“ང་དང་ཀྲུང་གོའི་དབར་ལས་འབྲེལ་ཟབ་མོ་འདུག”ཀྲུང་གོའི་སྐོར་གླེང་སྐབས་སྐབས་བཅོ་བརྒྱད་པའི་ཀྲུང་ཧྭ་དཔེ་དེབ་ཀྱི་དམིགས་བསལ་བྱས་རྗེས་བྱ་དགའ་ཐོབ་མཁན་ཐུ་ནི་སིའི་རྒྱ་རིག་པ་མཁས་ཅན་དང་། ལོ་ཙཱ་བ། དཔེ་སྐྲུན་མཁས་ཅན་བཅས་ཡིན་པའི་ཧྥུའུ་རུང་གི་ངོ་གདོང་ལ་སྤོབས་སེམས་ཀྱིས་ཁེངས་ཤིང་། “མཐོ་འབྲིང་ཐོན་རྗེས། ངས་ཨ་ཕའི་སྐུལ་ལྕག་དང་རེ་སྒུག་འོག་རྒྱ་ཡིག་སྦྱངས་པ་ཡིན། སྐབས་དེ་དུས་ཨ་ཕའི་མིག་རྒྱང་ཧ་ཅང་རིང་པོ་འདུག ཁོང་གིས་ཀྲུང་གོའི་མ་འོངས་པའི་འཕེལ་རྒྱས་ལ་ལྟ་སྟངས་ཡག་པོ་འཛིན་གྱི་འདུག ངས་ཨ་ཕའི་བསམ་འཆར་ཉན་ནས་1999ལོ་ནས་བཟུང་དངོས་སུ་རྒྱ་ཡིག་སྦྱངས་པ་ཡིན”ཞེས་ཁོང་གིས་བརྗོད།

དེ་ནས་བཟུང་ཧྥུའུ་རུང་ཀྲུང་གོའི་རིག་གནས་ལ་དགའ་ཞེན་ཆེ་རུ་སོང་ཞིང་། ཧྥུའུ་རུང་ལ་ཨེ་ཅིབ་ནས་འབུམ་རམས་པའི་སློབ་གནས་དང་པོ་ཐོབ་རྗེས་ཀྲུང་གོར་ཡོང་བ་དང་། ཡང་པེ་ཅིང་སྐད་ཡིག་སློབ་ཆེན་ནས་འབུམ་རམས་པའི་སློབ་གནས་གཉིས་པ་ཐོབ་ཡོད། ཀྲུང་གོར་ཁོང་དང་གྲོགས་པོ་ཚོའི་དབར་མཛའ་གྲོགས་ཟབ་མོ་བཙུགས་ནས་བརྗེད་པར་དཀའ་བའི་ལོ་དྲུག་བསྐྱལ་བ་རེད།

2014ལོར་ཧྥུའུ་རུང་པེ་ཅིང་ནས་ཁ་བྲལ་ཏེ་ཕ་ཡུལ་དུ་ལོག ཁོང་གིས་ཐུ་ནི་སིའི་ཅ་ཐའེ་ཅི་སློབ་ཆེན་དུ་རྒྱ་ཡིག་དགེ་རྒན་བྱས་ནས་སློབ་མ་ཚོར་ཀྲུང་གོའི་ལོ་རྒྱུས་རིག་གནས་དང་ཡུལ་སྲོལ་གོམས་གཤིས་ཀྱི་སློབ་ཚན་ཁྲིད།

2016ལོར་ཧྥུའུ་རུང་དང་བཟའ་ཟླས་ཐུ་ནི་སིའི་ཤར་ཕྱོགས་ཤེས་རིག་དཔེ་སྐྲུན་ཁང་བཙུགས་པ་དང་། གཙོ་བོ་ཀྲུང་གོའི་དཔེ་དེབ་ཡིག་སྒྱུར་དང་དཔེ་སྐྲུན་བྱས་ནས་ཐུ་ནི་སི་དང་དེ་བཞིན་ཨ་རབ་ཀྱི་རྒྱལ་ཁབ་གཞན་དག་གི་ཀློག་པ་པོར་ངོ་མཚར་ཆེ་བའི་ཀྲུང་གོའི་གཏམ་རྒྱུད་བརྗོད་པར་འབད།

