ཟླ་3ཚེས་28ཉིན། འབར་མར་ས་ཡོམ་རིམ་པ་7.9བརྒྱབ་ནས་མི་སྣ་འཆི་རྨས་དང་རྒྱུ་ནོར་ལ་གྱོང་གུན་ཚབས་ཆེན་བཟོས་ཡོད། ཟླ་3ཚེས་29ཉིན་གྱི་དགོང་མོར། འབར་མའི་རྒྱལ་ཁབ་དོ་དམ་ཨུ་ལྷན་གྱིས་གནས་ཚུལ་ཁྱབ་བསྒྲགས་བྱས་པར། མིག་སྔའི་བར། ས་ཡོམ་ཁྲོད་རྒྱལ་ཡོངས་ནས་མི་1644རྐྱེན་ལམ་དུ་ཤོར་བ་དང་། མི་3408ལ་རྨས་སྐྱོན་ཕོག་པ། གཞན་ཡང་། མི་139གར་སོང་ཆ་མེད་དུ་གྱུར་ཡོད། ས་ཡོམ་བརྒྱབ་རྗེས། ཀྲུང་གོ་ཕྱོགས་ཀྱིས་གནོད་འཚེའི་གནས་ཚུལ་ལ་ཚད་མཐོའི་དོ་ཁུར་བྱས་ཏེ་ཐབས་ལམ་སྣ་ཚོགས་ཐོག་ནས་འབར་མ་ཕྱོགས་ལ་དུས་ཐོག་ཏུ་རོགས་སྐྱོར་དང་རྒྱབ་སྐྱོར་བྱས་ཡོད།

ཟླ་3ཚེས་28ཉིན། ཕྱི་འབྲེལ་པུའི་མགྲིན་ཚབ་པས་བརྗོད་དོན། ཀྲུང་འབར་རྒྱལ་ཁབ་གཉིས་ཀྱི་མི་དམངས་དབར་སྤུན་ཉེའི་མཛའ་གཅུགས་ཟབ་མོ་ལྡན་ཡོད། འབར་མའི་མི་དམངས་ལ་ས་ཡོམ་གྱི་གནོད་འཚེ་ཕོག་པར་ང་ཚོར་ཡང་གདུང་སེམས་དྲག་པོ་སྐྱེས་བྱུང་། ཀྲུང་གོ་ཕྱོགས་ཀྱིས་འབར་མ་ཕྱོགས་ཀྱི་དགོས་མཁོར་གཞིགས་ཏེ་འབར་མའི་གེགས་ཁུལ་ལ་རང་ནུས་ཡོད་རྒུས་ཛ་དྲག་གི་མི་ཆོས་རིང་ལུགས་ཀྱི་རོགས་སྐྱོབ་དང་རྒྱབ་སྐྱོར་བྱས་ནས། འབར་མའི་མི་དམངས་ལ་ཡོམ་འགོག་གེགས་སེལ་བྱེད་རོགས་དང་དཀའ་གནད་ལས་སྒྲོལ་རོགས་བྱེད་འདོད་ཡོད།

ཟླ་3ཚེས་28ཉིན། ཀྲུང་གོ་མི་དམངས་ཕྱི་ཕྱོགས་མཛའ་གྲོགས་མཐུན་ཚོགས་ཀྱིས་འབར་མ་དང་ཀྲུང་གོའི་མཛའ་གྲོགས་མཐུན་ཚོགས་ལ་འཚམས་འདྲིའི་གློག་འཕྲིན་བཏང་ནས། གནོད་འཚེ་ཕོག་པའི་མང་ཚོགས་ལ་གདུང་སེམས་མཉམ་སྐྱེ་དང་ལྷག་བསམ་ཟོལ་མེད་ཀྱི་སེམས་གསོའི་འཚམས་འདྲི་དང་རྐྱེན་ལམ་དུ་ཤོར་བར་མྱ་ངན་ཟབ་མོ་ཞུས་པ་རེད། སེམས་གསོའི་འཚམས་འདྲིའི་གློག་འཕྲིན་ནང་། ཀྲུང་གོ་མི་དམངས་ཀྱིས་འབར་མའི་གྲོགས་པོའི་བདེ་སྡུག་དང་བདེ་རྩ་ཐོག་མཐའ་བར་གསུམ་དུ་སེམས་ལ་བཞག་ཡོད་པས། གེགས་ཁུལ་གྱི་མང་ཚོགས་ལ་གནོད་འཚེ་ཕོག་པར་གདུང་སེམས་དྲག་པོ་སྐྱེས་བྱུང་། “འབར་མའི་གནོད་འཚེ་ཕོག་པའི་མང་ཚོགས་སྔ་ཙམ་དཀའ་གནད་ལས་སྒྲོལ་བ་དང་། བདེ་སྐྱིད་ལྡན་པའི་ཁྱིམ་གཞིས་བསྐྱར་སྐྲུན་ཐུབ་ནས་རྒྱུན་གཏན་གྱི་འཚོ་བ་སླར་གསོ་ཡོང་བའི་སྨོན་འདུན་ཞུ་གི་ཡིན”ཞེས་འཁོད་ཡོད།

