ཟླ་5ཚེས་13ཉིན་ཀྲུང་གོ—ལ་ཏིང་མེ་གླིང་དང་ཅ་ལེ་པི་རྒྱལ་ཁབ་གཅིག་མཐུན་ཚོགས་པའི་གླེང་སྟེགས་ཀྱི་པུའུ་ཀྲང་རིམ་པའི་ཚོགས་འདུ་སྐབས་བཞི་པ་པེ་ཅིང་དུ་འཚོགས་ཤིང་། ཀྲུའུ་ཞི་ཞི་ཅིན་ཕིང་ཚོགས་འདུའི་འགོ་ཚུགས་མཛད་སྒོར་ཞུགས་པ་དང་འབྲེལ་གསུང་བཤད་གལ་ཆེན་ཡང་གནང་སྟེ་ཀྲུང་གོ་ཕྱོགས་ཀྱིས་ལ་ཏིང་མེ་གླིང་དང་ལག་གདང་སྦྲེལ་ནས་འདུ་འགོད་ཆེན་པོ་ལྔ་སྤེལ་འགོ་བཙུགས་ཏེ། གོང་འཕེལ་དར་རྒྱས་མཉམ་དུ་དོན་གཉེར་དང་ཀྲུང་གོ་དང་ལ་ཏིང་མེ་གླིང་གི་ལས་དབང་གཅིག་མཐུན་ཚོགས་པ་མཉམ་སྐྲུན་གྱིས། ཀྲུང་གོ་དང་ལ་ཏིང་མེ་གླིང་དབར་གྱི་འབྲེལ་བའི་འབྱུང་འགྱུར་ལ་འཕེལ་རྒྱས་ཀྱི་འཆར་གཞི་འགོད་འདོད་ཡོད་ཅེས་གསུངས་པ་རེད།

ཚོགས་འདུའི་ཐོག《ཀྲུང་གོ—ལ་ཏིང་མེ་གླིང་གཅིག་མཐུན་ཚོགས་པའི་གླེང་སྟེགས་ཀྱི་པུའུ་ཀྲང་རིམ་པའི་ཚོགས་འདུ་སྐབས་བཞི་པའི་པེ་ཅིང་བསྒྲགས་གཏམ》(གཤམ་དུ《པེ་ཅིང་བསྒྲགས་གཏམ》ཞེས་བསྡུ་རྒྱུ)དང《ཀྲུང་གོ—ལ་ཏིང་མེ་གླིང་གཅིག་མཐུན་ཚོགས་པའི་ཁོངས་མིའི་རྒྱལ་ཁབ་ཀྱི་གཙོ་གནད་ཁྱབ་ཁོངས་མཉམ་ལས་ཀྱི་ཐུན་མོང་བྱ་སྤྱོད་འཆར་གཞིར(2025ནས་2027ལོའི་བར)》(གཤམ་དུ《ཐུན་མོང་གི་བྱ་སྤྱོད་འཆར་གཞི》ཞེས་བསྡུ་རྒྱུ)གྲོས་འཆམ་བྱུང་ཞིང་། ཕྱོགས་གཉིས་པོས་བཞག་པའི་ལོ་གསུམ་གྱི་མཉམ་ལས་རྣམ་གྲངས་ཁག་100ལྷག་ཙམ་ཟིན་གྱི་ཡོད། ཀྲུང་གོ་ཕྱོགས་ཀྱིས་ད་དུང་ལ་ཏིང་མེ་གླིང་གི་འཕེལ་རྒྱས་ལ་རྒྱབ་སྐྱོར་བྱེད་པའི་བྱེད་ཐབས་ཁག་20ཁྱབ་བསྒྲགས་བྱས་པ་རེད།

“ང་རང་ཀྲུའུ་ཞི་ཞི་ཅིན་ཕིང་གི་གཟིགས་རྒྱང་རིང་པོར་ཡིད་རང་ཆེན་པོ་སྐྱེས་བྱུང”

