ལག་གདང་སྦྲེལ་ནས་འགྲན་སློང་བསུ། མཉམ་ལས་བྱས་ནས་འབྱུང་འགྱུར་གཏོད།
མིག་སྔར་ཚོགས་བཞིན་པའི་པོ་ཨའོ་ཨེ་ཤེ་ཡའི་གླེང་སྟེགས་ཀྱི་2025ལོའི་ལོ་ཚོགས་རིང“ལག་གདང་སྦྲེལ་ནས་འགྲན་སློང་བསུ། མཉམ་ལས་བྱས་ནས་འབྱུང་འགྱུར་གཏོད”ཅེས་པ་ཀུན་གྱི་བསམ་འདུན་ཆེ་ཤོས་སུ་གྱུར་ལ། རྒྱལ་ཁབ་བཅུ་གྲངས་ཁ་ཤས་ནས་ཡོང་བའི་ལས་རིཌ་ཁག་གི་མི་སྣས་ཧའེ་ནན་གྱི་པོ་ཨའོ་རུ་འཛོམས་ཏེ། “འཛམ་གླིང་གི་འཕོ་འགྱུར་ཁྲོད་དུ་ཨེ་ཤེ་ཡའི་འབྱུང་འགྱུར་མཉམ་དུ་གཏོད”ཅེས་པའི་བརྗོད་དོན་གཙོ་བོར་དམིགས་ནས་ཨེ་ཤེ་ཡ་དང་འཛམ་གླིང་འཕེལ་རྒྱས་ཀྱི་ཇུས་ཆེན་ལ་མཉམ་དུ་གྲོས་བསྡུར་བྱས་པ་རེད། ཚོགས་ཞུགས་མི་སྣས་མིག་སྔའི་ངེས་མེད་རང་བཞིན་ཆེ་བའི་འཛམ་གླིང་དུ། བློ་སེམས་གཅིག་སྒྲིལ་དང་ཕྱར་བ་གྲུ་འདེགས་བྱ་རྒྱུ་ནི་ནུས་པ་ལྡན་ཤོས་ཀྱི་བྱ་ཐབས་ཤིག་ཡིན་པའི་ངོས་འཛིན་བྱེད་ཀྱི་ཡོད། ཨེ་ཤེ་ཡའི་ཁྱིམ་ཚང་ཆེན་པོའི་ཁོངས་མི་གལ་ཆེན་ཞིག་ཡིན་པའི་ཀྲུང་གོས་ས་ཁོངས་དཔལ་འབྱོར་གཞི་གཅིག་ཅན་ལ་སྐུལ་འདེད་དང་ཀུན་ཕན་ཁོང་ཡངས་ཀྱི་དཔལ་འབྱོར་གོ་ལ་ཅན་ལ་སྐུལ་འདེད་གཏོང་ཆེད་མུ་མཐུད་དགེ་མཚན་ལྡན་པའི་ནུས་པ་འདོན་རྒྱུ་རེད།
འཕེལ་ཕྱོགས་ཆེན་པོར་སྟངས་འཛིན་གྱིས། འཕར་སྣོན་ཡོང་བར་སྐུལ་འདེད་གཏོང་།
—— “རྒྱལ་སྤྱིའི་སྤྱི་ཚོགས་སུ་ཀུན་ཕན་ཁོང་ཡངས་ཀྱི་དཔལ་འབྱོར་གོ་ལ་ཅན་ལ་སྐུལ་འདེད་གཏོང་རྒྱུའི་ཡིད་ཆེས་བརྒྱུད་བསྒྲགས་བྱས་པ”
དུས་རབས་གསར་པ་ཤར་ཚུན། ཀྲུའུ་ཞི་ཞི་ཅིན་ཕིང་གིས་པོ་ཨའོ་ཨེ་ཤེ་ཡའི་གླེང་སྟེགས་ཀྱི་ལོ་ཚོགས་ཐོག་གཙོ་དོན་གཏམ་བཤད་ཐེངས་ལྔ་གནང་སྟེ། ས་ཁུལ་གྱི་འཕེལ་རྒྱས་དང་དར་རྒྱས་ལ་སྐུལ་འདེད་གཏོང་ཆེད་ཨེ་ཤེ་ཡའི་ཐུན་མོང་གི་ངོས་འཛིན་གཅིག་མཐུན་ཡོང་བར་བྱེད་པ་དང་། གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ཁ་གཏད་གཅོག་ཆེད་ཀྲུང་གོའི་ཇུས་གཞི་འདོན་པ། ཀུན་ཕན་ཁོང་ཡངས་ཀྱི་དཔལ་འབྱོར་གོ་ལ་ཅན་ལ་སྐུལ་འདེད་གཏོང་བ་བཅས་ལ་ཁ་ཕྱོགས་གསལ་སྟོན་གནང་ཡོད།
མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཟུར་པ་པོ་ཨའོ་ཨེ་ཤེ་ཡ་གླེང་སྟེགས་ཀྱི་ལས་འཛིན་དཔོན་ཕན་ཅི་ཝུན་གྱིས། ཨེ་ཤེ་ཡ་ནི་ཐོག་མཐའ་བར་གསུམ་དུ་ཕྱོགས་མང་རིང་ལུགས་དང་། རང་མོས་ཚོང་དོན། དཔལ་འབྱོར་གོ་ལ་ཅན་བཅས་བློ་བརྟན་འགྱུར་མེད་ངང་དར་སྤེལ་གཏོང་མཁན་ཞིག་རེད། “ཨེ་ཤེ་ཡའི་ངོ་མཚར”ནི་ངོ་བོའི་ཐོག་ནས་བརྗོད་ན་གོ་ལ་ཧྲིལ་པོ་ཅན་འཛམ་གླིང་དཔལ་འབྱོར་ནང་མཉམ་འདྲེས་གཏིང་ཟབ་བྱུང་བའི་ངོ་མཚར་ཅན་ཞིག་རེད། “ཡིད་ཆེས་དང་མཐུན་སྒྲིལ་ཁྲིད་སྟོན་དུ་བྱས་ནས་བློ་བརྟན་འགྱུར་མེད་ངང་རྒྱལ་སྤྱིའི་མཉམ་ལས་ཡུན་རིང་བྱས་ཚེ། གཞི་ནས་མིའི་རིགས་ཡོངས་ལ་ཐུན་མོང་གི་བདེ་སྐྱིད་གཏོད་ཐུབ”ཅེས་བརྗོད་པ་རེད།
ཐེ་ལན་གྱི་ཙུང་ལི་གཞོན་པ་ཟུར་པ་དང་ཕྱི་འབྲེལ་པུའི་པུའུ་ཀྲང་གཅིག་ལྕོགས་ཏུན་གྱིས། འདས་ཟིན་པའི་ལོ་མང་པོའི་རིང་རྒྱལ་ཁབ་ཁག་གིས་དཔལ་འབྱོར་གོ་ལ་ཅན་གྱི“མྱུར་བགྲོད་ལམ”དུ་མགྱོགས་མྱུར་མདུན་སྐྱོད་བྱས་ཡོད། ད་ལྟའི་བགྲོད་ལམ་དུ་ཐོན་པའི“འགལ་རྐྱེན”ཁ་ཤས་ལ་ངེས་པར་དུ་གོ་ལ་ཧྲིལ་པོས་མཉམ་ལས་དམ་ཟབ་དང་ཕྱར་བ་གྲུ་འདེགས་བྱས་ནས་ཁ་གཏད་གཅོག་དགོས། རྒྱལ་ཁབ་ཚང་མས་ཁོང་ཡངས་ཀྱི་དཔལ་འབྱོར་གོ་ལ་ཅན་ལ་སྟོབས་ཤུགས་ལེགས་སྐྱེས་འབུལ་ཐུབ། ཀྲུང་གོས་གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་དང་། གོ་ལ་ཧྲིལ་པོའི་བདེ་འཇགས་ཀྱི་གྲོས་འགོ གོ་ལ་ཧྲིལ་པོའི་ཤེས་དཔལ་གྱི་གྲོས་འགོ་བཅས་བཏོན་ནས་གོ་ལ་ཅན་ལ་རྒྱབ་སྐྱོར་ཧུར་ཐག་དང་སྐུལ་འདེད་ཏན་ཏིག་གཏོང་བཞིན་ཡོད་ཅེས་བརྗོད་པ་རེད།
