ཉིན་ཤས་རིང་ལོ་48ལ་སླེབས་པའི་ནད་པ་ཡེ་ཤེས་སྒྲོལ་མ་ཧ་ཅང་དགའ་པོ་བྱུང་ཞིང་། ཁོང་བོད་ནས་ཐོན་མི་དགོས་པར་ལྷ་སར་རྒྱང་ཁྲིད་འཕྲུལ་མིས་མོ་ནད་གཤགས་བཅོས་ལེགས་གྲུབ་བྱུང་བ་རེད།

ཡེ་ཤེས་སྒྲོལ་མའི་སེམས་ཁྲལ་སི་ཁྲོན་སློབ་ཆེན་ཧྭ་ཤིས་སྨན་ཁང་གཉིས་པའི་དགེ་རྒན་ཆེ་མོ་བ་ཀྲེང་དབྱིང་གིས་བསལ་བ་དང་། ཁོང་གིས་ཁྲེང་ཏུའུ་ཡི་གཤགས་བཅོས་ཁང་ནས་རྒྱང་ཁྲིད་བཀོལ་སྤྱོད་མ་ལག་བརྒྱུད་རང་སྐྱོང་ལྗོངས་བུད་མེད་དང་བྱིས་པའི་སྨན་ཁང་གི་གཤགས་བཅོས་ཁང་གི་འཕྲུལ་མིའི་ལག་པར་བརྟེན་ནས་གཤགས་བཅོས་བྱས་པ་རེད།

ཡེ་ཤེས་སྒྲོལ་མ་ཙམ་མ་ཟད་མི་མང་པོ་ཞིག་གི་སེམས་ནད་ཀྱང་བསལ་ཡོད། 2024ལོར། རང་ལྗོངས་ཀྱི་སྨན་བཅོས་འཕྲོད་བསྟེན་ཁྱབ་ཁོངས་ཀྱི་དམངས་འཚོའི་ལས་དོན་གྱི་བཀྲག་མདངས་འཚེར་ས་མང་པོ་ཐོན་ནས་མི་དམངས་མང་ཚོགས་ལ་དངོས་དངོས་རྗེན་རྗེན་གྱི་ཕན་པ་བཏགས་ཡོད།

སྨན་བཅོས་ཤེས་ལྡན་པའི“ཚོཌ་སྒྲིག་རྣམ་པའི”བོད་སྐྱོར་གྲུབ་འབྲས་མངོན་གསལ་དོད་པ།

“ཚོགས་སྒྲིག་རྣམ་པའི”བོད་སྐྱོར་སྨན་དོན་པས་ཐུམ་འབུའི་ནད་ཀྱི་ཚན་རིག་ཁྱབ་གདལ་ཤུགས་ཆེན་བཏང་བ་དང་། སི་ཁྲོན་སློབ་ཆེན་ཧྭ་ཤིས་སྨན་ཁང་གིས་ས་གནས་དེ་གའི་སྨན་ཁང་ལ་མཆིན་པའི་ཐུམ་འབུའི་ནད་ཀྱི་རང་ལུས་མཆིན་པ་སྤོ་འཛུགས་གཤགས་བཅོས་ལ་མཛུབ་ཁྲིད་བྱས་པས། ནད་པའི་ལོ་ལྔའི་གསོན་ཚད་20%མ་ཟིན་པ་ནས་82.1%བར་མཐོ་རུ་ཕྱིན་ཡོད།

ལྷ་ས་གྲོང་ཁྱེར་སྙེ་མོ་རྫོང་སོགས་སུ་བསྐྱོད་ནས་གྲུམ་བུ་ཚིགས་ཆེན་ནད་ཕོག་པའི་ནད་པ་2000ལྷག་ཙམ་ལ་དབྱེ་བཤེར་བྱས་ནས་རུས་ཚིགས་བརྗེ་བའི་གཤགས་བཅོས་120ལྷག་ཙམ་བྱས་པ་རེད།

