རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གི་གདན་ཞུས་ལྟར་ཁེན་ནི་ཡའི་ཙུང་ཐུང་ལུའུ་ཐུའོ་ཡིས་ཟླ་4ཚེས་22ནས་26ཉིན་བར་ཀྲུང་གོར་རྒྱལ་དོན་འཚམས་འདྲི་གནང་རྒྱུ་རེད། ཙུང་ཐུང་ལུའུ་ཐུའོ་ཡིས་ཀྲུང་གོར་འཚམས་འདྲི་མ་གནང་གོང་། འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་གནང་སྐབས། ཁེན་ཀྲུང་མཛའ་གྲོགས་ལ་ལོ་རྒྱུས་ཡུན་རིང་ལྡན་པ་དང་། རིམ་པ་ཁག་གི་འགྲོ་འོང་ཟབ་པ། “རྒྱུད་གཅིག་ལམ་གཅིག”མཉམ་སྐྲུན་ལ་གཡུར་ཟའི་གྲུབ་འབྲས་ཐོབ་པ་བཅས་རྒྱལ་ཁབ་གཉིས་པོའི་མཉམ་ལས་ལ་མདུན་ལམ་ཆེན་པོ་ལྡན་ཡོད། ད་ཐེངས་ཀྱི་འཚམས་འདྲི་བྱས་ནས་རྒྱལ་ཁབ་གཉིས་ཀྱི་འབྲེལ་བ་མུ་མཐུད་ཟབ་ཏུ་འགྲོ་བ་དང་གཉིས་ཁེ་གཉིས་ཕན་གྱི་མཉམ་ལས་དེ་བས་མང་བ་སྤེལ་རྒྱུའི་རེ་བ་ཡོད་ཅེས་གསུངས།

ལུའུ་ཐུའོ་ཡིས་ཁེན་ཀྲུང་དབར་ཕྱི་འབྲེལ་བཙུགས་ནས་ལོ་60ལྷག་ཙམ་སོང་རིང་། རྒྱལ་ཁབ་གཉིས་པོའི་སྲིད་གཞུང་དང་། གྲོས་ཚོགས། སྲིད་ཏང་། དམངས་ཁྲོད་སོགས་རིམ་ཁག་འགྲོ་འོང་ཟབ་མོ་ཡོད། 2017ལོར་རྒྱལ་ཁབ་གཉིས་པོས་ཕྱོགས་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བ་བཙུགས་ཤིང་། “ད་ཐེངས་ཀྱི་བརྒྱུད་རིམ་ཁྲོད་ཁེན་ཀྲུང་གིས་མཉམ་དུ་མདུན་སྐྱོད་བྱས་ཏེ་ཕྱོགས་གཉིས་ཀར་གྲུབ་འབྲས་ཐོབ་པར་བྱས་ཡོད་ལ། ལྷག་པར་དུ་འཕེལ་རྒྱས་མཉམ་ལས་ཐད་རྣམ་གྲངས་མང་པོ་ལག་བསྟར་ཡང་བྱས་ཡོད” ལུའུ་ཐུའོ་ཡིས“ད་ཐེངས་ཀྱི་འཚམས་འདྲི་བྱེད་རིང་ང་ལ་ཀྲུའུ་ཞི་ཞི་ཅིན་ཕིང་དང་ལྷན་དུ་རྒྱལ་ཁབ་གཉིས་པོའི་སྲིད་གཞུང་དང་མི་དམངས་ཀྱིས་ཐུན་མོང་ཐོག་དོ་ཁུར་བྱེད་པའི་བྱ་བར་སྤེལ་རེས་བྱེད་པའི་གོ་སྐབས་ཐོབ་རྒྱུ་རེད། ཁེན་ཀྲུང་མཉམ་ལས་རྒྱུན་ཆད་མེད་པར་རྒྱ་ཆེར་གཏོང་བ་དང་རྒྱལ་ཁབ་གཉིས་པོའི་མི་དམངས་ལ་དེའི་ཁྲོད་ནས་ཕན་པ་ཐོབ་རྒྱུ་རེད”ཅེས་གསུངས།

ལུའུ་ཐུའོ་ཡིས་ཁེན་ནི་ཡས་ཀྲུང་གོ་ཕྱོགས་དང་མུ་མཐུད་མཉམ་ལས་བྱས་ནས་ཚད་ལྡན་ལྕགས་ལམ་སྣུར་སྲིང་བྱས་ཏེ། ཁེན་ནི་ཡ་དང་ཨ་ཧྥེ་རི་ཁའི་རྒྱལ་ཁབ་གཞན་དག་དང་ཐ་ན་འཛམ་གླིང་གི་རྒྱལ་ཁབ་དང་ས་ཁུལ་དེ་བས་མང་བའི་ཚོང་དོན་འགྲོ་འོང་ལ་སྐུལ་འདེད་གཏོང་རྒྱུའི་རེ་བ་ཡོད་ཅེས་གསུངས་ཤིང་། ཁོང་གིས་ཀྲུང་གོའི་ཁེ་ལས་དེ་བས་མང་བ་ཁེན་ནི་ཡར་མ་འཇོག་བྱས་ནས་རྨང་གཞིའི་སྒྲིག་བཀོད་ཀྱི་མཉམ་ལས་རྒྱ་ཆེར་གཏོང་ཐབས་འཚོལ་ཞིབ་བྱས་ཏེ“རྒྱུད་གཅིག་ལམ་གཅིག”མཉམ་སྐྲུན་མཉམ་ལས་ཀྱི་མི་མངོན་པའི་སྟོབས་ཤུགས་སྔར་བས་སྔོག་འདོན་བྱ་རྒྱུའི་རེ་བ་ཡོད་ཅེས་གསུངས།

