ཉེ་ཆར། 2025ལོའི་ཀྲུང་ཀོན་ཚུན་གླེང་སྟེགས་ལོ་ཚོགས་ཀྱི་མཉམ་གཤིབ་གླེང་སྟེགས“ཧི་མ་ལ་ཡའི་མཐའ་སྐོར་རྒྱལ་ཁབ་ཀྱི་སའི་གོ་ལའི་ཚན་རིག་རྒྱལ་སྤྱིའི་མཉམ་ལས”གླེང་སྟེགས་པེ་ཅིང་དུ་འཚོགས་པ་དང་། རྒྱལ་ཁབ་10ལྷག་ཙམ་ལས་ཡོང་བའི་མཚོ་བོད་ས་མཐོའི་ཞིབ་འཇུག་ཁྱབ་ཁོངས་ཀྱི་རིགས་གཅིག་མཁས་ཅན་དང་། མཁས་དབང་200ལྷག་ཙམ་གྱིས་མིའི་རིགས་ཐུན་མོང་ལ་འཕྲད་པའི་གནམ་གཤིས་ཀྱི་འགྱུར་ལྡོག་དང་། སྐྱེ་དངོས་སྣ་མང་རང་བཞིན། སྐྱེ་ཁམས་ཁོར་ཡུག་སོགས་ཀྱི་འགྲན་སློང་གལ་ཆེན་ལ་དམིགས་ནས་ཧི་མ་ལ་ཡའི་མཐའ་སྐོར་རྒྱལ་ཁབ་ཀྱི་སའི་གོ་ལའི་མ་ལག་གི་ཚན་རིག་དང་མཐུན་པའི་ལྟ་བ་དང་། ལག་ལེན་དང་བསམ་གཞིག་སྐོར་ལ་སྤེལ་རེས་གཏིང་ཟབ་བྱས་པ་རེད།

གླེང་སྟེགས་ཐོག 2025ལོ་ནི་མཚོ་བོད་ས་མཐོའི་ཚན་རིག་རྟོག་ཞིབ་ཐེངས་གཉིས་པར་གྲུབ་འབྲས་གལ་ཆེན་འཐོབ་པའི་འགག་རྩའི་ལོ་ཞིག་ཡིན་སྟབས། རྒྱལ་ཁབ་ཀྱི་གཙོ་གནད་དགོས་མཁོར་དམིགས་ནས་ཆེད་དོན་བརྗོད་གཞི་དང་། ལས་འགན། རིག་ཚན་བཅས་ལས་བརྒལ་བའི་སྤེལ་རེས་དང་ཕྱོགས་བསྡུས་རང་བཞིན་གྱི་གྲུབ་འབྲས་གལ་ཆེན་ཐོན་པར་ཤུགས་སྣོན་རྒྱག་དགོས། ཀྲུང་གོས་འཛམ་གླིང་རྒྱལ་ཁབ་ཁག་དང་མཉམ་དུ་མཚོ་བོད་ས་མཐོའི་འགག་རྩའི་ཚན་རིག་གནད་དོན་ལ་མུ་མཐུད་ཞིབ་འཇུག་གཏིང་ཟབ་བྱས་ཏེ། གནམ་གཤིས་འགྱུར་ལྡོག་གི་གྲུབ་འབྲས་དང་སྐྱེ་ཁམས་ཁོར་ཡུག་སྲུང་སྐྱོང་གི་ཉམས་མྱོང་མཉམ་སྤྱོད་བྱས་ནས་མིའི་རིགས་རྒྱུན་མཐུད་ཆོག་པའི་འཕེལ་རྒྱས་ཡོང་བར་ཀྲུང་གོའི་བློ་གྲོས་དང་ཀྲུང་གོའི་ཇུས་གཞི་ལེགས་སྐྱེས་སུ་འབུལ་འདོད་ཡོད་ཅེས་བསྟན་ཡོད།