འདི་ནི་2025ལོའི་ASCའཛམ་གླིང་གི་སློབ་ཆེན་སློབ་མའི་རིམ་འདས་རྩིས་འཁོར་གྱི་འགྲན་བསྡུར་ལ་ཞུགས་བཞིན་པའི་མཚོ་སྔོན་སློབ་ཆེན་གྱི་རིམ་འདས་རྩིས་འཁོར་ཚོགས་པའི་ཁོངས་མི་ཡིན་པ།

འདི་ནི་ཅང་སུའུ་ཡི་མཚོ་སྐྱོར་ལས་བྱེད་པ་དང་མཚོ་བོད་ལྕགས་ལམ་མེ་ཏོག་ལྡུམ་ར་སློབ་གྲྭའི་སློབ་སྤྱི་གཞོན་པ་ཞུས་ཅན་གྱིས་སློབ་གྲྭར་ཁྱིམ་བདག་ཚོགས་འདུ་ཚོགས་བཞིན་པ།

འདི་ནི་ཧྲང་ཧའེ་ཡི་མཚོ་སྐྱོར་ལས་བྱེད་པ་དང་མགོ་ལོག་ཀྲོའུ་རྟ་བོ་མི་རིགས་སློབ་འབྲིང་གི་དགེ་རྒན་ཅང་ཧུང་ཝུའུ་ཡིས་སློབ་ཚན་ཁྲིད་བཞིན་པ།

ནུབ་རྒྱུད་ཀྱི་མཐོ་སློབ་མཚོ་སྔོན་སློབ་ཆེན་གྱིས་ASCའཛམ་གླིང་སློབ་ཆེན་སློབ་མའི་རིམ་འདས་རྩིས་འཁོར་འགྲན་བསྡུར་སྐབས་བཞིའི་མཐའ་བསྡུར་གྱི་ཨང་དང་པོ་བསྟུད་མར་བླངས་པ་མ་ཟད།　ད་དུང་འགྲན་བསྡུར་དེའི་2025ལོའི་མཐའ་བསྡུར་གྱི་གཉེར་དབང་ཡང་རག་པ་རེད།　“དེ་ནི་མཚོ་སྔོན་གྱི་རྩིས་འཁོར་ཤེས་ལྡན་པ་གསོ་སྐྱོང་ལ་ཁས་ལེན་དང་ལྕག་སྐུལ་བྱས་པ་ཞིག་རེད”ཅེས་མཚོ་སྔོན་སློབ་ཆེན་རྩིས་འཁོར་ཚན་ཁག་གི་ཡུན་བསྐོས་དགེ་རྒན་ཆེ་མོ་བ་མཚོ་སྔོན་རྩིས་འཁོར་ལག་རྩལ་དང་བཀོལ་སྤྱོད་སློབ་གླིང་གི་ཡོན་ཀྲང་ཀྲའེ་ཅིས་ཏུང་གིས་བཤད་པ་དང་།　ཁོང་གིས་རིག་སྟོབས་ཀྱི་རྒྱབ་སྐྱོར་ནས་བླ་སྲོག་སྐྲུན་པའི་བར་མཚོ་སྔོན་སློབ་ཆེན་གྱི་འཕེལ་རྒྱས་ནི་སློབ་གསོའི་ཁ་གཏད་རོགས་སྐྱོར་གྱི་བསྡུས་རིས་ཤིག་རེད་ཅེས་བཤད།

