སྨོན་ལམ་བཟང་མོའི་འདྲ་པར། ཤིན་ཧྭ་གསར་འགྱུར་ཁང་གི་གསར་འགོད་པ། འཇིགས་མེད་རྡོ་རྗེས་པར་བརྒྱབ།

སྨོན་ལམ་བཟང་མོ(གཡས་ཀྱི་གཉིས་པ)དང་ཁོང་གི་བུ་མོས་རང་ཁྱིམ་གྱི་སྒོ་རའི་ནང་གྲོང་མི་དང་ཁ་བརྡ་གློད་བཞིན་པ། ཤིན་ཧྭ་གསར་འགྱུར་ཁང་གི་གསར་འགོད་པ། འཇིགས་མེད་རྡོ་རྗེས་པར་བརྒྱབ།

བོད་ལྗོངས་ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་གནས་ཆུང་ཁྲོམ་གཞུང་དོན་གཅོད་ཁྲུའུ་སྒང་གྲོང་ཚོའི་ལོ་91ལ་སླེབས་པའི་སྨོན་ལམ་བཟང་མོ་ཁ་བཟོ་འཕེར་ལ་དང་གླུ་གཞས་གཏོང་རྒྱུར་དགའ་བས། གྲོང་ཚོའི་ནང་གི་སྣང་བ་སྐྱིད་པའི་མི་ཞིག་རེད། ཡིན་ནའང་བོད་རྙིང་པར་ཁོང་སྡུག་བསྔལ་གྱིས་མནར་མྱོང་ཡོད།

སྨོན་ལམ་བཟང་མོའི་ཨ་ཕ་ནི་ཡུལ་དེ་གའི་ཞིང་བྲན་བདག་པོའི་རྟ་གཡོག་རེད། ཉིན་མོ་རྟ་གྲོད་པ་རྒྱགས་དྲགས་ནས་མཚན་མོར་རྩྭ་སྟེར་ཡང་ཟ་གི་མེད་པས་དྲིལ་བུའི་སྒྲ་མ་གྲགས་སྟབས་ཞིང་བྲན་བདག་པོས་རྟ་གཡོག་གིས་རྟ་ལ་གཟན་རྩྭ་སྦྱིན་མི་འདུག་བསམས་ཏེ་རྒྱུན་དུ་ཁོང་གི་ཨ་ཕར་ཉེས་རྡུང་དྲག་པོ་གཏོང་གི་ཡོད། ལོ་ན་ཕྲ་བའི་སྨོན་ལམ་བཟང་མོས་ངུ་བཞིན་ཨ་ཕ་ལ་སེམས་གསོ་གཏོང་བ་ཙམ་ལས་ཨ་ཕར་ཅིའི་ཕྱིར་ཉེས་རྡུང་གཏོང་གི་ཡོད་པ་ཧ་གོ་གི་མེད།

ཐོན་ཁུངས་དཀོན་པའི་བོད་རྙིང་པར། ཉིན་མོ་སྔོན་ལ་ཞིང་བྲན་བདག་པོའི་ས་ཞིང་ལ་ཆུ་གཏོང་དགོས་པས་སྨོན་ལམ་བཟང་མོ་དང་འདྲ་བའི་ས་ཞིང་བོགས་མར་བླངས་པའི་ཞིང་བྲན་དག་དགོང་མོ་ཆུ་གཏོང་དགོས་ཀྱི་ཡོད། བགྲེས་སོང་ཁོང་གིས“ང་ཚོ་དགོང་མོ་མ་གཏོགས་ཆུ་གཏོང་ཆོག་གི་མེད་པ་དང་ཆུ་ཉུང་དྲགས་པས་ལོ་ཏོག་ཚང་མ་ཐན་པས་སྐེམ་གྱི་ཡོད”ཅེས་ཕྱིར་དྲན་བྱས་ནས་བཤད། སྟོན་ཐོག་བསྡུས་རྗེས་ཞིང་བྲན་བདག་པོས་རིན་གོང་དམའ་པོ་བྱས་ནས་འབྲུ་རིགས་ཉོ་གི་ཡོད་ལ། བཟའ་འབྲུ་ལྷག་འཕྲོས་སྨོན་ལམ་བཟང་མོའི་ཁྱིམ་ཚང་གི་བཟའ་འབྲུ་གཏན་ནས་འདང་གི་མེད་པས། ཞིང་བྲན་བདག་པོའི་ས་ནས་གཡར་དགོས་ཀྱི་ཡོད།

1959ལོར། བོད་དུ་དམངས་གཙོའི་བཅོས་སྒྱུར་བྱས་ནས་བཀས་བཀོད་རྒྱུད་འཛིན་ཞིང་བྲན་ལམ་ལུགས་རྦད་དེ་མེད་པར་བཟོས་ཏེ་ཞིང་བྲན་ཁྲི་ཚོ་བརྒྱར་ཡར་ལངས་བཅིངས་འགྲོལ་ཐོབ་པར་བརྟེན། སྨོན་ལམ་བཟང་མོར་འཚོ་བ་གསར་པ་སྐྱེལ་རྒྱུ་བྱུང་ཡོད། “བོད་རྙིང་པར་ཐ་ན་རྩམ་པ་ཡང་གྲོད་པ་རྒྱགས་པ་ཞིག་བཟའ་རྒྱུ་མེད” “ཡིན་ནའང་ད་ཆ་སྔོ་ཚལ་སྣ་ཚོགས་བཟའ་རྒྱུ་ཡོད་པའི་ཁར། ནང་ས་ནས་དབོར་ཡོང་བའི་ཟས་རིགས་འདྲ་མིན་སྣ་ཚོགས་ཡོད”ཅེས་སྨོན་ལམ་བཟང་མོས་ངོ་གདོང་ནས་སྐྱིད་པའི་འཛུམ་མདངས་འཕྱུར་བཞིན་བརྗོད།