མངའ་རིས་ས་ཁུལ་རུ་ཐོག་རྫོང་དང་། སྒར་རྫོང་། སྤུ་ཧྲེང་རྫོང་སོགས་སུ་བྱིས་པ་3315ལ་དབྱེ་བཤེར་བྱས་པ་མ་ཟད། ལྷན་སྐྱེས་སྙིང་ནད་ཕོག་པའི་བྱིས་པ་11ལ་རིན་པ་མི་དགོས་པར་གཤགས་བཅོས་བྱས་པ་རེད།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཀྲུང་དབྱང་དང་ཁ་གཏད་རོགས་སྐྱོར་བྱེད་མཁན་ཞིང་ཆེན་དང་གྲོང་ཁྱེར་གྱིས་ཁྱོན་མ་དངུལ་སྒོར་དུང་ཕྱུར་300ལྷག་ཙམ་བཏང་བ་རེད། མིག་སྔར། བོད་དུ་གྲོང་ཁྱེར་དང་གྲོང་གསེབ་ལ་ཁྱབ་པ་དང་། ནུས་པ་ཅུང་འཐུས་སྒོ་ཚང་བ། བཀོད་ཇུས་ཅུང་ལུགས་མཐུན་བཅས་ཀྱི་སྨན་བཅོས་འཕྲོད་བསྟེན་ཞབས་ཞུའི་མ་ལག་བཙུགས་པས། སྦྲུམ་མ་དང་ཕྲུ་གུ་དམར་འབྱར་ཤི་ཚད་ལྡབ་ཆག་ནས་མི་རེའི་ཆ་སྙོམས་ཀྱི་སྔོན་དཔག་ཚེ་ཚད་ལོ་72.5ཟིན་ཡོད།

མང་ཚོཌ་ཀྱི“ནད་གཞི་ལྟ་བའི་མཐའ་མའི་འགག་གནད”བསལ་བ།

ད་ལོ་ཚུན་དུ། བོད་སྐྱོར་ཞིང་ཆེན་དང་གྲོང་ཁྱེར་ཁག་གིས“དྲ་སྦྲེལ་དང་སྨན་བཅོས་བདེ་ཐང་ཟུང་འབྲེལ”ཐད་ཤུགས་སྣོན་རྒྱུན་མཐུད་བརྒྱབ་པ་དང་། རང་སྐྱོང་ལྗོངས་མི་དམངས་སྨན་ཁང་གིས“ཁྲག་ནད་ཆེད་ཚན་སྒོ་བསྟེན་སྨན་ཁང”གསར་སྣོན་བྱས་པ། ཡུན་རིང་གདན་ཞུས་བྱས་པའི་ཤང་དང་གྲོང་རྡལ་གྱི་འཕྲོད་བསྟེན་ཆེད་ལས་ལག་རྩལ་མི་སྣའི་ཐོབ་ཐང་ཐག་གཅོད་བྱས་པ་རེད།

རང་ལྗོངས་གྱིས“རྒྱང་ཁྲིད་སྨན་བཅོས་རོགས་སྐྱོར་འཚོལ་ཞིབ་དང་ས་གནས་དེ་གའི་སྨན་དོན་མི་སྣ་གསོ་སྐྱོང་ཟུང་འབྲེལ”ལ་བརྟེན་ནས་མང་ཚོགས་ཀྱི“ནད་གཞི་ལྟ་བའི་མཐའ་མའི་འགག་གནད”བསལ་ཡོད།

རྒྱང་ཁྲིད་སྨན་བཅོས་ཞབས་ཞུ་རང་ལྗོངས་ཀྱི་ཤང་དང་གྲོང་རྡལ་གྱི་འཕྲོད་བསྟེན་སྨན་ཁང་ཚང་མར་ཁྱབ་ཡོད་པས། རྙོག་འཛིང་ཆེ་བའི་མགོ་སྐྲན་དང་བྱིས་པའི་ཁྲག་རིལ་དཀར་པོའི་ནད་གཞི་སོགས་ནད་ཆེན་400ལྷག་ཙམ་རང་སྐྱོང་ལྗོངས་ནས་སྨན་བཅོས་ཐུབ་པ་དང་། དོས་དྲག་གི་སྙིང་རྩ་འགགས་པ་དང་ཀླད་པའི་ཁྲག་རྩའི་ནད་གཞི་སོགས་ནད་གཞི་འབྲིང་རིགས་2000ལྷག་ཙམ་གྲོང་ཁྱེར་དང་ས་ཁུལ་ནས་སྨན་བཅོས་ཐུབ་པ། རྒྱུན་མཐོང་གི་ནད་གཞི་ཆུང་ངུ་ས་གནས་ས་ཐོག་ནས་སྨན་བཅོས་ཐུབ་ཀྱི་ཡོད་པ་རེད།

