ཟླ་4ཚེས་24ཉིན་གྱི་ཕྱི་དྲོར། རྒྱལ་སྲུང་པུས་གསར་འགོད་པའི་འཆར་ཅན་ཚོགས་འདུ་འཚོགས་པ་དང་། རྒྱལ་སྲུང་པུའི་གསར་འགྱུར་མགྲིན་ཚབ་པ་ཏཱ་ཞའོ་དམག་དཔོན་ཆེ་མོ་ཀྲང་ཞའོ་ཀང་གིས་གསར་འགོད་པའི་དྲི་བར་ལན་བཏབ་པ་རེད།

གསར་འགོད་པ་ཞིག་གིས། འདི་ལོ་ནི་ཀྲུང་གོའི་དམག་དཔུང་མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་སྐྱོང་བྱ་སྤྱོད་ལ་ཞུགས་ནས་ལོ་35འཁོར་བའི་ལོ་ཞིག་རེད། ཀྲུང་གོའི་དམག་དཔུང་གིས་1990ལོའི་ཟླ་4པར་དམག་དོན་ལྟ་ཞིབ་པ་ཐེངས་དང་པོ་བཏང་བ་དང་། ད་ཆ་མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་སྐྱོང་བྱ་སྤྱོད་ཀྱི་འགག་རྩའི་སྟོབས་ཤུགས་སུ་གྱུར་ཡོད། མགྲིན་ཚབ་པས་ཀྲུང་གོའི་དམག་དཔུང་མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་སྐྱོང་བྱ་སྤྱོད་ལ་ཞུགས་པའི་གནས་ཚུལ་ངོ་སྤྲོད་གནང་རོགས་ཞེས་བརྗོད།

ཀྲང་ཞའོ་ཀང་གིས། ཀྲུང་གོའི་དམག་དཔུང་མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་སྐྱོང་བྱ་སྤྱོད་ལ་ཞུགས་ནས་ལོ་35སོང་རིང་། ཞི་བདེ་སྲུང་སྐྱོང་བྱ་སྤྱོད་ཁག་25ལག་བསྟར་བྱས་པ་དང་། ཞི་བདེ་སྲུང་སྐྱོང་དཔོན་དམག་མི་ཐེངས་ཁྲི་5ལྷག་ཙམ་ཁོང་ཀོ(ཅིན)དང་། ལེ་པ་ནོན། ལྷོ་སུའུ་ཏན་སོགས་རྒྱལ་ཁབ་དང་ས་ཁུལ་20ལྷག་ཙམ་དུ་ས་འོག་གི་འབར་རྡེལ་སེལ་བ་དང་། སྨན་བཅོས་རོགས་སྐྱོབ། ཉེན་ཟོན་སྲུང་སྐྱོང་། མི་སེར་དཀྱུས་མར་སྲུང་སྐྱོབ་སོགས་ཀྱི་ལས་འགན་སྒྲུབ་པར་བཏང་ཞིང་། ལིའུ་མིང་ཧྥང་དང་། ཏུའུ་ཀྲའོ་ཡུས། ཧྲེན་ལེའང་ལེའང་སོགས་དཔོན་དམག་17གྱིས་སྔ་རྗེས་སུ་མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་སྐྱོང་བྱ་གཞག་ལ་རྩ་ཆེའི་ཚེ་སྲོག་ལེགས་སྐྱེས་ཕུལ་ཡོད། ད་ཆ། ཀྲུང་གོའི་ཞི་བདེ་སྲུང་སྐྱོང་དཔོན་དམག་1800ཙམ་གྱིས་མཉམ་འབྲེལ་རྒྱལ་ཚོགས་ཀྱི་ལས་འགན་སྒྲུབ་ཁུལ་7དང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་པུའུ་རུ་ལས་འགན་སྒྲུབ་བཞིན་ཡོད། ཀྲུང་གོའི་དམག་དཔུང་གིས་མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་སྐྱོང་བྱ་སྤྱོད་ཀྱི་ཕྱོགས་གང་ས་ཅི་ཐད་ལ་མུ་མཐུད་ཧུར་ཐག་བཞུགས་ནས་གོ་ལ་ཧྲིལ་པོའི་བདེ་འཇགས་གྲོས་འགོ་ལག་ལེན་ཧུར་ཐག་བསྟར་བ་དང་། མིའི་རིགས་ཀྱི་ལས་དབང་གཅིག་མཐུན་ཚོགས་པ་གཏོད་པར་ཞབས་འདེགས་ཞུ་ཆེད་སྟོབས་ཤུགས་དེ་བས་མང་བ་ལེགས་སྐྱེས་འབུལ་གྱི་ཡིན་ཞེས་ངོ་སྤྲོད་བྱས་པ་རེད།

གཞན་ཡང་། ཀྲང་ཞའོ་ཀང་གིས་གསར་འགོད་པའི་འབྲེལ་ཡོད་དྲི་བར་ལན་རྒྱག་སྐབས། རྒྱལ་ཁབ་དབར་དམག་དོན་མཉམ་ལས་བྱེད་སྐབས་ཕྱོགས་གསུམ་པར་དམིགས་གཏད་བྱེད་པའམ་ཡང་ན་ཕྱོགས་གསུམ་པའི་ཁེ་ཕན་ལ་གནོད་འཚེ་གཏོང་མི་ཆོག་ལ། ས་ཁུལ་གྱི་ཞི་བདེ་བརྟན་ལྷིང་ལ་གནོད་འཚེ་དེ་བས་ཀྱང་གཏོང་མི་ཆོག རྒྱལ་ཁབ་གང་རུང་ཞིག་གིས་ཐའེ་དབན་གྱི་གནད་དོན་ལ་ཁ་གཡར་ནས་ས་ཁུལ་གྱི་དམག་དོན་བཀོད་སྒྲིག་བྱེད་ཤུགས་ཆེ་རུ་གཏོང་བ་དང་ཛ་དྲག་འགྲན་རྒོལ་གྱི་འཁྲུག་རྐྱེན་སློང་བར་ངོ་རྒོལ་མཐའ་གཅིག་ཏུ་བྱེད་ཀྱི་ཡིན། གནས་ཚུལ་ཅི་ཞིག་འཕྲད་རུང་ཀྲུང་གོ་ཕྱོགས་ཀྱིས་རང་ཉིད་ཀྱི་མངའ་ཁོངས་བདག་དབང་དང་རྒྱ་མཚོའི་ཁེ་དབང་བློ་བརྟན་འགྱུར་མེད་ངང་སྲུང་སྐྱོང་བྱས་ཏེ། ས་ཁུལ་གྱི་ཞི་བདེ་བརྟན་ལྷིང་སྲུང་སྐྱོང་ནུས་ལྡན་བྱེད་ཀྱི་ཡིན་ཞེས་བརྗོད་པ་རེད།