ད་ལོ་ཀྲུང་གོ་དང་ལ་ཏིང་མེ་གླིང་གླེང་སྟེགས་དངོས་སུ་སྤྱོད་འགོ་ཚུགས་ནས་ལོ་10འཁོར་ཞིང་། 2014ལོར་ཀྲུའུ་ཞི་ཞི་ཅིན་ཕིང་གིས་པ་ཞི་ལི་ཡར་ཀྲུང་གོ—ལ་ཏིང་མེ་གླིང་དང་ཅ་ལེ་པི་རྒྱལ་ཁབ་ཀྱི་འགོ་ཁྲིད་པའི་ཞལ་འཛོམས་ནང་ཞུགས་སྐབས། ཀྲུང་གོ་དང་ལ་ཏིང་མེ་གླིང་ལས་དབང་གཅིག་མཐུན་ཚོགས་པ་འཛུགས་རྒྱུའི་གྲོས་འགོ་གལ་ཆེན་བཏོན་གནང་བ་དང་ལ་ཏིང་མེ་གླིང་ཕྱོགས་ཀྱི་འགོ་ཁྲིད་པ་དང་མཉམ་དུ་ཀྲུང་གོ་དང་ལ་ཏིང་མེ་གླིང་གླེང་སྟེགས་འཛུགས་རྒྱུའི་ཐུགས་ཐག་བཅད་གནང་བ་རེད། 2015ལོར་ཀྲུའུ་ཞི་ཞི་ཅིན་ཕིང་པེ་ཅིང་དུ་ཀྲུང་གོ་དང་ལ་ཏིང་མེ་གླིང་གླེང་སྟེགས་ཀྱི་པུའུ་ཀྲང་རིམ་པའི་ཚོགས་འདུ་སྐབས་དང་པོའི་འགོ་ཚུགས་མཛད་སྒོར་ཞུགས་ནས་ཀྲུང་གོ་དང་ལ་ཏིང་མེ་གླིང་གླེང་སྟེགས་བཙུགས་པ་ཁྱབ་བསྒྲགས་གནང་ཡོད། ལོ་10ཡི་རིང་རྒྱལ་ཁབ་ཀྱི་གཙོ་བདག་ཕྱི་འབྲེལ་གྱི་འཐབ་ཇུས་སྣེ་ཁྲིད་དང་ཕྱོགས་གཉིས་པོའི་སྐྱེད་སྲིང་ཞིབ་ཚགས་འོག་ཀྲུང་གོ་དང་ལ་ཏིང་མེ་གླིང་གླེང་སྟེགས་ལ་འཕེལ་རྒྱས་ཆེན་པོ་བྱུང་ནས་ཀྲུང་གོ་དང་ལ་ཏིང་མེ་གླིང་དབར་གྱི་འབྲེལ་བ་མགྱོགས་མྱུར་འཕེལ་རྒྱས་འགྲོ་བར་སྐུལ་འདེད་བཏང་ཡོད་པ་རེད།

གསར་སྤེལ་དངུལ་ཁང་གསར་པའི་ཧང་ཀྲང་ལུའོ་སའེ་ཧྥུའུ་ཡིས“ང་རང་ཀྲུའུ་ཞི་ཞི་ཅིན་ཕིང་གི་གཟིགས་རྒྱང་རིང་པོར་ཡིད་རང་ཆེན་པོ་སྐྱེས་བྱུང”ཀྲུའུ་ཞི་ཞི་ཅིན་ཕིང་གིས་ཐོག་མཐའ་བར་གསུམ་དུ་གླེང་མོལ་དང་། མཉམ་ལས། ཕྱོགས་མང་རིང་ལུགས་ལ་གཞིགས་པའི་རྒྱལ་སྤྱིའི་སྒྲིག་ལམ་བཅས་དར་སྤེལ་གཏོང་གི་ཡོད། ལ་ཏིང་མེ་གླིང་དང་ཀྲུང་གོའི་གླེང་སྟེགས་སྤྱོད་འགོ་ཚུགས་ཚུན། ལ་ཏིང་མེ་གླིང་དང་ཀྲུང་གོའི་ཁྱབ་ཁོངས་ཁག་གི་མཉམ་ལས་རྒྱུན་ཆད་མེད་པར་རྒྱ་ཆེར་ཕྱིན་ནས་ཕྱོགས་གཉིས་པོའི་མི་དམངས་ལ་དངོས་དངོས་རྗེན་རྗེན་གྱི་ཕན་པ་ཐོབ་པ་མ་ཟད། ལྷོ་ལྷོ་མཉམ་ལས་ཀྱི་དཔེ་མཚོན་ཡང་བཏོད་ཡོད་ཅེས་གསུངས།

