འདི་ནི་པོ་ཨའོ་ཨེ་ཤེ་ཡའི་གླེང་སྟེགས་རྒྱལ་སྤྱིའི་གྲོས་ཚོགས་ལྟེ་གནས་ཡིན་པ།

ཟླ་3ཚེས་25ཉིན། པོ་ཨའོ་ཨེ་ཤེ་ཡའི་གླེང་སྟེགས་ཀྱི་2025ལོའི་ལོ་ཚོགས་ཐོག་གསར་འགྱུར་ཡོངས་བསྒྲགས་ཚོགས་འདུ་འཚོགས་ནས། 《པོ་ཨའོ་ཨེ་ཤེ་ཡའི་གླེང་སྟེགས་ཨེ་ཤེ་ཡའི་དཔལ་འབྱོར་གྱི་མདུན་ལྗོངས་དང་གཞི་གཅིག་ཅན་གྱི་འཕེལ་རིམ་2025ལོ་འཁོར་གྱི་སྙན་ཞུ》དང《པོ་ཨའོ་ཨེ་ཤེ་ཡའི་གླེང་སྟེགས་ཀྱི་རྒྱུན་མཐུད་ཆོག་པའི་འཕེལ་རྒྱས་ཀྱི་ཨེ་ཤེ་ཡ་དང་འཛམ་གླིང་2025ལོ་འཁོར་གྱི་སྙན་ཞུ——གནམ་གཤིས་ཀྱི་འགྱུར་ལྡོག་ལ་ཁ་གཏད་གཅོག་པ། ཨེ་ཤེ་ཡས་ལྗང་མདོག་འཕེལ་རྒྱས་ལ་སྐུལ་འདེད་གཏོང་བ》ཞེས་པའི་ལོ་ཚོགས་ཀྱི་སྙན་ཞུ་གཙོ་བོ་གཉིས་དངོས་སུ་ཁྱབ་བསྒྲགས་བྱས་པ་རེད། སྙན་ཞུའི་ནང་ངོས་འཛིན་བྱས་དོན། ཨེ་ཤེ་ཡའི་དཔལ་འབྱོར་སྡེ་གཞི་ནི་བརྟན་ལྷིང་དང་འཛམ་གླིང་དཔལ་འབྱོར་ལ་འདེགས་སྐྱོར་བྱེད་པའི་སྟོབས་ཤུགས་དང་རྨང་རྡོ་གལ་ཆེན་ཞིག་ཏུ་གྱུར་ཡོད་པ་དང་། ལྗང་མདོག་ཕྱོགས་སྒྱུར་ནི་ཨེ་ཤེ་ཡའི་དཔལ་འབྱོར་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་འདེད་གཏོང་བའི“རམ་འདེགས་འཕྲུལ་ཆས”གལ་ཆེན་ཞིག་ཏུ་གྱུར་ཡོད།

ཨེ་ཤེ་ཡའི་དཔལ་འབྱོར་ལ་མི་མངོན་པའི་སྟོབས་ཤུགས་གསར་པ་དང་འཕེལ་རྒྱས་ཀྱི་བར་མཐོངས་ལྡན་པ།

མིག་སྔར། རྒྱལ་སྤྱིའི་ཁོར་ཡུག་རྙོག་འཛིང་ཆེ་བ་དང་། ཕྱོགས་རྐྱང་རིང་ལུགས་དང་སྲུང་སྐྱོང་རིང་ལུགས་ལ་འཕེལ་རྒྱས་གསར་པ་བྱུང་ཡོད། པོ་ཨའོ་ཨེ་ཤེ་ཡའི་གླེང་སྟེགས་ཀྱི་དྲུང་ཆེ་ཀྲང་ཅུན་གྱིས་བརྗོད་དོན། འགྲན་སློང་མང་པོ་ཞིག་གི་མདུན་དུ་ཨེ་ཤེ་ཡའི་དཔལ་འབྱོར་སྡེ་གཞི་དང་ལྷག་པར་དུ་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་ལས་མཉེན་གཤིས་དང་གསོན་ཤུགས་ཆེན་པོ་མུ་མཐུད་མངོན་པ་དང་། དཔལ་འབྱོར་འཕེལ་རྒྱས་དང་། དངོས་ཟོག་དང་ཞབས་ཞུ་ཚོང་དོན། ས་ཁོངས་དཔལ་འབྱོར་གཞི་གཅིག་ཅན་སོགས་འཛམ་གླིང་གི་མདུན་གྲལ་དུ་སླེབས་པས། དེར་མི་མངོན་པའི་སྟོབས་ཤུགས་གསར་པ་དང་འཕེལ་རྒྱས་ཀྱི་བར་མཐོངས་ལྡན་ཡོད།

