བོད་དུ་འོད་གསོག་གློག་ཁང་ཆེ་ཤོས་བསྐྲུན་ནས་དྲ་སྦྲེལ་གློག་གཏོང་བྱེད་པ།
ཉེ་ཆར། ཀྲུང་གོ་ཧྭ་ནུས་ཀྱིས་བོད་དུ་འོད་གསོག་གློག་ཁང་ཆེ་ཤོས་ཏེ། ཧྭ་ནུས་སྐྱ་བ་དུས་ཐེངས་དང་པོའི་འོད་གསོག་གློག་ཁང་གིས་དྲ་སྦྲེལ་གློག་གཏོང་བྱེད་པའི་ཁྱབ་བསྒྲགས་བྱས་པ་རེད།
ཧྭ་ནུས་སྐྱ་བ་དུས་ཐེངས་དང་པོའི་འོད་གསོག་གློག་ཁང་ནི་ལྷོ་ཁ་གྲོང་ཁྱེར་ཆུ་གསུམ་རྫོང་སྐྱ་བ་གྲོང་ཚོར་གནས་པ་དང་། སྒྲིག་སྦྱོར་བྱས་པའི་འཕྲུལ་འཁོར་ནས་གློག་གཏོང་ཚད་ཆན་ཝ་ཁྲི་25ཟིན་པ་དང་། ཆུ་ཚོད་ཀྲའོ་ཝ་50དང་ཀྲའོ་ཝ་200ཡི་ནུས་གསོག་མ་ལག་སྒྲིག་ཡོད་པས། བོད་དུ་བསྐྲུན་ཟིན་པའི་འོད་གསོག་གློག་གཏོང་རྣམ་གྲངས་ཆེ་ཤོས་དེ་ཡིན། རྣམ་གྲངས་ཀྱི་ནུས་གསོག་མ་ལག་གིས་ཉིན་མོའི་གློག་ནུས་ལྷག་མ་གསོག་འཇོག་ཐུབ་པ་དང་མཚན་མོར་བསྟུད་མར་ཆུ་ཚོད་4ཡི་ནང་ཆུ་ཚོད་ཆན་ཝ་ཁྲི་20ཡི་གློག་བཏང་ནས་ས་གནས་དེ་གའི་གློག་ཤུགས་མཁོ་སྤྲོད་འགན་ལེན་ནུས་པ་ཆེ་རུ་ནུས་ལྡན་འགྲོ་རྒྱུ་ཡིན་པ་རེད།
ཧྭ་ནུས་ཡར་ཀླུང་གཙང་པོ་ཀུང་སིའི་སྐྱ་བ་དུས་ཐེངས་དང་པོའི་འོད་གསོག་རྣམ་གྲངས་ཀྱི་ཅིང་ལི་ལི་ཡུང་གིས་སྐྱ་བ་དུས་ཐེངས་དང་པོའི་འོད་གསོག་གློག་ཁང་གི་ཆ་སྙོམས་ས་བབ་མཐོ་ཚད་སྨི་4500ཡན་ཡོད་པ་དང་རྣམ་གྲངས་ཐོན་སྐྱེད་བྱེད་འགོ་ཚུགས་རྗེས་ལོ་རེའི་ཆ་སྙོམས་གློག་གཏོང་ཚད་ཆུ་ཚོད་ཆན་ཝ་དུང་ཕྱུར་3.7ཙམ་ཟིན་རྒྱུ་དང་། དེས་བོད་ཀྱི་གློག་སྤྱོད་ཚད་མཐོ་ཤོས་ཀྱི་དགོས་མཁོ་སྐོང་ཐུབ་པ་དང་ས་གནས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་བརྟན་པའི་ནུས་རྒྱུ་གཙང་མ་འགན་ལེན་མཁོ་འདོན་ཐུབ་རྒྱུ་རེད་ཅེས་ངོ་སྤྲོད་བྱས་པ་རེད།