ཟླ་3ཚེས་31ཉིན། ཀྲུང་གོ་ཟོག་འགྲེམས་དང་ཉོ་སྒྲུབ་མཉམ་འབྲེལ་ལྷན་ཚོགས་དང་རྒྱལ་ཁབ་བསྡོམས་རྩིས་ཅུས་ཀྱི་ཞབས་ཞུའི་ལས་རིགས་བརྟག་དཔྱད་ལྟེ་གནས་ཀྱིས་ཡོངས་བསྒྲགས་བྱས་པའི་གྲངས་གཞི་ལས་མངོན་པར། ཟླ་3པར་རང་རྒྱལ་གྱི་བཟོ་སྐྲུན་ལས་རིགས་ཀྱི་ཉོ་སྒྲུབ་སྤྱི་གཉེར་སྟོན་གྲངས(PMI)50.5%ཟིན་པ་དེ་ཟླ་བ་གོང་མ་དང་བསྡུར་ན་བརྒྱ་ཆའི་གྲངས་0.3འཕར་བ་དང་། བཟོ་སྐྲུན་ལས་རིགས་ཀྱི་དར་རྒྱས་ཆུ་ཚད་མུ་མཐུད་མཐོ་རུ་ཕྱིན་ནས་ཟླ་གཉིས་བསྟུད་མར་རྒྱ་སྐྱེད་ཀྱི་བར་མཚམས་སུ་འཁོར་སྐྱོད་བྱེད་བཞིན་ཡོད།

ཁེ་ལས་ཀྱི་གཞི་ཁྱོན་ནས་བལྟས་ན། ཁེ་ལས་ཆེ་གྲས་ཀྱི་PMIནི་51.2%ཟིན་ནས་སྔར་བཞིན་རྒྱ་སྐྱེད་ཀྱི་བར་མཚམས་སུ་རྒྱུན་འཁྱོངས་ཐུབ་པ་དང་། ཁེ་ལས་འབྲིང་གྲས་ཀྱི་PMIནི་49.9%ཟིན་པ་དེ་ཟླ་བ་གོང་མ་དང་བསྡུར་ན་བརྒྱ་ཆའི་གྲངས་0.7འཕར་བ། ཁེ་ལས་ཆུང་གྲས་ཀྱི་PMIནི་49.6%ཟིན་པ་དེ་ཟླ་གོང་མ་དང་བསྡུར་ན་བརྒྱ་ཆའི་གྲངས་3.3འཕར་ནས། ཁེ་ལས་འབྲིང་གྲས་དང་ཆུང་གྲས་བསྐྱར་དུ་བརྟན་པོའི་ངང་འཁོར་སྐྱོད་བྱེད་བཞིན་ཡོད།

སྲིད་ཇུས་ཀྱི་ཕན་ནུས་སྔར་བས་མངོན་གསལ་དོད་དུ་ཕྱིན་པ་དང་ཁྲོམ་རའི་དགོས་མཁོ་མགྱོགས་མྱུར་ཆེ་རུ་ཕྱིན་ཞིང་། ཟླ་3པར་བཟོ་སྐྲུན་ལས་རིགས་ཀྱི་མངགས་ཐོ་གསར་པའི་སྟོན་གྲངས་51.8%ཟིན་པ་དེ་ཟླ་བ་གོང་མ་དང་བསྡུར་ན་བརྒྱ་ཆའི་གྲངས་0.7འཕར་ནས་ཟླ་གཉིས་བསྟུད་མར་51%ཡན་འཁོར་སྐྱོད་ཐུབ་ཡོད། ཕྱིར་གཏོང་མངགས་ཐོ་གསར་པའི་སྟོན་གྲངས་49%ཟིན་པ་དེ་ཟླ་གོང་མ་ལས་བརྒྱ་ཆའི་གྲངས་0.4འཕར་ནས་ཟླ་གཉིས་བསྟུད་མར་འཕར་ཡོད། དགོས་མཁོ་འཕར་ཚད་མགྱོགས་སུ་ཕྱིན་པ་དེས་ཁེ་ལས་ཀྱི་ཐོན་སྐྱེད་འདོད་བློ་ཆེ་རུ་ཕྱིན་པ་དང་ཐོན་སྐྱེད་སྟོན་གྲངས་52.6%ཟིན་པ་དེ་ཟླ་གོང་མ་ལས་བརྒྱ་ཆའི་གྲངས་0.1འཕར་ནས་ཟླ་གཉིས་བསྟུད་མར་52%ཡན་འཁོར་སྐྱོད་ཐུབ་ཡོད།

སྒུལ་ནུས་གསར་པ་ཅུང་མགྱོགས་པོ་འཕར་བ་དང་ཐོན་སྐྱེད་ནུས་ཤུགས་གསར་མ་འཕེལ་རྒྱས་མགྱོགས་པོ་ཕྱིན་པ། ཟླ་3པར་སྒྲིག་ཆས་བཟོ་སྐྲུན་ལས་རིགས་ཀྱི་PMIནི་52%ཟིན་པ་དེ་ཟླ་བ་གོང་མ་ལས་བརྒྱ་ཆའི་གྲངས་1.2འཕར་བ་དང་དེའི་ནང་ཐོན་སྐྱེད་སྟོན་གྲངས་ཟླ་བ་གོང་མ་ལས་བརྒྱ་ཆའི་གྲངས་0.8འཕར་ནས་55%ཙམ་གྱི་ཆུ་ཚད་དུ་སླེབས་པ་དང་། མངགས་ཐོ་གསར་པའི་སྟོན་གྲངས་ཟླ་བ་གོང་མ་ལས་བརྒྱ་ཆའི་གྲངས་3.7འཕར་ནས་55%ཡན་ཟིན་ཏེ་2023ལོའི་ཟླ་4པ་ཚུན་གྱི་ཟིན་ཐོ་གསར་པ་བཏོད་ཡོད།