《པོ་ཨའོ་ཨེ་ཤེ་ཡའི་གླེང་སྟེགས་ཨེ་ཤེ་ཡའི་དཔལ་འབྱོར་གྱི་མདུན་ལྗོངས་དང་གཞི་གཅིག་ཅན་གྱི་འཕེལ་རིམ་2025ལོ་འཁོར་གྱི་སྙན་ཞུའི》ནང་སྔོན་དཔག་བྱས་པར། 2025ལོར། ཨེ་ཤེ་ཡའི་དངོས་ཡོད་GDPརྩིས་སྐོར་གྱི་འཕར་ཚད་4.5%ཟིན་པས། ཨེ་ཤེ་ཡ་དེ་ཉིད་སྔར་བཞིན་འཛམ་གླིང་དཔལ་འབྱོར་གྱི་སྒུལ་ཤུགས་གཙོ་བོར་འགྱུར་རྒྱུ་རེད། ཀྲུང་གོ་སྤྱི་ཚོགས་ཚན་རིག་ཁང་རིག་གནས་ཚན་ཁག་གི་ཨུ་ཡོན་དང་ཀྲུང་གོ་སྤྱི་ཚོགས་ཚན་རིག་ཁང་སློབ་ཆེན་རྒྱལ་སྤྱིའི་ཆབ་སྲིད་དཔལ་འབྱོར་རིག་པ་སློབ་གླིང་གི་ཡོན་ཀྲང་ཀྲང་ཡུས་ཡན་གྱིས་བརྗོད་དོན། ཨེ་ཤེ་ཡའི་དཔལ་འབྱོར་བསྡོམས་འབོར་གྱིས་གོ་ལ་ཧྲིལ་པོར་བཟུང་བའི་བསྡུར་ཚད་རྒྱུན་མཐུད་འཕར་ཡོད། “ཉོ་ནུས་ཀྱི་རྒྱུན་གོང་གཞིར་བཟུང་རྩིས་བརྒྱབ་ན། ཨེ་ཤེ་ཡའི་དཔལ་འབྱོར་སྡེ་གཞིའི་GDPསྤྱི་འབོར་གྱིས་འཛམ་གླིང་དཔལ་འབྱོར་ཁྲོད་བཟུང་བའི་བསྡུར་ཚད་དེ་2024ལོའི་48.1%ནས་2025ལོའི་48.6%བར་འཕར་རེ་ཡོད། ང་ཚོས་ཨེ་ཤེ་ཡ་འཕེལ་རྒྱས་དང་ཨེ་ཤེ་ཡའི་འབྱུང་འགྱུར་ལ་མུ་མཐུད་ཡིད་ཆེས་བྱེད་པར་རྒྱུ་མཚན་ཡོད”