“ལོ་9ཡི་རིང་ང་ཚོས་དཔལ་འབྱོར་དང་། ཆབ་སྲིད། རིག་གནས། ལོ་རྒྱུས། སྤྱི་ཚོགས་སོགས་ཀྱི་ནང་དོན་དང་འབྲེལ་བ་ཡོད་པའི་ཀྲུང་གོའི་དཔེ་དེབ་80ལྷག་ཙམ་ནང་འདྲེན་དང་ཡིག་སྒྱུར་དཔེ་སྐྲུན་བྱས་པ་ཡིན། འགྱུར་རྩོམ་དེ་དག་ཁྲོད《ཀྲེན་ཧོ་དང་ཨ་ཧྥེ་རི་ཁ》དང་། 《ཀྲུང་གོའི་འགྲོ་ལམ་དང་ཀྲུང་གོའི་གནས་ལུགས》 《གནའ་བོའི་ཕོ་བྲང་གི་ལོ་རྒྱུས་གླེང་གཏམ》 《ཀྲུང་གོའི་དཔལ་འབྱོར་གྱི་དཀའ་གནད་ཆེན་པོ་བཅུ་སེལ་བ》སོགས་ཀྱི་དཔེ་དེབ་ལ་མི་རྣམས་རྒྱུས་མངའ་ཆེན་པོ་ཡོད། ང་ཚོས་ད་དུང་ཨ་རབ་རྒྱལ་ཁབ་ཀྱི་རྒྱལ་སྤྱིའི་དཔེ་དེབ་འགྲེམས་སྟོན་སྣ་ཚོགས་ལ་བརྩམས་ཆོས་ཕུལ་བྱུང་མང་པོ་འགྲེམས་སྟོན་བྱས་པས། ས་གནས་དེ་གའི་ཀློག་པ་པོའི་དགའ་བསུ་ཆེན་པོ་ཐོབ་ཡོད”ཅེས་ཧྥུའུ་རུང་གིས་འཛུམ་དམུལ་དམུལ་ངང་བརྗོད།

འདི་ལོའི་ཟླ་4པར་ཐུ་ནི་སིའི་རྒྱལ་སྤྱིའི་དཔེ་དེབ་འགྲེམས་སྟོན་སྐབས་སོ་དགུ་པ་འཚོགས་པ་དང་། ཀྲུང་གོ་ནི་གཙོ་མགྲོན་རྒྱལ་ཁབ་རེད། “ཀློག་པ་པོ་ཚོས་ཀྲུང་གོར་བཅངས་པའི་སྤྲོ་སེམས་དང་ཀྲུང་གོའི་གཏམ་རྒྱུད་ལ་དགའ་པོ་བྱེད་པ་ནི་ང་ཚོའི་བསམ་ཚོད་ལས་བརྒལ་སོང་། ཁོང་ཚོས་ཀྲུང་གོར་ཡུན་རིང་གི་ལོ་རྒྱུས་དང་ཤེས་དཔལ་ལྡན་པ་ཤེས་པ་མ་ཟད། ད་དུང་དེང་རབས་ཀྲུང་གོའི་དཔལ་འབྱོར་དང་སྤྱི་ཚོགས་མགྱོགས་མྱུར་འཕེལ་རྒྱས་འགྲོ་བའི་ཐབས་མཆོག་ཀྱང་ཤེས་འདོད་བྱེད་ཀྱི་འདུག ཀློག་པ་པོ་མི་ཉུང་བས་མི་རིང་བར་ཀྲུང་གོར་བལྟ་ཙམ་བྱེད་པར་འགྲོ་རྒྱུའི་རེ་སྒུག་བྱེད་ཀྱི་འདུག དེས་ང་ཚོར་ཡིག་སྒྱུར་དང་དཔེ་སྐྲུན་གྱི་ལས་ཀ་སྔར་བས་ཏན་ཏིག་བསྒྲུབ་པར་སྐུལ་མ་གཏོང་གི་འདུག”ཅེས་ཧྥུའུ་རུང་གིས་བརྗོད།