ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་31ཉིན་གློག་འཕྲིན་འབྱོར་གསལ། ཚེས་31ཉིན། ཀྲུང་གུང་ཀྲུང་དབྱང་གཞུང་དོན་ཐིང་དང་རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གིས་བཀྲམ་པའི《སྤྱི་ཚོགས་ཀྱི་ཡིད་རྟོན་མ་ལག་འཐུས་སྒོ་ཚང་དུ་གཏོང་རྒྱུའི་སྐོར་གྱི་བསམ་འཆར》ཕྱི་ཕྱོགས་ལ་ཁྱབ་བསྒྲགས་བྱས་པ་རེད།

《བསམ་འཆར》ནང་བསྟན་དོན། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་དང་ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན་ལག་བསྟར་གཏིང་ཟབ་བྱས་ཏེ། ཏང་གི་འགོ་ཁྲིད་མཐའ་འཁྱོངས་དང་དེར་ཤུགས་སྣོན་རྒྱག་པ་དང་། བརྟན་ཐོག་ཡར་འཕེལ་གྱི་ལས་ཀའི་རྩ་བའི་དགོངས་གཞི་མཐའ་འཁྱོངས་བྱེད་པ། འཕེལ་རྒྱས་ཀྱི་འདུ་ཤེས་གསར་པ་ཆ་ཚང་བ་དང་། གནད་ལ་འཁེལ་བ། ཕྱོགས་ཡོངས་བཅས་ཀྱི་སྒོ་ནས་ལག་བསྟར་བྱེད་པ། སྲིད་གཞུང་གིས་ཁྲིད་སྟོན་དང་། ཁྲོམ་རས་སྐུལ་སྤེལ། སྤྱི་ཚོགས་ཀྱིས་མཉམ་སྐྲུན་བཅས་བྱ་རྒྱུ་མཐའ་འཁྱོངས་བྱེད་པ། ཡིད་རྟོན་རིག་གནས་དར་སྤེལ་གཏོང་རྒྱུ་མཐའ་འཁྱོངས་བྱེད་པ། སྤྱི་པའི་ཡིད་རྟོན་ཆ་འཕྲིན་དང་ཁྲོམ་རའི་ཡིད་རྟོན་ཆ་འཕྲིན་ཕན་ཚུན་མཉམ་འདྲེས་ཡོང་རྒྱུ་མཐའ་འཁྱོངས་བྱེད་པ། ཡིད་རྟོན་གྱི་བྱ་དགའ་ཆད་གཅོད་བྱེད་སྟངས་ལུགས་མཐུན་དང་ཁྲིམས་མཐུན་ཡོང་རྒྱུ་མཐའ་འཁྱོངས་བྱེད་པ། བྱེད་པོ་སྣ་ཚོགས་ལ་ཁྱབ་པ་དང་། ལམ་ལུགས་སྒྲིག་སྲོལ་གཅིག་ཏུ་གྱུར་པ། མཉམ་སྐྲུན་མཉམ་སྤྱོད་ཐུབ་པ་བཅས་ཀྱི་སྤྱི་ཚོགས་ཀྱི་ཡིད་རྟོན་མ་ལག་འཛུགས་པ། སྤྱི་ཚོགས་ཀྱི་ཡིད་རྟོན་མ་ལག་དང་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཕྱོགས་ཁག་དང་ལྷུ་ཚིགས་ཁག་མཉམ་འདྲེས་གཏིང་ཟབ་ཡོང་རྒྱུར་སྐུལ་འདེད་གཏོང་བ་བཅས་བྱས་ནས། རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་པོ་འཛུགས་སྐྲུན་མགྱོགས་པོ་བྱེད་པ་དང་། དྲང་གཞག་དང་གོ་རིམ་ལྡན་པའི་འགྲན་རྩོད་ཁྲོམ་རའི་སྒྲིག་ལམ་ལ་སྲུང་སྐྱོང་བྱེད་པ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་བཅས་ཀྱི་ཆེད་དུ་འདེགས་སྐྱོར་ནུས་ལྡན་བྱེད་དགོས།