ལོ་10ཡི་རིང་ཀྲུང་གོ་དང་ལ་ཏིང་མེ་གླིང་གླེང་སྟེགས་ཀྱིས་པུའུ་ཀྲང་རིམ་པའི་ཚོགས་འདུ་དང་། ཀྲུང་གོ—ལ་ཏིང་མེ་གླིང་གི་གཅིག་མཐུན་ཚོགས་པའི“སྒུལ་ཤུགས་ཆེན་པོ་བཞིའི”ཕྱི་འབྲེལ་པུའུ་ཀྲང་གི་གླེང་མོལ། རྒྱལ་ཁབ་ཀྱི་མཐུན་སྦྱོར་པའི་ཚོགས་འདུ་སོགས་ལམ་སྲོལ་བཙུགས་པ་དང་། པུའུ་ཀྲང་རིམ་པའི་ཚོགས་འདུ་སྐབས་བཞི་པ་དང་དེ་བཞིན་མངའ་ཁོངས་ཡན་ལག་གླེང་སྟེགས་31ཚུད་པའི་བྱེད་སྒོ་བརྒྱ་ལྷག་ཙམ་སྤེལ་བ། ཀྲུང་གོ་དང་ལ་ཏིང་མེ་གླིང་སྤྱི་ཡོངས་མཉམ་ལས་ཀྱི་ཐབས་ལམ་གཙོ་བོ་ཞིག་བཏོད་ཡོད་པ་རེད།

“ཀྲུང་གོས་ཐོག་མཐའ་བར་གསུམ་དུ་ལ་ཏིང་མེ་གླིང་གི་སྐད་སྒྲ་ཉན་འདོད་བྱེད་ཀྱི་ཡོད”

སྐབས་འདིའི་ཚོགས་འདུའི་རིང་ཀྲུང་གོ་ཕྱོགས་ཀྱིས་ལ་ཏིང་མེ་གླིང་ཕྱོགས་དང་ལག་གདང་སྦྲེལ་ནས“མཐུན་སྒྲིལ་གྱི་འདུ་འགོད”དང་། “འཕེལ་རྒྱས་ཀྱི་འདུ་འགོད” “ཤེས་དཔལ་གྱི་འདུ་འགོད” “ཞི་བདེའི་འདུ་འགོད”“དམངས་སེམས་འདུ་འགོད”བཅས་འདུ་འགོད་ཆེན་པོ་ལྔ་སྤེལ་འགོ་བཙུགས་ནས་གོ་ལ་ཧྲིལ་པོའི་གྲོས་འགོ་ཆེན་པོ་གསུམ་ཐུན་མོང་ཐོག་དོན་འཁྱོལ་བྱེད་འདོད་ཡོད་ཅེས་ཁྱབ་བསྒྲགས་བྱས། ཚོགས་འདུའི་ཐོག་གྲུབ་འབྲས་ཡིག་ཆ་མང་པོར་གྲོས་འཆམ་བྱུང་ཞིང་། དེའི་ནང་ཚན་རྩལ་གསར་གཏོད་དང་། དཔལ་འབྱོར་ཚོང་དོན་མ་འཇོག མི་ཐབས་རིག་ནུས། དངུལ་རྩ། རྨང་གཞིའི་སྒྲིག་བཀོད། ཞིང་ལས་འབྲུ་རིགས། བཟོ་ལས་དང་ཆ་འཕྲིན་ཅན། ནུས་རྒྱུ་དང་གཏེར་ཐོན་དེ་བཞིན“རྒྱུད་གཅིག་ལམ་གཅིག”མཉམ་སྐྲུན་སོགས་ཁྱབ་ཁོངས་ཐད་ཀྱི་ཕྱོགས་གཉིས་པོའི་མཉམ་ལས་ཀྱི་ཞིབ་ཕྲའི་བྱེད་ཐབས་ཚུད་ཡོད་པ་དང་། དེས་ཞི་བདེ་དོན་གཉེར་དང་། འཕེལ་རྒྱས་ཇུས་འགོད། མཉམ་ལས་ལ་སྐུལ་གཏོང་བཅས་ཐད་ཀྱི་ཀྲུང་གོ་དང་ལ་ཏིང་མེ་གླིང་གི་ཆོད་སེམས་བརྟན་པོ་གང་ལེགས་མངོན་ཏེ་ཀྲུང་གོ་དང་ལ་ཏིང་མེ་གླིང་མཉམ་ལས་ལ་སྒུལ་ཤུགས་ཆེན་པོ་བསྣན་ཡོད་པ་རེད།