ཟླ་3ཚེས་29ཉིན། རྒྱལ་ཁབ་རྒྱལ་སྤྱིའི་འཕེལ་རྒྱས་མཉམ་ལས་ཧྲུའུ་ཡི་གསར་འགྱུར་མགྲིན་ཚབ་པ་ལི་མིང་གིས་བརྗོད་དོན། འབར་མ་སྲིད་གཞུང་གི་རེ་འདུན་ལྟར། ཀྲུང་གོ་སྲིད་གཞུང་གིས་འབར་མར་མི་དམངས་ཤོག་སྒོར་དུང་ཕྱུར་1གི་ས་ཡོམ་གེགས་སེལ་གྱི་ཛ་དྲག་གི་མི་ཆོས་རིང་ལུགས་ཀྱི་རོགས་སྐྱོར་བྱ་རྒྱུ་དང་། རོགས་སྐྱོབ་རུ་ཁག་གཉིས་མངགས་ནས་གེགས་ཁུལ་དུ་གུར་དང་། ཀམ་པ་ལི། མྱུར་སྐྱོབ་སྨན་ཁུག བཟའ་བཅའ། འཐུང་ཆུ་སོགས་དགོས་མཁོ་ཆེ་བའི་དངོས་ཟོག་མཁོ་འདོན་བྱ་རྒྱུ་ཡིན། ཀྲུང་གོ་སྲིད་གཞུང་གི་རོགས་སྐྱོར་དངོས་ཟོག་ཁག་དང་པོ་ཟླ་3ཚེས་31ཉིན་དབོར་འགོ་ཚུགས་པ་དང་། ཀྲུང་གོ་ཕྱོགས་ཀྱིས་ད་དུང་འབར་མ་ཕྱོགས་ཀྱི་དགོས་མཁོར་གཞིགས་ནས་རོགས་སྐྱོར་མུ་མཐུད་བྱེད་ཀྱི་ཡིན།

ཀྲུང་གོ་ནས་ཡོང་བའི་རོགས་སྐྱོབ་སྟོབས་ཤུགས་མང་པོ་གཅིག་རྗེས་གཉིས་མཐུད་ངང་གེགས་ཁུལ་དུ་སྐྱོད་བཞིན་ཡོད་པ་དང་། གཅིག་གྱུར་གྱི་བཀོད་སྒྲིག་གཞིར་བཟུང་འཕྲལ་སྡོམ་དོ་དམ་པུའུ་ཡིས་རོགས་སྐྱོབ་སྒྲིག་ཆས་དང་དངོས་ཟོག་ཁྱེར་བའི་ཀྲུང་གོའི་རོགས་སྐྱོབ་རུ་ཁག་གི་རུ་མི་82གེགས་ཁུལ་དུ་མངགས་ནས་འབར་མ་ཕྱོགས་ལ་ནུས་ཤུགས་ཡོད་རྒུས་ཉེན་སེལ་རོགས་སྐྱོབ་བྱ་རྒྱུ་རེད།

ས་གནས་དེ་གའི་དུས་ཚོད་ཟླ་3ཚེས་29ཉིན་གྱི་སྔ་དྲོར། འཕྲལ་སྡོམ་རོགས་སྐྱོབ་དངོས་ཟོག་ཁྱེར་བའི་ཀྲུང་གོའི་ཡུན་ནན་རོགས་སྐྱོབ་སྨན་བཅོས་རུ་ཁག་གི་རུ་མི་37འབར་མའི་རང་ཀོང་རྒྱལ་སྤྱིའི་གནམ་ཐང་དུ་འབྱོར་བ་དང་། ཟླ་3ཚེས་29ཉིན་གྱི་ཕྱི་དྲོར། རོགས་སྐྱོབ་སྒྲིག་ཆས་ཁྱེར་བའི་ཧྲེན་ཀྲེན་སྤྱི་ཕན་རོགས་སྐྱོབ་རུ་ཁག་གི་རུ་མི་23འབར་མར་རོགས་སྐྱོབ་བྱེད་པར་རྡོག་ཐོན་བྱས་པ། ཟླ་3ཚེས་29ཉིན་གྱི་དགོང་མོར། ཤང་ཀང་དམིགས་བསལ་སྲིད་འཛིན་ཁུལ་སྲིད་གཞུང་གིས་མངགས་པའི་མི་51ཡོད་པའི་རོགས་སྐྱོབ་རུ་ཁག་རང་ཀོང་དུ་འབྱོར་ཞིང་། རོགས་སྐྱོབ་རུ་ཁག་དེ་ནི་དམིགས་བསལ་སྲིད་འཛིན་ཁུལ་སྲིད་གཞུང་གི་བདེ་སྲུང་ཅུས་དང་། མེ་ཟོན་ཁྲུའུ། རྒྱལ་མཚམས་སུ་འཛུལ་བའི་ལས་དོན་ཁྲུའུ་དང་ཤང་ཀང་སྨན་ཁང་དོ་དམ་ཅུས་བཅས་ཀྱི་མི་སྣ་ལས་གྲུབ་ཡོད་པ་རེད།

ཀྲུང་གོ་རྒྱ་གྲམ་དམར་པོ་ཚོགས་པས་འབར་མའི་རྒྱ་གྲམ་དམར་པོ་ཚོགས་པ་བརྒྱུད་གེགས་ཁུལ་ལ་ཛ་དྲག་གི་དངོས་ཟོག་རོགས་སྐྱོར་བྱས་པའི་ནང་གུར་300དང་། ཉལ་ཆས་2000 ལྟེབ་ཁྲི་600བཅས་དང་། དེ་བཞིན་གེགས་ཁུལ་གྱི་ཁྱིམ་ཚང་2000ལ་འདང་བའི་མུག་སྐྱོབ་ཁྱིམ་ཚང་ཁུག་མ་སོགས་སྤྲད་པ་རེད།