“ལག་གདང་སྦྲེལ་ནས་དེ་བས་དར་རྒྱས་ཆེ་བའི་ཨེ་ཤེ་ཡའི་ལས་དབང་གཅིག་མཐུན་ཚོགས་པ་འཛུགས་ཀྱི་ཡིན”
—— ལོ་སིའི་ཙུང་ལི་སུང་སའེ་ལ་བཅར་འདྲི་ཞུས་པ།
“སྒོ་དབྱེའི་གླེང་མོལ་དང་མཉམ་ལས་བྱས་ན། གཞི་ནས་ཨེ་ཤེ་ཡའི་ས་ཁུལ་དེ་བས་སྟོབས་དང་ལྡན་པ་དང་དེ་བས་མཉེན་གཤིས་ལྡན་པར་སྐུལ་འདེད་གཏོང་ཐུབ་ནས་ལག་གདང་སྦྲེལ་ཏེ་དེ་བས་དར་རྒྱས་ཆེ་བའི་ཨེ་ཤེ་ཡའི་ལས་དབང་གཅིག་མཐུན་ཚོགས་པ་འཛུགས་ཐུབ་པར་ང་ལ་ཡིད་ཆེས་ཡོད”ཅེས་ཀྲུང་གོར་པོ་ཨའོ་ཨེ་ཤེ་ཡའི་གླེང་སྟེགས་2025ལོའི་ལོ་ཚོགས་ལ་ཕེབས་པའི་ལོ་སིའི་ཙུང་ལི་སུང་སའེ་ཡིས་འདི་ག་ཚགས་པར་གྱི་གསར་འགོད་པའི་ཆེད་དོན་བཅར་འདྲི་དང་ལེན་གནང་སྐབས་དེ་ལྟར་བརྗོད། དེ་ནི་ཁོང་འདུ་ཚོགས་དེར་ཐོག་མར་ཞུགས་ནས། ཨེ་ཤེ་ཡ་དང་དེ་བཞིན་གོ་ལ་ཧྲིལ་པོ་ནས་ཕེབས་པའི་འགོ་ཁྲིད་དང་། རིགས་གཅིག་མཁས་ཅན་དང་མཁས་དབང་དང་སྤེལ་རེས་གཏིང་ཟབ་དང་། རྒྱུན་མཐུད་ཆོག་པའི་འཕེལ་རྒྱས་དང་། ལག་རྩལ་གསར་གཏོད། ས་ཁོངས་གཞི་གཅིག་ཅན་སོགས་ཀྱི་གྲོས་དོན་ལ་གྲོས་བསྡུར་བྱས་པ་ཞིག་རེད།
“སྤེལ་རེས་བརྒྱུད། རང་ཉིད་ཀྱིས་ལྟ་ཚུལ་རྩ་ཆེན་མང་པོ་ཞིག་ཤེས་རྟོགས་བྱུང་། ཨེ་ཤེ་ཡར་འཕྲད་པའི་འགྲན་སློང་དང་གོ་སྐབས་ལ་རྒྱུས་མངའ་དེ་བས་གཏིང་ཟབ་བྱུང་། ལྷག་པར་དུ་དཔལ་འབྱོར་མཉམ་ལས་དང་། རྒྱུན་མཐུད་ཆོག་པའི་འཕེལ་རྒྱས། གསར་གཏོད་བཅས་ཀྱི་ཐད་གྲོས་བསྡུར་བྱས་པས། རང་ཉིད་ལ་ཕན་པ་ཆེན་པོ་ཐོབ་བྱུང”ཞེས་སུང་སའེ་ཡིས་བརྗོད།
