བཟའ་བཅར་གཅེས་སྤྲས་དང་། འཕྲོ་བརླག་གཏོང་བར་ངོ་རྒོལ་བྱེད་པ་ནི་དེང་རབས་སྤྱི་ཚོགས་ཀྱི་ཡ་རབས་མཚོན་པའི་ཚད་གཞི་གལ་ཆེན་ཞིག་ཡིན་མོད། ཡིན་ནའང་དྲ་རྒྱའི་ལས་སྟེགས་ཁག་གཅིག་ལ་ཟ་སྟངས་ངན་པ་ཐད་གཏོང་ནང་དོན་གྱིས་ཁེངས་ཤིང་། མིའི་གཟུགས་པོའི་ཚད་ལས་འགལ་བའི་བཟའ་ཤུགས་ཆེ་ཉམས་དང་། ཞིམ་པོ་ཡོད་ལུགས་སམ་ཡང་ན་བཟའ་ཆའི་རྒྱུ་ཆ་དཀོན་ཚུལ(ཧ་ཅང་ཁ་ཚ་བའི་ཟས་ལྟ་བུ)སོགས་ཀྱི་གཡོ་ཐབས་ལ་བརྟེན་ནས་མི་མང་པོའི་བློ་འགུགས་ཐབས་བྱེད་ཀྱི་ཡོད། “ཟ་སྟངས་ཐད་གཏོང་མཁན”དེ་དག་གིས་བདེ་ཐང་དང་། གྲོན་ཆུང་། ཡ་རབས་བཅས་ལྡན་པའི་དེང་རབས་འཚོ་བའི་འདུ་ཤེས་དང་རྒྱབ་འགལ་བྱས་ནས་ཀྲུང་ཧྭ་མི་རིགས་ཀྱི་གྲོན་ཆུང་བསྲི་ཚགས་ཀྱི་སྲོལ་རྒྱུན་སྤྱོད་བཟང་ལ་མངོན་སུམ་འཛེམ་མེད་ཀྱིས་རྡོག་རོལ་བཏང་ལ། བཟའ་བཅའ་འཕྲོ་བརླག་གཏོང་བར་ངོ་རྒོལ་བྱེད་པའི་བཅའ་ཁྲིམས་ཀྱི་འབྲེལ་ཡོད་གཏན་འབེབས་དང་ཡང་འགལ་བས། བྱེད་སྟངས་དེ་རིགས་ལ་མཐོང་ཆེན་གྱིས་མཐའ་གཅིག་ཏུ་བཀག་འགོག་བྱེད་དགོས། ཟླ་6ཚེས་24ཉིན་ཀྲུང་གོ་འཛད་སྤྱོད་པའི་མཐུན་ཚོགས་ཀྱིས་གྲོས་འགོ་བཏོན་ནས་སྤྱི་ཚོགས་ཡོངས་ཀྱིས་བཟའ་བཅའ་འཕྲོ་བརླག་གཏོང་བར་ངོ་རྒོལ་བྱས་ནས་ཟ་སྟངས་ངན་པ་ཐད་གཏོང་བཀག་འགོག་བྱེད་དགོས་པའི་འབོད་སྐུལ་བྱས་ཡོད།

