2024ལོར།　ཕྱི་རྒྱལ་གྱི་རིགས་གཅིག་མཁས་ཅན་100ལ་ཀྲུང་གོ་སྲིད་གཞུང་གི་མཛའ་གྲོགས་བྱ་དགའ་ཐོབ་ཅིང་།　འདི་ག་ཚགས་པར་གྱི་གསར་འགོད་པས་དེའི་ནང་གི་བྱ་དགའ་ཐོབ་མཁན་6ལ་བཅར་འདྲི་བྱས་ནས་ཁོང་ཚོ་དང་ཀྲུང་གོའི་དབར་གྱི་མཛའ་གྲོགས་གཏམ་རྒྱུད་ཤོད་ཀྱི་ཡིན།

འདི་ནི་ཏི་ཡཱ་ལོས（མདུན）ཀྲེ་ཅང་ཅིན་ཧྭ་གྲོང་ཁྱེར་ཕུའུ་ཅང་རྫོང་ཧྲང་ཧོ་གྲོང་ཚོར་ས་གནས་དེ་གའི་སྲོལ་རྒྱུན་རིག་གནས་ཉམས་ལེན་བྱེད་བཞིན་པ།　（བཅར་འདྲི་དང་ལེན་བྱེད་མཁན་གྱིས་པར་རིས་མཁོ་འདོན་བྱས）

འདི་ནི་ཨ་ཧྥེ་རི་ཁ་རྟེན་མཛོད་ཁང་གི་དང་བླངས་པས（གཡས་ཀྱི་དང་པོ）ལྟ་སྐོར་བར་རིག་དངོས་ངོ་སྤྲོད་བྱེད་བཞིན་པ།　（ཀྲེ་ཅང་དགེ་འོས་སློབ་ཆེན་ཨ་ཧྥེ་རི་ཁ་ཞིབ་འཇུག་ཁང་གིས་པར་རིས་མཁོ་འདོན་བྱས）

“འདི་ནི་གཟི་བརྗིད་དང་སྐུལ་ལྕག་ཧ་ཅང་ཆེན་པོ་ཞིག་རེད།　ང་རང་ལ་ཁས་ལེན་བྱས་པ་ཞིག་ཡིན་པ་མ་ཟད་ཀྲུང་ཧྥེའི་མཛའ་གྲོགས་ལ་ཁས་ལེན་བྱས་པ་ཞིག་དེ་བས་ཀྱང་ཡིན”ཞེས་མ་ལེའི་མཁས་དབང་དང་ཕྱི་འབྲེལ་དཔོན་ཟུར་པ་གཡོད་ལོ·ཏི་ཡཱ་ལོས་སེམས་འགུལ་ཆེན་པོ་ཐེབས་བཞིན་གསར་འགོད་པར་བརྗོད།　ཁོང་གིས་རང་ངོས་ཀྱི་རིག་གཞུང་རྒྱབ་ལྗོངས་ཟབ་མོ་དང་ཕུན་སུམ་ཚོགས་པའི་རིག་གནས་ལས་བརྒལ་བའི་ཉམས་མྱོང་སྤྱད་དེ་ཀྲུང་ཧྥེའི་རིག་གནས་སྤེལ་རེས་ལ་སྐུལ་འདེད་ཧུར་ཐག་བཏང་བས།　2024ལོའི་ལོ་འཁོར་གྱི་ཀྲུང་གོ་སྲིད་གཞུང་གི་མཛའ་གྲོགས་བྱ་དགའ་ཐོབ་ཡོད།

