གསར་འགོད་པར་སློབ་གསོ་པུའུ་ནས་ཤེས་རྟོགས་བྱུང་བར། ཉེ་ཆར། སློབ་གསོ་པུའུ་གཞུང་དོན་ཐིང་གིས་བརྡ་ཐོ་བཀྲམ་ནས་2025ལོའི་འོས་འགན་སློབ་གསོའི་ཀུན་གསལ་སློབ་བསྡུའི་ཆེད་དོན་བྱ་སྤྱོད་བཀོད་སྒྲིག་བྱས་པ་རེད། ཆེད་དོན་བྱ་སྤྱོད་ཀྱིས“སྦུག་མཐུན་གཡོ་བསྒྱུར” དང“རྩེར་སོན་སློབ་བསྡུའི”བྱེད་སྤྱོད་ལ་སྔར་བས་བཅོས་སྒྲིག་དང་། ཚོད་ལྟའི་རྣམ་གྲངས་སོགས་ཆེད་དམིགས་རིགས་ཀྱི་སློབ་མ་བསྡུ་བར་དོ་དམ་ཚོད་འཛིན་ནན་པོ་བྱེད་པ། སློབ་བསྡུ་དང་སློབ་ཞུགས་ལྷུ་ཚིགས་ཀྱི་ཚུལ་མིན་སྤྱོད་ཚུལ་དང་རུལ་སུངས་གནད་དོན་ལ་ཞིབ་བཤེར་ཐག་གཅོད་ནན་པོ་བཅས་བྱས་ཏེ། འོས་འགན་སློབ་གསོའི་སློབ་བསྡུ་དང་སློབ་ཞུགས་ལས་དོན་ཚད་ལྡན་ཅན་དང་། ཚན་རིག་ཅན། ལམ་ལུགས་ཅན་བཅས་ཀྱི་ཆུ་ཚད་མཐོ་རུ་རྒྱུན་མཐུད་གཏོང་རྒྱུ་ཡིན་པ་རེད།

བརྡ་ཐོའི་ནང་བླང་བྱ་བཏོན་དོན། རྒྱུགས་སྤྲོད་མི་དགོས་པའི་སློབ་ཞུགས་བླང་བྱ་དོན་འཁྱོལ་ནན་པོ་བྱེད་དགོས། འོས་འགན་སློབ་གསོའི་སློབ་གྲྭས་རིག་གནས་སློབ་ཚན་གྱི་རྒྱུགས་ལེན་དང་ཚད་ལེན་ཚོད་ལྟ་སོགས་ཀྱི་བྱ་ཐབས་བརྒྱུད་སློབ་མ་འདེམས་སྒྲུག་བྱེད་མི་ཆོག སློབ་ཞུགས་བྱས་རྗེས་འཛིན་གྲྭ་དོ་སྙོམས་འཛུགས་པ་ལས་གཙོ་གནད་འཛིན་གྲྭ་དང་མགྱོགས་དལ་འཛིན་གྲྭ་འཛུགས་མི་ཆོག “སློབ་ཚུགས་ཉིན་མོ”སོགས་ཀྱི་མིང་ཐོག་ནས་སྒྲིག་འགལ་སློབ་བསྡུ་དྲིལ་བསྒྲགས་བྱེད་པའམ་ཡང་ན་སློབ་མ་དང་ཁྱིམ་བདག་ལ་རྟོག་ཞིབ་བྱེད་པ་གཏན་འགོག་བྱེད་དགོས།

བརྡ་ཐོའི་ནང་ད་དུང་ནན་བཤད་བྱས་དོན། “སློབ་གསོ་སློབ་ཞུགས་དོན་དག་གཅིག”དོན་འཁྱོལ་དང་། ས་གནས་དེ་གའི་འོས་འགན་སློབ་གསོའི་སློབ་བསྡུ་དང་སློབ་ཞུགས་ལས་དོན་གྱི་མཛུབ་ཁྲིད་འཐུས་སྒོ་ཚང་དུ་བཏང་ནས། སློབ་ཞུགས་བརྒྱུད་རིམ་དེ་བས་ལེགས་སུ་གཏོང་བ་དང་དཔང་རྟགས་དཔྱད་གཞི་ཁུ་བསྡུ་བྱེད་དགོས། གྲངས་འཛིན་ཅན་གྱིས་སློབ་བསྡུ་སློབ་ཞུགས་ལས་དོན་ལ་ནུས་པ་སྦྱིན་ནས་མིང་ཐོ་འགོད་པ་དང་། དཔྱད་གཞིར་ཞིབ་བཤེར། སློབ་མ་བསྡུ་ལེན་བཅས“དྲ་ཐོག་ཀུན་སྒྲུབ”གང་མགྱོགས་མངོན་འགྱུར་ཐུབ་པ་བྱེད་དགོས། དྲ་ཕྱིའི་ཞབས་ཞུའི་ཆུ་ཚད་མཐོ་རུ་བཏང་སྟེ། “དྲ་ཕྱིར་སྒོ་གཅིག་ཁོ་ནར་འཛུལ་བར”སྐུལ་འདེད་གཏོང་དགོས།

བརྡ་ཐོའི་ནང་བཀོད་སྒྲིག་བྱས་དོན། སློབ་གསོ་པུས་ཟླ་4པ་ནས་ཟླ་9པའི་བར། ཀྲུང་གོ་སློབ་གསོ་ལྟ་སྐུལ་སྐད་འཕྲིན་སྤྱི་རྟགས་ལས་སྟེགས་སུ“འོས་འགན་སློབ་གསོའི་སྒྲིག་འགལ་སློབ་བསྡུའི་གནད་དོན”ཞེས་པའི་ཆེད་སྒྲིག་ལེ་ཚན་གཏོད་རྒྱུ་དང་། རིམ་ཁག་སློབ་གསོ་སྲིད་འཛིན་སྡེ་ཚན་གྱིས་ཐེར་འདོན་དང་ཞུ་གཏུག་བདག་སྤྲོད་བྱེད་པའི་ཐབས་ལམ་གཏོད་པ། རྫོང་རིམ་པའི་སློབ་གསོ་སྲིད་འཛིན་སྡེ་ཚན་གྱིས་ཆེད་མངགས་སློབ་བསྡུ་དང་སློབ་ཞུགས་ཐད་སྦྲེལ་ཁ་པར་བཙུགས་ནས་རང་འགུལ་ངང་ཡོངས་བསྒྲགས་བཅས་བྱེད་དགོས། ས་གནས་ཁག་གིས་སློབ་བསྡུའི་སྒྲིག་ཁྲིམས་ནན་པོའི་ཐོག་ནས་སྒྲིག་བཤེར་སོགས་སྡེ་ཚན་དང་མཉམ་དུ་སློབ་བསྡུའི་བརྒྱུད་རིམ་ལ་ལྟ་འདོམས་བྱེད་ཤུགས་དང་སྒྲིག་འགལ་བྱེད་སྤྱོད་ལ་ཞིབ་བཤེར་ཐག་གཅོད་བྱེད་ཤུགས་ཆེ་རུ་གཏོང་དགོས།