ཀྲུང་གོས་ཨེ་ཤེ་ཡའི་རྒྱལ་ཁབ་ཀྱི་ལྗང་མདོག་ཕྱོགས་སྒྱུར་ལ་སྣེ་ཁྲིད་བྱེད་པ།

ལྗང་མདོག་ཕྱོགས་སྒྱུར་ནི་རྒྱུན་མཐུད་ཆོག་པའི་འཕེལ་རྒྱས་མངོན་འགྱུར་གྱི་ལྡོག་མེད་ཀྱི་ལམ་བུ་ཞིག་དང་། ཨེ་ཤེ་ཡའི་རྒྱལ་ཁབ་དང་ས་ཁུལ་དེ་བས་མང་བའི་དཔལ་འབྱོར་དང་། སྤྱི་ཚོགས། སྐྱེ་ཁམས་བཅས་མཐུན་སྦྱོར་འཕེལ་རྒྱས་ཡོང་བའི་གདམ་ག་གསར་པ་ཞིག་ཏུ་གྱུར་ཡོད། ཀྲུང་གོ་སོགས་ཨེ་ཤེ་ཡའི་རྒྱལ་ཁབ་ཀྱི་ནུས་ལྡན་བྱ་སྤྱོད་ལས་དགེ་མཚན་ལྡན་པའི་ཕན་འབྲས་ཐོན་བཞིན་ཡོད། 《པོ་ཨའོ་ཨེ་ཤེ་ཡའི་གླེང་སྟེགས་ཀྱི་རྒྱུན་མཐུད་ཆོག་པའི་འཕེལ་རྒྱས་ཀྱི་ཨེ་ཤེ་ཡ་དང་འཛམ་གླིང་གི་2025ལོ་འཁོར་གྱི་སྙན་ཞུ——གནམ་གཤིས་ཀྱི་འགྱུར་ལྡོག་ལ་ཁ་གཏད་གཅོག་པ། ཨེ་ཤེ་ཡས་ལྗང་མདོག་འཕེལ་རྒྱས་ལ་སྐུལ་འདེད་གཏོང་བ》ལས་མངོན་པར། ལྗང་མདོག་ཕྱོགས་སྒྱུར་བརྒྱུད་གནམ་གཤིས་ངན་པར་ཁ་གཏད་གཅོག་པ་དང་། དཔལ་འབྱོར་འཕེལ་རྒྱས་དང་དེ་བཞིན་རྒྱུན་མཐུད་ཆོག་པའི་འཕེལ་རྒྱས་མངོན་འགྱུར་ཡོང་བར་སྐུལ་འདེད་ཐེབས་རྒྱུ་ཡིན་ཞིང་། ཨེ་ཤེ་ཡས་དེ་བས་གསོན་ཤུགས་ལྡན་པ་དང་རྒྱུན་མཐུད་ཆོག་པའི་འཕེལ་རྒྱས་ཀྱི་ཐབས་ལམ་གསར་པ་ཞིག་གཏོད་བཞིན་ཡོད།

ནུས་རྒྱུ་གཙང་མའི་མ་འཇོག་ཨེ་ཤེ་ཡར་རྒྱུན་མཐུད་འཕེལ་རྒྱས་འགྲོ་བཞིན་ཡོད་ཅིང་། 2023ལོར། ཀྲུང་གོས་ནུས་རྒྱུ་གཙང་མའི་ཐད་མ་དངུལ་བཏང་བ་དེས་གོ་ལ་ཧྲིལ་པོའི་མ་འཇོག་བསྡོམས་འབོར་གྱི་གསུམ་ཆ་གཅིག་ཟིན་ཡོད། ཨེ་ཤེ་ཡའི་རྨང་གཞིའི་སྒྲིག་བཀོད་མ་འཇོག་དངུལ་ཁང་གི་དབུ་བཞུགས་དཔལ་འབྱོར་རིག་པ་མཁས་ཅན་པའེ་ལེ་ཧྥུས་བརྗོད་དོན། ཀྲུང་གོས་ལྗང་མདོག་ཕྱོགས་སྒྱུར་ལ་སྐུལ་འདེད་གཏོང་རིང་གྲུབ་འབྲས་མངོན་གསལ་དོད་པོ་ཐོབ་ཅིང་། ལྗང་མདོག་ནུས་རྒྱུ་སོགས་ལག་རྩལ་རྒྱུན་ཆད་མེད་པར་འཕེལ་རྒྱས་འགྲོ་བཞིན་ཡོད་པ་དང་། ཀྲུང་གོའི་ལྗང་མདོག་འཕེལ་རྒྱས་ཀྱིས་འཕེལ་རྒྱས་འགྲོ་བཞིན་པའི་རྒྱལ་ཁབ་གཞན་དག་ལ་དཔྱད་གཞི་མཁོ་འདོན་བྱས་ཡོད།