ཚན་རིག་ལག་རྩལ་གསར་དུ་གཏོད། འཕེལ་རྒྱས་གཏོང་བར་རམ་འདེགས་བྱེད།
—— “ཀྲུང་གོའི་གསར་གཏོད་ཀྱི་རམ་འདེཌ་འོག་འཛམ་གླིང་དེ་བས་མཛེས་སྡུག་ལྡན་པར་འགྱུར་ངེས་ཡིན་པ”
མིག་སྔར། མིས་བཟོས་རིག་ནུས་ཀྱིས་ཚབ་མཚོན་དུ་བྱས་པའི་རེས་སྐོར་གསར་པའི་ཚན་རྩལ་གསར་བརྗེ་དང་ཐོན་ལས་འཕོ་འགྱུར་ལ་འཕེལ་རྒྱས་མགྱོགས་པོ་ཕྱིན་ཏེ། མིས་བཟོས་རིག་ནུས་བཀོལ་སྤྱོད་དང་བཅོས་སྐྱོང་ལ་ཤུགས་སྣོན་ཐེབས་ནས་ཕྱོགས་ཁག་གི་དོ་ཁུར་བྱེད་ཡུལ་དུ་གྱུར་ཡོད། ཚོགས་ཞུགས་མི་སྣས་ཚ་ཚ་འུར་འུར་ངང་ཀྲུང་གོའི་ཚན་རྩལ་གསར་གཏོད་ཁྱབ་ཁོངས་ཀྱི་གྲུབ་འབྲས་གསར་ཤོས་ལ་གྲོས་བསྡུར་བྱས་པ་རེད།
ཨ་སི་ལི་ཁང་ཀུང་སིའི་གོ་ལ་ཧྲིལ་པོའི་དབུ་བཞུགས་ལག་བསྟར་དཔོན་སུའུ་པོ་ཁོ་ཡིས། ཡོ་རོབ་དང་ཀྲུང་གོའི་གསར་གཏོད་སྒྲིག་གཞིས་མཉམ་ལས་ཐབས་ལམ་རྒྱ་སྐྱེད་གཏོང་བ་དང་ཚན་ཞིབ་སྤེལ་རེས་ཀྱི་རྣམ་པ་དེ་བས་མང་བ་འཚོལ་ཞིབ་བྱ་རྒྱུའི་རེ་སྒུག་བྱེད་ཀྱི་ཡོད། “ཀྲུང་གོའི་གསར་གཏོད་ནུས་པ་འཕེལ་རྒྱས་དང་སྐྱོན་བྲལ་གྱི་ཀྲུང་གོ་འཛུགས་སྐྲུན་བྱེད་པར་ཡིད་ཆེས་ཆེན་པོ་ཡོད་ལ། ཀྲུང་གོའི་གསར་གཏོད་ཀྱི་རམ་འདེགས་འོག་འཛམ་གླིང་དེ་བས་མཛེས་སྡུག་ལྡན་པར་འགྱུར་ངེས་པའི་ཡིད་ཆེས་ཀྱང་ཡོད”ཅེས་བརྗོད་པ་རེད།
གླེང་སྟེགས་ཀྱི་ལོ་ཚོགས་རིང་ཚོགས་ཞུགས་སྐུ་མགྲོན་ཚོས་ད་དུང་རྒྱུན་མཐུད་ཆོག་པའི་འཕེལ་རྒྱས་ཀྱི་དམིགས་ཚད་དོན་འཁྱོལ་མགྱོགས་པོ་བྱ་རྒྱུ་དང་། གནམ་གཤིས་འགྱུར་ལྡོག་ལ་དེ་བས་ནུས་ལྡན་ངང་ཁ་གཏད་གཅོག་རྒྱུ། ཨེ་ཤེ་ཡའི་ནུས་རྒྱུ་ཕྱོགས་སྒྱུར་ལ་སྐུལ་འདེད་གཏོང་རྒྱུ་སོགས་ཀྱི་གྲོས་གཞིར་དམིགས་ནས་གྲོས་བསྡུར་གཏིང་ཟབ་བྱས་པ་རེད། ཨ་རབ་རྒྱལ་སྤྱིའི་མ་འཇོག