ཉེ་ཆར། སྣང་རྫོང་ཞིང་ལས་གྲོང་གསེབ་ཅུས་ཀྱིས་ཞིང་སྤྱོད་འགྱིག་ཤོག་གསར་པ་ཁྱབ་གདལ་གཏོང་བའི་བྱ་སྤྱོད་སྤེལ་ནས། རྫོང་དེ་ཡོངས་ཀྱི་ཞིང་དུད་ཚོར་ཚད་གཞི་མཐོ་བའི་འགྱིག་ཤོག་མཐུག་པོ་རིན་མེད་ངང་སྤྲད་པ་རེད།

དངོས་ཟོག་སྤྲོད་ཡུལ་དུ། གྲོང་ཚོ་ཁག་གི་འཐུས་མིས་གོ་རིམ་ལྡན་པའི་ངང་འགྱིག་ཤོག་ལེན་པའི་འགྲོ་ལུགས་བསྒྲུབས་ཤིང་། ཐེངས་འདིར་སྤྲད་པའི་འགྱིག་ཤོག་མཐུག་པོར་དྲོད་སྲུང་དང་བརླན་སྲུང་སོགས་ཀྱི་ནུས་པ་སྔར་བས་ཡག་པོ་ལྡན་པ་མ་ཟད། ད་དུང་འཕྲུལ་ཆས་ཅན་གྱི་ཕྱིར་བསྡུ་བྱེད་བདེ་པོ་ཡོད་པ་རེད། སྤྲོད་པའི་བརྒྱུད་རིམ་ཁྲོད། སྣང་རྫོང་ཞིང་ལས་གྲོང་གསེབ་ཅུས་ཀྱི་ལས་དོན་མི་སྣས་འགྱིག་ཤོག་ཚན་རིག་དང་མཐུན་པར་བེད་སྤྱོད་བྱེད་སྟངས་ཁྱབ་གདལ་བཏང་བ་དང་སྦྲགས། ད་དུང་ཞིང་དུད་ཁག་ལ་འགྱིག་ཤོག་ཡང་དག་པར་སྤྱོད་རྒྱུའི་མཛུབ་ཁྲིད་ཀྱང་བྱས་པ་རེད།

སྣང་རྫོང་ཞིང་ལས་གྲོང་གསེབ་ཅུས་ཁྱབ་གདལ་ས་ཚིགས་ཀྱི་ཀྲན་ཀྲང་སྤེན་པས་སྣང་རྫོང་ནི“འགྱིག་ཤོག་ཕྱིར་བསྡུ་ཚོད་ལྟའི་རྫོང་ཡིན་པས། འདི་ལོར་སྣང་རྫོང་གིས་སྲིད་གཞུང་གིས་ཁ་གསབ་དང་ཞིང་དུད་ཞུགས་རྒྱུ་ཟུང་དུ་སྦྲེལ་བའི་གདུབ་ཟུམ་མ་ལག་བཙུགས་ཏེ། ཞིང་དུད་ཚོར་འགྱིག་ཤོག་མཐུག་པོ་སྤྲད་ཡོད། རྗེས་སུ་གཅིག་གྱུར་ཐོག་བེད་མེད་འགྱིག་ཤོག་དེ་དག་ཕྱིར་བསྡུ་བྱས་ནས་གཙང་མ་བཟོ་གི་ཡིན”ཞེས་བཤད།

ཤེས་རྟོགས་བྱུང་བར་གཞིགས་ན། ཐེངས་འདིའི་ཚད་གཞི་མཐོ་བའི་འགྱིག་ཤོག་མཐུག་པོ་སྤྲོད་པའི་ལས་དོན་དེ་སྣང་རྫོང་གི་ཤང་དང་གྲོང་རྡལ་6དང་། གྲོང་ཚོ(གྲོང་ལྷན)52སུ་སྤེལ་ནས་ཞིང་དུད་3000ལྷག་ཙམ་ལ་ཕན་པ་ཐོབ་ཡོད་པ་རེད། དེ་ནི་དཔྱིད་རྨོད་ཐོན་སྐྱེད་འགན་ལེན་བྱེད་པའི་དངོས་སྒྲུབ་བྱེད་ཐབས་ཤིག་ཡིན་ལ། ཞིང་ལས་ཀྱི་ཕྱིའི་སྦགས་བཙོག་བཅོས་སྒྲིག་ལ་སྐུལ་འདེད་གཏོང་བའི་འགག་རྩའི་བྱ་སྤྱོད་ཅིག་ཀྱང་ཡིན་པ་རེད།