མཚོ་ནག་དང་རི་བོ་གངས་རྩེ་བརྒྱད།

གཡང་ལུང་འདམ་རའི་ཁུལ་གྱི་ཁྲུང་ཁྲུང་སྐེ་ནག

མདོ་ལ་རིང་མོའི་འདབས་སུ་ཆགས་པའི་གྲོང་ཚོ།

འཁྱག་རོམ་ནས་བཞུར་བའི་ཆུ།

མདོ་ལའི་རྒྱུད་ཀྱི་གླང་སྙིང་རི་བོ།

མདོ་ལ་རིང་མོའི་ལ་གཤམ་གྱི་མཚེར་ས།

མདོ་ལ་རིང་མོའི་མུ་མེད་ཀྱི་རྩྭ་ཐང་།

ཨ་མེས་སྟོང་སོར་ཐུར་དུ་བལྟས་ན་ངོ་མཚར་ཆེ་བའི་འདབ་ལོའི་དབྱིབས་མངོན་པ།

དབྱར་གཞུང་དུ། ང་ཚོ་མདོ་ལ་རིང་མོའི་རྒྱལ་ཁབ་སྤྱི་གླིང་གི་འོས་འདེམས་ཁུལ་མཚོ་སྔོན་ཡུག་ཁུལ་གྱི་མཐིལ་དུ་སྐྱོད་སྐབས་འདི་གའི་རི་བོ་དང་། ཆུ་རྒྱུན་དྭངས་མོ། རྩྭ་རྩི་ཤིང་བཅས་ཚང་མ་ལས་ས་མཐོའི་ས་གཞི་ཆེན་པོའི་ཚེ་སྲོག་གི་མཛེས་རིས་ཤིག་གྲུབ།

མགོ་བོ་ཡར་བཀྱགས་ནས་བལྟས་ཚེ། ཉི་འོད་འོག་རི་བོ་གངས་རྩེ་བརྒྱད་ཀྱི་དབུ་རྩེ་ནས་དངུལ་མདོག་གི་འོད་སྣང་འཚེར། དེ་ནས་བཞུར་བའི་ཆུ་ཐིགས་རེ་རེས་གངས་ལྗོངས་ཀྱི་ཟོལ་མེད་བཅོས་མིན་གྱི་མངགས་བཅོལ་ཐོགས་ཏེ་ཆུ་ཕྲན་དུ་འདྲེས་རྗེས་གཙང་པོ་ཆགས། ཆུ་ཕྲན་འདིས་གསེར་ལུང་ཆུ་དང་བར་དམ་ཆུ་བོའི་ལང་ལོང་དུ་རྒྱུག་པའི་ཉམས་བསྐྱངས་ཡོད་ལ། སྨད་རྒྱུད་ཀྱི་སྤྱི་ཆིང་ཁྲི་སྟོང་ཡོད་པའི་སྔོ་གླིང་སྟེ། རི་བོ་གངས་རྩེ་བརྒྱད་བརླན་གྱིས་བསྐྱངས། དེ་ནི“ཀྲུང་ཧྭའི་ཆུ་གསོག་མཐོ་ལྕོག”ཅེས་སུ་འབོད་པའི་མདོ་ལ་རིང་མོའི་མཆན་འགྲེལ་བརྗིད་ཉམས་ལྡན་ཤོས་ཤིག་རེད།

རི་མོའི་ཤོག་དྲིལ་ལྟར་བཀྲམ་པའི་མདོ་ལ་རྩྭ་ཐང་ནི་དབྱར་གཞུང་ལ་ཕུལ་བའི་ཚེ་སྲོག་གི་བསྟོད་གླུ་སྙན་མོ་ཞིག་རེད། དེ་ནི་མུ་མཐའ་མི་མངོན་པའི་སྔོ་ལྗང་གི་མཚོ་མོ་ཞིག་དང་འདྲ་ལ། འབྲོག་པའི་སྦྲ་གུར་ནི་ཆུ་སྐྱེས་དཀར་པོ་དང་འདྲ་བར་དེའི་སྟེང་དུ་ཁྲ་རྒྱན་བརྒྱབ་ཅིང་། ནོར་ལུག་ཁྱུ་དང་ཁྱུ་བག་ཡངས་པོས་ཅི་དགར་རྒྱུ། མུ་མཐའ་ཡས་པའི་སྔོ་གདན་དེ་ནི་རུ་བ་སྤོ་བའི་ཤེས་དཔལ་གྱི་ལོ་ངོ་སྟོང་ཕྲག་རིང་གི་བརྟེན་ས་ཡིན་ལ། རི་དྭགས་སེམས་ཅན་གྲངས་མེད་མཉམ་དུ་འཚོ་བའི་ཁྱིམ་གཞིས་ཤིག་ཀྱང་རེད།

