“བོད་ལ་དམངས་གཙོ་བཅོས་སྒྱུར་བྱས་ནས་ལོ་66འཁོར་བར་དྲན་གསོ་ཞུ་བའི་སྐབས་སུ་ཡོངས་བསྒྲགས་བྱས་པའི་རྒྱབ་ཤ་དཀར་པོའི་དེབ་ནང་ཞི་བས་བཅིངས་འགྲོལ་བཏང་བ་ནས་བཟུང་དང་ལྷག་པར་དུ་དུས་རབས་གསར་པ་ཤར་ཚུན་དུ། བོད་ཀྱི་འགྲོ་བ་མིའི་ཐོབ་ཐང་བྱ་གཞག་འཕེལ་རྒྱས་མྱུར་པོ་དང་ཕྱོགས་ཡོངས་ནས་ཡར་རྒྱས་བྱུང་བ་ཆད་ལུས་མེད་པར་བསྟན་ཡོད”ཅེས་ཟླ་3ཚེས་28ཉིན《དུས་རབས་གསར་པའི་བོད་ཀྱི་འགྲོ་བ་མིའི་ཐོབ་ཐང་བྱ་གཞག་གི་འཕེལ་རྒྱས་དང་ཡར་ཐོན》རྒྱབ་ཤ་དཀར་པོའི་དེབ་ཡོངས་བསྒྲགས་བྱས་རྗེས་རང་སྐྱོང་ལྗོངས་སྤྱི་ཚོགས་ཚན་རིག་ཁང་གི་ཞིབ་འཇུག་པ་པད་མ་མཚོས་གསར་འགོད་པའི་ཆེད་དོན་བཅར་འདྲི་དང་ལེན་བྱེད་སྐབས་དེ་ལྟར་བཤད།

ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག བོད་ཀྱི་འགྲོ་བ་མིའི་ཐོབ་ཐང་བྱ་གཞག་ལ་ཕྱོགས་ཡོངས་ནས་ཡར་རྒྱས་བྱུང་བ་དང་ལོ་རྒྱུས་རང་བཞིན་གྱི་གྲུབ་འབྲས་ཐོབ་ཡོད། དམིགས་བསལ་ཚོགས་སྤྱིའི་གྲུབ་ཆ་གལ་ཆེན་ཞིག་ཡིན་པའི་རྒན་རྒོན་གྱི་ཁེ་དབང་འགན་སྲུང་བྱེད་ལུགས《དུས་རབས་གསར་པའི་བོད་ཀྱི་འགྲོ་བ་མིའི་ཐོབ་ཐང་བྱ་གཞག་གི་འཕེལ་རྒྱས་དང་ཡར་ཐོན》རྒྱབ་ཤ་དཀར་པོའི་དེབ་ནང་ཞིབ་ཕྲ་བསྟན་ཡོད།

“རྒྱབ་ཤ་དཀར་པོའི་དེབ་ནང་རྒན་རྒོན་ཚོགས་སྤྱིའི་སྐོར་ལ་དམིགས་སུ་བཀར་ནས་དོན་ཚན་གཅིག་བཀོད་སྒྲིག་བྱས་ནས་བརྒྱུད་རིམ་ལྡན་པའི་རྒྱས་བཤད་བྱས་ཡོད། བཀོད་སྒྲིག་དེར་མཚོན་བྱེད་རང་བཞིན་གྱི་དོན་སྙིང་གལ་ཆེན་ལྡན་ཡོད” པད་མ་མཚོས་ངོས་འཛིན་བྱས་དོན། དམིགས་བསལ་ས་ཁོངས་དང་དམིགས་བསལ་ཚོགས་སྤྱི་གཉིས་འབྲེལ་མཚམས་སུ་རྒན་རྒོན་གྱི་ཁེ་དབང་འགན་སྲུང་དམིགས་སུ་བཀར་ནས་བཀོད་པ་དེས་བོད་ཀྱི་རྒན་གསོའི་ཞབས་ཞུའི་མ་ལག་དེང་རབས་ཅན་ལ་ཕྱོགས་སྒྱུར་བྱེད་པའི་རྣམ་པ་མཚོན་པ་མ་ཟད། ཀྲུང་གོ་གུང་ཁྲན་ཏང་གི“མི་དམངས་ལྟེ་བར་འཛིན་པའི”སྲིད་སྐྱོང་འདུ་ཤེས་གངས་ལྗོངས་ས་མཐོར་གསོན་ཉམས་ལྡན་པའི་ངང་ལག་ལེན་བསྟར་བ་དེ་བས་མཚོན་ཡོད།

