ཉིང་ཁྲིའི་དཔལ་འབྱོར་གསར་སྤེལ་ཁུལ་གྱིས“འཛམ་གླིང་ཡང་རྩེའི”གསར་གཏོད་ཀྱི་གཏམ་རྒྱུད་བརྩམས་པ།
ཉེ་ཆར། གསར་འགོད་པ་བོད་ལྗོངས་ཉིང་ཁྲིའི་དཔལ་འབྱོར་གསར་སྤེལ་ཁུལ་ས་མཐོའི་སྐྱེ་དངོས་ཚན་རྩལ་ཐོན་ལས་གླིང་དུ་སྐྱོད་སྐབས་བོད་ལྗོངས་ཟླ་བ་ཆོས་སྒྲོན་ཁེ་ལས་ཚད་ཡོད་ཀུང་སིའི་ཐོན་སྐྱེད་འཁོར་ཁང་དུ་བཟོ་པ་ཚོས་བེ་ཤའི་ཉིང་ཁུའི་ཐུག་པ་སྒམ་ནང་བླུག་བཞིན་པ་མཐོང་བྱུང་། ས་མཐོའི་བེ་ཤའི་ཉིང་ཁུའི་བཟའ་བཅའ་འདི་རིགས་དྲ་ཚོང་ལས་སྟེགས་བརྒྱུད་གཡོད་ཀང་ཨའོ་ཁུག་ཆེན་ཁུལ་དུ་འཚོང་གི་ཡོད། ཀུང་སི་དེའི་འགན་འཁུར་བ་རྡོ་རྗེས“བེ་ཤའི་ཉིང་ཁུ་འདོན་པའི་ལག་རྩལ་ནི་ཀོང་ཏུང་ཀྲུང་ལུགས་གསོ་རིག་སློབ་ཆེན་གྱི་རིགས་གཅིག་མཁས་ཅན་ཚོགས་པས་ང་ཚོ་དང་མཉམ་ལས་བྱས་ནས་འགག་སྒྲོལ་བྱས་པ་ཞིག་རེད”ཅེས་གསར་འགོད་པར་ངོ་སྤྲོད་བྱས།
2024ལོར་ཉིང་ཁྲིའི་དཔལ་འབྱོར་གསར་སྤེལ་ཁུལ་གྱིས་སློབ་གྲྭ་དང་ས་གནས་མཉམ་ལས་དང་། ཁེ་ལས་དང་ས་གནས་མཉམ་འཛུགས། ཁེ་ལས་དང་ཁེ་ལས་མཉམ་འདྲེས་སོགས་ཀྱི་མཐུན་སྦྱོར་གསར་གཏོད་བྱས་པ་བརྒྱུད་རྒྱལ་ཁབ་རིམ་པའི་མཐོ་གསར་ལག་རྩལ་ཁེ་ལས་1གདན་དྲངས་པ་དང་། རྒྱལ་ཁབ་རིམ་པའི་མཐོ་གསར་ལག་རྩལ་ཁེ་ལས་སུ་རེ་འདུན་ཞུ་འཆར་ཡོད་པའི་ཁེ་ལས་5སྐྱེད་སྲིང་བྱས་པ། རྒྱལ་ཁབ་རིམ་པའི་ཚན་རྩལ་རྣམ་པའི་ཁེ་ལས་འབྲིང་ཆུང་26ལ་ཆོག་མཆན་ཐོབ་ནས་ཁེ་བེད་བདག་ཐོབ་ཀྱི་བསྡོམས་འབོར་དུས་མཚུངས་ལས་53.57%འཕར་ཡོད།
ཉིང་ཁྲི་དཔལ་འབྱོར་གསར་སྤེལ་ཁུལ་དུ་གནས་པའི་ཀྲུང་ལུགས་དང་བོད་ལུགས་གསོ་རིག་ཐོན་ལས་གླིང་བོད་སྨན་དེང་རབས་ཅན་ཞིབ་འཇུག་གསར་སྤེལ་ལྟེ་གནས་སུ་ལག་རྩལ་པ་པད་མ་དབྱངས་ཅན་གྱིས་སྒྲིག་ཆས་སྙོམ་སྒྲིག་ཚོད་ལྟ་བྱེད་བཞིན་འདུག “ང་ཚོས་ཀྲུའུ་ཧའེ་ལིན་ཤོན་སྨན་བཅོས་ཚན་རྩལ་ཚད་ཡོད་ཀུང་སི་དང་མཉམ་ལས་བྱས་ནས་བོད་སྨན་གྱི་དམིགས་བསལ་གྲུབ་ཆ་སྟེ‘བཙོ་ཐལ’ལས་སྣོན་བཟོ་རྩལ་ཚད་ལྡན་ཅན་དུ་བཏང་ནས་སྨན་ནུས་ཀྱི་གྲུབ་ཆ་ལེན་ཚད་98%བར་མཐོ་རུ་གཏོང་རྒྱུ་ཡིན” གླིང་འདིས་ད་ལོའི་ནང་སྔོན་དཔག་བྱས་ན་ལས་གྲྭའི་འབོར་ཚད་ཀྱི་50%ལེགས་སྒྲུབ་བྱེད་ཐུབ་རྒྱུ་རེད་ལ། ཐོན་སྐྱེད་བྱེད་འགོ་ཚུགས་རྗེས་ལོ་རེར་བོད་སྨན་སྨན་རྫས་ཏུན་300ལས་སྣོན་ཐུབ་ནས་ཞིང་འབྲོག་པ་500ལས་ཞུགས་བྱེད་པར་སྐུལ་ཁྲིད་ཐུབ་རྒྱུ་རེད་ཅེས་པད་མ་དབྱངས་ཅན་གྱིས་བཤད།
མུའུ་1700ཟིན་པའི་ཉིང་ཁྲི་གྲོང་ཁྱེར་སྤོ་བོ་རྫོང་ཁྲབ་རྨོག་གྲོང་རྡལ་འདོང་རོ་གྲོང་ཚོའི་ར་མོ་ཤག་ཆེན་འདེབས་འཛུགས་རྟེན་གཞིས་ཉིང་ཁྲིའི་དཔལ་འབྱོར་གསར་སྤེལ་ཁུལ་གྱི་ར་མོ་ཤག་ཆེན་གྱི་ཐོན་ལས་འཕེལ་རྒྱས་འགྲོ་བར་རྨང་གཞི་བཏིང་ཡོད། འདེབས་འཛུགས་རྟེན་གཞིར་སླེབས་སྐབས་ལས་མི་བཀྲ་ཤིས་ཚེ་རིང་གིས་ཤ་མོའི་ཟེའི་སྐྱེ་འཚར་ལ་ཞིབ་ལྟ་བྱེད་བཞིན་འདུག
ད་ཆ་ཀོང་ཏུང་ཞིང་ཆེན་བོད་སྐྱོར་ལས་དོན་རུ་ཁག་གིས་བཙུགས་པའི“ས་མཐོའི་ཐོན་ལས་ཞིབ་འཇུག་རིག་མཛོད”ལ་བརྟེན་ཏེ། ཉིང་ཁྲི་དཔལ་འབྱོར་གསར་སྤེལ་ཁུལ་གྱིས་ས་མཐོའི་ཁྱད་ལྡན་ལག་རྩལ་ཁག་12གཞན་སྒྱུར་ལ་སྐུལ་འདེད་བཏང་ནས་བེ་ཤ་དང་བོད་ཀྱི་ར་མོ་ཤག་ཆེན་སོགས་ཞིང་ལས་ཐོན་རྫས་ཀྱི་ཟུར་སྣོན་རིན་ཐང་30%ཡན་འཕར་བར་སྐུལ་ཁྲིད་བྱས་ཡོད།
ཉིང་ཁྲི་དཔལ་འབྱོར་གསར་སྤེལ་ཁུལ་དོ་དམ་ཨུ་ལྷན་གྱི་ཀྲུའུ་རེན་གཞོན་པ་ལི་མིང་ཀའོ་ཡིས། “ང་ཚོས‘ཀུན་གཏོད་བར་མཐོངས་དང་། སྐྱོང་གསོ་རྟེན་གཞི། འདེགས་སྐྱོར་རྟེན་གཞི་བཅས་ཟུང་དུ་འབྲེལ་བའི་འཁོར་འབྲེལ་མ་ལག་ཆ་ཚང་བཙུགས་ཡོད། ད་ཆ་སྨི་ངོས་གྲུ་ཁྲི་6ཟིན་པའི་ཚད་ལྡན་བཟོ་ཁང་གིས་ཁེ་ལས‘ཐད་ཀར་གཞི་སྡོད་བྱེད་པའི’དགོས་མཁོ་སྐོང་ཐུབ་ཀྱི་ཡོད”ཅེས་ངོ་སྤྲོད་བྱས།
སྤུས་ལེགས་ཞབས་ཞུའི་གཡས་གཞོགས་གཡོན་འདེགས་འོག་ཁེ་ལས་གཞི་ཚུགས་པའི་ལས་ཕྱོད་ཟམ་མི་ཆད་པར་ཆེ་རུ་ཕྱིན་ཡོད།
