འདི་ནི་ཀྲུང་གོས་འབར་མར་ཞལ་འདེབས་བརྒྱབ་པའི་ཛ་དྲག་གི་མི་ཆོས་རིང་ལུགས་ཀྱི་རོགས་སྐྱོབ་དངོས་ཟོག་ཁག་དང་པོ་རང་ཀོང་རྒྱལ་སྤྱིའི་གནམ་ཐང་དུ་འབྱོར་བ།

འདི་ནི་ཀྲུང་གོ་ཕྱོགས་ཀྱི་རོགས་སྐྱོབ་རུ་ཁག་གིས་འབར་མའི་མན་ཏེ་ལེར་རོགས་སྐྱོབ་བྱེད་བཞིན་པ།

ས་གནས་དེ་གའི་དུས་ཚོད་ཟླ་3ཚེས་31ཉིན་གྱི་ཆུ་ཚོད་12ཙམ་ལ། རང་ཀོང་རྒྱལ་སྤྱིའི་གནམ་ཐང་གི་གནམ་གྲུ་སྡོད་སར་ཀྲུང་གོ་སྲིད་གཞུང་གིས་འབར་མར་ཞལ་འདེབས་བརྒྱབ་པའི་ཛ་དྲག་གི་མི་ཆོས་རིང་ལུགས་ཀྱི་རོགས་སྐྱོབ་དངོས་ཟོག་ཁག་དང་པོ་འབྱོར་མ་ཐག་ལས་བཟོ་ཚོས་བྲེལ་བརྩོན་དང་གོ་རིམ་ལྡན་པའི་ངང་གནམ་གྲུའི་འགྲུལ་ཁང་ནས་དངོས་ཟོག་བཏོན་ཞིང་། དངོས་ཟོག་དེ་དག་ནང་གུར་1200དང་། ཀམ་པ་ལི་8000 མྱུར་སྐྱོབ་སྨན་ཁུག་ཁྲི་4ལྷག་ཙམ་ཡོད་པ་དང་། དེ་དག་གནམ་གྲུ་གཙང་གླས་ཀྱིས་རང་ཀོང་དུ་དབོར་འདྲེན་བྱས་ཡོད། རྗེས་མཐུད་ཀྱི་དངོས་ཟོག་ཀྱང་གང་མྱུར་གྲབས་གསོག་བྱེད་བཞིན་ཡོད་ལ་མི་རིང་བར་འབར་མར་འབྱོར་རྒྱུ་རེད།

ཟླ་3ཚེས་31ཉིན་ཕྱི་འབྲེལ་པུའི་མགྲིན་ཚབ་པ་ཀུའོ་ཅ་ཁུན་གྱིས། ཀྲུང་གོ་ཕྱོགས་ཀྱིས་ཀྲུང་གོ་དང་འབར་མའི་སྤུན་ཟླའི་མཛའ་མཐུན་བརྩེ་སེམས་ལ་བརྟེན་ནས་འབར་མ་དང་མཉམ་དུ་དཀའ་ངལ་མཉམ་སེལ་དང་དཀའ་ངལ་ལས་ཐར་བ་བྱ་རྒྱུ་ཡིན་ཞེས་བརྗོད་པ་རེད།

