རྒྱལ་ཁབ་17གྱི་ཡུལ་སྐོར་ཚོང་པ་བརྒྱ་ལྷག་ཙམ་བོད་དུ་ལྟ་སྐོར་ལ་སླེབས་པ།
ཉེ་ཆར། དབྱིན་ཇི་དང་། ནེའུ་ཙི་ལན། རི་པིན། མ་ལེ་ཞི་ཡ་སོགས་རྒྱལ་ཁབ་17ནས་ཡོང་བའི་རྒྱལ་སྤྱིའི་ཡུལ་སྐོར་ཚོང་པ་བརྒྱ་ལྷག་ཙམ་གནམ་གྲུར་བསྡད་ནས་ལྷ་སར་ཡོང་སྟེ“ཀྲུང་གོའི་བོད་ལྗོངས། བཀྲ་ཤིས་བདེ་ལེགས་2025ལོའི་རྒྱལ་སྤྱིའི་ཡུལ་སྐོར་ཚོང་པ་བོད་དུ་སྐྱོད་པའི”བྱེད་སྒོར་ཞུགས་པ་རེད།
བོད་ཀྱི་བྱེད་སྒོའི་ས་ཚིགས་དང་པོ་ཡིན་པའི་ལྷོ་ཁ་གྲོང་ཁྱེར་དུ་ཡུལ་སྐོར་ཚོང་པ་ཚོས་ངོ་མཚར་ཆེ་བའི་རིག་གནས་ཀྱི་ཡུལ་སྐོར་བྱེད་སྒོ་སྤེལ་ཡོད། ཁོང་ཚོས་བོད་ཀྱི་ལོ་རྒྱུས་ཐོག་གི་ཕོ་བྲང་དང་པོ་ཡུམ་བུ་བླ་སྒང་ལ་ལྟ་སྐོར་བྱས་པ་དང“ལྷ་མོའི་གྲོང་ཚོ་དང་པོར”གྲགས་པའི་བཀྲ་ཤིས་མཆོད་རྟེན་སྡེ་ཁུལ་དུ་བསྐྱོད་ནས་སྲོལ་རྒྱུན་ལྷ་མའི་སྒྱུ་རྩལ་གྱི་ཐུན་མོང་མ་ཡིན་པའི་ཡིད་དབང་འཕྲོག་ཤུགས་མྱོང་ཚོར་བྱས་ཡོད། བོད་ཀྱི་བཙན་པོའི་བང་སོ་དང་། ཆང་ཁྱིམ་གཞིས་ཀ བསམ་ཡས་གཙུག་ལག་ཁང་སོགས་ལོ་རྒྱུས་ཀྱི་རིག་གནས་གནའ་ཤུལ་ལ་ལྟ་སྐོར་བྱས་ནས་ལོ་རྒྱུས་ཀྱི་རིག་གནས་ཟབ་མོར་མྱོང་ཚོར་བྱས་ཡོད། ཡར་འབྲོག་གཡུ་མཚོའི་འགྲམ་ནས་ས་མཐོའི་མཛེས་སྡུག་ལྡན་པའི་རྣམ་པ་མྱོང་རོལ་ཐུབ་ཡོད།
སུའེ་ཙེར་གྱི་ཡུལ་སྐོར་ཚོང་པ་མཱ་ལི་ནཱ་ཡིས“འདི་གའི་རང་བྱུང་ཡུལ་ལྗོངས་ཧ་ཅང་མཛེས་སྡུག་ལྡན་པ་མ་ཟད། སྲོལ་རྒྱུན་རིག་གནས་ཀྱི་རྨང་གཞི་ཟབ་པས་ངའི་ཡིད་དབང་འཕྲོག་སོང་། ས་གནས་དེ་གའི་མི་རྣམས་སེམས་རྩ་འཁོལ་བས་ང་ལ་དྲོ་སྐྱིད་ཀྱི་ཚོར་སྣང་སྟེར་བྱུང”ཞེས་བཤད།
ཤེས་རྟོགས་བྱུང་བར་གཞིགས་ན། ད་ཐེངས་ཀྱི་བྱེད་སྒོ་དེ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་རིག་གནས་དང་ཡུལ་སྐོར་པུའུ་རྒྱལ་སྤྱིའི་སྤེལ་རེས་དང་མཉམ་ལས་ཅུས་ཀྱིས་མཛུབ་ཁྲིད་བྱས་པ་དང་། བོད་རང་སྐྱོང་ལྗོངས་རིག་གནས་དང་ཡུལ་སྐོར་ཐིང་གིས་གཙོ་གཉེར་བྱས་པ་ཞིག་རེད།