“གན་རྒྱ་བཞག་པ་ནས་ཐོན་སྐྱེད་བྱེད་འགོ་ཚུགས་པའི་བར་ཉིན་45ལས་འགོར་མེད” ཉིང་ཁྲི་དཔལ་འབྱོར་གསར་སྤེལ་ཁུལ་གྱི་ཁེ་ལས་ཞབས་ཞུ་ལྟེ་གནས་སུ་ཉིང་ཁྲི་ཡུས་ཀྲི་ཞང་སྐྱེ་དངོས་ཚན་རྩལ་ཀུང་སིའི་འགན་འཁུར་བ་ཉིང་ཀྲུང་ཁུའེ་ཡིས“བརྒྱུད་རིམ་ཡོངས་ཚབ་སྒྲུབ”ཀྱི་གསལ་ཐོ་གསར་འགོད་པར་བསྟན་བྱུང་། དཔལ་འབྱོར་གསར་སྤེལ་ཁུལ་གྱིས་ཁྱབ་སྤེལ་བཏང་བའི“1+1+N”ཡི་ཞབས་ཞུའི་མ་ལག་ལས་ཁེ་ལས་གཉེར་བ་དང་ཁྲལ་དོན་ཐོ་འགོད་སོགས་ཞིབ་མཆན་འགོད་པའི་དོན་ཚན་ཁག་13“སྐར་ཁུང་གཅིག་ནས་ཀུན་སྒྲུབ”མངོན་འགྱུར་བྱུང་ཡོད།
ཉིང་ཁྲི་དཔལ་འབྱོར་གསར་སྤེལ་ཁུལ་གྱི་ཅིང་ཏུང་ཟོག་འགྲུལ་རིག་ནུས་མཛོད་ཁང་དུ་རང་འགུལ་འདྲེན་ཐག་སྐྱེལ་འདྲེན་རླངས་འཁོར་གྱིས་བོད་ཀྱི་ར་མོ་ཤག་ཆེན་དང་བེ་ཤ་སོགས་ཁྱད་ལྡན་ཐོན་རྫས་དབྱེ་གསེས་བྱས་ནས་རླངས་འཁོར་ནང་བླུག་བཞིན་འདུག “སྔོན་སྒྲུབ་མཛོད་ཀྱི་དཔེ་དབྱིབས་ལས་ཟོག་འགྲུལ་གྱི་ཕན་ནུས་40%མཐོ་རུ་ཕྱིན་སོང་ལ། ད་ལོའི་དྲ་ཚོང་གི་ཕྱིར་ཚོང་དངུལ་འབོར་སྒོར་ཁྲི་3500ལྷག་ཙམ་ཟིན་འདུག”ཅེས་ཟོག་འགྲུལ་གྱི་གཙོ་གཉེར་བ་བཀྲ་ཤིས་ཀྱིས་བཤད་པ་དང་། ཁོང་གིས“སྦྲག་སྲིད་དང་མྱུར་སྐྱེལ་མཉམ་ལས”ཀྱི་འདུ་འགོད་བརྒྱུད་ཉིང་ཁྲི་དཔལ་འབྱོར་གསར་སྤེལ་ཁུལ་གྱིས་གྲོང་ཚོ་ཡོངས་སུ་མྱུར་སྐྱེལ་ཁྱབ་ཐུབ་པ་བྱས་ཡོད་ལ་ཞིང་ལས་ཐོན་རྫས་བཙོངས་ཚད་སྒོར་དུང་ཕྱུར་3.4ཟིན་པར་སྐུལ་ཁྲིད་ཀྱང་བྱས་ཡོད་ཅེས་ངོ་སྤྲོད་བྱས།
བྱེད་ཐབས་རབ་དང་རིམ་པའི་སྐུལ་འདེད་འོག་ཁེ་ལས་ཀྱི་གཅིག་སྡུད་ཕན་ནུས་གང་མགྱོགས་མངོན་པ་དང་། གྲངས་གཞི་ལས་མངོན་པར། 2024ལོར་ཉིང་ཁྲི་དཔལ་འབྱོར་གསར་སྤེལ་ཁུལ་དུ་གཉེར་སྐྱོང་བྱེད་པོ་427མང་དུ་ཕྱིན་ནས་བཟོ་ལས་ཐོན་སྐྱེད་རིན་ཐང་བསྡོམས་འབོར་དུས་མཚུངས་ལས་179.95%འཕར་ཡོད་པ་རེད།
(《ཚན་རྩལ་ཉིན་རེའི་ཚགས་པར》ནས་བརྒྱུད་འགོད་བྱས་པ)