རྒྱབ་ཤ་དཀར་པོའི་དེབ་ནང་རྒན་གསོའི་ཞབས་ཞུའི་ལམ་ལུགས་མ་ལག་རྒྱུན་ཆད་མེད་པར་འཐུས་སྒོ་ཚང་དུ་གཏོང་བ་དང་། རྒན་གསོའི་ཞབས་ཞུའི་རྣམ་པ་ཕུན་སུམ་ཚོགས་པ། རྒན་འཕྲོད་ཅན་འཛུགས་སྐྲུན་ལ་མུ་མཐུད་སྐུལ་འདེད་གཏོང་བ་བཅས་ཕྱོགས་གསུམ་གྱི་ཐད་ནས་དུས་རབས་གསར་པར་བོད་ཀྱིས་རྒན་རྒོན་གྱི་དགོས་མཁོ་དང་རེ་འདུན་ལ་དམིགས་པ་གང་ལེགས་མཚོན་ཡོད་ཅིང་། རྒན་གསོའི་ཞབས་ཞུའི་མ་ལག་རྒྱུན་ཆད་མེད་པར་འཐུས་སྒོ་ཚང་དུ་གཏོང་བ་དང་། རྒན་གསོའི་ཞབས་ཞུ་མཁོ་སྤྲོད་ལེགས་སུ་གཏོང་བ། རྒན་གསོའི་ཞབས་ཞུའི་ཁྱབ་རྒྱ་ཆེ་རུ་གཏོང་བ། རྒན་གསོའི་ཞབས་ཞུའི་སྤུས་ཚད་མཐོ་རུ་གཏོང་བ། ཁྱིམ་སྡོད་དང་སྡེ་ཁུལ་སྒྲིག་གཞི་མཐུན་སྦྱོར་དང་། སྨན་བཅོས་དང་བདེ་སྲུང་ཟུང་འབྲེལ་བྱེད་པའི་རིམ་པ་མང་བའི་རྒན་གསོའི་ཞབས་ཞུའི་མ་ལག་ཧུར་ཐག་འཛུགས་སྐྱོང་བྱེད་པའི་ཐད་ཕན་འབྲས་མངོན་གསལ་དོད་པོ་ཐོན་ནས་རྒན་རྒོན་གྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་ཆེ་རུ་ཏན་ཏིག་ཕྱིན་ཡོད་པ་རེད།

