ཉེ་དུས། བོད་ལྗོངས་མེ་ཏོག་རྫོང་གི་ཇ་འདེབས་ཞིང་པ་ལི་ཏུང་གི་སྐད་འཕྲིན་ནང་ཇ་ཉོ་མཁན་གྱི་ཆ་འཕྲིན་མང་པོ་ཞིག་འབྱོར། “དཔྱིད་ཇ་འཐུ་བའི་དུས་ཚིགས་སླར་ཡང་འཆར་ཞིང་། རི་སྔོན་ཆུ་དྭངས་ཀྱིས་ས་གཞི་ཆེ་མོ་བསྐོར་བ་དང་། ང་ཚོའི་ཇ་ལོའི་སྤུས་ཀ་ལེགས་པས་འཚོང་མི་ཐུབ་པའི་སེམས་ཁྲལ་རྩ་བ་ནས་མི་འདུག”ཅེས་ལི་ཏུང་གིས་བཤད། ལོ་51ལ་སླེབས་པའི་ལི་ཏུང་ནི་མེ་ཏོག་རྫོང་དུ་སྐད་གྲགས་ཡོད་པའི་ཕྱུག་འགྱུར་སྣེ་ཁྲིད་པ་ཞིག་རེད། ཁོང་ལོ་45ལ་སླེབས་སྐབས་གཞི་ནས་ཇ་འདེབས་སྟངས་སྦྱངས་ཀྱང་ད་ཆ་ཇ་ཞིང་གཡོག་བྱེད་དང་ཇ་བཟོ་སྟངས་དང་ཕྱིར་ཚོང་སོགས་ཚང་མ་བྱང་ཆུབ་པོ་ཡོད་པ་རེད།

ཟླ་3པའི་ཟླ་སྨད་དུ། མེ་ཏོག་རྫོང་དུ་ལོ་གཅིག་དུས་གཅིག་གི་ཇ་ལོ་འཐུ་བའི་དུས་ཚིགས་སུ་སླེབས་པ་དང་ཡར་ཀླུང་གཙང་པོའི་གཞོགས་གཉིས་ཀྱི་རི་མཐོའི་ཇ་ཞིང་དུ་མི་ཚོགས་ཀྱིས་ཁེངས་པ་དང་ཚང་མ་ཇ་ལོ་འཐུ་བའི་ལས་ལ་བྲེལ་བཞིན་ཡོད་པ་རེད།

ལོ་བཅུ་གྲངས་ཀྱི་གོང་། ཇ་ལོ་ནི་མེ་ཏོག་རྫོང་གི་ཞིང་འབྲོག་མང་ཚོགས་ཀྱི་ངོས་ནས་བརྗོད་ན་ཧ་ཅང་དཀོན་པ་ཞིག་རེད། རྒྱལ་ཡོངས་ནས་གཞུང་ལམ་ཤར་གཏོང་ཐུབ་པའི་རྫོང་གྲོང་མཐའ་མ་དེ་ཡིན་པའི་མེ་ཏོག་རྫོང་ལ་དེ་སྔ“ས་མཐོའི་ཁེར་ཆགས་གླིང་ཕྲན”ཞེས་བརྗོད་པ་དང་དེར་དངོས་ཟོག་དཀོན་པ་མ་ཟད། ཐོན་ལས་འདེགས་སྐྱོར་ཀྱང་དེ་བས་ཉུང་ཉུང་ཡིན་པ་རེད།

མེ་ཏོག་རྫོང་ཞིང་ལས་དང་གྲོང་གསེབ་ཅུས་ཀྱི་ཅུས་ཀྲང་ཚེ་རིང་མཆོག་གིས“ལོ་རེའི་ཆ་སྙོམས་དྲོད་ཚད་ཧྲེ་ཧྲི་ཏུའུ་16ཟིན་པ་དང་ཆར་ཆུ་འབེལ་བས་ས་རྒྱུའི་སྐྱུར་བུལ་ཚད་གཞི་དང་དེ་བཞིན་དེའི་ནང་འདུས་པའི་གཏེར་རྒྱུའི་གྲུབ་ཆ་ཚང་མ་ཧ་ཅང་འཚམ་པ་དང་དེ་གར་ཇ་ལོ་འདེབས་འཛུགས་བྱེད་པར་ཐུན་མོང་མ་ཡིན་པའི་ལེགས་ཆ་ལྡན་ཡོད། དེར་བརྟེན་ཁ་གཏད་བོད་སྐྱོར་དང་དབུལ་སྒྲོལ་འགག་སྒྲོལ་གྱི་ལས་དོན་སྤེལ་བ་ལས་ཇའི་མྱུ་གུ་དང་པོ་དེ་གར་ཐོན་ཡོད”ཅེས་ངོ་སྤྲོད་བྱས།