སུང་སའེ་ཡིས་ནན་བཤད་བྱས་དོན། པོ་ཨའོ་ཨེ་ཤེ་ཡའི་གླེང་སྟེགས་ཀྱིས་འཛམ་གླིང་རྒྱལ་ཁབ་ཁག་ལ་གྲོས་བསྡུར་དང་མཉམ་ལས་ཀྱི་ལས་སྟེགས་ཤིག་མཁོ་འདོན་བྱས་པ་དང་། ལྷག་པར་དུ་མིག་སྔའི་རྒྱལ་སྤྱིའི་དུས་བབ་ལ་གཏན་འཁེལ་མེད་པའི་རང་བཞིན་གྱིས་ཁེངས་པའི་རྒྱབ་ལྗོངས་འོག གླེང་སྟེགས་དེས་ཕྱོགས་མང་རིང་ལུགས་ལ་སྐུལ་འདེད་གཏོང་བ་དང་རྒྱལ་སྤྱིའི་མཉམ་ལས་ལ་ཤུགས་སྣོན་རྒྱག་པར་རམ་འདེགས་བྱས་ནས། གོ་ལ་ཧྲིལ་པོའི་འཕེལ་རྒྱས་ལ་རེ་བ་དང་སྒུལ་ཤུགས་གསར་པ་བསྣན་ཡོད། ཁོང་གིས་པོ་ཨའོ་ཨེ་ཤེ་ཡའི་གླེང་སྟེགས་ཀྱིས་སྲིད་གཞུང་དང་། ཁེ་ལས། རྒྱལ་སྤྱིའི་རྩ་འཛུགས་བཅས་དབར་གྱི་ཕན་ཡོད་གླེང་མོལ་ལ་སྐུལ་འདེད་གཏོང་བར་ནུས་པ་དེ་བས་ཆེ་བ་འདོན་པ་དང་ལྷག་པར་དུ་ས་ཁོངས་གཞི་གཅིག་ཅན་དང་ཚོང་དོན་མཉམ་ལས་ལ་སྐུལ་འདེད་གཏོང་བར་ནུས་པ་དེ་བས་ཆེ་བ་འདོན་པར་རེ་སྒུག་ཆེན་པོ་བྱེད་ཀྱི་ཡོད།
ཀྲུང་ལོ་ཏང་གཉིས་དང་རྒྱལ་ཁབ་གཉིས་ཀྱི་ཆེས་མཐོའི་འགོ་ཁྲིད་པའི་འཐབ་ཇུས་སྣེ་ཁྲིད་འོག ཀྲུང་ལོ་རྒྱལ་ཁབ་གཉིས་ཀྱི་ལས་དབང་གཅིག་མཐུན་ཚོགས་པ་འཛུགས་སྐྱོང་རྒྱུན་ཆད་མེད་པར་གཏིང་ཟབ་དང་ཏན་ཏིག་བྱུང་ནས་གྲུབ་འབྲས་གསར་པ་དང་འཕེལ་རྒྱས་གསར་པ་རབ་དང་རིམ་པ་བྱུང་ཡོད། 2023ལོའི་ཟླ་10པར། ཀྲུང་ལོ་རྒྱལ་ཁབ་གཉིས་ཀྱི་ལས་དབང་གཅིག་མཐུན་ཚོགས་པ་འཛུགས་པའི་ལོ་ལྔའི་བྱ་སྤྱོད་འཆར་གཞི་གསར་པར་མིང་རྟགས་བཀོད་ནས་དུས་རབས་གསར་པའི་ཀྲུང་ལོའི་འབྲེལ་བ་འཕེལ་རྒྱས་གཏོང་བ་དང་ལས་དབང་གཅིག་མཐུན་ཚོགས་པ་འཛུགས་པར་མཛེས་སྡུག་ལྡན་པའི་འཆར་གཞི་བཀོད་ཡོད། སུང་སའེ་ཡིས། མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པའི་འདུ་ཤེས་ནི་ཀྲུའུ་ཞི་ཞི་ཅིན་ཕིང་གིས་གོ་ལ་ཧྲིལ་པོའི་མཉམ་ལས་དང་འཕེལ་རྒྱས་ལ་སྐུལ་འདེད་གཏོང་ཆེད་བཏོན་པའི་འདུ་ཤེས་གལ་ཆེན་ཞིག་རེད། མིག་སྔའི་གོ་ལ་ཧྲིལ་པོར་དཔལ་འབྱོར་དང་ཁོར་ཡུག་སོགས་ཀྱི་འགྲན་སློང་གལ་ཆེན་འཕྲད་པའི་རྒྱབ་ལྗོངས་འོག