ཚེས་7ཉིན་ཚོང་དོན་པུའི་གསར་འགྱུར་མགྲིན་ཚབ་པས་བརྗོད་དོན། འཕྲུལ་མི་དང་ནུས་རྒྱུ་གསར་པའི་རླངས་འཁོར་སོགས་ལས་རིགས་འཕེལ་རྒྱས་འགྲོ་བ་དང་ཆབས་ཅིག་རྒྱལ་ཁབ་ཁག་གིས་དམངས་སྤྱོད་ཁྱབ་ཁོངས་སུ་ལྗིད་ཚད་འབྲིང་བའི་ཞི་ཐུའུ་ཡི་དགོས་མཁོ་རྒྱུན་མཐུད་ཆེ་རུ་འགྲོ་བཞིན་ཡོད། ཀྲུང་གོ་ནི་འགན་འཁུར་བའི་རྒྱལ་ཁབ་ཆེན་པོ་ཞིག་ཡིན་པའི་ཆ་ནས་དམངས་སྤྱོད་ཁྱབ་ཁོངས་ཀྱི་རྒྱལ་ཁབ་ཁག་གི་ལུགས་མཐུན་གྱི་དགོས་མཁོ་དང་དོ་ཁུར་ལ་བསམ་གཞིག་གང་ལེགས་བྱས་ནས། ཞི་ཐུའུ་དང་འབྲེལ་བ་ཡོད་པའི་དངོས་རྫས་ཕྱིར་གཏོང་ཆོག་འཐུས་ཀྱི་རེ་ཞུར་བཅའ་ཁྲིམས་དང་སྒྲིག་སྲོལ་གཞིར་བཟུང་ཞིབ་བཤེར་བྱེད་ཀྱི་ཡོད་པ་དང་། གྲངས་འབོར་ངེས་ཅན་གྱི་ལུགས་མཐུན་རེ་ཞུར་ཁྲིམས་ལྟར་ཆོག་མཆན་སྤྲོད་པ་དང་འབྲེལ། ལུཌ་མཐུན་རེ་ཞུའི་ཞིབ་མཆན་སྤྲོད་པའི་ལས་དོན་ལ་རྒྱུན་མཐུན་ཤུགས་སྣོན་རྒྱག་བཞིན་ཡོད། ཀྲུང་གོ་ཕྱོགས་ཀྱིས་དེའི་ཐད་འབྲེལ་ཡོད་རྒྱལ་ཁབ་དབར་གྱི་ཕྱིར་གཏོང་བཀག་སྡོམ་གྱི་འབྲེལ་གཏུག་དང་སྐད་ཆ་ཤོད་རེས་ལ་སྔར་བས་ཤུགས་སྣོན་བརྒྱབ་སྟེ་ལུགས་མཐུན་གྱི་ཚོང་དོན་ལ་སྟབས་བདེ་སྐྲུན་པར་སྐུལ་འདེད་གཏོང་འདོད་ཡོད།

གསར་འགོད་པ་ཞིག་གིས། ཉེ་ཆར་རྒྱལ་ཁབ་མང་པོས་ཀྲུང་གོའི་ཞི་ཐུའུ་ཕྱིར་གཏོང་བཀག་སྡོམ་གྱི་བྱེད་ཐབས་ལ་དོ་ཁུར་བྱེད་ཀྱི་ཡོད་ལུགས་བརྗོད་ཡོད། དེས་ན་ཀྲུང་གོ་ཕྱོགས་ཀྱིས་བྱེད་ཐབས་གང་དག་སྤྱད་ནས་ཕྱོགས་ཁག་གི་དོ་ཁུར་ལ་ལན་རྒྱག་རྩིས་ཡོད་དམ་ཞེས་འདྲི་སྐབས། ཚོང་དོན་པུའི་གསར་འགྱུར་མགྲིན་ཚབ་པས་གོང་གསལ་གྱི་ལན་དེ་ལྟར་བཏབ་ཡོད།

མགྲིན་ཚབ་པས་བརྗོད་དོན། ཞི་ཐུའུ་དང་འབྲེལ་བ་ཡོད་པའི་དངོས་རྫས་ལ་དམག་དམངས་གཉིས་སྤྱོད་ཀྱི་ངོ་བོ་ལྡན་པ་དང་། དེར་ཕྱིར་གཏོང་གི་བཀག་སྡོམ་བྱས་པ་དེ་རྒྱལ་སྤྱིའི་ཤར་བགྲོད་ཀྱི་བྱེད་ཐབས་དང་མཐུན་ཡོད། ཀྲུང་གོས་ཞི་ཐུའུ་དང་འབྲེལ་བ་ཡོད་པའི་དངོས་རྫས་ལ་ཕྱིར་གཏོང་གི་ཚོད་འཛིན་བྱེད་པའི་དམིགས་ཡུལ་ནི་རྒྱལ་ཁབ་ཀྱི་བདེ་འཇགས་དང་ཁེ་ཕན་ལ་དེ་བས་སྲུང་སྐྱོང་ཡག་པོ་བྱས་ནས་ཁྱབ་ཚད་སྔོན་འགོག་སོགས་ཀྱི་རྒྱལ་སྤྱིའི་འོས་འགན་སྒྲུབ་ཆེད་རེད། དེ་ཐོག་ནས་སྔར་ནས་ད་བར་འཛམ་གླིང་ཞི་བདེ་དང་ས་ཁུལ་གྱི་བརྟན་ལྷིང་སྲུང་སྐྱོང་མཐའ་འཁྱོངས་བྱེད་པའི་ལངས་ཕྱོགས་མངོན་ཡོད།