2007ལོར་མཚོ་སྔོན་སློབ་ཆེན་རྩིས་འཁོར་ལག་རྩལ་དང་བཀོལ་སྤྱོད་ཚན་ཁག་བཙུགས་ཤིང་།　དང་ཐོག་མར་ཆེད་ལས་ཤེས་ལྡན་པ་དཀོན་པའི་དབང་གིས་འཕེལ་རྒྱས་རྗེས་སུ་ལུས་པ་དང་ཚན་ཞིབ་ཀྱི་འཕེལ་རིམ་འགོར་པོ་ཡོད་པ་རེད།　ཤེས་ལྡན་པའི་དཔུང་ཁག་གི་གནད་དོན་སེལ་ཆེད།　ཆིང་ཧྭ་སློབ་ཆེན་གྱིས་སྔ་རྗེས་སུ་རིགས་གཅིག་མཁས་ཅན་5མངགས་ནས་མཚོ་སྔོན་སློབ་ཆེན་ལ་རྩིས་འཁོར་རིག་ཚན་གྱི་འཆར་འགོད་དང་འཛུགས་སྐྲུན་ལ་རོགས་སྐྱོར་བྱས་པ་རེད།　ཆིང་ཧྭ་སློབ་ཆེན་མཚོ་སྐྱོར་རིགས་གཅིག་མཁས་ཅན་གྱིས་མཚོ་སྔོན་སློབ་ཆེན་ལ་སློབ་ཚན་གྱི་མ་ལག་བཞག་པ་ཙམ་མ་ཟད།　“ཡར་ཐོན་ལྷུར་ལེན་དང་སྤྱོད་བཟང་ཁོང་ཡངས”ཀྱི་སྙིང་སྟོབས་ཀྱི་ས་བོན་དེ་བས་ཀྱང་བཏབ་ཡོད།

སློབ་གསོ་ནི་ཤར་ནུབ་རྒྱུད་མཉམ་ལས་དང་ཁ་གཏད་རོགས་སྐྱོར་བྱེད་པའི་གཙོ་གནད་ཅིག་རེད།　ཏང་ཀྲུང་དབྱང་གིས་པེ་ཅིང་སོགས་ཞིང་ཆེན་དང་གྲོང་ཁྱེར་6དང་ཆིང་ཧྭ་སློབ་ཆེན་སོགས་མཐོ་སློབ་23མཚོ་སྔོན་ལ་ཁ་གཏད་རོགས་སྐྱོར་བྱེད་པར་བཀོད་སྒྲིག་བྱས་པ་ལས་སློབ་གསོའི་མཚོ་སྐྱོར་སློབ་མཚམས་ཁག་དང་།　ས་ཁུལ་ཁག　ཤེས་ལྡན་པའི་མ་དངུལ་རྣམ་གྲངས་བཅས་ཁྱོན་ཡོངས་ལ་ཁྱབ་ཡོད་པ་རེད།

མཚོ་སྐྱོར་དགེ་རྒན་ཁག་ཐེངས་རེ་རེ་མཚོ་བོད་ས་མཐོར་རྩ་བ་ཚུགས་ཏེ་མཚོ་སྔོན་གྱི་སློབ་གསོའི་བྱ་གཞག་དེ་དོར་དུ་མི་རུང་བའི་འགན་འཁྲིར་བརྩི་བཞིན་ཡོད།

“མཚོ་སྐྱོར་བྱེད་དོན་གང་ཡིན།　མཚོ་སྔོན་དུ་གང་ཞིག་སྒྲུབ་དགོས་སམ།　མཚོ་སྔོན་ནས་ཁ་བྲལ་སྐབས་རིན་ཐང་ཡོད་པ་གང་ཞིག་འཇོག་དགོས་སམ”ཞེས་པ་ནི་མཚོ་སྐྱོར་དགེ་རྒན་ཞུས་ཅན་གྱིས་རྟག་ཏུ་བསམ་གཞིག་བྱེད་པའི་གནད་དོན་རེད།　2024ལོའི་ཟླ་2པར་ཁོང་ནན་ཅིང་གྲོང་ཁྱེར་ཀུའུ་ལོའུ་ཆུས་ནན་ཅིང་དགེ་འོས་སློབ་ཆེན་ཞོར་གཏོགས་སློབ་འབྲིང་ཧྲུའུ་རེན་སློབ་གྲྭའི་ཞོར་གཏོགས་སློབ་ཆུང་ནས་མཚོ་སྔོན་དུ“ཚོགས་སྒྲིག་རྣམ་པའི”སློབ་གསོའི་རོགས་སྐྱོར་ལས་དོན་སྤེལ་བར་ཡོང་སྟེ་ཟི་ལིང་གྲོང་ཁྱེར་མཚོ་བོད་ལྕགས་ལམ་མེ་ཏོག་ལྡུམ་ར་སློབ་གྲྭའི་སློབ་སྤྱི་གཞོན་པའི་འགན་འཁུར་བ་རེད།

