ཉེ་ཆར། གསར་འགོད་པར་དམངས་སྤྱོད་མཁའ་འགྲུལ་བོད་ལྗོངས་ཆུས་ཅུས་ནས་ཤེས་རྟོཌ་བྱུང་བར། ཟླ་དང་པོ་ནས་ལྔ་པའི་བར་བོད་ལྗོངས་དམངས་སྤྱོད་མཁའ་འགྲུལ་གྱིས་རིམ་རྩིས་བརྒྱབ་ན་དུས་གཏན་གནམ་གྲུ་འབབ་འཕུར་ཐེངས་ཁྲི་2.7དང་། འགྲུལ་པ་སྐྱེལ་འདྲེན་བྱེད་ཚད་མི་ཐེངས་ཁྲི་300 དངོས་ཟོག་དང་སྦྲག་ཐོག་བསྐུར་མ་སྐྱེལ་འདྲེན་བྱེད་ཚད་ཏུན་ཁྲི་2.1བཅས་ཟིན་པ་དེ་དུས་མཚུངས་ལས་3.4%དང་། 3.1% 9.5%བཅས་སོ་སོར་འཕར་ཡོད། ཟླ་ལྔ་པར་བོད་ལྗོངས་དམངས་སྤྱོད་མཁའ་འགྲུལ་གྱིས་དུས་གཏན་གནམ་གྲུ་ཐེངས་གྲངས་6116དང་། འགྲུལ་པ་སྐྱེལ་འདྲེན་བྱེད་ཚད་མི་ཐེངས་ཁྲི་70.4 དངོས་ཟོག་དང་སྦྲག་ཐོག་བསྐུར་མ་སྐྱེལ་འདྲེན་བྱེད་ཚད་ཏུན་5367.8བཅས་ཟིན་པ་དེ་དུས་མཚུངས་ལས་13.6%དང་། 8.3% 7.7%བཅས་སོ་སོར་འཕར་བ་དང་། བོད་ལྗོངས་དམངས་སྤྱོད་མཁའ་འགྲུལ་སྐྱེལ་འདྲེན་གྱི་འཕེལ་ཕྱོགས་བཟང་པོ་མངོན་ནས་འབྱུང་འགྱུར་རྒྱུན་མཐུད་འཕར་བར་རྨང་གཞི་བརྟན་པོ་བཏིང་ཡོད།

འདི་ལོ་ནས་བཟུང་མཁའ་འགྲུལ་གྱི་བདེ་འཇགས་ལ་འགན་ལེན་བྱ་ཆེད། དམངས་སྤྱོད་མཁའ་འགྲུལ་བོད་ལྗོངས་ཆུས་ཅུས་ཀྱིས་ལྷ་ས་གོང་དཀར་རྒྱལ་སྤྱིའི་གནམ་ཐང་དུ་འདབ་ཆགས་འགོག་པའི་གནས་ཚུལ་ལ་བརྟག་ཞིབ་གཏིང་ཟབ་བྱེད་པ་དང་། འདབ་ཆགས་ཀྱི་འཕུར་ཚུལ་ལ་དབྱེ་ཞིབ་དང་བརྡར་ཤ་གཅོད་པ་དང་མཐའ་འཁོར་སྐྱེ་ཁམས་བཅོས་སྐྱོང་ལ་ཤུགས་སྣོན་རྒྱག་པ། འདབ་ཆགས་འགོག་པ་སོགས་ཀྱི་བདེ་འཇགས་འཁོར་སྐྱོད་འགན་ལེན་གྱི་ལས་དོན་ནུས་ཤུགས་ཡོད་རྒུས་ཡག་པོ་སྒྲུབ་པ་བཅས་བྱས་ཡོད། 2025ལོའི“བདེ་འཇགས་ཐོན་སྐྱེད་ཟླ་བའི”སྐུལ་སློང་ཚོགས་འདུ་འཚོགས་ནས་ཁོངས་མི་ཡོངས་ཀྱི་བདེ་འཇགས་ཀྱི་འདུ་ཤེས་ཟབ་ཏུ་གཏོང་བ་དང་། མངོན་མེད་རྐྱེན་ངན་གྲལ་བཤེར་དང་བཅོས་སྐྱོང་གཏིང་ཟབ་བྱེད་པ། འཕྲལ་སྡོམ་དོ་དམ་དང་བདེ་འཇགས་རིག་གནས་འཛུགས་སྐྱོང་ལ་ཤུགས་སྣོན་རྒྱག་པ། བདེ་འཇགས་མེད་པའི་དོན་རྐྱེན་མ་ཐོན་སྔོན་འགོག་བཅས་བྱས་ཏེ། གནམ་ཐང་འཁོར་སྐྱོད་འཁོར་སྐྱོད་བདེ་འཇགས་ཡོང་བའི་འགན་ལེན་བྱས་ཡོད།