གྲོང་ཁྱེར་དང་གྲོང་གསེབ་འབྲེལ་མཐུད་ཀྱི“བར་བརྒལ་ས་ཁོངས”ཡིན་པའི་ངོས་ནས་གསང་ཡིབ་ལམ་སྒྱུར་བཀོད་ནི་གྲོང་ཁྱེར་ཅན་གྱི་འཕེལ་རིམ་ནང་ངེས་པར་དུ་ཐག་གཅོད་དགོས་པའི་གནད་དོན་ཞིག་རེད། གསང་ཡིབ་ལམ་ནི་ལྷ་སའི་བྱང་ཤར་རྒྱུད་དུ་གནས་པ་དང་ལྷོ་བྱང་དུ་སྐྱོད་སའི་ནེའུ་ཆུང་རི་འདབས་དང་འབྲེལ་ཡོད། ས་བབ་དམིགས་བསལ་རྐྱེན་གྱིས་ནེའུ་ཆུང་རི་ནི་རང་བྱུང་སྲུང་བཅད་ལྟར་བྱང་ཤར་གྱི་རླུང་རྒྱུན་བཀག་སྟབས། རི་འདབས་དང་ལུང་གཞུང་གི་འབྲེལ་མཚམས་སུ“རླུང་བུ་འཚུབ་ས”ཆགས་ཡོད། རླུང་འཚུབ་ཆེ་བའི་གནམ་གཤིས་བསྟན་རིམ་བཞིན་རླུང་རྒྱུན་ཇེ་དྲག་ཏུ་གྱུར་ནས་བྱེ་རླུང་གསང་ཡིབ་ལམ་དུ་ལྡང་གི་ཡོད། གྲོང་ཁྱེར་དང་གྲོང་གསེབ་འབྲེལ་མཚམས་སུ་གནས་པའི་དབང་གིས་ཉེ་འགྲམ་གྱི་ཡུལ་མིས་ཟོག་འདྲེན་རླངས་འཁོར་གཏོང་གི་ཡོད་ལ་ཕར་འགྲོ་ཚུར་འོང་མང་བའི་དབང་གིས་ལམ་གཞི་བརྡིབས་ཡོད།

“དགུན་ཁར་གནམ་གཤིས་སྐམ་ཤས་ཆེ་བ་དང་རླུང་བུ་ལྡང་མ་ཐག་ཐལ་རྡུལ་ཁང་པའི་ནང་འཛུལ་ཡོང་གི་ཡོད་པས། གཙང་སྦྲ་ཡང་སེ་བྱེད་དགོས་ཀྱི་ཡོད”ཅེས་ལྕགས་ཆས་ཚོང་ཁང་གཉེར་སྐྱོང་བྱས་ནས་ལོ་15ཙམ་སོང་བའི་བཀྲ་ཤིས་དོན་གྲུབ་ཀྱིས་སྒོ་ཡོལ་བཀྱགས་ཏེ་གྱང་ཟུར་གྱི་གད་གཞོང་སྟོན་བཞིན་མགོ་བོ་གཡུག་གཡུག་བྱས་ཏེ་བརྗོད་ཅིང་། གསང་ཡིབ་ལམ་གྱི་གནས་མཆོག་ཤིང་པད་མའི་དགའ་ཚལ་དང་དྲོ་སྐྱིད་ཁྱིམ་གཞིས་ཁུལ་ཆུང་གཉིས་ཀྱི་དུད་ཚང་གི་ངོས་ནས་བརྗོད་ན། ཨར་འདམ་ལམ་མིན་པའི་ས་ལམ་དུ་འགྲོ་འོང་བྱེད་དཀའ་བ་དང་སློབ་གྲྭར་ཡང་སྐྱོད་ཁག་པོ་ཡོད། “ཚ་བོས་རྐང་འཁོར་ལ་བཞོན་སྟངས་སྦྱོང་སྐབས་ང་རང་ཐེངས་གསུམ་འགྱེལ་མྱོང་། རྐང་པར་ད་དུང་རྨ་ཤུལ་ཡོད”ཅེས་བརྗོད་བཞིན་ལོ་68ལ་སླེབས་པའི་ཚེ་རིང་ལྷ་མོས་གོས་ཐུང་ཡར་བརྫེས་པ་ན་པུས་མོ་སྟེང་གི་རྨ་ཤུལ་རྙིང་པ་གསལ་པོར་མཐོང་ཐུབ།

