ཉེ་ཆར། གསར་འགོད་པས་ཀྲུང་གོ་མི་དམངས་དངུལ་ཁང་མངའ་རིས་ས་ཁུལ་ཡན་ལག་དངུལ་ཁང་ནས་ཤེས་རྟོགས་བྱས་པར། 2025ལོའི་ཟླ་2པའི་ཟླ་མཇུག་བར། ས་ཁུལ་དེས་སྲིད་གཞུང་དང་། དངུལ་ཁང་། ཁེ་ལས་བཅས་ཀྱི་མཉམ་ལས་ལམ་སྲོལ་གསར་གཏོད་བྱས་པ་བརྒྱུད་རིམ་རྩིས་བརྒྱབ་ན་ཁེ་ལས་199ལ་ཡིད་རྟོན་ལག་ཁྱེར་སྤྲད་པ་དང་དངུལ་བུན་སྒོར་དུང་ཕྱུར་3.33བཏང་བའི་ནང་ཀུན་ཕན་ཕྲན་ཚེགས་ཁེ་ལས་ཀྱི་དངུལ་བུན་ལྷག་གྲངས་དུས་མཚུངས་ལས་35.40%འཕར་བ་དང་། དམངས་གཉེར་ཁེ་ལས་ཀྱི་དངུལ་བུན་ལྷག་གྲངས་31.45%འཕར་བ། ལྗང་མདོག་དངུལ་བུན་གྱི་ལྷག་གྲངས་29.22%འཕར་ནས་ཁུལ་ཁོངས་དཔལ་འབྱོར་དང་དངུལ་རྩའི་སྤུས་ཚད་མཐོ་བའི་འཕེལ་རྒྱས་ཀྱི་རྣམ་པ་མངོན་ཡོད།

དངོས་ཚན་དཔལ་འབྱོར་གྱི་མ་དངུལ་བསྡུ་སྒྲིལ་གྱི་དཀའ་གནད་ཐག་གཅོད་བྱ་ཆེད། མི་དམངས་དངུལ་ཁང་མངའ་རིས་ས་ཁུལ་ཡན་ལག་དངུལ་ཁང་གིས་ས་ཁུལ་འཕེལ་སྒྱུར་ཨུ་ལྷན་དང་ནོར་སྲིད་ཅུས་སོགས་སྡེ་ཚན་དྲུག་དང་མཉམ་དུ་བརྒྱུད་རིམ་ཅན་གྱི་དངུལ་རྩའི་ཞབས་ཞུའི་མ་ལག་བཙུགས་པ་རེད། 《མངའ་རིས་ས་ཁུལ་གྱི“ཞིང་གསུམ”ཁྱབ་ཁོངས་ཀྱི་སྲིད་གཞུང་དང་། དངུལ་ཁང་། ཁེ་ལས་བཅས་མཉམ་ལས་ཀྱི་ཕུགས་ཕན་ལམ་སྲོལ་གྱི་ལག་བསྟར་ཇུས་གཞི》བཏོན་པ་དང་འབྲེལ། འགུལ་རྣམ་གསར་སྒྱུར་ལམ་སྲོལ་བཙུགས་པ་བརྒྱུད་ཆེད་དོན་སྦྲེལ་མཐུད་བྱེད་སྒོ་ཐེངས་21གྲུབ་འབྲས་ཐོབ་པའི་ངང་གཉེར་བ་རེད། ལྷག་པར་དུ“དངུལ་བུན་ཐོག་མ་དང་འབབ་ཁུངས”ལམ་སྲོལ་གསར་གཏོད་བྱས་ནས་བཙུགས་པར་ཕན་འབྲས་མངོན་གསལ་དོད་པོ་ཐོན་ནས་རིམ་རྩིས་བརྒྱབ་ན་དངུལ་བུན་མེད་པའི་ཁེ་ལས་79ལ་མ་དངུལ་བསྡུ་སྒྲིལ་བྱེད་རོགས་བྱས་ནས་ཐེངས་དང་པོར་དངུལ་བུན་གཏོང་ཚད་སྒོར་དུང་ཕྱུར་1.4ཟིན་ཡོད་པ་རེད།