རྩྭ་ཐང་གི་དབུས་སུ་ཡོད་པའི་གཡང་ལུང་འདམ་ར་ནི་ས་གཞི་ཆེན་པོ་འདིའི་གློ་བ་དང་འདྲ་ཞིང་། ཆུ་ལག་སྣ་མང་འདྲེས་པ་དང་ན་འདམ་ནས་སྨུག་སྤྲིན་འཁྲིགས་ཏེ་ཕུན་སུམ་ཚོགས་པའི་ཆུ་རྩྭ་དེ་དག་ཉི་འོད་འོག་ཏུ་སྣུམ་ཞག་དོད། བག་ཕེབས་པའི་ཁྲུང་ཁྲུང་སྐེ་ནག་ཆུ་གཏིང་ཐུང་སར་གོམ་པ་དལ་གྱིས་སྤོ་བཞིན་པ་ནི་ཀླུ་ཡུལ་གྱི་ལྷ་མོ་འཕོས་པ་དང་ཅིས་ནས་མཚུངས། ཆུ་མང་ས་ཁུལ་དེ་ནི་ས་མཐོའི་རྩ་ཆེ་བའི“མཁལ་མ”དང་འདྲ་བར་སྐད་གྲགས་མེད་པར་ཆུ་འགོ་གསོ་འཁྱོངས་དང་སྐྱེ་ཁམས་གཙང་འགྱུར་བྱེད་ལ། སྐྱེ་དངོས་སྣ་མང་རང་བཞིན་གྱི་སྲོག་རྩའི་རྒྱུན་སྐྱོང་བཞིན་ཡོད་པས། དེའི་དབུགས་འབྱིན་རྔུབ་བྱེད་ཐེངས་རེ་རེ་ནི་སྨད་རྒྱུད་ཀྱི་འཚོ་གནས་དང་འབྲེལ་བ་ཡོད།

དབྱར་གཞུང་གི་མདོ་ལ་རིང་མོའི་མཐིལ་དུ་སྐྱེ་ཁམས་ཀྱི་དབྱར་མཚོ་རྒྱས་ཤིང་། ང་ཚོས་མཐོང་བའི་རི་ཆུ་རེ་རེ་དང་རྩྭ་རྩི་ཤིང་རེ་རེ་ནི་ཁེར་རྐྱང་གི་ཡུལ་ལྗོངས་ཤིག་གཏན་ནས་མིན། རི་བོ་གངས་རྩེ་བརྒྱད་ཀྱི་གངས་འཁྱགས་ནི་ཁྲག་རྒྱུན་གྱི་འབྱུང་ཁུངས་དང་། ཐེམ་ཆེན་གྱི་རྡོ་ནགས་ནི་དུས་ཀྱི་འཇིམ་བརྐོས། མདོ་ལ་རིང་མོའི་རྩྭ་ཐང་ནི་ཚེ་སྲོག་གི་འབོལ་གདན། གཡང་ལུང་འདམ་ར་ནི་ལིང་ལིང་དུ་གཡོ་བའི་གློ་བ། གདོད་མའི་ནགས་ཚལ་ནི་གནའ་བོའི་སྲུང་སྐྱོང་བཅས་ཡིན། དེ་དག་ཕན་ཚུན་གཅིག་ལ་གཅིག་བརྟེན་གྱིས་མདོ་ལ་རིང་མོའི་རྒྱལ་ཁབ་སྤྱི་གླིང་གི་འོས་འདེམས་ཁུལ་མཚོ་སྔོན་ཡུག་ཁུལ་གྱི་རི་ཆུ་ནགས་་ཞིང་མཚོ་རྩྭ་བྱེ་འཁྱགས་བཅས་ཀྱི་སྐྱེ་ཁམས་གཏམ་རྒྱུད་ཐུན་མོང་ཐོག་བརྗོད་པ་དང་གཉིས་སུ་མ་མཆིས།