དབུ་ཤོག>གསར་འགྱུར།>རྒྱལ་ནང་།རྒྱལ་སྤྱི།>རྒྱལ་སྤྱི།
  • ཀྲུང་རི་ཧན་གྱི་དཔལ་འབྱོར་ཚོང་དོན་པུའི་པུའུ་ཀྲང་གི་ཚོགས་འདུ་ཐེངས་13པ་ཧན་གོའི་གྲོང་ཁྱེར་ཧྲོའར་དུ་འཚོགས་པ།

  • ཡོང་ཁུངས།  མི་དམངས་ཉིན་རེའི་ཚགས་པར།   |     སྤེལ་དུས།  2025-04-03

    ཉེ་ཆར། ཀྲུང་རི་ཧན་དཔལ་འབྱོར་ཚོང་དོན་པུའི་པུའུ་ཀྲང་གི་ཚོགས་འདུ་ཐེངས་13པ་ཧན་གོའི་གྲོང་ཁྱེར་ཧྲོའར་དུ་འཚོགས་པ་རེད། ཀྲུང་གོའི་ཚོང་དོན་པུའི་པུའུ་ཀྲང་ཝང་ཝུན་ཐའོ་དང་། ཧན་གོའི་ཐོན་ལས་ཚོང་འགྲུལ་ཐོན་ཁུངས་པུའི་དཔོན་རིགས་ཨན་ཏི་ཀེན། རི་པིན་དཔལ་འབྱོར་ཐོན་ལས་ཀྱི་བློན་ཆེན་ཝུའུ་ཐེང་རུང་ཀྲི་བཅས་ཀྱིས་མཉམ་དུ་ཚོགས་འདུ་གཙོ་སྐྱོང་བྱས་པ་རེད། ཚོགས་འདུའི་ཐོག་ཀྲུང་རི་ཧན་གྱི་འགོ་ཁྲིད་པའི་ཚོགས་འདུ་ཐེངས་དགུ་པའི་དཔལ་འབྱོར་ཚོང་དོན་ཁྱབ་ཁོངས་ཀྱི་ཐུན་མོང་གི་ངོས་འཛིན་གལ་ཆེན་དོན་འཁྱོལ་ལ་དམིགས་ནས་ཚོང་དོན་མ་འཇོག་མཉམ་ལས་དང་། ས་ཁོངས་དང་དེ་བཞིན་ཕྱོགས་མང་མཉམ་ལས་སོགས་ལ་ཤུགས་སྣོན་རྒྱག་པར་བསམ་འཆར་བརྗེ་རེས་གཏིང་ཟབ་བྱས་ཤིང་། ཐུན་མོང་གི་ངོས་འཛིན་ཡང་རྒྱ་ཁྱབ་བྱུང་བ་རེད།

