2024ལོའི་ཟླ་9པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀན་སུའུ་རུ་རྟོག་ཞིབ་གནང་སྐབས“ཀན་སུའུ་ཡིས་བཟོ་ལས་ཅན་གསར་པར་སྐུལ་འདེད་ཧུར་ཐག་གཏོང་བ་དང་། སྲོལ་རྒྱུན་ཐོན་ལས་སྒྱུར་བཀོད་རིམ་སྤོར་མགྱོགས་སུ་གཏོང་བ། ཁྱད་ལྡན་ལེགས་ཆའི་ཐོན་ལས་ཀྱི་རྒྱ་སྟོབས་ཆེ་རུ་གཏོང་བ། འཐབ་ཇུས་རང་བཞིན་གྱི་གསར་དར་ཐོན་ལས་འཕེལ་རྒྱས་ཧུར་ཐག་གཏོང་བ་བཅས་བྱས་ཏེ། ཡུལ་བབ་དང་བསྟུན་ནས་ཐོན་སྐྱེད་ནུས་ཤུགས་གསར་མ་འཕེལ་རྒྱས་གཏོང་དགོས”ཞེས་གསུངས་ཡོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ཏེ། ཀན་སུའུ་ཡིས་ཚན་རྩལ་གསར་གཏོད་དང་ཐོན་ལས་གསར་གཏོད་མཉམ་འདྲེས་གཏིང་ཟབ་བྱེད་པར་སྐུལ་འདེད་ཏན་ཏིག་བཏང་སྟེ་ཚན་རྩལ་གསར་གཏོད་དང་དེའི་གཞན་སྒྱུར་རྟེན་གཞི་ཧུར་ཐག་བསྐྲུན་ཡོད།

སྤུས་ཚད་མཐོ་བའི་ཚན་རྩལ་མཁོ་སྤྲོད་བྱེད་ཚད་མང་དུ་ཕྱིན་པ།

ལན་ཀྲོའུ་གྲོང་ཁྱེར་ནན་ཁྲང་ལམ་སྒོ་རྟགས་ཨང་509པར་ཀྲུང་གོ་ཚན་རིག་ཁང་ཉེ་རབས་དངོས་ཁམས་ཞིབ་འཇུག་སུའོ་གནས་ཤིང་། རིང་ཚད་ལ་སྨི་བརྒྱ་ཕྲག་ཡོད་པའི་ལན་ཀྲོའུ་ཡི་ལྕི་བའི་གྱེས་རྡུལ་མགྱོགས་གཏོང་ཡོ་ཆས“འབྲུག་ཆེན”ཞིག་ལྟར་འདིར་གནས་ཡོད།

རང་རྒྱལ་གྱི་རང་བདག་ཤེས་བྱའི་བདག་དབང་ལྡན་པ་དང་རང་རྒྱལ་ནས་ཐོན་པའི་ཐཱན་གྱེས་རྡུལ་སྨན་བཅོས་མ་ལག་ཐོག་མ་དེ་ལན་ཀྲོའུ་ཡི་ལྕི་བའི་གྱེས་རྡུལ་མགྱོགས་གཏོང་ཡོ་ཆས་ནས་བྱུང་བ་ཞིག་རེད། ཉེ་རབས་དངོས་ཁམས་ཞིབ་འཇུག་སུའོ་ཡི་སུའུ་ཀྲང་གཞོན་པ་དབྱང་ཅན་ཁྲེང་གིས་མིག་སྔའི་བར་འཕྲུལ་ཆས་5ལ་ཐོ་འགོད་ཆོག་མཆན་ཐོབ་པ་དང་འཕྲུལ་ཆས་5ཐོན་སྐྱེད་བྱེད་བཞིན་ཡོད་པས་རྨང་གཞིའི་ཞིབ་འཇུག་ཐོན་ལས་ཅན་མངོན་འགྱུར་བྱུང་ཡོད་ཅེས་བཤད།

