ཀན་སུའུ་ཡི་ནུས་རྒྱུ་གསར་པའི་གློག་འདོན་ཚད་ཆན་ཝ་ཁྲི་7000ལྷག་ཙམ་ཟིན་པ།
ཟླ་6ཚེས་4ཉིན། གསར་འགོད་པས་རྒྱལ་ཁབ་གློག་དྲ་ཀན་སུའུ་ཞིང་ཆེན་གློག་ཤུགས་ཀུང་སི་ནས་ཤེས་རྟོགས་བྱས་པར། ཟླ་5པའི་ཟླ་མཇུག་བར་ཀན་སུའུ་ཞིང་ཆེན་ཡོངས་ཀྱི་ནུས་རྒྱུ་གསར་པའི་གློག་འདོན་ཚད་ཆན་ཝ་ཁྲི་7062.46ཟིན་ནས་དུས་མཚུངས་ལས་25.25%འཕར་བ་དེས་སྤྱིའི་གློག་འདོན་ཚད་ཀྱི་65.81%བཟུང་ཡོད། དེའི་ནང་རླུང་གློག་གི་གློག་འདོན་ཚད་ཆན་ཝ་ཁྲི་3494.57ཟིན་ནས་དུས་མཚུངས་ལས་21.76%འཕར་བ་དང་། ཉི་ནུས་ཀྱི་གློག་འདོན་ཚད་ཆན་ཝ་ཁྲི་3536.89ཟིན་ནས་དུས་མཚུངས་ལས་28.89%འཕར་ཡོད།
ཀན་སུའུ་ཞིང་ཆེན་གྱི་རླུང་ནུས་དང་ཉི་ནུས་ལག་རྩལ་གསར་སྤེལ་བྱེད་ཆོག་ཚད་རྒྱལ་ཡོངས་ཀྱི་ཨང་བཞི་པ་དང་ལྔ་པར་སོ་སོར་སླེབས་ཡོད། “ཐཱན་གཉིས”དམིགས་ཚད་ཀྱི་ཁྲིད་སྟོན་འོག ཞིང་ཆེན་ཡོངས་ཀྱིས་ནུས་རྒྱུའི་ལྗང་མདོག་ཐཱན་ཉུང་ཕྱོགས་སྒྱུར་ལ་སྐུལ་འདེད་མགྱོགས་མྱུར་བཏང་ཡོད། རྒྱལ་ཁབ་གློག་དྲ་ཀན་སུའུ་གློག་ཤུགས་ཀྱིས་རྒྱལ་ཁབ་ཀྱི་ནུས་རྒྱུ་གསར་པའི་ཕྱོགས་བསྡུས་གསར་སྤེལ་བེད་སྤྱོད་དཔེ་སྟོན་ཁུལ་དང་བྱེ་ཐང་དང་ཐང་རྒོད་ཀྱི་རྟེན་གཞི་ཆེན་པོ་འཛུགས་སྐྲུན་ལ་ནུས་ཤུགས་ཡོད་རྒུས་ཞབས་འདེགས་ཞུས་ནས་ཀན་གློག་ཕྱིར་གཏོང་འདུ་འགོད་ལ་སྐུལ་འདེད་མགྱོགས་པོ་བཏང་བ་དང་། ནུས་རྒྱུའི་ཐོན་ཁུངས་ཀྱི་ལེགས་ཆ་དཔལ་འབྱོར་དང་འཕེལ་རྒྱས་ཀྱི་ལེགས་ཆར་བསྒྱུར་བར་རམ་འདེགས་བྱས་པ། མདོ་ལ་རིང་མོ་ནས་ཧྲའོ་ཧྲན་བར་གྱི་ཐད་རྒྱུག་འདུ་འགོད་ཀྱིས་རིམ་རྩིས་བརྒྱབ་ན་གློག་ཆུ་ཚོད་ཆན་ཝ་དུང་ཕྱུར་2000ལྷག་ཙམ་ཕྱིར་བཏང་བ། ཀན་སུའུ་ཡི་གློག་ཧྲན་ཏུང་དུ་གཏོང་བའི་འདུ་འགོད་ལེགས་གྲུབ་ཟིན་ནས་གློག་གཏོང་འགོ་ཚུགས་པ། ཀན་སུའུ་ཡི་གློག་ཀྲེ་ཅང་དུ་གཏོང་བའི་འདུ་འགོད་འཛུགས་སྐྲུན་བྱེད་འགོ་ཚུགས་པ། ཀན་སུའུ་ཡི་གློག་སི་ཁྲོན་དུ་གཏོང་བའི་འདུ་འགོད་ཀྱི་ཚན་ཞིབ་ཞིབ་དཔྱད་ལེགས་གྲུབ་ཟིན་པ་བཅས་2025ལོའི་ཟླ་1ནས་ཟླ་5པའི་ཟླ་མཇུག་བར་ཞིང་ཆེན་ཡོངས་ཀྱིས་གློག་ཕྱིར་གཏོང་ཚད་རིམ་རྩིས་བརྒྱབ་ན་ཆུ་ཚོད་ཆན་ཝ་དུང་ཕྱུར་264.24ཟིན་ནས་དུས་མཚུངས་ལས་33.45%འཕར་ཡོད།