གནད་དོན་དེ་དག་ལ་ཁེར་རྐྱང་དུ་ཁ་གཏད་གཅོག་ཐུབ་པའི་རྒྱལ་ཁབ་གཅིག་ཀྱང་མེད། མཉམ་ལས་དང་ཕན་ཚུན་རྒྱབ་སྐྱོར་བྱས་ན། གཞི་ནས་གོ་ལ་ཧྲིལ་པོའི་ཞི་བདེ་དང་འཕེལ་རྒྱས་ལ་མཉམ་དུ་སྐུལ་འདེད་གཏོང་ཐུབ་ཅེས་བརྗོད།
གོ་ལ་ཧྲིལ་པོའི་བཅོས་སྐྱོང་ཁྲོད་ཀྲུང་གོས་ནུས་པ་གལ་ཆེན་བཏོན་པའི་སྐོར་གླེང་སྐབས། སུང་སའེ་ཡིས། སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་བརྒྱུད། ཀྲུང་གོས་ཨེ་ཤེ་ཡ་དང་གོ་ལ་ཧྲིལ་པོའི་ས་ཁུལ་གཞན་དག་གི་རྨང་གཞིའི་སྒྲིག་བཀོད་འཛུགས་སྐྲུན་ལ་སྐུལ་འདེད་བཏང་བ་མ་ཟད། ས་ཁོངས་གཞི་གཅིག་ཅན་ལ་ཤུགས་སྣོན་བརྒྱབ་ནས་ཉོ་ཚོང་འཁོར་རྒྱུག་ལ་སྐུལ་འདེད་བཏང་སྟེ། འཕེལ་རྒྱས་འགྲོ་བཞིན་པའི་རྒྱལ་ཁབ་ལ་དངོས་དངོས་རྗེན་རྗེན་གྱི་ཕན་པ་བཏགས་ཡོད་ཅེས་བརྗོད་པ་དང་། “ལོ་ཀྲུང་མཉམ་ལས་ནི་གྲོས་འགོ་དེའི་འོག་གི་གྲུབ་འབྲས་ཐོབ་པའི་དཔེ་མཚོན་ཞིག་རེད”ཅེས་སུང་སའེ་ཡིས་བརྗོད།
སུང་སའེ་ཡིས་ཀྲུའུ་ཞི་ཞི་ཅིན་ཕིང་གིས་བཏོན་པའི་གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་དང་། གོ་ལ་ཧྲིལ་པོའི་བདེ་འཇགས་ཀྱི་གྲོས་འགོ། གོ་ལ་ཧྲིལ་པོའི་ཤེས་དཔལ་གྱི་གྲོས་འགོ་བཅས་ལ་ཚད་མཐོའི་གདེང་འཇོག་བྱས་པ་དང་། གྲོས་འགོ་དེ་དག་གིས་གོ་ལ་ཧྲིལ་པོ་དང་ལྷག་པར་དུ་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་འཕེལ་རྒྱས་ཀྱི་གོ་སྐབས་གསར་པ་མཁོ་འདོན་བྱས་ནས། རྒྱལ་སྤྱིའི་མཉམ་ལས་ལ་སྐུལ་འདེད་བཏང་བ་དང་ལྷག་པར་དུ་མཉམ་འབྲེལ་རྒྱལ་ཚོགས་ཀྱི་2030ལོའི་རྒྱུན་མཐུད་ཆོག་པའི་འཕེལ་རྒྱས་ཀྱི་དམིགས་ཚད་མངོན་འགྱུར་ལ་ནུས་པ་གལ་ཆེན་བཏོན་པའི་ངོས་འཛིན་བྱས་པ་རེད།