ཚན་རྩལ་གསར་གཏོད་དང་ཐོན་ལས་གསར་གཏོད་མཉམ་འདྲེས་གཏིང་ཟབ་བྱ་རྒྱུར་ཤུགས་སྣོན་རྒྱག་པར་སྤུས་ཚད་མཐོ་བའི་ཚན་རྩལ་མཁོ་སྤྲོད་བྱ་རྒྱུ་ནི་འགག་རྩ་རེད། “ལུང་ཡིའུ་ཨང་6པར”བརྟེན་ནས་རང་རྒྱལ་གྱི་དགུན་ཁའི་པད་ཁ་འདེབས་འཛུགས་ས་ཁོངས་བྱང་ཕྱོགས་ཀྱི་འཕྲེད་ཐིག་ཏུའུ་13རུ་སྣུར་སྲིང་བྱས་པ་དང་ཀྲའོ་ཝ་2ཀྱི་གཤེར་གཟུགས་འབུད་རྫས་ཐུའུ་རྨང་བཞུ་ཚྭའི་ཚོད་ལྟ་གོ་ལ་ཧྲིལ་པོར་ཐོག་མར་སྤྱོད་རྒྱུ་ཁྱབ་གདལ་བཏང་བ་དང་སྨན་སྤྱོད་གནས་མཐུན་རྒྱུ་རིགས་6གྲུབ་འབྲས་ཐོབ་པའི་ངང་བཟོ་ཐུབ་ཡོད།

“2024ལོར་ཀན་སུའུ་ཡི་གྲུབ་འབྲས་ཁག་8ལ་རྒྱལ་ཁབ་ཚན་རིག་ལག་རྩལ་གྱི་བྱ་དགའ་ཐོབ་ཡོད” ཀན་སུའུ་ཞིང་ཆེན་ཚན་རྩལ་ཐིང་གི་ཐིང་ཀྲང་མིན་ཕིང་གིས་ཀན་སུའུ་རུ་ལག་རྩལ་རྣམ་གྲངས་353རང་རྒྱལ་གྱིས་ཐོན་པའི་ཚབ་བྱས་པ་དང་ལག་རྩལ་ཁག་226རྒྱལ་ནང་ངམ་ཡང་ན་རྒྱལ་སྤྱིའི་ཐོག་སྔོན་ཐོན་རྒྱུན་འཁྱོངས་ཐུབ་ཡོད་ལ། ཐོག་མའི་གསར་གཏོད་གྲུབ་འབྲས་རྣམ་གྲངས་173ཐོན་ལས་ཅན་དུ་གྱུར་ཡོད་ཅེས་བཤད།

ཁེ་ལས་ཀྱི་གསར་གཏོད་གསོན་ཤུགས་ཇེ་ཆེར་འཕེལ་བ།

ཚན་རྩལ་གསར་གཏོད་དང་ཐོན་ལས་གསར་གཏོད་མཉམ་འདྲེས་གཏིང་ཟབ་ལ་སྐུལ་འདེད་གཏོང་བར་ཁེ་ལས་ཀྱི་གསར་གཏོད་བྱེད་པོའི་གནས་བབ་ལ་ཤུགས་སྣོན་རྒྱག་རྒྱུ་ནི་གཙོ་གནད་ཡིན། “ང་ཚོས་རང་རྟེན་ཞིབ་སྤེལ་བྱས་པའི་ཨ་ཤོམ་འཐུ་བའི་འཕྲུལ་ཆས་ཐོན་སྐྱེད་བྱེད་འགོ་ཚུགས་ཡོད” ཅིའུ་ཆོན་ཨའོ་ཁའེ་ས་བོན་འཕྲུལ་ཆས་མ་རྐང་ཚད་ཡོད་ཀུང་སིའི་ཏུང་ཧྲི་ཀྲང་ཅ་ཅུན་གྱིས་འཕྲུལ་འཁོར་དེའི་ལས་ཕྱོད་མིས་བཀོག་པ་ལས་ལྡབ་200ཡིས་མང་བ་ཡོད་པ་དང་མུའུ་རེ་ནས་མ་གནས་སྒོར་200གྲོན་ཆུང་ཐུབ་པས་ཀན་སུའུ་དང་ཤིན་ཅང་སོགས་སུ་ཁྱབ་གདལ་བཏང་ཡོད་ཅེས་བཤད། 