2013ལོར་ཏི་ཡཱ་ལོ་ཀྲུང་གོར་ཡོང་ནས་ཀྲུང་གོར་བཅའ་སྡོད་མ་ལིའི་གཞུང་ཚབ་ཆེ་མོ་ཁང་གི་ཚན་ཙན་རིམ་པ་དང་པོའི་འགན་ཁུར།　2017ལོར་ཁོང་ཀྲེ་ཅང་དགེ་འོས་སློབ་ཆེན་ཨ་ཧྥེ་རི་ཁ་ཞིབ་འཇུག་ཁང་དུ་ཞུགས་ནས་ཨ་ཧྥེ་རི་ཁ་རྟེན་མཛོད་ཁང་གི་ཀོན་ཀྲང་དང་ཨ་ཧྥེ་རི་ཁའི་ཧྥ་རན་སིའི་སྐད་ཡིག་རྒྱལ་ཁབ་ཀྱི་ཞིབ་འཇུག་ལྟེ་གནས་ཀྱི་ལག་བསྟར་ཀྲུའུ་རེན་གྱི་འགན་ཁུར་ཞིང་།　གཙོ་བོ་ཞིབ་འཇུག་སློབ་མའི་སློབ་ཁྲིད་དང་།　ཚན་རིག་ཞིབ་འཇུག　ཨ་ཧྥེ་རི་ཁ་རྟེན་མཛོད་ཁང་གི་རིག་དངོས་ཁུངས་འཚོལ་ར་སྤྲོད་བཅས་ཀྱི་ལས་ཀ་བྱེད་ཀྱི་ཡོད།　ཁོང་གིས་ཀྲུང་གོའི་སློབ་མར་ཕྱོགས་ནས“ཨ་ཧྥེ་རི་ཁའི་ས་ཁམས་དང་ཨ་ཧྥེ་རི་ཁའི་རིག་གནས”ཀྱི་ཆེད་དོན་འཆད་ཁྲིད་གཉེར་བ་དང་།　ཨ་ཧྥེ་རི་ཁ་རྟེན་མཛོད་ཁང་ནང་གི་འགྲེམས་དངོས་1000ལྷག་ཙམ་ཁུངས་འཚོལ་ར་སྤྲོད།　དཔེ་ཀློག་སྤེལ་རེས་ཚོགས་འདུ་སྒྲིག་འཛུགས་བྱས་ནས་ཀྲུང་གོའི་སློབ་མར་ཀྲུང་ཧྥེའི་མཉམ་ལས་ཀྱི་ད་ལྟའི་གནས་ཚུལ་ངོ་སྤྲོད་བཅས་བྱས་ཤིང་།　ཏི་ཡཱ་ལོས“རིག་གནས་སྤེལ་རེས་ནི་དམངས་སེམས་གཅིག་མཐུན་ལ་སྐུལ་འདེད་གཏོང་བ་དང་མཛའ་གྲོགས་ཟབ་ཏུ་གཏོང་བའི་འགག་རྩ་ཡིན།　རིག་གནས་སྤེལ་རེས་བྱེད་ཤུགས་ཆེ་རུ་བཏང་བ་དེ་ཀྲུང་ཧྥེའི་ལས་དབང་གཅིག་མཐུན་ཚོགས་པ་འཛུགས་པར་སྐུལ་འདེད་གཏོང་རྒྱུར་ཕན་ཐོགས་ཡོད”ཅེས་བརྗོད།

ཏི་ཡཱ་ལོས་འབྱུང་འགྱུར་ཀྲུང་ཧྥེའི་རིག་གནས་སྤེལ་རེས་ལ་སྐུལ་འདེད་གཏོང་བར་མུ་མཐུད་གཞོལ་ནས་ཨ་ཧྥེ་རི་ཁའི་མཁས་དབང་དང་ན་གཞོན་དང་གླེང་མོལ་བྱེད་མང་དུ་བཏང་སྟེ།　ཨ་ཧྥེ་རི་ཁའི་རྒྱལ་ཁབ་ཀྱི་དམངས་ཚོགས་དེ་བས་མང་པོས་ཇི་མ་ཇི་བཞིན་གྱི་ཀྲུང་གོ་ཤེས་རྟོགས་ཐུབ་པ་བྱེད་ཀྱི་ཡིན།　“ཀྲུང་གོར་རྒྱུས་མངའ་ལོན་ཚེ་ཀྲུང་གོར་དགའ་པོ་ཡོང་ངེས་རེད”ཅེས་བརྗོད་པ་རེད།