ལུའུ་ཐུའོ་ཡིས་ཁེན་ནི་ཡ་ཕྱོགས་ཀྱིས་ཀྲུང་གོ་ཕྱོགས་ཀྱི་ལག་རྩལ་དང་མ་དངུལ་གྱི་རྒྱབ་སྐྱོར་ལ་བརྟེན་ནས་བཟོ་སྐྲུན་ལས་རིགས་འཕེལ་རྒྱས་ཤུགས་ཆེན་གཏོང་རྒྱུ་ཡིན། “ཀྲུང་གོའི་ཉི་ནུས་གློག་རྫས་དང་གློག་སྒུལ་རླངས་འཁོར་གྱི་གློག་རྫས་སོགས་འབྲེལ་ཡོད་ལག་རྩལ་གྱི་ཁྱབ་ཁོངས་ལ་གཡུར་ཟའི་གྲུབ་འབྲས་ཐོབ་ཡོད”ཅེས་གསུངས་ཤིང་། ཁོང་གིས་ཁེན་ནི་ཡར་བསྐྱར་སྐྱེས་ཐུབ་པའི་ནུས་རྒྱུ་ཕུན་སུམ་ཚོགས་པོ་ཡོད་པས་2030ལོར་སླེབས་སྐབས་100%ཡི་ནུས་རྒྱུ་གཙང་མའི་གློག་གཏོང་ཐུབ་རྒྱུའི་བརྩོན་ལེན་བྱེད་ཀྱི་ཡོད། ཀྲུང་གོའི་ལྗང་མདོག་ནུས་རྒྱུའི་ལག་རྩལ་སྔོན་ཐོན་ཡིན་པས་ཕྱོགས་གཉིས་པོར་ལྗང་མདོག་མཉམ་ལས་ཀྱི་མི་མངོན་པའི་སྟོབས་ཤུགས་ཆེན་པོ་ལྡན་ཡོད་ཅེས་གསུངས། ཁོང་གིས་ཁེན་ནི་ཡ་ཕྱོགས་ཀྱིས་ཀྲུང་གོའི་གློག་སྒུལ་རླངས་འཁོར་ཁེ་ལས་སོགས་ནུས་རྒྱུ་གསར་པའི་ཁྱབ་ཁོངས་ཀྱི་ཁེ་ལས་དང་མཉམ་ལས་བྱས་ཏེ་ཁེན་ནི་ཡའི་བཟོ་སྐྲུན་ནུས་པ་ཆེ་རུ་བཏང་ནས་ལྗང་མདོག་མཉམ་ལས་ལ་གྲུབ་འབྲས་དེ་བས་མང་བ་ཐོབ་རྒྱུའི་རེ་བ་ཡོད་ཅེས་གསུངས།

“ཁེན་ནི་ཡ་དང་ཀྲུང་གོ་དང་། ཨ་ཧྥེ་རི་ཁ་དང་ཀྲུང་གོའི་མཉམ་ལས་ནི་ལྷོ་ལྷོ་མཉམ་ལས་ཀྱི་གྲུབ་ཆ་གལ་ཆེན་ཞིག་ཡིན། ལྷོ་ལྷོ་མཉམ་ལས་ཀྱི་མི་མངོན་པའི་སྟོབས་ཤུགས་རྒྱུན་ཆད་མེད་པར་ཆེ་རུ་འགྲོ་བ་དང་སྒུལ་ཤུགས་ཀྱང་རྒྱུན་ཆད་མེད་པར་ཆེ་རུ་འགྲོ་བཞིན་ཡོད”ལུའུ་ཐུའོ་ཡིས། ཁེན་ནི་ཡ་ཕྱོགས་ཀྱིས་འབོ་གསེར་རྒྱལ་ཁབ་ཀྱི་མཉམ་ལས་ལམ་སྲོལ་ནང་ཞུགས་རྒྱུར་ཚོད་སྐོར་བྱེད་བཞིན་ཡོད། སྣེ་མང་ཅན་གྱི་འཛམ་གླིང་ཁྲོད་ཁེན་ནི་ཡས་མཉམ་ལས་རོགས་ཟླ་དེ་བས་མང་བ་འཚོལ་རྒྱུར་གཞོལ་ནས་ཕྱོགས་མང་མཉམ་ལས་འཚོལ་ཞིབ་བྱས་ཏེ། ཁེན་ནི་ཡའི་ཐོན་རྫས་ཕྱིར་གཏོང་ལ་གོ་སྐབས་གཏོད་རྒྱུ་ཡིན་ལ། ལག་རྩལ་ཁྱབ་ཁོངས་ཀྱི་མཉམ་ལས་ལ་སྐུལ་འདེད་བཏང་ནས་གཉིས་ཕན་ཡོང་བར་བྱ་རྒྱུ་ཡིན་ཞེས་གསུངས་པ་རེད།

(འདི་ག་ཚགས་པར་ཁང་དུ་གྲོང་ཁྱེར་ནེ་རོ་པི་ནས་ཟླ་4ཚེས་21ཉིན་འབྱོར་བའི་གློག་འཕྲིན)