2024ལོའི་ལོ་མཇུག་བར། ཀན་སུའུ་ཞིང་ཆེན་དུ་མཐོ་གསར་ལག་རྩལ་གྱི་ཁེ་ལས་2463ཟིན་ནས་དུས་མཚུངས་ལས་16.2%འཕར་ཡོད། ཁེ་ལས་གསར་གཏོད་མཉམ་འབྲེལ་སྒྲིག་གཞི་13ཞིང་ཆེན་ཕྱི་ནང་གི་ཚན་པ་326ལ་གཅིག་སྡུད་བྱས་པ་དང་ཚན་ཞིབ་མི་སྣ་5700ལྷག་ཙམ་གྱིས་མཐུན་སྦྱོར་གསར་གཏོད་བྱས་ཏེ་འགག་རྩའི་ཐུན་མོང་རང་བཞིན་གྱི་ལག་རྩལ་རྣམ་གྲངས་89འགག་སྒྲོལ་དང་ཚན་རྩལ་གྲུབ་འབྲས་རྣམ་གྲངས་41གཞན་སྒྱུར་བེད་སྤྱོད་བྱས་ཡོད།

ཚན་རྩལ་གྲུབ་འབྲས་གཞན་སྒྱུར་བདེ་བླག་བྱུང་བ།

པེ་ཅིང་སློབ་ཆེན་ཧོང་ཁྲུན་ཧུའེ་ཡོན་ཧྲི་ཚོགས་པས་ཞིབ་སྤེལ་བྱས་པའི་ཞི་ཐུའུ་སྡེབ་སྦྱོར་དངོས་རྫས་འོད་འཕྲོ་རྒྱུ་ཆ་ཐོན་སྐྱེད་ཐུབ་ཚེ་ཐོན་རྫས་རྐྱང་པའི་ཐོན་རྫས་རིན་ཐང་སྒོར་དུང་ཕྱུར་1.5ཟིན་རེ་ཡོད་མོད། འོན་ཀྱང་ཚོགས་པར་ལག་རྩལ་ཡོད་ཀྱང་འཁོར་ཁང་མེད་པའི་དཀའ་ངལ་འཕྲད་ཡོད།

“ཁེ་ལས་ཀྱིས་འདྲི་གཞི་འདོན་པ་དང་། སློབ་གླིང་གིས་ལན་འདེབས་པ། སྲིད་གཞུང་གིས་ཁྲིད་སྟོན”བཅས་བྱས་ཏེ། ལན་ཀྲོའུ་ཁུལ་གསར་གྱིས་གསར་གཏོད་འཁོར་འབྲེལ་དང་ཐོན་ལས་འཁོར་འབྲེལ་འབྲེལ་མཐུད་བྱེད་པར་སྐུལ་འདེད་བཏང་ཡོད། “ང་ཚོས་ཆེད་མི་བཏང་ནས་འབྲེལ་མཐུད་དང་ཚད་ལྡན་ཅན་གྱི་འཁོར་ཁང་མཁོ་འདོན་བྱས་པ་མ་ཟད། ཧོང་ཁྲུན་ཧུའེ་ཡོན་ཧྲི་ཚོགས་པ་གདན་དྲངས་ནས་ལན་ཀྲོའུ་རེའུ་སི་རྒྱུ་ཆ་གསར་པའི་ཚན་རྩལ་ཀུང་སི་ཐོ་བཀོད་ནས་བཙུགས་ཡོད”ཅེས་ལན་ཀྲོའུ་ཁུལ་གསར་ཚན་རྩལ་གསར་གཏོད་ཅུས་ཀྱི་ཅུས་ཀྲང་དབྱང་ཐེན་གཡོད་ཀྱིས་བརྗོད་པ་དང་། ཁོང་གིས་ཀུང་སིས་ས་གནས་དེ་གའི་མཐོ་སློབ་དང་མཉམ་དུ་འགག་སྒྲོལ་བྱས་ནས་ཟླ་བ་དྲུག་གི་ནང་ཏུན་བརྒྱ་རིམ་པའི་ཐོན་སྐྱེད་སྒྲུབ་རིམ་བསྐྲུན་ནས་ཞི་ཐུའུ་འོད་འཕྲོ་རྒྱུ་ཆ་ཏུན་ཟིན་པ་ཐོན་སྐྱེད་བྱས་ཡོད་ཅེས་བཤད།