་གླེང་སྟེགས་ལས་འཛིན་ལྷན་ཚོགས་ཀྱི་ཁོངས་མི་མུའུ་ཧན་མོ་ཏེ·ན་ཆི་མུའུ·ས་པ་ཧོ་ཡིས། “དཔལ་འབྱོར་ཕྱོགས་སྒྱུར་དང་ལག་རྩལ་ཕྱོགས་སྒྱུར་ཁྲོད་རྒྱུན་མཐུད་ཆོག་པའི་འཕེལ་རྒྱས་ཡོང་ཐབས་འཚོལ་ཞིབ་བྱེད་དགོས། ཕྱོགས་ཁག་གིས་གོ་སྐབས་དམ་འཛིན་བྱས་ནས་སྐད་ཆ་ཤོད་རེས་དང་སྤེལ་རེས་ལ་ཤུགས་སྣོན་བརྒྱབ་སྟེ། མཉམ་ལས་དང་མཐུན་སྦྱོར་གྱི་བྱ་ཐབས་ནུས་ལྡན་ངང་འཚོལ་ཞིབ་ཧུར་ཐག་བྱེད་དགོས”ཞེས་བརྗོད་པ་རེད།
མཉམ་ལས་བྱེད་པར་ཤུགས་སྣོན་རྒྱག མངོན་མེད་ནུས་པ་ཡོངས་སུ་འདོན།
—— “མི་ཚང་མས་མཉམ་སྤྱོད་དང་། ཞི་བདེ། དར་རྒྱས། རྒྱུན་མཐུད་ཆོག་པ་བཅས་ཀྱི་འཛམ་གླིང་མཉམ་དུ་སྐྲུན་དགོས”
མིག་སྔར། གོ་ལ་ཧྲིལ་པོའི་ལྷོ་ཕྱོགས་ཀྱི་སྟོབས་ཤུགས་མངོན་གསལ་དོད་པོས་ཆེ་རུ་ཕྱིན་ནས་མིའི་རིགས་ཡར་རྒྱས་ཀྱི་བྱ་གཞག་ཁྲོད་ནུས་པ་ཇེ་ཆེར་འགྲོ་བཞིན་ཡོད། ད་ལོའི་གླེང་སྟེགས་ཀྱི་ལོ་ཚོགས་ཐོག“ལྷོ་ཕྱོགས་འདུས་ཚད”སྔར་བས་མཐོ་རུ་ཕྱིན་ཞིང་། གོ་ལ་ཧྲིལ་པོའི་ལྷོ་ཕྱོགས་ཀྱིས་རང་ངོས་ཀྱི་ཁྱད་ཆོས་ལྡན་པའི་དེང་རབས་ཅན་གྱི་ཐབས་ལམ་ཇི་ལྟར་འཚོལ་ཞིབ་བྱ་རྒྱུ་དང་ཉོ་ཚོང་དང་། དངུལ་རྩ། གནམ་གཤིས་འགྱུར་ལྡོག་ལ་ཇི་ལྟར་ཁ་གཏད་གཅོག་པ་སོགས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་སོགས་ཀྱི་གྲོས་གཞི་བཀོད་སྒྲིག་བྱས་ཡོད།
ཕན་ཅི་ཝུན་གྱིས། གདོང་ཐུག་དང་། དབུལ་ཕོངས། གནམ་གཤིས་འགྱུར་ལྡོག་སོགས་གོ་ལ་ཧྲིལ་པོའི་རང་བཞིན་གྱི་འགྲན་སློང་གི་མདུན་དུ། གོ་ལ་ཧྲིལ་པོའི་ལྷོ་ཕྱོགས་དེ་ཕྱོགས་མང་མཐུན་སྦྱོར་དང་མཉམ་ལས་དར་སྤེལ་གཏོང་བའི་སྟོབས་ཤུགས་གཙོ་བོར་གྱུར་ཡོད། གོ་ལ་ཧྲིལ་པོའི་ལྷོ་ཕྱོགས་ཀྱི་དེ་བས་རྒྱ་ཁྱབ་ཀྱི་འཐུས་ཚབ་རང་བཞིན་དང་གཏམ་བཤད་དབང་ཆ་ལས་ཁོང་ཡངས་རང་བཞིན་དང་། དང་ལེན་ནུས་པ། ཕན་འབྲས་རང་བཞིན་བཅས་སྔར་བས་ལྡན་པའི་ཕྱོགས་མང་མ་ལག་འཛུགས་རྒྱུར་གསོན་ཤུགས་དང་སྒུལ་ཤུགས་གསར་པ་སྣོན་བཞིན་ཡོད་ཅེས་བརྗོད་པ་རེད།
