རི་པིན་ཏེ་ཅིང་སློབ་ཆེན་གྱི་དགེ་རྒན་ཆེ་མོ་བ་ལུའུ་ཁོའུ་དབྱང་ཅེས་རི་པིན་དངུལ་ཁང་པེ་ཅིང་ལས་དོན་ཁང་གི་འགོ་འཛིན་ཐོག་མའི་འགན་འཁུར་མྱོང་ཞིང་། ཀྲུང་གོར་ལོ་མང་ལས་ཀ་བྱེད་མྱོང་བས་ཀྲུང་གོའི་དཔལ་འབྱོར་འཕེལ་རྒྱས་ལ་ཡུན་རིང་དོ་ཁུར་བྱེད་ཀྱི་ཡོད། “ཀྲུང་གོར་འགྲོ་རིམ་བཞིན་ངས་ཆེད་མངགས་དཔེ་ཚོང་ཁང་ནས་དངུལ་རྩའམ་ཡང་ན་དཔལ་འབྱོར་དང་འབྲེལ་བའི་དཔེ་དེབ་ཉོ་གི་ཡོད། ད་ཆ་ཁྱིམ་གྱི་དཔེ་སྒྲོམ་དུ་ཀྲུང་གོ་དང་འབྲེལ་བའི་དཔེ་དེབ་ཀྱིས་ཁེངས་ཡོད”ཅེས་ལུའུ་ཁོའུ་དབྱང་ཅེས་ཉེ་ཆར་གསར་འགོད་པའི་བཅར་འདྲི་དང་ལེན་བྱེད་སྐབས་བརྗོད་པ་དང་། ཁོང་གིས“ཀྲུང་གོ་ནི་ཡིད་དབང་འཕྲོག་ཤུགས་ལྡན་པའི་རྒྱལ་ཁབ་ཅིག་ཡིན་པ་དང་། ལོ་འདི་དག་རིང་ཐོབ་པའི་ཕུལ་བྱུང་གྲུབ་འབྲས་ལ་འཛམ་གླིང་ཡོངས་ཀྱིས་དོ་སྣང་ཆེན་པོ་བྱེད་ཀྱི་ཡོད”ཅེས་བརྗོད།

2024ལོར། ཀྲུང་གོའི་རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་དུས་མཚུངས་ལས་5%འཕར་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དམིགས་ཚད་ལས་འགན་གཙོ་བོ་ལེགས་གྲུབ་བདེ་བླག་བྱུང་ཡོད། ལུའུ་ཁོའུ་དབྱང་ཅེས། 5%ཡི་དཔལ་འབྱོར་འཕར་ཚད་དེ་འཛམ་གླིང་གི་དཔལ་འབྱོར་སྡེ་གཞི་གཙོ་བོའི་ཁྲོད་མདུན་གྲལ་དུ་སླེབས་ནས། འཛམ་གླིང་ཡོངས་ཀྱི་3%ཡི་སྔོན་དཔག་འཕར་ཚད་ལས་མངོན་གསལ་དོད་པོས་མཐོ་བ་ཡོད་ཅེས་བརྗོད།

“ཀྲུང་གོར་དཔལ་འབྱོར་ཁྱབ་ཁོངས་སུ་གྲུབ་འབྲས་ཧ་ཅང་ཆེན་པོ་ཐོབ་པ་མ་ཟད། ཚན་རྩལ་གསར་གཏོད་ཐད་ལ་ཡང་གྲུབ་འབྲས་མངོན་གསལ་དོད་པོ་ཐོབ་ཡོད”ཅེས་ལུའུ་ཁོའུ་དབྱང་ཅེས་བརྗོད་ཅིང་། ཁོང་གིས་ཀྲུང་གོ་སྲིད་གཞུང་གིས་ཚན་རྩལ་གསར་གཏོད་ལ་བརྟེན་ནས་ཐོན་སྐྱེད་ནུས་ཤུགས་གསར་མ་འཕེལ་རྒྱས་ལ་སྣེ་ཁྲིད་བྱེད་དགོས་པའི་ནན་བཤད་བྱས་ཡོད། དེ་ལས་ཀྲུང་གོར་ཆུ་ཚད་མཐོ་བའི་ཚན་རྩལ་རང་ཚུགས་རང་དར་ཡོང་བར་མཐུན་རྐྱེན་བསྐྲུན་རྒྱུ་རེད་ཅེས་བརྗོད།