2020ལོ་ནས་བཟུང་། མེ་ཏོག་རྫོང་གིས་སྔ་རྗེས་སུ་ཇ་འཐུ་བ་དང་རྔོ་བ་སོགས་ཆེད་ལས་རྩལ་ནུས་གསོ་སྦྱོང་དུས་ཐེངས་46བྱས་པས་ཧ་ལམ་རྫོང་ཡོངས་ཀྱི་ཇ་འདེབས་དུད་ཚང་2400ལྷག་ཙམ་ལ་ཁྱབ་ཡོད་པ་རེད། “ཁྱིམ་གྱི་སྒོ་འགྲམ་དུ་ཇ་བཏབ་པས་ཁྱིམ་གྱི་སྒོ་འགྲམ་དུ་ཕྱུག་པོ་ཆགས་ཡོད”ཅེས་ཚེ་རིང་མཆོག་གིས་བཤད།

ད་ཆ་མེ་ཏོག་གི་ཇ་ཞིང་དུ་སྐྱོད་སྐབས་སྤྲིན་སྨུག་འཁྲིགས་པ་དང་། སྡོད་ཁང་གྲལ་སྟར་འགྲིག་པ། ཡུལ་ལྗོངས་ལྟ་ན་སྡུག་པ་བཅས་ཡོད།

ཐོན་ལས་དར་ན་ལས་རིགས་ཀུན་དར། ཇའི་ཐོན་ལས་དེ་ས་གནས་དེ་གའི་ཁྱད་ལྡན་གྱི་གཙོ་ཁྲིད་ཐོན་ལས་ལ་གྱུར་ནས་ས་ཆ་དེ་གར་སྐྱེ་ལྡན་ཇ་ཞིང་ཁག་103བསྐྲུན་པ་དང་རྒྱ་ཁྱོན་མུའུ་ཁྲི་1.9ཟིན་གྱི་ཡོད། ཇའི་ཐོན་ལས་འཕེལ་རྒྱས་ལ་བརྟེན་ནས་ས་གནས་དེ་གས་ད་དུང་ཤང་དང་། གྲོང་རྡལ། གྲོང་ཚོ་བཅས་ཁག་ཏུ་སྨྱུག་བསླས་དང་ནགས་ཚལ་ཤིང་འབྲས་སོགས་ཁྱད་ལྡན་ཐོན་ལས་འཕེལ་རྒྱས་ཤུགས་ཆེན་བཏང་བ་དེས་ཞིང་ལས་དང་ལག་ཤེས་བཟོ་ལས་ཐད་འབབ་འཕར་བཏོད་པ་མ་ཟད། ད་དུང་མེ་ཏོག་གི་རིག་གནས་ཡུལ་སྐོར་ཐོན་ལས་འཕེལ་རྒྱས་འགྲོ་བར་ཡང་སྐུལ་ཁྲིད་ཐུབ་ཡོད། 2024ལོར་མེ་ཏོག་རྫོང་དེ་ཀྲུང་གོའི་ཇའི་ཡུལ་སྐོར་གྱི་དམིགས་ས་ཆེ་གྲས་བཅུའི་ནང་ཚུད་ཡོད་པ་རེད།

“ལོ་འཁོར་མོར་ཇ་ལོ་རྒྱ་མ་ཁྲི་102ལྷག་ཙམ་བཏུས་ནས་མང་ཚོགས་ལ་འབབ་འཕར་སྒོར་ཁྲི་1540ལྷག་ཙམ་ཡོང་བར་སྐུལ་ཁྲིད་བྱས་པས་ལོ་རྒྱུས་ཀྱི་ཟིན་ཐོ་མཐོ་ཤོས་བཏོད་ཡོད”མེ་ཏོག་རྫོང་ཨུད་ཀྱི་ཧྲུའུ་ཅི་གཞོན་པ་དང་རྫོང་དཔོན་ལི་ཅི་ཁྲེང་གིས་མེ་ཏོག་རྫོང་གི་སྲིད་གཞུང་གི་ལས་དོན་སྙན་སྒྲོན་གནང་སྐབས་ཇ་ལོ་དེ་གྲོང་གསེབ་དར་རྒྱས་ཀྱི་དམ་འཛིན་བྱ་གཞི་གལ་ཆེན་ལ་གྱུར་བ་དང“མེ་ཏོག་རྫོང་གིས་ཇ་ལོར་བརྟེན་ནས་ཕྱུག་འགྱུར་གྱི་ལམ་བུ་བཏོད་ཡོད”ཅེས་བརྗོད།