“གོ་ལ་ཧྲིལ་པོའི་ལྷོ་ཕྱོགས། མཉམ་དུ་དེང་རབས་ཅན་གྱི་ཕྱོགས་སུ་སྐྱོད”ཅེས་པ་བརྗོད་དོན་གཙོ་བོར་བྱས་པའི་ཡན་ལག་གླེང་སྟེགས་ཐོག མཉམ་འབྲེལ་རྒྱལ་ཚོགས་ཚོགས་ཆེན་སྐབས་དོན་ལྔ་པའི་ཀྲུའུ་ཞི་པོ་ཙི་ཁེར་གྱིས“མིག་སྔར། གོ་ལ་ཧྲིལ་པོའི་ལྷོ་ཕྱོགས་ཀྱིས་རང་སོ་སོའི་ཐབས་ལམ་བརྒྱུད་དེང་རབས་ཅན་གྱི་ལམ་བུར་སྐྱོད་བཞིན་ཡོད་པས། འགྲན་སློང་ཡོད་ལ་གོ་སྐབས་ཀྱང་ཡོད། རྒྱལ་ཁབ་ཁག་གིས་མཉམ་ལས་ལ་ཤུགས་སྣོན་བརྒྱབ་ནས་དེ་བས་འདྲ་མཉམ་དང་ཁོང་ཡངས་ཀྱི་རྒྱལ་སྤྱིའི་སྒྲིག་ལམ་བཏོད་དེ་མི་ཚང་མས་མཉམ་སྤྱོད་དང་། ཞི་བདེ། དར་རྒྱས། རྒྱུན་མཐུད་ཆོག་པ་བཅས་ཀྱི་འཛམ་གླིང་མཉམ་དུ་གཏོད་དགོས”ཞེས་བརྗོད་པ་རེད།
མཉམ་འབྲེལ་རྒྱལ་ཚོགས་ལྷོ་ལྷོ་མཉམ་ལས་གཞུང་དོན་ཁང་གི་ཐེབས་རྩའི་ཀྲུའུ་རེན་ཝང་ཞའོ་ཅུན་གྱིས། ཉེ་བའི་ལོ་ཤས་རིང་། གོ་ལ་ཧྲིལ་པོའི་ལྷོ་ཕྱོགས་ཅེས་པ་གླེང་མང་བའི་ཐ་སྙད་ཅིག་ཏུ་གྱུར་ཞིང་། ཚང་མས་ཇི་ལྟར་གོ་ལ་ཧྲིལ་པོའི་ལྷོ་ཕྱོགས་ཀྱི་ནུས་པ་དེ་བས་ཆེ་བ་འདོན་སྤེལ་བྱེད་རྒྱུར་བསམ་གཞིག་བྱེད་བཞིན་ཡོད། “གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ཁ་གཏད་གཅོག་པར་སྟོབས་ཤུགས་ངོ་མ་ནི་མཐུན་སྒྲིལ་དང་སྣ་མང་ཅན་ལས་བྱུང་བ་དང་། འགྲོ་ལམ་འབའ་ཞིག་ནི་མཉམ་ལས་བྱེད་རྒྱུ་དེ་རེད། གལ་ཏེ་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱིས་སྔར་བས་མཐུན་སྒྲིལ་དང་རོགས་རེས་བྱས་ཚེ། གོ་ལ་ཧྲིལ་པོའི་འཕེལ་རྒྱས་ལ་སྐུལ་འདེད་ཀྱི་ནུས་པ་དེ་བས་ཆེན་པོ་འདོན་ཐུབ”ཅེས་བརྗོད་པ་རེད།