ཀྲུང་གོ་འཛད་སྤྱོད་པའི་མཐུན་ཚོགས་ཀྱིས་རྒྱ་ཆེའི་འཛད་སྤྱོད་པར་མིག་གསལ་པོས་ལྟ་བ་དང་བག་ཡོད་ཚུལ་ལྡན་ཡོང་བར་བྱེད་དགོས་པ་ལས། འཕྲོ་བརླག་གཏོང་བ་ངོམ་པ་དང་། བདེ་ཐང་ལ་གནོད་པའི་ཟ་སྟངས་ངན་པ་ཐད་གཏོང་གི་ནང་དོན་ལ་ལད་ཟློས་དང་། བསྔགས་བརྗོད། བརྒྱུད་བསྐུར་སོགས་མི་བྱེད་པར་རང་རྟོགས་ངང་འབྲེལ་ཡོད་ཀྱི་ཐོ་ཁོངས་ཨང་རྟགས་དང་འཕྲིན་ལམ་བཀག་དགོས་པ་མ་ཟད། ཚན་རིག་དང་མཐུན་པའི་ཟ་སྟངས་དང་། བཟའ་བཅར་གཅེས་སྤྲས། བདེ་ཐང་གི་འཚོ་བ་སྐྱེལ་སྟངས་བརྒྱུད་བསྐུར་བཅས་ཀྱི་ནང་དོན་ཡག་པོ་དེ་རིགས་འདེམས་རྒྱུར་དོ་ཁུར་བྱས་ཏེ། “འཕྲོ་བརླག་གཏོང་བ་ནི་ངོ་ཚ་དང་། གྲོན་ཆུང་བསྲི་ཚགས་བྱེད་པ་ནི་གཟི་བརྗིད་ཡིན་པའི”འདུ་ཤེས་བརྟན་པོ་བཙུགས་ནས་འཕྲོ་བརླག་མི་གཏོང་བ་རྒྱུན་གཏན་འཛད་སྤྱོད་ཁྲོད་ཀྱི་རང་འགུལ་བྱ་སྤྱོད་ཅིག་ཏུ་འགྱུར་བ་བྱེད་དགོས་པའི་འབོད་སྐུལ་བྱས་ཡོད།

ནང་དོན་གསར་བཟོ་མཁན་གྱིས་མཐའ་ཚད་ཡག་པོ་བསྲུངས་ནས་བདེ་ཐང་ལྡན་པའི་བཟའ་བཏུང་རིག་གནས་བརྒྱུད་བསྐུར་བྱེད་དགོས། རང་ངོས་ཀྱི་ཤུགས་རྐྱེན་ཐེབས་ཤུགས་བེད་ཡག་པོ་སྤྱད་དེ་རང་འགུལ་ངང་གྲོན་ཆུང་བསྲི་ཚགས་ཀྱི་འདུ་ཤེས་དྲིལ་བསྒྲགས་བྱས་ནས། “སྡེར་གཙང་བྱ་སྤྱོད”ཀྱི་དཔེ་མཚོན་མཉམ་སྤྱོད་ཀྱིས་བདེ་ཐང་ལྡན་པའི་བཟའ་བཏུང་རིག་གནས་དང་བཟའ་བཅའ་འཕྲོ་བརླག་གཏོང་བར་ངོ་རྒོལ་བྱེད་པའི་ལག་ལེན་ཧུར་ཐག་བསྟར་མཁན་ཞིག་ཏུ་འགྱུར་བ་བྱེད་དགོས་པའི་གྲོས་འགོ་བཏོན་ཡོད།

ལས་སྟེགས་གཉེར་མཁན་གྱིས་འགན་འཁྲི་ནན་དུ་བཏང་ནས་བདེ་ཐང་གི་དྲ་རྒྱའི་ཁོར་ཡུག་གཏོད་དགོས། དྲ་རྒྱའི་ལས་སྟེགས་གཉེར་མཁན་གྱིས་ཞིབ་དཔྱད་ནན་པོ་བྱས་ནས་ནང་དོན་ཞིབ་དཔྱད་ལམ་སྲོལ་དང་འོས་སྦྱོར་ལེགས་གཏོང་ལམ་སྲོལ་འཛུགས་པ་དང་འཐུས་སྒོ་ཚང་དུ་བཏང་བ་དང་སྦྲགས་ཁ་ཕྱོགས་ཡང་དག་གིས་ཁྲིད་སྟོན་བྱ་རྒྱུར་ཤུགས་བརྒྱབ་སྟེ། བཟའ་བཅའ་གྲོན་ཆུང་བསྲི་ཚགས་དང་བདེ་ཐང་ངང་བཟའ་བཏུང་བྱེད་པའི་སྤྱི་ཕན་དྲིལ་བསྒྲགས་ཀྱི་ནང་དོན་འོས་སྦྱོར་ཧུར་ཐག་བྱས་ནས་བདེ་ཐང་དང་དགེ་མཚན་ལྡན་པའི་དྲ་རྒྱའི་བཟའ་བཏུང་རིག་གནས་ཀྱི་ཁོར་ཡུག་ཅིག་གཏོད་པར་ལེགས་སྐྱེས་འབུལ་དགོས།