ཆབ་མདོ་གྲོང་ཁྱེར་ལྷོ་རོང་རྫོང་གདགས་རོང་ཤང་གིས།
བྱ་ཐབས་སྣ་མང་སྤྱད་དེ་གྲོང་གསེབ་དར་རྒྱས་ལ་ཕན་འབྲས་དངོས་ཐོན་པར་རམ་འདེགས་བྱས་པ།
2024ལོ་ནས་བཟུང་། ཆབ་མདོ་གྲོང་ཁྱེར་ལྷོ་རོང་རྫོང་གདགས་རོང་ཤང་གི་ཏང་ཡོན་ལས་བྱེད་པས་བློ་ཁོག་ཆེན་པོས་འགན་འཁྲི་ཕྲག་ཐོག་ཏུ་འཁུར་ཏེ་དམངས་འཚོའི་བྱ་བ་དངོས་དང་། རྨང་གཞིའི་སྒྲིག་བཀོད། རིག་གནས་འཕེལ་རྒྱས་སོགས་ལ་རྒྱུན་མཐུད་ཤུགས་བརྒྱབ་ནས་གྲོང་གསེབ་དར་རྒྱས་གཏོང་བའི་རྨང་གཞི་ཟམ་མི་ཆད་པར་བརྟན་དུ་བཏང་ཡོད།
ཏང་འཛུགས་སྐྱོང་གིས་སྣེ་འཁྲིད་པ་དང་། ཕྱོགས་ཁག་གི་ཐོན་ཁུངས་མཐུན་སྦྱོར་ཧུར་ཐག་བྱས་པའི་ཐོག་འཚོ་རྟེན་ལས་སྤྲོད་ཀྱི་བྱེད་ཐབས་ལ་བརྟེན་ནས་གྲོང་ཚོའི་མཉམ་སྡེབ་དཔལ་འབྱོར་ལ་འབྲེལ་ཡོད་ཀྱི་རྣམ་གྲངས་5འགན་གཙང་ལེན་དུ་བཅུག་སྟེ། ས་གནས་དེ་གའི་མང་ཚོགས་119ལས་ཞུགས་བྱས་པར་འབབ་འཕར་སྒོར་ཁྲི་106.31བྱུང་བ་དང་། ཨར་སྐྲུན་ཕྱོགས་ཀྱིས་རང་འགུལ་ངང་ས་གནས་དེ་གའི་མང་ཚོགས་རྣམ་གྲངས་འཛུགས་སྐྲུན་ནང་ཞུགས་རྒྱུར་མཐུན་སྦྱོར་བྱས་པར་ངལ་རྩོལ་ཡོང་འབབ་སྒོར་ཁྲི་13ལྷག་ཙམ་བྱུང་ཡོད།
2024ལོའི་དཔྱིད་གསར་དུས་ཆེན་དང་། བོད་ཀྱི་ལོ་གསར། རྒྱལ་སྟོན་དུས་ཆེན་སོགས་དུས་ཚོད་ཀྱི་མཚམས་ཚིགས་གལ་ཆེན་བེད་སྤྱད་དེ། མང་ཚོགས་རང་བཞིན་གྱི་རིག་གནས་བྱེད་སྒོ་ཐེངས་25སྔ་རྗེས་སུ་སྒྲིག་འཛུགས་བྱས་པར། མང་ཚོགས་མི་ཐེངས་6800ལྷག་ཙམ་ཞུགས་ནས་གྲོང་གསེབ་ཀྱི་འཚོ་བའི་གསོན་ཤུགས་ཆེས་ཆེར་འཕེལ་བ་དང་། “བཀྲ་ཤིས་བུམ་པའི”གྲོང་གསེབ་ཀྱི་རྐང་རྩེད་སྤོ་ལོའི་རིམ་མཚུངས་མཉམ་འགྲན་སྐབས་དང་པོ་བདེ་བླག་ངང་གཉེར་ནས་རྫོང་ཡོངས་ཀྱི་སྤོ་ལོའི་རུ་ཁག་16དང་སྤོ་ལོ་རྒྱག་མཁན་257གྱིས་འགྲན་ར་གཅིག་ཏུ་འགྲན་བསྡུར་བྱས་པས་གྲོང་གསེབ་ཀྱི་རིག་གནས་ལུས་རྩལ་ཕུན་སུམ་ཚོགས་སུ་དང་འཁྲུག་ཏུ་ཕྱིན་པ་མ་ཟད། ཉེ་འཁོར་གྱི་བཟའ་བཏུང་དང་། དམངས་སྲོལ་གནས་ཚང་། ཞིང་ཟོག་ཐོན་རྫས་བྲིན་ཚོང་སོགས་ཀྱི་འཛད་སྤྱོད་ཁྲོམ་རར་སྐུལ་ཁྲིད་ཐུབ་ནས་ས་གནས་དེ་གའི་མང་ཚོགས་ལ་འབབ་འཕར་སྒོར་ཁྲི་20.5ལྷག་ཙམ་བྱུང་ཡོད། ས་གནས་དེ་གའི་ཡུལ་སྐོར་རིག་གནས་ཐོན་ཁུངས་སྔོག་འདོན་ཧུར་ཐག་བྱས་ཏེ་མ་དངུལ་སྒོར་ཁྲི་640བཏང་ནས་ཆུ་ཚན་འཛུགས་སྐྲུན་བྱེད་འགོ་བཙུགས་པར་སྔོན་དཔག་བྱས་ན་2025ལོར་སྤྱོད་ཐུབ་རེ་ཡོད་པ་རེད།
2024ལོར་གཞི་རིམ་བཅོས་སྐྱོང་གི་སྐུལ་འདེད་ཚོགས་འདུ་ཐེངས་4དང་བཀོད་གཏོང་ཚོགས་འདུ་ཐེངས་12སྔ་རྗེས་སུ་འཚོགས་ཏེ། གཞི་རིམ་བཅོས་སྐྱོང་གི་གཙོ་གནད་ལས་འགན་དོན་འཁྱོལ་གནད་སྨིན་ཡོང་བར་སྐུལ་འདེད་བཏང་ཡོད། རིམ་རྩིས་བརྒྱབ་ན། འགལ་བ་དང་རྩོད་གཞི་ཐེངས་220ལྷག་ཙམ་གྲལ་བཤེར་དང་ཁྲིམས་སྐྱོང་སྒྲོག་འགྲེལ་ཐེངས་18 དུད་ཚང་275ལ་བསྐྱོད་ནས་སྒྲོག་འགྲེལ། དང་བླངས་ཞབས་ཞུའི་བྱེད་སྒོ་ཐེངས་60ལྷག་ཙམ་སྒྲིག་འཛུགས་བཅས་བྱས་ཏེ་གྲོང་གསེབ་བཅོས་སྐྱོང་གི་ལས་དོན་གཏིང་ཟབ་དང་ཏན་ཏིག་ཡོང་བར་སྐུལ་འདེད་བཏང་ཡོད།