གསར་འགོད་པས་ཤེས་རྟོགས་བྱས་པར་གཞིགས་ན། ཀྲུང་གོ་སྲིད་གཞུང་གི་ཛ་དྲག་གི་མི་ཆོས་རིང་ལུགས་ཀྱི་རོགས་སྐྱོབ་དངོས་ཟོག་ཁག་དང་པོ་ཕུད་གཞན་ཡང་ཡུན་ནན་ཞིང་ཆེན་གྱིས་ཞལ་འདེབས་བརྒྱབ་པའི་མི་དམངས་ཤོག་སྒོར་ཁྲི་500རི་བའི་དངོས་ཟོག་རོགས་སྐྱོར་ཡང་གཅིག་རྗེས་གཉིས་མཐུད་དུ་འབྱོར་བཞིན་ཡོད། ཡུན་ནན་ཏེ་ཧུང་ཏའེ་རིགས་ཅིང་ཕོ་རིགས་རང་སྐྱོང་ཀྲོའུ་ཡིས་ཞལ་འདེབས་བརྒྱབ་པའི་མི་དམངས་ཤོག་སྒོར་ཁྲི་110རི་བའི་གུར་དང་། སྨན་རྫས། ལྟེབ་ཁྲི། སྲིང་བལ་གྱི་ཉལ་ཆས། སྟབས་བདེའི་ཐུག་པ་སོགས་རོགས་སྐྱོབ་དངོས་ཟོག་གེགས་ཁུལ་དུ་དབོར་ཡོད། ཀྲུང་གོ་རྒྱ་གྲམ་དམར་རྟགས་ཚོགས་པས་འབར་མར་ཨ་སྒོར་ཁྲི་20ཞལ་འདེབས་བརྒྱབ་པ་མ་ཟད། གུར་300དང་། ཉལ་ཆས་2000 ལྟེབ་ཁྲི་600 ཁྱིམ་ཚང་2000ལ་འདང་བའི་རྒུད་སྐྱོབ་ཁྱིམ་ཚང་ཁུག་མ་སོགས་ཛ་དྲག་དངོས་ཟོག་སྤྲད་ཡོད། ཀྲུང་གོ་གྲོང་གསེབ་འཕེལ་རྒྱས་ཐེབས་རྩ་ལྷན་ཚོགས་ཀྱིས་མན་ཏེ་ལེ་དང་ནེ་པི་ཏུའུ་རུ་གནོད་འཚེ་ཕོག་པའི་དམངས་ཚོགས་དུད་ཚང་1000ལ་ཆུ་དང་། ལམ་རྒྱགས། གུར། སྦྲང་ཡོལ། སྟབས་བདེའི་ཐུག་པ་སོགས་འཚོ་བའི་དངོས་ཟོག་སྤྲད་ཡོད། ཀྲུང་གོ་དང་འབར་མའི་མཐའ་མཚམས་འགག་སྒོ་ཁག་གིས་མགྱོགས་མྱུར་ས་ཡོམ་རྗེས་ཀྱི་འཕྲལ་སྡོམ་འགག་སྒྲོལ་ལམ་སྲོལ་བཟོ་འགོ་ཚུགས་ནས“ཤར་སྐྱོད་འགྲོ་ལམ”བཏོད་ཅིང་། འབར་མར་ཡོད་པའི་ཀྲུང་གོའི་མ་འཇོག་ཁེ་ལས་ཚོང་ཚོགས་དང་ས་གནས་ཚོང་ཚོགས་ཀྱིས་འབར་མའི་དངུལ་སྨར་སྒོར་དུང་ཕྱུར་10(མི་དམངས་ཤོག་སྒོར་1ལ་འབར་མའི་དངུལ་སྒོར་288ཙམ་ཡིན)དང་འབར་མའི་དངུལ་སྒོར་དུང་ཕྱུར་15རི་བའི་དངོས་ཟོག་གྲབས་གསོག་བྱས་ཡོད། གོམ་སྟབས་རྗེས་མར་ཀྲུང་གོ་ཕྱོགས་ཀྱིས་ད་དུང་འབར་མ་ཕྱོགས་ཀྱི་དགོས་མཁོར་གཞིགས་ནས་མུ་མཐུད་རོགས་སྐྱོར་བྱ་རྒྱུ་རེད།

རོགས་སྐྱོབ་ཀྱི་ཐད། ཀྲུང་གོ་ཕྱོགས་ཀྱིས་ཀྲུང་གོའི་རོགས་སྐྱོབ་རུ་ཁག་དང་། ཀྲུང་གོའི་དམག་དཔུང་ཞུགས་པའི་ཀྲུང་གོའི་རྒྱལ་སྤྱིའི་རོགས་སྐྱོབ་རུ་ཁག ཡུན་ནན་རོགས་སྐྱོབ་སྨན་བཅོས་རུ་ཁག ཤང་ཀང་དམིགས་བསལ་སྲིད་འཛིན་ཁུལ་གྱི་སྲིད་གཞུང་གི་རོགས་སྐྱོབ་རུ་ཁག་བཅས་གཞུང་ཕྱོགས་ཀྱི་རོགས་སྐྱོབ་རུ་ཁག་བཞི་མངགས་ཤིང་། མིག་སྔར་ཀྲུང་གོའི་ས་ཡོམ་རིགས་གཅིག་མཁས་ཅན་དང་། རོགས་སྐྱོབ་དང་སྨན་དོན་མི་སྣ་400ཙམ་འབར་མའི་ས་གནས་ཁག་ཏུ་ཡོམ་འགོག་རོགས་སྐྱོབ་ལ་ཞུགས་ཡོད། ས་གནས་དེ་གའི་དུས་ཚོད་ཟླ་3ཚེས་31ཉིན་གྱི་ཆུ་ཚོད་8པའི་བར། ཀྲུང་གོ་ཕྱོགས་ཀྱི་རོགས་སྐྱོབ་མི་སྣས་འབར་མར་མི་6བསྐྱབས་ཡོད་པ་རེད།

ངོ་སྤྲོད་བྱས་པ་ལྟར་ན། འབར་མར་ཡོད་པའི་ཀྲུང་གོའི་ཁེ་ལས་དང་། ཚོང་ལས་མཐུན་ཚོགས། ཀྲུང་གོའི་དང་བླངས་པ་བཅས་ཀྱང་རོགས་སྐྱོབ་ལ་ཧུར་ཐག་ཞུགས་ཤིང་། རོགས་སྐྱོབ་རུ་ཁག་ལ་དངོས་ཟོག་གི་རྒྱབ་སྐྱོར་དང་། རླངས་འཁོར་བཀོད་སྒྲིག འབར་སྣུམ་མཁོ་སྤྲོད། སྐད་སྒྱུར། འབྲེལ་གཏུག་མཐུན་སྦྱོར་སོགས་ཀྱི་རོགས་རམ་བྱས་པ་རེད།