན་ཏེ། འབྲེལ་ཡོད་རྒྱལ་ཁབ་དང་ས་ཁུལ་གྱི་ཚན་རྩལ་ཁེ་ལས་ཧིན་རྡུ་ཉི་ཞི་ཡར་མ་འཇོག་བྱེད་པར་ཡོང་རྒྱུའི་ཡིད་དབང་བཀུག་སྟེ་ཐོན་ལས་ཀྱི་འགྲན་རྩོད་ནུས་པ་ཆེ་རུ་གཏོང་རྒྱུ་རེད།

ཐོན་ལས་རིམ་སྤོར་ལ་སྐུལ་འདེད་གཏོང་རྒྱུ་དང་ཕྱིར་གཏོང་གྲུབ་ཆ་ལེགས་སུ་གཏོང་རྒྱུ་དེ་ཧིན་རྡུ་ཉི་ཞི་ཡས་གནམ་གཤིས་འགྱུར་ལྡོག་དང་ལག་རྩལ་འཕོ་འགྱུར་ལས་བྱུང་བའི་འགྲན་སློང་ལ་ཁ་གཏད་ནུས་ལྡན་གཅོག་པའི་ངོས་ནས་བརྗོད་ན་གལ་འགངས་ཧ་ཅང་ཆེན་པོ་ཞིག་རེད། ཧིན་རྡུ་ཉི་ཞི་ཡས་ཀྲུང་གོའི་ཚན་རྩལ་དང་དེ་བཞིན་ནུས་རྒྱུ་གསར་པའི་ཁེ་ལས་ཕྱི་རྒྱལ་དུ་མ་འཇོག་བྱེད་ཕྱོགས་ཤེས་རྟོགས་བྱེད་ནུས་ཆེ་རུ་གཏོང་བ་དང་། ཧིན་རྡུ་ཉི་ཞི་ཡ་དང་ཀྲུང་གོའི་ཚན་རྩལ་དང་ནུས་རྒྱུ་གསར་པའི་ཁེ་ལས་ཆུང་འབྲིང་རིགས་ཀྱིས་རང་མོས་ཚོང་དོན་ཁུལ་གྱི་འབྲེལ་ཡོད་སྲིད་ཇུས་བེད་སྤྱོད་དེ་བས་ཡག་པོ་བྱ་རྒྱུར་རོགས་རམ་བྱས་ཏེ། དགོས་ངེས་ཀྱི་མ་དངུལ་གྱི་རྒྱབ་སྐྱོར་དང་མ་བཅོས་རྒྱུ་ཆ་འགན་ལེན་བྱས་ནས། ཀྲུང་གོ་དང་ལག་གདང་སྦྲེལ་ཐོག་ལྗང་མདོག་དང་བདེ་འཇགས་ཀྱི་ས་ཁོངས་མཁོ་སྤྲོད་འཁོར་འབྲེལ་གཏོད་དགོས།

དུས་ཡུན་ངེས་ཅན་ཞིག་གི་རིང་། ཨ་རིའི་སྒོ་ཁྲལ་བྱེད་ཐབས་ལས་ས་ཁུལ་འཕེལ་རྒྱས་ལ་ཐུན་མོང་གི་འགྲན་སློང་འཕྲད་ཡོད། ཧིན་རྡུ་ཉི་ཞི་ཡ་དང་ཀྲུང་གོས་མཉམ་ལས་ལ་ཤུགས་སྣོན་བརྒྱབ་ནས་ཨེ་ཤེ་ཡ་ཤར་ལྷོའི་མནའ་འབྲེལ་དང་ཀྲུང་གོའི་རང་མོས་ཚོང་དོན་ཁུལ་གྱི་པར་གཞི་3.0གྱི་འཕེལ་རྒྱས་ཁ་ཕྱོགས་དང《ས་ཁོངས་ཕྱོགས་ཡོངས་ཀྱི་དཔལ་འབྱོར་རོགས་ཟླའི་འབྲེལ་བའི་གྲོས་ཆོད》(ＲＣＥＰ)ནང་གཏན་འཁེལ་བྱས་པའི་སྒྲིག་སྲོལ་དང་མཐུན་པའི་འགན་ལེན་བྱེད་དགོས་པ་དང་ཆབས་ཅིག རྨང་གཞི་དེའི་ཐོག་དཔལ་འབྱོར་ཚོང་དོན་གྱི“གྲོགས་ཚོམས”རྒྱུན་ཆད་མེད་པར་རྒྱ་སྐྱེད་བཏང་ནས་ཕྱི་ཕྱོགས་ཀྱི་འགྲན་སློང་ལ་ཐུན་མོང་ཐོག་ཁ་གཏད་གཅོག་པའི་ནུས་པ་ཆེ་རུ་གཏོང་དགོས། རྒྱལ་ཁབ་གཉིས་པོས་ད་དུང་ནུས་རྒྱུ་གསར་པ་དང་ཚན་རྩལ་མཐོ་བའི་ཁྱབ་ཁོངས་ཀྱི་མཉམ་ལས་ལ་སྐུལ་འདེད་མགྱོགས་པོ་བཏང་ནས་གོ་ལ་ཧྲིལ་པོའི་ཁྲོམ་ར་སྔར་བས་རྒྱ་སྐྱེད་གཏོང་དགོས་པ་དང་དུས་མཚུངས། སྤེལ་རེས་ལས་སྟེགས་སྣ་ཚོགས་བེད་སྤྱོད་གང་ལེགས་བྱས་ནས་སྲུང་སྐྱོང་རིང་ལུགས་ཀྱི་འགྲན་སློང་ལ་མཉམ་དུ་ཁ་གཏད་བཅག་སྟེ་སྒོ་དབྱེ་དང་། ཁོང་ཡངས། གཉིས་ཕན་བཅས་ཀྱི་ས་ཁོངས་དཔལ་འབྱོར་གྱི་རྣམ་པ་ཞིག་གཏོད་དགོས།

(རྩོམ་པ་པོ་ནི་ཧིན་རྡུ་ཉི་ཞི་ཡའི་འཐབ་ཇུས་དང་རྒྱལ་སྤྱིའི་གནད་དོན་ཞིབ་འཇུག་ལྟེ་གནས་ཀྱི་རྒྱལ་སྤྱིའི་འབྲེལ་བ་ཞིབ་འཇུག་པུའི་ཞིབ་འཇུག་པ་ཡིན་པ)