2024ལོར། ལྷོ་ཁ་གྲོང་ཁྱེར་ཆུ་གསུམ་རྫོང་གིས་དུས་རབས་གསར་པའི་ཤེས་དཔལ་ལག་ལེན་ལྟེ་གནས་ཀྱི་ནུས་པ་འདོན་སྤེལ་གང་ལེགས་བྱས་ཏེ། ཤེས་དཔལ་ལག་ལེན་དེ་མང་ཚོགས་ལ་ཞབས་འདེགས་ཞུ་བའི“མཐའ་མའི་འགག་གནད”བསལ་བའི་དམ་འཛིན་བྱ་གཞི་གལ་ཆེན་ཞིག་ཏུ་བརྩི་བ་དང་ནང་དོན་དང་རྣམ་པ་གསར་གཏོད་བྱས་ནས། ཤེས་དཔལ་སྐྱེད་སྲིང་དང་། ཤེས་དཔལ་ལག་ལེན། ཤེས་དཔལ་འཛུགས་སྐྱོང་སོགས་ཀྱི་ལས་དོན་ཁག་ལ་སྐུལ་འདེད་རྒྱུན་མཐུད་བཏང་ཡོད།

དུས་རབས་གསར་པའི་ཤེས་དཔལ་ལག་ལེན་ལྟེ་གནས(ཁང་དང་ས་ཚིགས)ཀྱི་རིགས་པའི་གཞུང་ལུགས་དང་སྲིད་ཇུས་སྒྲོག་འགྲེལ་པ་དང་གཞི་རིམ་གྱི་སྒྲོག་འགྲེལ་པའི་ནུས་པ་འདོན་སྤེལ་གང་ལེགས་བྱས་ཏེ། གྲོང་ཚོའི་རྒྱང་བསྒྲགས་ནས་སྒྲོག་འགྲེལ་དང་། རིག་རྩལ་སྒྲོག་འགྲེལ། “སྐད་འཕྲིན་དང་ཁྱུག་དབྱིངས”ཟུང་འབྲེལ་གྱི་དྲ་རྒྱའི་ལས་སྟེགས་སྒྲོག་འགྲེལ་སོགས་ཀྱི་བྱེད་ཐབས་སྣ་ཚོགས་སྤྱད་དེ་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་དང་། ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་བདུན་པ། 《ལྷོ་ཁ་གྲོང་ཁྱེར་གྱི་ཡ་རབས་བྱ་སྤྱོད་ལ་སྐུལ་འདེད་གཏོང་བའི་སྲོལ་ཡིག》སོགས་ཀྱི་ནང་དོན་དྲིལ་བསྒྲགས་རྒྱ་ཁྱབ་བྱས་ནས། ཏང་གི་གསར་གཏོད་རིགས་པའི་གཞུང་ལུགས་དང་དམངས་ཕན་སྲིད་ཇུས་མང་ཚོགས་ཀྱི་སྒོ་ཁར་དྲིལ་བསྒྲགས་བྱས་པ་རེད། 2024ལོར། རྫོང་ཡོངས་ཀྱིས་རིམ་རྩིས་བརྒྱབ་ན། རིགས་པའི་གཞུང་ལུགས་ཀྱི་སྒྲོག་འགྲེལ་ཐེངས་600ལྷག་ཙམ་བྱས་པར་མང་ཚོགས་མི་ཐེངས་ཁྲི་3.8ལྷག་ཙམ་ཞུགས་ཡོད།

“ཤེས་དཔལ་གྲོང་ཁྱེར་མཉམ་དུ་གཏོད། བདེ་སྐྱིད་ལྡན་པའི་འཚོ་བར་མཉམ་དུ་རོལ”དང“ལོ་གསར་གྱི་རྣམ་པ་ཟབ་ཏུ་གཏོང་། དཔྱིད་གསར་དུས་ཆེན་བསུ”“ལེ་ཧྥུང་ལ་སློབ་སྦྱོང་བྱེད། ཤེས་དཔལ་ལག་ལེན་བྱ་སྤྱོད་ང་ཡིས་སྤེལ”“ཇ་ཁང་ནང་ཏང་གི་བཀའ་དྲིན་གླེང་། ངས་ཁྱེད་ལ་གྲངས་འཛིན་རྩལ་ནུས་སློབ་ཁྲིད་བྱེད” “ལྗང་མདོག་ཐཱན་ཉུང་གོང་དུ་བཀུར། བདེ་སྐྱིད་ལྡན་པའི་འཚོ་བར་མཉམ་དུ་རོལ”དེ་བཞིན་རྒྱལ་གཅེས་འཕྲོད་བསྟེན་གྱི་ཁོར་ཡུག་བཅོས་སྐྱོང་དང་འོས་འགན་ཤིང་འཛུགས་སོགས་དང་བླངས་ཞབས་ཞུའི་བྱེད་སྒོ་སྒྲིག་འཛུགས་བྱས་ནས་སྤེལ་བ་རེད། མིག་སྔའི་བར་ཆུ་གསུམ་རྫོང་གི་དུས་རབས་གསར་པའི་ཤེས་དཔལ་ལག་ལེན་ལྟེ་གནས(ཁང་དང་ས་ཚིགས)ཀྱིས་རིམ་རྩིས་བརྒྱབ་ན་དང་བླངས་ཞབས་ཞུའི་བྱེད་སྒོ་ཐེངས་460ལྷག་ཙམ་སྤེལ་བར་མང་ཚོགས་མི་ཐེངས་ཁྲི་3.61ལྷག་ཙམ་ཞུགས་ཡོད།