ཤེས་རྟོགས་བྱུང་བར་གཞིགས་ན། ཉེ་བའི་ལོ་ལྔའི་རིང་། བོད་ཀྱི་ནད་པ་ཕྱིར་སྨན་བཅོས་ལ་སྐྱོད་ཚད་བརྒྱ་ཆའི་གྲངས་12ཆག་ཡོད།

བདེ་ཐང་དབུལ་སྐྱོར་དང་གྲོང་གསེབ་དར་རྒྱས་ཕན་ཚུན་སྦྲེལ་མཐུད་བྱས་པ།

“བཀའ་དྲིན་ཆེ། ཁྱེད་རང་སྐུ་ལས་ཁག་སོང”“དཀའ་ལས་ཁག་མ་བྱུང་། གཤགས་བཅོས་ཡག་པོ་བྱུང་སོང་། བཀྲ་ཤིས་བདེ་ལེགས”ཐེན་ཅིན་ཐའེ་ཏ་རྒྱལ་སྤྱིའི་སྙིང་ཁམས་ཁྲག་རྩའི་ནད་གཤགས་བཅོས་ཁང་གི་ཕྱི་རོལ་དུ་ནག་ཆུ་གྲོང་ཁྱེར་ཉི་མ་རྫོང་ནས་ཡོང་བའི་ཉི་མ་དོན་གྲུབ་ཀྱི་ཕ་མས་ལག་ཏུ་ཁ་བཏགས་ཁྱེར་ནས་མིག་ལ་མཆི་བཞག་འཁོར་བཞིན་དུ་གཤགས་བཅོས་བྱེད་མཁན་སྨན་པར་ཐུགས་རྗེ་ཆེ་ཞུས་པ་རེད།

ལོ་16ལ་སླེབས་པའི་ཉི་མ་དོན་གྲུབ་དང་ལོ་14ལ་སླེབས་པའི་ཀླ་དར་གཉིས་གཅེན་གཅུང་ཡིན་པ་དང་ནག་ཆུ་གྲོང་ཁྱེར་ཉི་མ་རྫོང་ནས་ཡིན་ཞིང་། ལྷན་སྐྱེས་སྙིང་ནད་དབྱེ་བཤེར་བྱེད་སྐབས་གཅེན་གཅུང་གཉིས་པོའི་་ནད་གཞི་ཅུང་ཚབས་ཆེ་ཙམ་ཡོད་པའི་ནད་རྟགས་གཏན་འཁེལ་བྱུང་ཡང་སྟབས་ལེགས་པ་ཞིག་ལ་གཅེན་གཅུང་གཉིས་ལ་གཤགས་བཅོས་བྱེད་པའི་གོ་སྐབས་ཡོད་པས་རིན་མེད་ངང་གཤགས་བཅོས་བྱས་ཡོད།

ཤེས་རྟོགས་བྱུང་བར་གཞིགས་ན། རང་ལྗོངས་ཀྱིས་བདེ་ཐང་དབུལ་སྐྱོར་གྱི་ལོ་གསུམ་འགག་སྒྲོལ་བྱ་སྤྱོད་གཏིང་ཟབ་སྤེལ་ནས་ནད་ཆེན་རིགས་38ཕོག་མཁན་ནད་པ་དབུལ་པོར་ཚད་ལྡན་ཅན་གྱི་གཅིག་སྡུད་སྨན་བཅོས་བྱེད་པ་དང་། གཅོང་ནད་ཕོག་པའི་ནད་པ་དབུལ་པོར་གཞི་རྩའི་སྐྱོབ་བཅོས་དང་ཁྱིམ་ཚང་སྨན་པའི་གན་འཇོག་དོ་དམ་ཞབས་ཞུ་བྱེད་པ། ནད་གཞི་ལྕི་པོ་ཕོག་པའི་ནད་པ་དབུལ་པོར་ཐ་སྐྱོང་འགན་ལེན་བཅས་བྱས་ནས། རང་ལྗོངས་ཀྱི་མི་རིགས་ཁག་གི་མང་ཚོགས་རྒྱལ་ཡོངས་མི་དམངས་དང་མཉམ་དུ་འབྱོར་འབྲིང་སྤྱི་ཚོགས་ཕྱོགས་སུ་བསྐྱོད་ཐུབ་པའི་འགན་ལེན་ནུས་ལྡན་བྱས་ཡོད།