པད་མ་མཚོས་དཔེ་དྲངས་ནས་བརྗོད་དོན། རྒན་གསོའི་ཞབས་ཞུའི་ལམ་ལུགས་དང་མ་ལག་འཐུས་སྒོ་ཚང་དུ་གཏོང་བའི་ཐད། བོད་ཀྱིས《རྒན་གསོའི་ཞབས་ཞུ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུའི་སྐོར་གྱི་བྱེད་ཐབས་འགའ་ཞིག》དང་།《ཁྱིམ་སྡོད་དང་སྡེ་ཁུལ་གྱི་རྒན་གསོའི་ཞབས་ཞུའི་ལག་བསྟར་ཇུས་གཞི》《གཞི་རྩའི་རྒན་གསོའི་ཞབས་ཞུའི་མ་ལག་འཛུགས་སྐྱོང་ལ་སྐུལ་འདེད་གཏོང་རྒྱུའི་སྐོར་གྱི་བོད་རང་སྐྱོང་ལྗོངས་ཀྱི་ལག་བསྟར་ཇུས་གཞི》སོགས་སྲིད་ཇུས་ཡིག་ཆ་བཟོས་པ་དང་། རྒན་གསོའི་སྒྲིག་གཞིའི་ནད་སྐྱོང་ཞབས་ཞུའི་ཚད་གཞི་དང་། མི་སྣའི་དོ་དམ་ཚད་གཞི། འཕྲལ་སྡོམ་དོ་དམ་ཚད་གཞི་སོགས་རང་སྐྱོང་ལྗོངས་ཀྱི་རྒན་གསོའི་སྒྲིག་གཞིའི་ས་གནས་ཚད་གཞི་ཁག་18བཟོས་པ་རེད། “ལམ་ལུགས་དང་མ་ལག་འཐུས་སྒོ་ཚང་དུ་བཏང་སྟེ་གཞི་རྩའི་རྒན་གསོའི་ཞབས་ཞུའི་གསལ་ཐོ་བཟོས་ནས་བོད་ཀྱི་གནས་ཚུལ་དང་མཐུན་པ་དང་། རྒན་རྒོན་ཡོངས་ལ་ཁྱབ་པ། དབང་ཆ་དང་འགན་འཁྲི་ཁ་གསལ། འགན་སྲུང་འོས་འཚམ། རྒྱུན་མཐུད་ཆོག་པའི་གཞི་རྩའི་རྒན་གསོའི་ཞབས་ཞུའི་མ་ལག་མགྱོགས་མྱུར་འཛུགས་རྒྱུར་མཛུབ་ཁྲིད་དང་ཁ་ཕྱོགས་གསལ་བཏོན་བྱས་ཡོད”ཅེས་པད་མ་མཚོས་གསར་འགོད་པར་བཤད།

རྒན་འཕྲོད་ཅན་འཛུགས་སྐྱོང་ལ་སྐུལ་འདེད་གཏོང་བའི་ཐད། བོད་ཀྱིས《“ལོ་ལྔ་ཚན་བཅུ་བཞི་པའི”རིང་དམིགས་བསལ་དཀའ་ངལ་ཡོད་པའི་རྒན་རྒོན་ཁྱིམ་ཚང་གི་རྒན་འཕྲོད་ཅན་གྱི་སྒྱུར་བཀོད་ལས་དོན་ལ་སྐུལ་འདེད་གཏོང་རྒྱུའི་སྐོར་གྱི་ལག་བསྟར་ཇུས་གཞི》བཀྲམ་ནས་འབྲེལ་ཡོད་ཚད་གཞི་དང་མཐུན་པ་དང་། གཞི་རྩའི་སྒྱུར་བཀོད་ཀྱི་ཆ་རྐྱེན་འཛོམས་པའི་དམིགས་བསལ་དཀའ་ངལ་ཡོད་པའི་རྒན་རྒོན་ཁྱིམ་ཚང་ལ་རྒན་འཕྲོད་ཅན་གྱི་སྒྱུར་བཀོད་བྱས་པ་རེད། 2024ལོའི་ལོ་མཇུག་བར་རིམ་རྩིས་བརྒྱབ་ན། དམིགས་བསལ་དཀའ་ངལ་ཡོད་པའི་རྒན་རྒོན་གྱི་ཁྱིམ་ཚང་2315ལ་རྒན་འཕྲོད་ཅན་གྱི་སྒྱུར་བཀོད་བྱས་པ་རེད།

བོད་ལ་དམངས་གཙོའི་བཅོས་སྒྱུར་བྱས་ནས་ལོ་66འཁོར་བ་དང་རང་སྐྱོང་ལྗོངས་དབུ་བརྙེས་ནས་ལོ་60འཁོར་བའི་ལོ་རྒྱུས་ཀྱི་མཚམས་ཚིགས་སུ། རྒྱབ་ཤ་དཀར་པོའི་དེབ་ནི་འདས་ཟིན་པའི་གྲུབ་འབྲས་ལ་ཕྱོགས་སྡོམ་བྱས་པ་ཞིག་ཡིན་ལ། མ་འོངས་པར་ཁ་ཕྱོགས་པའི་བསྒྲགས་གཏམ་ཞིག་དེ་བས་ཡིན།