གྲོང་ཁྱེར་དང་གྲོང་གསེབ་ཀྱི་ཁོར་ཡུག་ཕྱོགས་བསྡུས་བཅོས་སྒྲིག་ཆེན་པོའི་བྱ་སྤྱོད་དང་སྲང་ལམ་རྒྱབ་ཕྱོགས་ཀྱི་སྲང་ལམ་ཆུང་ཆུང་སྒྱུར་བཀོད་ལས་དོན་ལ་སྐུལ་འདེད་གཏིང་ཟབ་བཏང་བ་དང་བསྟུན། 2024ལོའི་ལོ་མཇུག་ཏུ་ཁྲེང་ཀོན་ཆུས་ཀྱིས་གསང་ཡིབ་ལམ་དེ“བྱ་སྤྱོད་ཆེན་པོ་བརྒྱད”ཀྱི་གཙོ་གནད་སྒྱུར་བཀོད་ཀྱི་གསལ་ཐོའི་ནང་བཅུག་ཡོད། ད་ལོའི་བོད་ཀྱི་ལོ་གསར་ཚར་མ་ཐག་གསང་ཡིབ་ལམ་དུ་ཁྱོན་ཡོངས་ནས་ཨར་ལས་བྱེད་འགོ་ཚུགས་ཡོད། ད་ཐེངས་སྒྱུར་བཀོད་ཐད་དེ་སྔོན་གྱི་ཉམས་མྱོང་བསྡུ་ལེན་བྱས་ཏེ་ལམ་ཐིག་ཧྲིལ་པོར་མཁྲེགས་ཤིང་བདག་སྐྱོང་མ་གནས་དམའ་བའི་ཨར་འདམ་ལམ་བཟོས་པའི་དུས་མཚུངས་སུ་ལམ་རྨང་གི་གྲུབ་ཆ་ལེགས་སུ་བཏང་ནས་ཟོག་འདྲེན་རླངས་འཁོར་འགྲོ་སྐྱོད་དགོས་མཁོ་སྐོང་རྒྱུ་རེད། ཟླ་3པའི་ཟླ་མཇུག་བར་ལམ་དུམ་ཁྱོན་ཡོངས་ནས་མཁྲེགས་འགྱུར་བྱས་པ་དང་ཚད་ལྡན་ཅན་གྱི་རླངས་འཁོར་འཇོག་ས་89བཟོས་ཚར་བ་མ་ཟད། སྨི་1700ཟིན་པའི་ལོགས་དབྱེ་སྲུང་སྒྲོམ་ཡང་ལས་མཇུག་སྒྲིལ་ཉེར་ཡོད་པ་རེད།

“སྔོན་ཆད་ལམ་ཁར་ས་དོང་གིས་ཁེངས་ཡོད་མོད། ད་ཆ་ཕྲུ་གུའི་འདེད་འཁོར་དེད་ནས་སྐྱོད་ཀྱང་ཆོག གནས་སྐབས་སུ་རྩྭ་རྩི་ཤིང་བཏབ་མེད་ཀྱང་སྡེ་ཁུལ་གྱིས་མ་འོངས་པར་མེ་ཏོག་སྒྲིག་རྒྱུ་ཡིན་ཟེར”ཞེས་ཆོས་གྲུབ་ཀྱིས་གནས་མཆོག་ཤིང་པད་མའི་དགའ་ཚལ་ཁུལ་ཆུང་གི་ནུབ་སྒོའི་འགྲམ་དུ་སྐྱོད་བཞིན་བཤད།

མིག་སྔར་དོག་སྡེ་ཁྲོམ་གཞུང་དར་རྒྱས་སྡེ་ཁུལ་གྱིས་སྟོང་བཙན་ལམ་དང་། དོག་སྡེ་ལམ་གྱི་གོ་མཚོན་བཟོ་གྲྭའི་ལམ་དུམ། གསང་ཡིབ་ལམ་བཅས་ཀྱི་ལམ་ངོས་ལེགས་སུ་གཏོང་བཞིན་ཡོད་ཅིང་། ས་ཆ་དེའི་ལམ་ངོས་སྨི་ངོས་གྲུ་12373མཁྲེགས་འགྱུར་བྱས་པ་དང་ཆུ་སིམ་ནུས་པའི་སོ་ཕག་སྨི་ངོས་གྲུ་2800བཏིང་ཡོད། ཟླ་4པའི་ཟླ་དཀྱིལ་དུ་ཨར་ལས་ཡོངས་སུ་འགྲུབ་རྒྱུ་ཡིན་པ་དང་། ལས་མཇུག་འགྲིལ་རྗེས་མཐའ་འཁོར་གྱི་མང་ཚོགས་ཁྲི་3ལྷག་ཙམ་གྱི་འགྲོ་སྐྱོད་ཆ་རྐྱེན་ལེགས་སུ་ཆེས་ཆེར་འགྲོ་རྒྱུ་རེད།