“ཀྲུང་གོས་ཐོག་མཐའ་བར་གསུམ་དུ་ལ་ཏིང་མེ་གླིང་གི་སྐད་སྒྲ་ཉན་འདོད་ཡོད”ཀྲུང་གོ་ཕྱོགས་ཀྱིས་སྤེལ་འགོ་ཚུགས་པ་ཁྱབ་བསྒྲགས་བྱས་པའི་འདུ་འགོད་ཆེན་པོ་ལྔ་ནི་ལ་ཏིང་མེ་གླིང་དང་ཀྲུང་གོའི་མཉམ་ལས་ལ་སྐུལ་འདེད་གཏོང་བའི་དངོས་སྒྲུབ་ཀྱི་བྱེད་ཐབས་ཤིག་ཡིན། དེ་ཐུན་མོང་གི་ཁེ་ཕན་དང་མཐུན་ལ་དངོས་སྒྲུབ་ཀྱི་དགོས་མཁོར་ཡང་འཚམ་ཞིང་། དེ་ནི་ལ་ཏིང་མེ་གླིང་དང་ཀྲུང་གོའི་མཉམ་ལས་ཀྱི་གསོན་ཤུགས་རྒྱས་ས་ཡིན། “ཀྲུང་གོས་ཐོག་མཐའ་བར་གསུམ་དུ་ལ་ཏིང་མེ་གླིང་གི་དོན་དངོས་ཀྱི་དགོས་མཁོར་གཞི་བཙུགས་ནས་མཉམ་ལས་རྣམ་གྲངས་དོན་འཁྱོལ་ཐུབ་པར་སྐུལ་འདེད་བཏང་སྟེ། ལ་ཏིང་མེ་གླིང་གི་ས་ཁུལ་འཕེལ་རྒྱས་ལ་སྒུལ་ཤུགས་བསྣན་ཡོད”ཅེས་མོ་ཞི་ཁོ་རྒྱལ་སྤྱིའི་ཆབ་སྲིད་རིགས་གཅིག་མཁས་ཅན་ཧོ་ལར་ཏུའོ·ཐོ་ལེ་སི·པར་ཏེ་སིས་བརྗོད།

“གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཀྱི་སྐད་ཆ་ཤོད་དབང་དང་ཤུགས་རྐྱེན་ཐེབས་ནུས་ཆེ་རུ་གཏོང་བར་ཕན་པ་ཡོད”