《བསམ་འཆར》ནང་བསྟན་དོན། བྱེད་པོ་སྣ་ཚོགས་ལ་ཁྱབ་པའི་སྤྱི་ཚོགས་ཡིད་རྟོན་མ་ལག་འཛུགས་དགོས་ཤིང་། སྲིད་དོན་གྱི་ཡིད་རྟོན་འཛུགས་སྐྱོང་གཏིང་ཟབ་ཏུ་གཏོང་བ་དང་། གཉེར་སྐྱོང་བྱེད་པོའི་ཡིད་རྟོན་འཛུགས་སྐྱོང་ལ་ཤུགས་སྣོན་རྒྱག་པ། སྤྱི་ཚོགས་རྩ་འཛུགས་ཀྱི་ཡིད་རྟོན་འཛུགས་སྐྱོང་མགྱོགས་པོ་བྱེད་པ། རང་བྱུང་མིའི་ཡིད་རྟོན་འཛུགས་པར་གོ་རིམ་ལྡན་པའི་ངང་སྐུལ་འདེད་གཏོང་བ། ཁྲིམས་འཛིན་ཁྲིམས་སྒྱུར་མ་ལག་གི་ཡིད་རྟོན་འཛུགས་སྐྱོང་ལ་ཕྱོགས་ཡོངས་ནས་ཤུགས་སྣོན་རྒྱག་པ་བཅས་བྱེད་དགོས།

《བསམ་འཆར》ནང་བསྟན་དོན། སྤྱི་ཚོགས་ཡིད་རྟོན་མ་ལག་གི་གྲངས་གཞིའི་རྨང་གཞི་སྲ་བརྟན་དུ་གཏོང་དགོས་ཤིང་། ཕྱོགས་ཡོངས་དང་། ཆ་ཚང་བ། ཡང་དག་པ་བཅས་ཀྱི་ཡིད་རྟོན་ཟིན་ཐོ་འགོད་པ་དང་། ཡིད་རྟོན་ཆ་འཕྲིན་བསྡུ་རུབ་མཉམ་སྤྱོད་བྱེད་ཤུགས་ཆེ་རུ་གཏོང་བ། སྤྱི་པའི་ཡིད་རྟོན་ཆ་འཕྲིན་གྱི་གཅིག་གྱུར་ཡོངས་བསྒྲགས་ཀྱི་ལམ་ལུགས་འཛུགས་པ། སྤྱི་པའི་ཡིད་རྟོན་ཆ་འཕྲིན་སྒོ་འབྱེད་དང་འཁོར་རྒྱུག་ལ་གོ་རིམ་ལྡན་པའི་སྒོ་ནས་སྐུལ་འདེད་གཏོང་བ། ཡིད་རྟོན་ཆ་འཕྲིན་བདེ་འཇགས་ལ་སྲུང་སྐྱོང་བྱེད་ཤུགས་ཆེ་རུ་གཏོང་བ་བཅས་བྱེད་དགོས།

《བསམ་འཆར》ནང་བསྟན་དོན། ཡིད་རྟོན་ཡོད་རིགས་ལ་བསྔགས་སྐུལ་དང་ཡིད་རྟོན་མེད་རིགས་ལ་བསླབ་འདོམས་བྱེད་པའི་ལམ་སྲོལ་འཐུས་སྒོ་ཚང་དུ་གཏོང་དགོས་ཤིང་། ཡིད་རྟོན་བྱ་སྤྱོད་ལ་སྐུལ་ལྕག་བྱེད་ཤུགས་ཆེ་རུ་གཏོང་བ་དང་། ཁྲིམས་ལུགས་དང་སྒྲིག་སྲོལ་གཞིར་བཟུང་ཡིད་རྟོན་མེད་རིགས་ལ་བསླབ་འདོམས་བྱེད་པ། གཅིག་གྱུར་གྱི་ཡིད་རྟོན་སླར་གསོ་ལམ་ལུགས་འཐུས་སྒོ་ཚང་དུ་གཏོང་བ་བཅས་བྱེད་དགོས།

《བསམ་འཆར》ནང་བསྟན་དོན། ཡིད་རྟོན་རྨང་གཞིར་བྱེད་པའི་ལྟ་འདོམས་དང་བཅོས་སྐྱོང་ལམ་སྲོལ་འཐུས་སྒོ་ཚང་དུ་གཏོང་དགོས་ཤིང་། ཡིད་རྟོན་གདེང་འཇོག་རྨང་གཞིར་བྱས་ནས་རིམ་པ་དང་རིགས་དབྱེའི་ལྟ་འདོམས་བྱེད་པ་དང་། ཡིད་རྟོན་ཁས་ལེན་ལམ་ལུགས་འཛུགས་པ་དང་འཐུས་སྒོ་ཚང་དུ་གཏོང་བ། ཡིད་རྟོན་སྙན་ཞུ་བཀོལ་སྤྱོད་གཏིང་ཟབ་བྱེད་པར་སྐུལ་འདེད་གཏོང་བ། སྲིད་གཞུང་གིས་གན་རྒྱ་འཇོག་པ་དང་གན་རྒྱ་འཇོག་པར་མཛུབ་ཁྲིད་བྱེད་པ་སོགས་ཀྱི་ཁ་ཆད་ལག་བསྟར་བྱེད་པར་ཡིད་རྟོན་ལྟ་འདོམས་བྱེད་ཤུགས་ཆེ་རུ་གཏོང་བ། ཡིད་རྟོན་ནུས་སྐྱེད་ཀྱི་གཞི་རིམ་བཅོས་སྐྱོང་ལ་སྐུལ་འདེད་གཏོང་བ། སྤྱི་ཚོགས་ཀྱི་ཡིད་རྟོན་མ་ལག་གི་བཅའ་ཁྲིམས་དང་ཁྲིམས་སྲོལ་ལམ་ལུགས་འཐུས་སྒོ་ཚང་དུ་གཏོང་བ་བཅས་བྱེད་དགོས།

