གྲོན་ཆུང་བསྲི་ཚགས་ལག་བསྟར་ནན་པོ་བྱེད་པ་ནི་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་ནང་དོན་གལ་ཆེན་ཞིག་རེད་ལ། སྙིང་རུས་བརྟན་འཁྱོངས་བྱེད་དགོས་པའི་ཡུན་རིང་གི་ལས་འགན་ཞིག་ཀྱང་རེད། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་གཏིང་ཟབ་བྱེད་པར། ངེས་པར་དུ་འཕྲོ་བརླག་གཏོང་བའི་སྤྱོད་ཚུལ་ངན་པ་གཏན་འགོག་ནན་པོ་བྱེད་དགོས་པ་མ་ཟད། ཏང་སྲོལ་བཟང་པོར་བརྟེན་ནས་མི་སེམས་གཅིག་སྒྲིལ་བྱས་ཏེ། “འཕྲོ་བརླག་ནི་ཞེ་ཁྲེལ་དང་གྲོན་ཆུང་ནི་གཟི་བརྗིད་ཡིན་པའི”སྤྱི་ཚོགས་ཀྱི་སྤྱོད་ཚུལ་དང་དམངས་སྲོལ་ལ་སྣེ་ཁྲིད་བྱེད་དགོས།

གྲོན་ཆུང་བསྲི་ཚགས་དང་རྒྱས་སྤྲོས་གཏན་འགོག་བྱེད་པ་ནི་རང་རེའི་ཏང་གི་ཁྱིམ་རྒྱུད་ཀྱི་ནོར་བུ་རེད་ལ། “རང་གཅུན”དང“ལས་དར”དང་འབྲེལ་བ་ཡོད་པའི་དོན་ཆེན་ཞིག་ཀྱང་རེད། འཕྲོ་བརླག་གཏོང་བའི་སྤྱོད་ཚུལ་ངན་པས་སྤྱི་ཚོགས་ཀྱི་རྒྱུ་ནོར་ལ་གྱོང་གུན་བཟོ་བ་མ་ཟད། ད་དུང་ཏང་གི་གཟུགས་བརྙན་ལ་གནོད་སྐྱོན་ཚབས་ཆེན་བཟོ་བ་དང་སྤྱི་ཚོགས་ཀྱི་དར་སྲོལ་ཇེ་སྡུག་ཏུ་གཏོང་གི་ཡོད།

“ལྕེ་ཐོག་གི་འཕྲོ་བརླག”དང་། “གཞུང་འཁོར་གང་བྱུང་སྤྱོད་པ” “ཚད་གཞི་ལས་བརྒལ་བའི་གཞུང་ཁང་ནང་སྡོད་པ”བཅས་བཅོས་སྒྲིག་གཙང་སེལ་བྱས་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཏང་ཀྲུང་དབྱང་གིས་གོང་འོག་སྣེ་ཁྲིད་མཐའ་འཁྱོངས་བྱས་ཏེ། གཟེར་འདེབས་ཀྱི་སྙིང་སྟོབས་ལ་བརྟེན་ནས་རྒྱས་སྤྲོས་ཀྱི་སྤྱོད་ཚུལ་ཡོ་བསྲང་བྱས་པར་བརྟེན། ཏང་སྲོལ་དང་སྤྱི་ཚོགས་ཀྱི་དར་སྲོལ་རྣམ་པ་གསར་རྐྱང་དུ་གྱུར་ཡོད།

བག་མེད་འཕྲོ་བརླག་སོགས་ཀྱི་སྤྱོད་ཚུལ་གྱི་གནད་དོན་ལ་མཁྲེགས་བཟུང་རང་བཞིན་དང་བསྐྱར་ཟློས་རང་བཞིན་ཧ་ཅང་ཆེན་པོ་ལྡན་པ་དུས་གཅིག་ཏུ་མཐོང་ཐུབ་པ་བྱེད་དགོས། མིག་སྔར། མངོན་སུམ་འཛེམ་མེད་ངང་འཕྲོ་བརླག་གཏོང་མཁན་ཉུང་དུ་ཕྱིན་མོད། འོན་ཀྱང་བྱེད་ཐབས་བསྒྱུར་ནས་ཚད་གཞི་ལས་བརྒལ་ཏེ་སྣེ་ལེན་དང་སྒྲིག་འགལ་ཟ་འཐུང་སོགས་བྱེད་མཁན་སྔར་བཞིན་ཡོད་ལ། རྒྱས་སྤྲོད་རྒྱས་གཤོམ་བྱེད་མཁན་ཡང་སྔར་བཞིན་གནས་ཡོད། ཆུང་ས་ནས་བརྗོད་ན། དཔྱད་ཡིག་པར་རྒྱག་དང་གཞུང་ལས་ཁང་གི་མཁོ་ཆས་ཉོ་སྐབས“གཞུང་དངུལ་ལ་སེར་སྣ་མི་བྱེད་པ”དང་། ཆེ་ས་ནས་བརྗོད་ན། དངུལ་གང་བྱུང་དུ་སྤྱོད་པ་དང་ཚད་གཞི་ལས་བརྒལ་བའི་འགྲོ་སོང་བཏང་ནས། “དངུལ་མ་གཏོར་ན་འཕྲོ་བརླག་ལ་བརྩི་བ”སོགས་ཀྱི་སྣང་ཚུལ་ས་གནས་ཁ་ཤས་སུ་ད་དུང་ཅུང་མངོན་གསལ་དོད་པོ་ཡོད།

