ཤིན་ཧྭ་གསར་འགྱུར་ཁང་ཁྲུང་ཆིང་ནས་ཟླ་4ཚེས་20ཉིན་འབྱོར་པའི་གློག་འཕྲིན་གཞིར་བཟུང་། ཚེས་20ཉིན་གྱི་སྔ་དྲོར“ཁྲུང་ཆིང་གིས་བཟོས་པའི”འདུས་ཞག་གཏུབ་ལེབ་བྱུར་བུར་བླུགས་པའི་ཨེ་ཤེ་ཡ་དབུས་མའི་དུས་གཏན་མེ་འཁོར་ཞིག་ཁྲུང་ཆིང་མཐུན་སྒྲིལ་གྲོང་ཚོའི་ལྟེ་བའི་བབས་ཚུགས་ནས་དལ་གྱིས་ཐོན་ཞིང་། དེ་ནི་ཁྲུང་ཆིང་གིས་དུས་ཚོད་དང་ལམ་ཐིག་གཏན་འཁེལ་གྱི་ཨེ་ཤེ་ཡ་དབུས་མའི་དུས་གཏན་མེ་འཁོར་གཏོང་ཐེངས་ཐོག་མ་དེ་ཡིན་ཞིང་། སླད་ཕྱིན་ཟླ་རེར་ཐེངས་གཉིས་རྒྱུན་གཏན་ལྟར་གཏོང་རྒྱུ་རེད།

ཤེས་རྟོགས་བྱུང་བར་གཞིགས་ན། ད་ཐེངས་བཏང་བའི་དུས་ཚོད་དང་ལམ་ཐིགགཏན་འཁེལ་གྱི་ཨེ་ཤེ་ཡ་དབུས་མའི་དུས་གཏན་མེ་འཁོར་ཧོར་ཀོ་སི་འགག་སྒོ་བརྒྱུད་རྒྱལ་མཚམས་བསྒྲལ་ཏེ་ཧ་སག་སི་ཐན་བརྒྱུད་རྗེས་སྔོན་དཔག་བྱས་ན་ཉིན་12ཡས་མས་སུ་ཨུ་ཟ་བྷེ་ཁི་སི་ཐན་གྱི་རྒྱལ་ས་ཐ་ཧྲི་ཀན་དུ་འབྱོར་རྒྱུ་ཡིན་ཞིང་། ལམ་ཐག་ཧྲིལ་པོར་སྤྱི་ལེ་4700ཙམ་ཡོད་པས་ནུབ་རྒྱུད་དང་ཨེ་ཤེ་ཡ་དབུས་མའི་ས་ཁུལ་དབར་གྱི་ཚོང་དོན་འགྲོ་འོང་འགན་ལེན་ནུས་ལྡན་ཐུབ་རྒྱུ་རེད།

ཁེ་ལས་ཀྱི་ཟོག་འགྲེམས་ཅིང་ལི་ལིན་ཀྲེན་གྱིས“དུས་གཏན་མེ་འཁོར་རྒྱུན་གཏན་ལྟར་འཁོར་སྐྱོད་བྱས་རྗེས། ང་ཚོའི་དངོས་ཟོག་ཨེ་ཤེ་ཡ་དབུས་མའི་ས་ཁུལ་དུ་ཕྱིར་གཏོང་བྱེད་པའི་སྐྱེལ་འདྲེན་དུས་ཚོད་ཐུང་དུ་དང་། སྐྱེལ་འདྲེན་དུས་འཁོར་བརྟན་དུ། སྒྲིག་སྦྱོར་བརྒྱུད་རིམ་དེ་བས་སྟབས་བདེ་རུ་བཅས་ཕྱིན་པ་དེས་ཁེ་ལས་ཀྱིས་ཨེ་ཤེ་ཡ་དབུས་མའི་ཁྲོམ་ར་རྒྱ་སྐྱེད་གཏོང་བར་ཕན་ཐོགས་ཡོད”ཅེས་བཤད་པ་རེད།