《བསམ་འཆར》ནང་བསྟན་དོན། སྤྱི་ཚོགས་ཀྱི་ཡིད་རྟོན་མ་ལག་ཁྲོམ་ར་ཅན་དང་སྤྱི་ཚོགས་ཅན་གྱི་ཆུ་ཚད་མཐོ་རུ་གཏོང་དགོས་ཤིང་། ཡིད་རྟོན་ཞབས་ཞུའི་ཁྲོམ་ར་སྐྱེད་སྲིང་བྱེད་ཤུགས་ཆེ་རུ་གཏོང་བ་དང་། ཡིད་རྟོན་མ་དངུལ་བསྡུ་སྒྲིལ་དང་ཡིད་རྟོན་ཉོ་ཚོང་ལ་སྐུལ་འདེད་གཏིང་ཟབ་གཏོང་བ། ལས་སྟེགས་དཔལ་འབྱོར་ཁྱབ་ཁོངས་ཀྱི་ཡིད་རྟོན་འཛུགས་སྐྱོང་ལ་ཤུགས་སྣོན་རྒྱག་པ། ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་ཞབས་འདེགས་ཞུ་བ་བཅས་བྱེད་དགོས།

《བསམ་འཆར》ནང་། སྒྲིག་འཛུགས་དང་ལག་བསྟར་བྱ་རྒྱུར་ཤུགས་སྣོན་རྒྱག་དགོས་ཤིང་། ས་ཁུལ་ཁག་དང་འབྲེལ་ཡོད་སྡེ་ཚན་ཁག་གིས་ཏང་ཀྲུང་དབྱང་གི་གཅིག་སྡུད་གཅིག་གྱུར་གྱི་འགོ་ཁྲིད་འོག དོན་དངོས་དང་ཟུང་འབྲེལ་བྱས་ནས་བསམ་འཆར་འདི་ལག་བསྟར་དོན་འཁྱོལ་ལ་དམ་འཛིན་ཡག་པོ་བྱས་ཏེ། གོང་འོག་མཉམ་འགུལ་དང་། འཁྲི་འགན་རང་འཁུར། འཁུར་མཉམ་ལེན་དང་དོན་སྤྱི་སྒྲུབ་བཅས་ཀྱི་ལས་ཀའི་རྣམ་པ་ཞིག་ཆགས་པར་བྱེད་དགོས་པ་དང་། ཁ་དན་ཚིག་ལ་གནས་པའི་དཔེ་མཚོན་གྱི་སྣེ་ཁྲིད་ནུས་པ་འདོན་སྤེལ་གང་ལེགས་བྱས་ཏེ། “ཁ་དན་ཚིག་གནས་ཀྱི་མིག་དཔེ”དྲིལ་བསྒྲགས་དང“ཁ་དན་ཚིག་གནས་ཀྱིས་ཚོང་ལས་དར་སྤེལ་གཏོང་བའི་དྲིལ་བསྒྲགས་ཟླ་བའི”བྱེད་སྒོ་རྒྱུན་མཐུད་སྤེལ་ནས་ཁ་དན་ཚིག་གནས་དང་དམ་བཅའ་ལག་བསྟར་བྱེད་པའི་སྤྱི་ཚོགས་ཀྱི་དར་སྲོལ་བཟང་པོ་ཆགས་རྒྱུར་སྐུལ་འདེད་གཏོང་དགོས་པ། དཔེ་མཚོན་གྱི་ཉམས་མྱོང་དང་བྱེད་སྟངས་དུས་ཐོག་ཏུ་ཕྱོགས་སྡོམ་བྱས་ནས་ཁྱབ་སྤེལ་གཏོང་དགོས་པ། དོན་དག་གལ་ཆེན་དུས་ཐོག་ཏུ་རྒྱུད་རིམ་ལྟར་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་ལ་དགོངས་སྐོར་སྙན་སེང་ཞུ་དགོས་པའི་ནན་བཤད་བྱས་ཡོད།