མིག་སྔར། འཛམ་གླིང་གི་ལོ་བརྒྱའི་འཕོ་འགྱུར་མགྱོགས་མྱུར་བྱུང་བཞིན་ཡོད་པ་དང་ཉེན་ཁ་མང་པོ་མཉམ་དུ་གནས་ཡོད། རྒྱལ་ཁབ་ཁག་གིས་མཐུན་སྒྲིལ་རོགས་ལས་བྱས་ན་གཞི་ནས་འཛམ་གླིང་ཞི་བདེ་དང་བརྟན་ལྷིང་སྲུང་སྐྱོང་ཐུབ་པ་དང་། གོ་ལ་ཧྲིལ་པོའི་འཕེལ་རྒྱས་དང་དར་རྒྱས་ལ་སྐུལ་འདེད་གཏོང་ཐུབ། ཀྲུང་གོ་དང་ལ་ཏིང་མེ་གླིང་ནི་གོ་ལ་ཧྲིལ་པོའི་ལྷོ་ཕྱོགས་ཀྱི་གལ་ཆེའི་ཁོངས་མི་ཡིན་པའི་ངོས་ནས་ཀྲུང་གོ་དང་ལ་ཏིང་མེ་གླིང་ཕྱོགས་གཉིས་ཀྱིས་མཉམ་ལས་ལ་ཤུགས་སྣོན་བརྒྱབ་སྟེ་གོ་ལ་ཧྲིལ་པོའི་ལྷོ་ཕྱོགས་མཐུན་སྒྲིལ་རང་སྟོབས་ཀྱི་དུས་རབས་ཀྱི་སྐད་སྒྲ་ཆེན་པོ་སྒྲོག་པ་དེ། སྣ་མང་ཅན་གྱི་འཕེལ་ཕྱོགས་ཆེན་པོ་དང་མཐུན། དེ་ལས་ཀྲུང་གོ་དང་ལ་ཏིང་མེ་གླིང་གི་འབྲེལ་བ་འཕེལ་རྒྱས་འགྲོ་བར་གོ་དོན་གསར་པ་བསྣན་པ་མ་ཟད། རྒྱལ་སྤྱིའི་སྒྲིག་སྲོལ་སྔར་བས་འདྲ་མཉམ་དང་དྲང་གཞག་གི་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་གཏོང་ཆེད་ལེགས་སྐྱེས་གསར་པ་ཕུལ་ཡོད།

“ཀྲུང་གོས་གོ་ལ་ཧྲིལ་པོའི་མཉམ་ལས་ཁྲོད་སྣེ་ཁྲིད་ཀྱི་ནུས་པ་གལ་ཆེན་བཏོན་ཡོད”ཀྲུང་གོ་ནི་མཛའ་གྲོགས་རྒྱལ་ཁབ་ཅིག་ཡིན་པས་ཐོག་མཐའ་བར་གསུམ་དུ་ལ་ཏིང་མེ་གླིང་དང་ཅ་ལེ་པི་རྒྱལ་ཁབ་དང་འདྲ་མཉམ་གྱི་ལྟ་སྟངས་འཛིན་པ་དང་ཀྲུང་གོ་དང་མཉམ་ལས་བྱས་ན་ལ་ཏིང་མེ་གླིང་དང་ཅ་ལེ་པི་རྒྱལ་ཁབ་འཕེལ་རྒྱས་དང་དར་རྒྱས་ཡོང་ཐུབ། ནི་ཁ་ར་ཀྭ་ཕྱོགས་ཀྱིས《པེ་ཅིང་བསྒྲགས་གཏམ》དང《ཐུན་མོང་བྱ་སྤྱོད་འཆར་གཞི》ལ་བློ་བརྟན་འགྱུར་མེད་ངང་རྒྱབ་སྐྱོར་བྱས་ཏེ། ལ་ཏིང་མེ་གླིང་དང་ཀྲུང་གོའི་ལས་དབང་གཅིག་མཐུན་ཚོགས་པ་མཉམ་སྐྲུན་ནང་ཧུར་ཐག་ཞུགས་ཡོད”ཅེས་ནི་ཁ་ར་ཀྭའི་ཙུང་ཐུང་དང་རྒྱལ་སྤྱིའི་མཉམ་ལས་བློ་འདོན་པ་ལའོ་ལེ་ཡ་ནུའོ་ཡིས་བརྗོད།