“ཞི་ཐུའུ་འོད་འཕྲོ་རྒྱུ་ཆས་འོད་སྦྱོར་ནུས་པའི་ལས་ཕྱོད་མངོན་གསལ་དོད་པོས་ཆེ་རུ་ཕྱིན་ནས་ཞིང་ལས་སྐྱེ་དངོས་ཀྱི་ཐོན་ཚད་10%ནས་20%བར་མཐོ་རུ་འགྲོ་ཐུབ”ཅེས་ཀུང་སིའི་ལག་རྩལ་སྤྱི་ཁྱབ་ལྟ་ཞིབ་པ་ཝུའེ་ཧུའེ་པོ་ཡིས་བཤད།

ཀན་སུའུ་ཡིས་ཚན་རྩལ་གྲུབ་འབྲས་གཞན་སྒྱུར་གྱི“མཐའ་མའི་འགག་གནད”ལ་དམ་པོར་དམིགས་ནས་སྲིད་ཇུས་དང་། ཁྲོམ་ར། དངུལ་རྩ། ཞབས་ཞུ་བཅས་བགྲོད་ལམ་ཆེན་པོ་བཞི་ཤར་གཏོང་ཐུབ་པ་མ་ཟད། ཞིབ་འཇུག་བྱེད་བཞིན་པའི་གཙོ་གནད་རྣམ་གྲངས་དང་། ཚན་ཞིབ་གྲུབ་འབྲས། གཞན་སྒྱུར་རྣམ་གྲངས་བཅས་ཀྱི“གསལ་ཐོ་གསུམ”བཟོས་ནས་གྲུབ་འབྲས་གཞན་སྒྱུར་གྱི་ཁྲོམ་རའི་བགྲོད་ལམ་དེ་བས་ཤར་བགྲོད་ཐུབ་པ་བྱས་ཡོད།

“ང་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་བློ་ལ་བརྟན་པོར་ངེས་ནས་ཚན་རྩལ་གསར་གཏོད་དང་ཐོན་ལས་གསར་གཏོད་མཉམ་འདྲེས་གཏིང་ཟབ་དང‘ཕྱོགས་གཉིས་ལ་ཁྱབ་པར’སྐུལ་འདེད་ཏན་ཏིག་བཏང་སྟེ་ཚན་རྩལ་གསར་གཏོད་ལ་བརྟེན་ནས་ཐོན་སྐྱེད་ནུས་ཤུགས་གསར་མ་འཕེལ་རྒྱས་གཏོང་རྒྱུར་སྣེ་ཁྲིད་ཀྱིས་གསར་གཏོད་རྣམ་པའི་ཀན་སུའུ་མགྱོགས་མྱུར་སྐྲུན་གྱི་ཡིན”ཞེས་ཀན་སུའུ་ཞིང་ཨུད་ཀྱི་ཧྲུའུ་ཅི་ཧུའུ་ཁྲང་ཧྲེང་གིས་བཤད།