    ཝང་ཝུན་ཐའོ་ཡིས། ཀྲུང་རི་ཧན་གྱི་ས་ཐག་ཉེ་བ་དང་། རིག་གནས་འདྲ་བ། ཚོང་འབྲེལ་ཟབ་པ་བཅས་ཡིན་པས་རྒྱལ་ཁབ་གསུམ་གྱི་དཔལ་འབྱོར་ཚོང་དོན་མཉམ་ལས་ལ་གྲུབ་འབྲས་གཡུར་དུ་ཟ་བ་ཐོབ་ཡོད། ཕྱོགས་རྐྱང་རིང་ལུགས་དང་སྲུང་སྐྱོང་རིང་ལུགས་མཆེད་པ་སོགས་ཀྱི་ཤུགས་རྐྱེན་ཐེབས་ནས་འཛམ་གླིང་དཔལ་འབྱོར་འཕར་ཚད་ཆག་པའི་གནོན་ཤུགས་ཆེ་རུ་ཕྱིན་ཡོད། ས་ཁོངས་དང་ཐ་ན་གོ་ལ་ཧྲིལ་པོའི་དཔལ་འབྱོར་དངོས་ཚན་གལ་ཆེན་ཡིན་པའི་ཀྲུང་རི་ཧན་གསུམ་གྱིས་རང་མོས་ཚོང་དོན་དང་ཕྱོགས་མང་ཚོང་དོན་མ་ལག་མཉམ་དུ་སྲུང་སྐྱོང་དང་། ཕྱོགས་རྐྱང་རིང་ལུགས་དང་སྲུང་སྐྱོང་རིང་ལུགས་ལ་ངོ་རྒོལ། ས་ཁོངས་དཔལ་འབྱོར་གཞི་གཅིག་ཅན་ལ་མུ་མཐུད་སྐུལ་འདེད་བཏང་ནས། འཛམ་གླིང་དཔལ་འབྱོར་དར་རྒྱས་གོང་འཕེལ་ལ་སྒུལ་ཤུགས་ཆེན་པོ་སྣོན་དགོས། ཀྲུང་གོ་ཕྱོགས་ཀྱིས་བློ་བརྟན་འགྱུར་མེད་ངང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་ཆུ་ཚད་མཐོ་བའི་ཕྱི་ཕྱོགས་སྒོ་མོ་འབྱེད་རྒྱ་ཆེ་རུ་བཏང་ནས་ཧན་གོ་དང་རི་པིན་ཚུད་པའི་འཛམ་གླིང་རྒྱལ་ཁབ་ཁག་ལ་འཕེལ་རྒྱས་ཀྱི་གོ་སྐབས་མཉམ་དུ་སྤྱོད་འདོད་ཡོད་ཅེས་བརྗོད་པ་རེད།

    རྒྱལ་ཁབ་གསུམ་གྱི་དཔལ་འབྱོར་ཚོང་དོན་སྡེ་ཚན་གྱིས། འཛམ་གླིང་ཚོང་དོན་རྩ་འཛུགས་དང་། 《ས་ཁོངས་ཀྱི་ཕྱོགས་ཡོངས་ཀྱི་དཔལ་འབྱོར་རོགས་ཟླའི་འབྲེལ་བའི་གྲོས་ཆོད》 ཨེ་ཤེ་ཡ་དང་ཞི་བདེ་རྒྱ་མཚོ་ཆེ་མོ་ཁུལ་གྱི་དཔལ་འབྱོར་མཉམ་ལས་རྩ་འཛུགས་སོགས་ས་ཁོངས་དང་ཕྱོགས་མང་སྒྲོམ་གཞིའི་འོག་མཉམ་ལས་བྱེད་པར་ཤུགས་སྣོན་དང་། ཀྲུང་རི་ཧན་རང་མོས་ཚོང་དོན་གྲོས་ཆོད་གྲོས་མོལ་མགྱོགས་པོ་བྱ་རྒྱུའི་སྐོར་ལ་གྲོས་བསྡུར། མཁོ་སྤྲོད་འཁོར་འབྲེལ་གྱི་མཉམ་ལས་དང་ཕྱིར་གཏོང་དོ་དམ་གླེང་མོལ་ལ་ཤུགས་སྣོན། གྲངས་འཛིན་དཔལ་འབྱོར་དང་ལྗང་མདོག་དཔལ་འབྱོར་མཉམ་ལས་གཏིང་ཟབ་ཏུ་གཏོང་བ། ཧོང་ཧའེ་རྒྱ་མཚོར་ཁྱབ་པའི་དཔལ་འབྱོར་ལག་རྩལ་སྤེལ་རེས་ཚོགས་འདུ་སོགས་ས་གནས་ཀྱི་མཉམ་ལས་ལ་ཤུགས་སྣོན་བརྒྱབ་ནས་ཁེ་ལས་ལ་མཉམ་ལས་ཀྱི་ཚོང་གཉེར་ཁོར་ཡུག་བཟང་པོ་མཉམ་དུ་བསྐྲུན་རྒྱུའི་མོས་མཐུན་མགྲིན་གཅིག་ཏུ་བྱས་པ་རེད།

    འགན་འཁུར་རྩོམ་སྒྲིག་པ། བདེ་སྐྱིད་བུ་ཁྲིད།

མཉམ་སྤྱོད།

འབྲེལ་ཡོད་གསར་འགྱུར།