མཚོ་སྔོན་ལ་རང་བྱུང་ཁོར་ཡུག་དང་ས་བབ་ཀྱི་ཆ་རྐྱེན་སོགས་ཀྱི་ཚོད་འཛིན་ཕོག་ནས་ཤེས་ལྡན་པའི་གྲངས་འབོར་ཉུང་བ་དང་སློབ་གསོའི་རྨང་གཞི་ཞན་པ་སོགས་ཀྱི་དངོས་ཡོད་གནས་ཚུལ་ཡོད་པ་རེད།　ཞུས་ཅན་གྱིས“‘གཞན་བརྟེན’ནས‘རང་བརྟེན’ལ་སྒྱུར་དགོས་ན་ནང་དུ་འདྲེན་པ་དང་ཕྱིར་སྐྱོད་པ་གཉིས་ཀར་དམ་འཛིན་བྱེད་དགོས”ཞེས་བཤད།

ཅང་སུའུ་སློབ་གསོའི་སྡེ་ཚན་གྱི་རྒྱབ་སྐྱོར་འོག　2024ལོར་མཚོ་བོད་ལྕགས་ལམ་མེ་ཏོག་ལྡུམ་ར་སློབ་གྲྭས་དུས་ཐེངས་དང་ཁག་ཐེངས་དབྱེ་ནས་རྐང་འཛིན་དགེ་རྒན་70ལྷག་ཙམ་ནན་ཅིང་དང་ཁྲང་ཀྲོའུ་སོགས་སུ་ཟབ་སྦྱོང་གསོ་སྦྱོང་ལ་བཏང་བ་དང་།　ནན་ཅིང་སློབ་གསོའི་སློབ་ཁྲིད་རིགས་གཅིག་མཁས་ཅན་དང་དགེ་རྒན་གྲགས་ཅན་20ལྷག་ཙམ་ཟི་ལིང་དུ་ཉམས་མྱོང་བཟང་པོ་སྤེལ་བར་གདན་དྲངས་ཏེ་དྲ་ཐོག་དང་དྲ་ཕྱིའི་སློབ་ཁྲིད་དང་ཞིབ་འཇུག་གྲོས་བསྡུར་ཐེངས་40ལྷག་ཙམ་སྒྲིག་འཛུགས་བྱས་ནས་སྤེལ་བ་རེད།

བསྡོམས་རྩིས་བརྒྱབ་པ་ལྟར་ན།　2010ལོ་ཚུན་དུ་ཧྲང་ཧའེ་དང་།　པེ་ཅིང་།　ཅང་སུའུ།　ཐེན་ཅིན།　ཀྲེ་ཅང་།　ཧྲན་ཏུང་སོགས་ཞིང་ཆེན་དང་གྲོང་ཁྱེར་གྱིས་སྔ་རྗེས་སུ་དགེ་རྒན་2000ཙམ་མཚོ་སྔོན་དུ་སློབ་སྐྱོར་ལ་མངགས་ཏེ་རྐང་འཛིན་དགེ་རྒན་8000ལྷག་ཙམ་གསོ་སྐྱོང་བྱས་ནས་མཚོ་སྔོན་གྱི་སློབ་གསོའི་བྱ་གཞག་ལ་འཛད་མཐའ་མེད་པའི་ཤེས་ལྡན་པ་དང་སྒུལ་ཤུགས་བསྣན་ཡོད།

“སློབ་གསོ་ནི་ཤེས་བྱ་སློབ་པ་ཁོ་ན་ཙམ་མིན་པར་སེམས་པ་དང་སེམས་ཀྱི་འབྲེལ་མཐུད་ཅིག་རེད”ཧྲང་ཧའེ་ཡི་མཚོ་སྐྱོར་དགེ་རྒན་ཅང་ཧུང་ཝུའུ་ནི་ཆ་སྙོམས་ས་བབ་མཐོ་ཚད་སྨི་4200ཟིན་པའི་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཀྲོའུ་རུ་སློབ་སྐྱོར་ལ་ཡོང་ནས་མགོ་ལོག་ཀྲོའུ་རྟ་བོ་མི་རིགས་སློབ་འབྲིང་གི་རྒྱ་ཡིག་དགེ་རྒན་གྱི་འགན་འཁུར་གྱི་ཡོད་པ་རེད།

