འབར་མ་རྒྱལ་ཁབ་དོ་དམ་ཨུ་ལྷན་གྱིས་ས་གནས་དེ་གའི་དུས་ཚོད་ཟླ་3ཚེས་30ཉིན་གྱི་ཆུ་ཚོད་14ཙམ་ལ་བརྡ་ཁྱབ་བཏང་དོན། ཚེས་28ཉིན་ས་ཡོམ་དྲག་པོ་བརྒྱབ་ནས་རྒྱལ་ཡོངས་ཀྱི་མི་གྲངས་1700ལྷག་ཙམ་རྐྱེན་ལམ་དུ་སོང་བ་དང་། མི་3400ལྷག་ཙམ་ལ་རྨས་སྐྱོན་ཕོག་པ། མི་300ལྷག་ཙམ་གར་སོང་ཆ་མེད་དུ་སོང་བ་དང་། གཞན་ཡང་ས་ཡོམ་བརྒྱབ་ནས་འཛུགས་སྐྲུན་དངོས་པོ་མང་པོ་ཞིག་ལོག་པ་དང་། འགྲོ་ལམ་ལ་གཏོར་སྐྱོན་ཕོག་པ། སྤྱི་པའི་སྒྲིག་བཀོད་ལ་གཏོར་སྐྱོན་ཚབས་ཆེན་ཕོག་ཡོད་པ་སོགས་རེད།

ས་ཡོམ་བརྒྱབ་རྗེས། ཀྲུང་གོ་སྲིད་གཞུང་གིས་འབར་མའི་རེ་འདུན་ལྟར་མགྱོགས་མྱུར་བྱ་སྤྱོད་སྤེལ་ཏེ། ཆེད་ལས་རོགས་སྐྱོབ་རུ་ཁག་མངགས་ནས་འཚོལ་སྐྱོབ་ལས་དོན་སྤེལ་བ་མ་ཟད། གནོད་འཚེ་ཕོག་ཁུལ་ལ་གཞི་ཁྱོན་ཆེ་བའི་མི་ཆོས་རིང་ལུགས་ཀྱི་རོགས་སྐྱོབ་ཀྱང་བྱས་པ་རེད། རོགས་སྐྱོབ་དངོས་ཟོག་དང་། རོགས་སྐྱོབ་མི་སྣ། རྒྱལ་ཁོངས་སུ་འཛུལ་བའི་སྨན་དོན་པ་བཅས་མགྱོགས་མྱུར་འགག་སྒོ་ལས་སྒྲོལ་ཐུབ་པའི་འགན་ལེན་བྱ་ཆེད། ཀྲུང་གོ་དང་འབར་མའི་མཐའ་མཚམས་ཀྱིས་ས་ཡོམ་རྗེས་ཀྱི་འཕྲལ་སྡོམ་འགག་སྒྲོལ་གྱི་མཐུན་སྦྱོར་ལམ་སྲོལ་སྤྱོད་འགོ་ཚུགས་པ་རེད།

ཚེས་30ཉིན་གྱི་ཆུ་ཚོད་17ཙམ་ལ། འཕྲལ་སྡོམ་དོ་དམ་པུའུ་ཡིས་བཏང་བའི་ཀྲུང་གོའི་རོགས་སྐྱོབ་རུ་ཁག་གནོད་འཚེ་ཕོག་ཚབས་ཆེ་བའི་མན་ཏེ་ལེ་གྲོང་ཁྱེར་དུ་འབྱོར་མ་ཐག་འཕྲལ་དུ་གདོང་མཆོང་རུ་ཁག་ཆུང་ངུ་བཏང་ནས་ས་འོག་ཏུ་མི་ལུས་པའི་ས་ཆར་བསྐྱོད་དེ་རྩད་ཞིབ་ལས་དོན་སྤེལ་བ་རེད།

ཚེས་30ཉིན་ཀྲུང་གོ་རྒྱལ་སྤྱིའི་རོགས་སྐྱོབ་རུ་ཁག་གིས་རྒྱལ་སྤྱིའི་མི་ཆོས་རིང་ལུགས་ཀྱི་རོགས་སྐྱོབ་འཕྲལ་སྡོམ་ལམ་སྲོལ་ཛ་དྲག་ངང་སྤྱོད་འགོ་བཙུགས་ནས། རུ་མི་118ཀྱིས་ཆེད་ལས་སྒྲིག་ཆས་དང་སྨན་བཅོས་དངོས་ཟོག་འཁྱེར་ཏེ་ཆུ་ཚོད་19དང་སྐར་མ་38ཙམ་ལ་པེ་ཅིང་ནས་མཁའ་དམག—20རྟགས་ཅན་གྱི་སྐྱེལ་འདྲེན་གནམ་གྲུ་གཉིས་ལ་བསྡད་དེ་འབར་མར་བསྐྱོད་པ་དང་། ཉིན་དེའི་དགོང་མོར་འབར་མའི་རྒྱལ་ས་ནེ་པི་ཏུའུ་རུ་འབྱོར་རྗེས་འཕྲལ་མར་རོགས་སྐྱོབ་ལས་དོན་སྤེལ་བ་རེད།

གཞན་ཡང་ཀྲུང་གོ་ཕྱོགས་ཀྱི་རོགས་སྐྱོབ་རུ་ཁག་མང་པོ་ཞིག་གིས་ཀྱང་གནོད་འཚེ་ཕོག་ཁུལ་དུ་དུས་ཚོད་སྐར་ཆ་ཙམ་ཡང་བརྩོན་ལེན་གྱིས་ཚེ་སྲོག་མྱུར་སྐྱོབ་བྱེད་བཞིན་མཆིས།

མན་ཏེ་ལེ་རུ་ཚེས་30ཉིན་ཀྲུང་གོའི་ཧུའུ་ནན་གྱི་ཡུས་ལུའུ་གནམ་སྔོན་རོགས་སྐྱོབ་རུ་ཁག་གིས་སྲོག་ཉེན་ལས་ཐར་བའི་མི་ཞིག་བསྐྱབས་ཤིང་། དེ་ཡང་། ཉིན་དེའི་ཆུ་ཚོད་9དང་སྐར་མ་30ཙམ་ལ། ཡུས་ལུའུ་གནམ་སྔོན་རོགས་སྐྱོབ་རུ་ཁག་གིས་མན་ཏེ་ལེ་ཡི་ནང་བསྟན་ཚོགས་ཁང་གནས་སར་གསོན་པོ་འཚོལ་ཆས་སྤྱད་རྗེས་མི་གཅིག་གསོན་པོར་གནས་པ་ཤེས་རྟོགས་བྱུང་ཡོད། དེ་རྗེས་ས་གནས་དེ་གའི་མེ་ཟོན་རུ་ཁག་དང་མཉམ་དུ་རོགས་སྐྱོབ་ཇུས་གཞིར་གྲོས་བསྡུར་བྱས་ཏེ་ཞིག་རོ་གཏོར་ནས་ས་འོག་ཏུ་གསོན་པོར་ལུས་པའི་མི་འདི་བདེ་བླག་ངང་བསྐྱབས་པ་རེད།