དུས་རབས་གསར་པའི་ཤེས་དཔལ་ལག་ལེན་ལ་སྐུལ་འདེད་གཏོང་བའི་ཉིན་མོ་དང“ཇ་ཁང་ནང་ཏང་གི་བཀའ་དྲིན་གླེང་བའི”སྤུས་རྟགས་དང་བླངས་ཞབས་ཞུའི་བྱེད་སྒོ་དམ་འཛིན་བྱ་གཞིར་བྱས་ཏེ། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་དར་སྤེལ་དང་བཅའ་ཁྲིམས་དང་ཁྲིམས་སྲོལ་གྱི་སྒྲོག་འགྲེལ་ཐེངས་120ལྷག་ཙམ་བྱས་པར་མང་ཚོགས་མི་ཐེངས་6100ལྷག་ཙམ་ཞུགས་ཡོད།

རྒྱ་ཆེའི་ཞིང་འབྲོག་མང་ཚོགས་གྲོང་གསེབ་བཅོས་སྐྱོང་ནང་ཞུགས་པའི་ཧུར་སེམས་རང་བཞིན་དང་རང་འགུལ་རང་བཞིན་གྱི་བསམ་པ་སྔར་བས་ཆེ་རུ་གཏོང་ཆེད། ཆུ་གསུམ་རྫོང་དུས་རབས་གསར་པའི་ཤེས་དཔལ་ལག་ལེན་ལྟེ་གནས་ཀྱིས་རྒྱལ་ཁབ་ཀྱི་སྤྱི་སྐད་དང་། སྐྱེ་ཁམས་ཤེས་དཔལ། མི་རིགས་མཐུན་སྒྲིལ། ཡུལ་སྲོལ་བཟང་བ་སོགས་ཀྱི་ནང་དོན་ཚུད་པའི“ཤེས་དཔལ་ལག་ལེན”གྱི་སྐར་མ་བརྗེ་རེས་ཀྱི་བྱ་རིམ་ཆུང་ངུ་ཁྱབ་གདལ་ཧུར་ཐག་བཏང་སྟེ། སྐར་མ་བརྗེ་རེས་ཀྱི་སྐུལ་ལྕག་ལམ་སྲོལ་བརྒྱུད་གྲོང་མི་དེ་བས་མང་བ་དང་བླངས་ཞབས་ཞུའི་ནང་ཞུགས་པ་དང་གྲོང་གསེབ་བཅོས་སྐྱོང་ལས་དོན་ནང་ཞུགས་པར་ཁྲིད་སྟོན་བྱས་ནས་གྲོང་གསེབ་ཀྱི་ཤེས་དཔལ་འཛུགས་སྐྱོང་ལ་མཉམ་དུ་སྐུལ་འདེད་བཏང་ཡོད། 2024ལོར་རྫོང་ཡོངས་ཀྱི་ཞིང་འབྲོག་མང་ཚོགས་ཀྱིས“ཤེས་དཔལ་ལག་ལེན”གྱི་སྐར་མ་བརྗེ་རེས་ཀྱི་བྱ་རིམ་ཆུང་ངུ་དང་ལག་ཐོགས་ཀྱི་རྩིས་ཁྲའི་སྐར་མ་ཁྲི་11.5ལྷག་ཙམ་བརྗེས་པ་མ་ཟད། དམིགས་བཙུགས་ཀྱི་སྐར་མ་བརྗེ་རེས་བྱེད་སར་རིན་ཐང་སྒོར་8800ལྷག་ཙམ་རི་བའི་འཚོ་བའི་མཁོ་ཆས་དང་བརྗེས་ཡོད།