“ཀྲུང་གོའི་བཟོ་ལས་རིགས་སྣ་ཁ་འཛོམས་པ་དང་ལེ་ལག་ཆ་ཚང་པོ་ཡོད། མི་འབོར་དུང་ཕྱུར་14ལྷག་ཙམ་ཟིན་པའི་གཞི་ཁྱོན་ཧ་ཅང་ཆེ་བའི་ཁྲོམ་ར་ཡོད་པས། ཕྱི་ཕྱོགས་ཀྱི་གནོན་ཤུགས་མདུན་དུ་ཀྲུང་གོའི་དཔལ་འབྱོར་ལ་ལྡེམ་ཤུགས་ཆེན་པོ་དང་ནང་སྐྱེས་སྒུལ་ཤུགས་ཆེན་པོ་མངོན་ཡོད”ཅེས་ལུའུ་ཁོའུ་དབྱང་ཅེས་བརྗོད་པ་དང་། ཁོང་གིས་ཀྲུང་གོའི་དཔལ་འབྱོར་མགྱོགས་མྱུར་འཕར་བའི་དུས་མཚམས་ནས་སྤུས་ཚད་མཐོ་བའི་འཕེལ་རྒྱས་ཀྱི་དུས་མཚམས་སུ་བསྒྱུར་བ་དང“གྲངས་འབོར་གསོག་འཇོག”ནས“སྤུས་ཚད་མཆོང་སྐྱོད”ལ་བསྒྱུར་བས། ཀྲུང་གོས་འཛམ་གླིང་དཔལ་འབྱོར་ལ་ལེགས་སྐྱེས་འབུལ་སྟངས་ལ་ཡང་འགྱུར་ལྡོག་བྱུང་ཡོད་ཅེས་བརྗོད།

2024ལོར། ཀྲུང་གོའི་ཕྱིར་གཏོང་ནང་འདྲེན་ཚོང་ཟོག་ཚོང་འདུས་ནས་ཀྲུང་གོ་རྒྱལ་སྤྱིའི་ཞབས་ཞུའི་ཚོང་དོན་ཚོང་འདུས་བར་དང་། ཀྲུང་གོ་རྒྱལ་སྤྱིའི་འཛད་རྫས་དངོས་མང་སྟོན་ཚོགས་ནས་ཀྲུང་གོ་རྒྱལ་སྤྱིའི་ནང་འདྲེན་དངོས་མང་སྟོན་ཚོགས་བར། ཀྲུང་གོས་དཔལ་འབྱོར་ཚོང་དོན་རིགས་ཀྱི་འགྲེམས་ཚོགས་ཐེངས་3800ལྷག་ཙམ་གྲུབ་འབྲས་ཐོབ་པའི་ངང་གཉེར་ཡོད། ལུའུ་ཁོའུ་དབྱང་ཅེས“ཀྲུང་གོས་གཙོ་གཉེར་བྱས་པའི་འགྲེམས་ཚོགས་ལ་གཡུར་ཟའི་གྲུབ་འབྲས་ཐོབ་ནས། ཀྲུང་གོས་ཆུ་ཚད་མཐོ་པོས་ཕྱི་ཕྱོགས་ལ་སྒོ་མོ་འབྱེད་རྒྱ་རྒྱུན་ཆད་མེད་པར་ཆེ་རུ་གཏོང་བའི་ཆོད་སེམས་འཛམ་གླིང་ལ་མངོན་ཡོད། ཀྲུང་གོས་བཟོ་སྐྲུན་ལས་རིགས་ཁྱབ་ཁོངས་ཀྱི་ཕྱི་དངུལ་ཞུགས་འཐུས་ཚོད་འཛིན་བྱ་ཐབས་ཕྱོགས་ཡོངས་ནས་མེད་པར་བཟོས་པ་དང་ཕྱི་དངུལ་ཞུགས་འཐུས་ཀྱི་བཀག་རྒྱའི་གསལ་ཐོ་རྒྱུན་མཐུད་ཉུང་དུ་བཏང་བས། སྒོ་དབྱེའི་ཀྲུང་གོས་ཕྱི་རྒྱལ་གྱི་ཁེ་ལས་ལ་གོ་སྐབས་དེ་བས་མང་པོ་བསྐྲུན་རྒྱུ་རེད”ཅེས་བརྗོད།