འཕྲོ་བརླག་གཏོང་བའི་སྤྱོད་ཚུལ་ངན་པ་གཏན་འགོག་བྱེད་པར། ངེས་པར་དུ་ཐོག་ལྟར་དྲག་ལ་རླུང་ལྟར་མྱུར་བའི་བྱེད་ཐབས་ཡོད་དགོས་ལ། ནུས་ལྡན་གྱི་བྱེད་ཐབས་ཀྱང་ཡོད་དགོས། གནད་དོན་ལ་ཞིབ་བཤེར་གཏིང་ཟབ་བྱ་རྒྱུ་དང་ཡང་ཡང་བསྡུར་དགོས་ལ། ལྷག་པར་དུ་འཕྲོ་བརླག་གཏོང་བའི་རིགས་གསར་པ་དང་བྱེད་ཐབས་གསར་པར་ཞིབ་བཤེར་བྱེད་དགོས་པ་མ་ཟད། རང་འགུལ་ངང་མང་ཚོགས་དང་སྤྱི་ཚོགས་ཀྱི་ལྟ་སྐུལ་དང་ལེན་བྱས་ཏེ་འཕྲལ་བཤེར་འཕྲལ་བཅོས་བྱེད་དགོས། ཏང་གི་སྒྲིག་ཁྲིམས་སློབ་སྦྱོང་སློབ་གསོའི་གྲུབ་འབྲས་གང་ལེགས་སྤྱད་ནས་འཚོ་བ་རྒྱས་སྤྲོས་དང་། རྒྱས་སྤྲོས་ཆུད་ཟོས། ལོངས་སྤྱོད་ལ་ཞེན་ཆགས་སོགས་ཀྱི་སྣང་ཚུལ་ལ་དུས་ཐོག་ཏུ་ཉེན་བརྡ་གཏོང་བ་དང་། དུས་ཐོག་ཏུ་ཞིབ་བཤེར། དུས་ཐོག་ཏུ་བཅོས་སྒྲིག་བཅས་བྱེད་དགོས། ལམ་ལུགས་ཀྱི་ནུས་པ་ཐོན་པར་བྱས་ཏེ་འབྲེལ་ཡོད་བཅའ་ཁྲིམས་ཁྲིམས་སྲོལ་དང་སྲིད་ཇུས་བྱེད་ཐབས་སྔར་བས་འཐུས་སྒོ་ཚང་དུ་བཏང་སྟེ། རྒྱས་སྤྲོས་ཆུད་ཟོས་མཐའ་གཅིག་ཏུ་གཏན་འགོག་བྱེད་དགོས།

འཕྲོ་བརླག་གཏོང་བའི་སྤྱོད་ཚུལ་ངན་པ་གཏན་འགོག་ནན་པོ་བྱེད་དགོས་ལ། གྲོན་ཆུང་གི་འདུ་ཤེས་དེ་བས་བརྟན་དུ་གཏོང་དགོས། རྒྱ་ཆེའི་ཏང་ཡོན་ལས་བྱེད་པ་ཚོས་ངེས་པར་དུ་གྲོན་ཆུང་ལ་བརྟེན་ནས་རང་གཅུན་དང་གྲོན་ཆུང་ལ་བརྟེན་ནས་ལས་དར་མཐའ་འཁྱོངས་བྱས་ཏེ། ལྟོ་ཁམ་གང་དང་། ཆུ་ཤེལ་དམ་གཅིག གློག་ཏུའུ་གཅིག ཤོག་ལྷེ་གཅིག་བཅས་ནས་གྲོན་ཆུང་བྱེད་འགོ་འཛུགས་པ་དང་རང་དཔེ་གཞན་སྟོན་དང་ཧུར་བསྲིས་གྲོན་ཆུང་བྱས་ཏེ་གུང་ཁྲན་ཏང་མིའི་སྤྱོད་གཙང་གཞུང་དྲང་གི་ཆབ་སྲིད་རང་གཤིས་ནམ་ཡང་གནས་ཐུབ་པར་བྱེད་དགོས།