མཚོ་སྔོན་དུ་མ་སླེབས་གོང་ཁོང་གིས་ཡུལ་དེ་གའི་ལོ་རྒྱུས་རིག་གནས་དང་ཡུལ་སྲོལ་གོམས་གཤིས་སོགས་ལ་རྒྱུས་མངའ་ལོན་པར་བྱས་ནས་གནས་དེར་གང་མགྱོགས་གོམས་པར་བྱས་ཡོད།　ཁོང་ལ་ཁ་པར་ག་དུས་བཏང་ཡང་འབྲེལ་བ་བྱེད་ཐུབ་པ་དང་།　ཁོང་གིས་ཀྱང“སློབ་མ་དང་ཁྱིམ་བདག་ཚོས་ག་དུས་ཡིན་ཡང་ང་དང་འབྲེལ་བ་བྱས་ཆོག　ངས་ཀྱང་ཁོང་ཚོའི་རྒྱུན་གཏན་གྱི་འཚོ་བ་གང་འདྲ་ཡིན་མིན་ཤེས་འདོད་འདུག　དེ་དག་སློབ་ཚན་དང་ཟུང་འབྲེལ་བྱས་ཏེ་ཕྲུ་གུ་ཚོའི་སློབ་སྦྱོང་གི་སྤྲོ་སེམས་འཕེལ་བར་བྱེད་ཀྱི་ཡོད”ཅེས་བཤད།

ཉེ་བའི་ལོ་གཉིས་རིང་ཅང་ཧུང་ཝུའུ་ཡིས་ཧྲང་ཧའེ་ཡི་དགེ་རྒན་གྲགས་ཅན་གྱི་ཐོན་ཁུངས་དང་འབྲེལ་མཐུད་ཧུར་ཐག་བྱས་ཏེ་རང་སློབ་གྲྭའི་དགེ་རྒན་རྣམས་ཧྲང་ཧའེ་རུ་ཟབ་སྦྱོང་ལ་འགྲོ་བའི་བགྲོད་ལམ་བཤངས་པ་དང་།　མགོ་ལོག་ཀྲོའུ་སློབ་འབྲིང་གསུམ་གྱི་རྒྱ་ཡིག་དགེ་རྒན་7ལས་གྲུབ་པའི་སློབ་ཚན་ཞིབ་འཇུག་ཚོགས་པ་བཙུགས་ནས་ཐུན་མོང་ཐོག་ཞིབ་འཇུག་བྱ་གཞི་རེ་ཞུ་བྱས་པས་ས་གནས་དེ་གའི་སློབ་ཞིབ་སློབ་ཁྲིད་ཀྱི་ཆུ་ཚད་མངོན་གསལ་དོད་པོས་མཐོ་རུ་ཕྱིན་ཡོད།

“སློབ་གསོ་ནི་དུས་ཡུན་རིང་པོར་རྒྱུན་འཁྱོངས་བྱེད་དགོས་པ་ཞིག་ཡིན་མོད།　ང་ཚོ་མཚོ་སྐྱོར་དགེ་རྒན་གྱིས་གོམ་པ་སྤོ་མཚམས་ནམ་ཡང་འཇོག་མི་སྲིད་པར་ཤེས་བྱ་བརྒྱུད་སྤྲོད་དང་སློབ་མ་འཚར་ལོངས་ཡོང་བར་ཁྲིད་སྟོན་བྱས་ནས་ཁོང་ཚོར་རེ་བའི་འོད་སྣང་འཕྲོ་བ་བྱེད་ཀྱི་ཡིན།　འདི་ནི་མཚོ་སྐྱོར་དགེ་རྒན་ཚང་མའི་བསམ་འདུན་ཡིན་ངེས་རེད”ཅེས་ཅང་ཧུང་ཝུའུ་ཡིས་བཤད།