ཉེ་ཆར། ཀོང་ཀྲོའུ་གྲོང་ཁྱེར་ཀོང་ཀྲོའུ་ཚོང་འདུས་ཚོམས་ཆེན་དུ་ཕྱི་ཕྱོགས་ཚོང་དོན་གྱི་སྤུས་ལེགས་ཐོན་རྫས་དང་རྒྱལ་ནང་གི་ཉོ་སྒྲུབ་ཚོང་པའི་དབར་གྱི་འབྲེལ་མཐུད་ཀྱི་ཚོགས་འདུ་ཞིག་འཚོགས་ཤིང་། བྱེད་སྒོ་དེ་ཀོང་ཏུང་ཞིང་ཆེན་མི་དམངས་སྲིད་གཞུང་གིས་གཙོ་གཉེར་བྱས་པ་དང་ཀོང་ཏུང་ཞིང་ཆེན་ཚོང་དོན་ཐིང་དང་ཀོང་ཀྲོའུ་གྲོང་ཁྱེར་མི་དམངས་སྲིད་གཞུང་གིས་གཉེར་འགན་འཁུར་ཡོད། ཕྱི་ནང་ཚོང་དོན་གཞི་གཅིག་ཅན་དང་ནང་མཁོའི་སྒུལ་ནུས་གསར་པ་འཕེལ་བར་བྱ་རྒྱུ་དམིགས་ཚད་དུ་བྱས་ཏེ། སྤུས་ལེགས་ཀྱི་ཕྱི་ཕྱོགས་ཚོང་དོན་ཁེ་ལས་300ལྷག་ཙམ་དང་རྒྱལ་ནང་གི་ཉོ་སྒྲུབ་ཚོང་པ་360མཉམ་དུ་འཛོམས་ཤིང་། སྲིད་ཇུས་ཀྱིས་མཐུན་རྐྱེན་སྦྱོར་བ་དང་གནད་སྨིན་འབྲེལ་མཐུད་སོགས་བྱེད་ཐབས་མང་པོ་བརྒྱུད་ཕྱི་ཕྱོགས་ཚོང་དོན་ཁེ་ལས་ལ་ནང་འཚོང་རྒྱ་སྐྱེད་ཀྱི་ལས་སྟེགས་བསྐྲུན་ནས་འཛད་སྤྱོད་རིམ་སྤོར་དང་རྒྱལ་ནང་དང་རྒྱལ་སྤྱིའི་འཁོར་རྒྱུག་གཉིས་ལྡན་ཕན་ཚུན་སྐུལ་འདེད་གཏོང་བར་གཞོགས་འདེགས་བྱས་ཡོད། ས་ཡུལ་དངོས་སུ་ཕྱི་ཕྱོགས་ཚོང་དོན་ཁེ་ལས་མང་པོ་དང་ཉོ་སྒྲུབ་ཚོང་པའི་དབར་འདོད་མཐུན་མཉམ་ལས་གྲོས་མཐུན་བཞག་ནས་འདོད་མཐུན་ཚོང་འགྲིག་དངུལ་གྲངས་བསྡོམས་འབོར་སྒོར་དུང་ཕྱུར་6.8ལས་བརྒལ་ཡོད།

ད་ཐེངས་ཀྱི་བྱེད་སྒོ་དེ“ཕྱི་ཕྱོགས་ཚོང་དོན་གྱི་སྤུས་ལེགས་ཐོན་རྫས་ཀྱི་ཀྲུང་ཧྭའི་བྱ་སྤྱོད”ཀྱི་རྒྱལ་ཡོངས་ཀྱི་རིམ་སྤེལ་བྱེད་སྒོའི་ས་གནས་ས་ཚིགས་གལ་ཆེན་ཞིག་ཡིན་པའི་ངོས་ནས་ཀོང་ཏུང་ཞིང་ཆེན་གྱིས་ཕྱི་ནང་ཚོང་དོན་གཞི་གཅིག་ཅན་གྱི་འཕེལ་རྒྱས་ལ་སྐུལ་འདེད་གཏོང་བའི་བྱེད་ཐབས་གལ་ཆེན་ཞིག་ཡིན་ལ། ནང་མཁོའི་མི་མངོན་པའི་སྟོབས་ཤུགས་འཕེལ་བ་དང་། སྤུས་ཚད་མཐོ་བའི་ཕྱི་ཕྱོགས་ཚོང་དོན་གྱི་ཐོན་རྫས་རྒྱལ་ནང་གི་ཁྲོམ་རར་མཁོ་སྤྲོད་བྱེད་པར་སྐུལ་འདེད་གཏོང་བ། འཛད་སྤྱོད་རིམ་སྤོར་ལ་སྐུལ་འདེད་གཏོང་བ་བཅས་ཀྱི་གསར་གཏོད་ལག་ལེན་ཞིག་ཀྱང་རེད།