མཚོ་སྔོན་ཡུལ་ཤུལ་ཀྲོའུ་དང་ཝུའུ་ཧན་རོལ་དབྱངས་སློབ་གླིང་དབར་སློབ་གྲྭ་དང་ས་གནས་ཀྱི་མཉམ་ལས་གྲོས་མཐུན་བཞག་པ།
མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། ཉེ་ཆར། ཡུལ་ཤུལ་བོད་རིགས་རང་སྐྱོང་ཀྲོའུ་མི་དམངས་སྲིད་གཞུང་དང་ཝུའུ་ཧན་རོལ་དབྱངས་སློབ་གླིང་དབར་སློབ་གྲྭ་དང་ས་གནས་མཉམ་ལས་ཀྱི་སྒྲོམ་གཞིའི་གྲོས་མཐུན་ལ་མིང་རྟགས་འགོད་པའི་མཛད་སྒོ་ཡུལ་ཤུལ་དུ་འཚོགས་པ་རེད། ཕྱོགས་གཉིས་པོས་རོལ་དབྱངས་སྒྱུ་རྩལ་འབྲེལ་ཐག་ཏུ་བྱས་ཏེ་མི་རིགས་ཀྱི་རིག་གནས་རྒྱུན་འཛིན་དང་རིག་གནས་དང་ཡུལ་སྐོར་ཐོན་ལས་རིམ་སྤོར་ལ་དམིགས་ནས་མཉམ་དུ་སློབ་གྲྭ་དང་ས་གནས་མཐུན་སྦྱོར་འཕེལ་རྒྱས་ཀྱི་ཐབས་ལམ་གསར་པ་འཚོལ་ཞིབ་བྱས་པ་རེད།
ད་རེས་ཀྱི་མཉམ་ལས་ཀྱིས་ཡུལ་ཤུལ་གྱི་སྒྱུ་རྩལ་ཤེས་ལྡན་པ་གསོ་སྐྱོང་དང་རོལ་དབྱངས་གསར་རྩོམ་སོགས་ཐད་ཀྱི་ཞན་ཆར་དམིགས་ཏེ། ཝུའུ་ཧན་རོལ་དབྱངས་སློབ་གླིང་གིས་ཆེད་ལས་ཀྱི་ལེགས་ཆ་བཏོན་ནས། བཅར་འདྲི་གསར་རྩོམ་དང་། སློབ་ཚན་མཉམ་དུ་བཀོད་སྒྲིག སྤུས་རྟགས་བཏོད་པ་སོགས་ཀྱི་ཐབས་ཤེས་བརྒྱུད། བོད་རིགས་ཀྱི་རོལ་དབྱངས་རིག་གནས་རྒྱུན་འཛིན་གསོན་པོ་ཐུབ་པར་སྐུལ་འདེད་བཏང་ཡོད། ཕྱོགས་གཉིས་པོས་གཤམ་གསལ་ཁྱབ་ཁོངས་སུ་མཉམ་ལས་གཏིང་ཟབ་བྱ་རྩིས་ཡོད་དེ། རིག་གནས་གསར་གཏོད་དང་། ཡུལ་ཤུལ་གྱི་མངོན་མིན་རིག་གནས་ཤུལ་བཞག་དང་རང་བྱུང་མཛེས་ལྗོངས་ཀྱི་ཐོན་ཁུངས་སྔོན་འདོན། ས་ཁོངས་ཀྱི་ཁྱད་ཆོས་ཟབ་མོ་ལྡན་པའི་རོལ་དབྱངས་བརྩམས་ཆོས་གསར་རྩོམ་བཅས་བྱས་ནས། “གཙང་གསུམ་ཆུ་འགོའི”དབྱངས་རྟ་རྒྱལ་ཡོངས་སུ་ཁྱབ་པར་བྱ་རྒྱུ་དང་། ཤེས་ལྡན་པ་གསོ་སྐྱོང་བྱས་ཏེ་དམིགས་བཀར་གསོ་སྐྱོང་དང་དགེ་རྒན་ཆེ་མོ་བའི་མཉམ་ལས་བྱས་ནས་ཡུལ་དེའི་སྒྱུ་རྩལ་ཤེས་ལྡན་པའི་ཆེད་ལས་ཀྱི་བྱང་ཚད་མཐོ་རུ་གཏོང་རྒྱུ། རིག་གནས་ཡུལ་སྐོར་མཉམ་འདྲེས་ཀྱིས་རོལ་དབྱངས་མཚམས་སྦྱོར་དུ་བྱས་ནས་དབྱིངས་བཞུགས་རྣམ་པའི་འཁྲབ་སྟོན་དང་རོལ་དབྱངས་ཀྱི་བརྗོད་དོན་གཙོ་བོའི་ཡུལ་སྐོར་ལམ་ཐིག་གསར་སྤེལ་གྱིས་ཡུལ་ཤུལ་དུ“སྐྱེ་ཁམས་དང་སྒྱུ་རྩལ”ཟུང་འབྲེལ་གྱི་ཁྱད་ལྡན་སྤུས་རྟགས་གཏོད་པར་རམ་འདེམས་བྱ་རྒྱུ་ཡིན་པ་རེད།