འདི་ནི་ཉི་ཁོ་ལའེ་ལི་སི་ཡིན་པ།　（བཅར་འདྲི་དང་ལེན་བྱེད་མཁན་གྱིས་པར་རིས་མཁོ་འདོན་བྱས）

　འདི་ནི་ཉི་ཁོ་ལའེ་ལི་སིས（དཀྱིལ）སྨན་དོན་པ་དང་མཉམ་དུ་ནད་པར་གོམ་བགྲོས་སྦྱོང་བརྡར་མཛུབ་ཁྲིད་བྱེད་བཞིན་པ།

“ཀྲུང་གོ་སྲིད་གཞུང་གི་ཁས་ལེན་ཆེན་པོ་དེ་འདྲ་ཐོབ་པ་ངའི་བསམ་ཡུལ་ལས་འདས་སོང་།　གཅིག་བྱས་ན་འདི་ནི་ངའི་ལས་ཀའི་ནང་ཐོབ་པའི་ཆེས་བླ་ན་མེད་པའི་མཚན་སྙན་གྱི་གྲས་ཤིག་ཡིན་སྲིད”ཅེས་པར་ཙིར་གྱི་དབང་རྩའི་སྐྱེ་དངོས་རིག་པ་མཁས་ཅན་དང་ཀླད་འཕྲུལ་སྦྲེལ་རྩལ་ཞིབ་འཇུག་གི་སྔོན་བྱོན་པ་སྨི་ཀེར·ཉི་ཁོ་ལའེ་ལི་སིས་གསར་འགོད་པར་བརྗོད་པ་དང་།　ཁོང་གིས།　ང་རང་ལ་2024ལོའི་ལོ་འཁོར་གྱི་ཀྲུང་གོ་སྲིད་གཞུང་གི་མཛའ་གྲོགས་བྱ་དགའ་ཐོབ་པ་ལས་པར་ཀྲུང་རྒྱལ་ཁབ་གཉིས་པོའི་མཁས་དབང་དེ་བས་མང་བར་རིག་གཞུང་སྤེལ་རེས་དང་ཚན་ཞིབ་མཉམ་ལས་དེ་བས་གཏིང་ཟབ་བྱེད་པར་སྐུལ་ལྕག་ཐེབས་རྒྱུའི་རེ་བ་ཡོད་ཅེས་བརྗོད།

“ངས་ལག་རྩལ་དེ་གཙོ་བོ་རྒྱུངས་པར་རྨས་སྐྱོན་ཕོག་པ་སོགས་དབང་རྩའི་མ་ལག་གི་ནད་གཞིའི་ནད་ཐོག་སྨན་བཅོས་ལ་སྤྱོད་ཀྱི་ཡོད།　བདེ་འཇགས་དང་།　ནུས་ལྡན།　འགན་འཁུར་ཐུབ་པ་བཅས་བྱུང་ཚེ་གཞི་ནས་ནད་པ་དཀྱུས་མ་དེ་བས་མང་བར་ཕན་པ་ཐོབ་ཐུབ”ཅེས་ཉི་ཁོ་ལའེ་ལི་སིས་ངོ་སྤྲོད་བྱས།　ཞིབ་འཇུག་བྱས་འབྲས་ལས་མངོན་པར།　གོ་ལ་ཧྲིལ་པོའི་མི་དུང་ཕྱུར་30ལྷག་ཙམ་ལ་དབང་རྩའི་མ་ལག་གི་ནད་ཕོག་ཡོད་པ་དང་།　དབང་རྩའི་མ་ལག་གི་ནད་གཞི་ནི་གོ་ལ་ཧྲིལ་པོའི་བདེ་ཐང་མིན་པ་དང་དབང་པོ་སྐྱོན་ཅན་ཆགས་པའི་རྒྱུ་རྐྱེན་གཙོ་བོ་རེད།　2014ལོར།　ཉི་ཁོ་ལའེ་ལི་སིས“ཡང་བསྐྱར་འགྲོ་སྐྱོད་འཆར་གཞི”བཏོན་པར་རྒྱལ་ཁབ་25ཡི་མཁས་དབང་150ལྷག་ཙམ་དེའི་ནང་ཞུགས་ཡོད།

ཉི་ཁོ་ལའེ་ལི་སིས་རྨང་གཞིའི་དབང་རྩའི་ཚན་རིག་དང་ནད་ཐོག་སྨན་བཅོས་ལག་ལེན་སོགས་ཀྱི་ཐད་པར་ཀྲུང་རྒྱལ་ཁབ་གཉིས་པོས་སྤེལ་རེས་མཉམ་ལས་བྱེད་ཤུགས་མུ་མཐུད་ཆེ་རུ་གཏོང་ཆོག་པའི་ངོས་འཛིན་བྱེད་ཅིང་།　ཁོང་གིས“ངས་ཀྱང་རང་ནུས་གང་ཡོད་བཏོན་ནས་རྒྱལ་སྤྱིའི་མཁས་དབང་དེ་བས་མང་པོ་དེའི་ནང་ཞུགས་པར་སྐུལ་ལྕག་དང་རྒྱབ་སྐྱོར་བྱེད་ཀྱི་ཡིན”ཞེས་བརྗོད།