གོ་ལ་ཧྲིལ་པོར་བརྟན་པོའི་རང་བཞིན་དང་གཏན་འཁེལ་རང་བཞིན་མུ་མཐུད་མཁོ་འདོན་བྱ་རྒྱུ་ཡིན་པ།

ད་ལོ་ནི་ཀྲུང་གོའི“ལོ་ལྔ་ཚན་བཅུ་བཞི་པའི”འཆར་འགོད་ཀྱི་མཇུག་བསྡུའི་ལོ་རེད་ལ། ཕྱོགས་ཡོངས་ནས་སྒྱུར་བཅོས་སྔར་བས་ཟབ་གཏོང་གི་ལོ་གལ་ཆེན་ཞིག་ཀྱང་རེད། ཀྲུང་གོས་མུ་མཐུད་སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་བརྟེན་ནས་འཛམ་གླིང་ལ་ནུས་པ་བསྩལ་ཏེ། གོ་ལ་ཧྲིལ་པོའི་དཔལ་འབྱོར་སླར་གསོ་དང་འཕེལ་རྒྱས་ལ་འགག་རྩའི་སྒུལ་ཤུགས་གསར་པ་བསྣན་རྒྱུ་རེད།

པོ་ཨའོ་ཨེ་ཤེ་ཡ་གླེང་སྟེགས་ཞིབ་འཇུག་ཁང་གིས་ད་ལོའི་ཟླ་བ་དང་པོར་སྤེལ་བའི“གོ་ལ་ཧྲིལ་པོ་དང་ཨེ་ཤེ་ཡའི་དཔལ་འབྱོར་གྱི་གདེང་ཚོད་བརྟག་དཔྱད”ལས་མངོན་པར། བཅར་འདྲི་དང་ལེན་བྱེད་མཁན་མང་པོས་2025ལོའི་ཀྲུང་གོའི་དཔལ་འབྱོར་འཕེལ་རྒྱས་ཀྱི་མདུན་ལྗོངས་ལ་ལྟ་སྟངས་ཡག་པོ་འཛིན་པའམ་ཡང་ན་བལྟོས་བཅས་ཀྱི་ལྟ་སྟངས་ཡག་པའི་རྣམ་འགྱུར་འཛིན་གྱི་ཡོད་པ་དང་། ལྗང་མདོག་ཐཱན་ཉུང་བཟོ་སྐྲུན་དང་རྩེར་སོན་དང་རིག་ནུས་བཟོ་སྐྲུན་ཐོན་ལས་དེ་2025ལོའི་ཀྲུང་གོའི་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བའི་ཐོན་ལས་ཀྱི་སྒུལ་ཤུགས་གཙོ་བོར་འགྱུར་བའི་ངོས་འཛིན་བྱེད་ཀྱི་ཡོད། པོ་ཨའོ་ཨེ་ཤེ་ཡ་གླེང་སྟེགས་ཀྱི་ལས་འཛིན་གཞོན་པ་ཀྲོའུ་ཞའོ་ཁྲོན་གྱིས། ཀྲུང་གོས་ཕྱོགས་ཡོངས་ནས་སྒྱུར་བཅོས་སྔར་བས་ཟབ་གཏོང་གིས་ཆུ་ཚད་མཐོ་བའི་ཕྱི་ཕྱོགས་སྒོ་དབྱེ་རྒྱ་ཆེར་གཏོང་གི་ཡིན། “ཀྲུང་གོས་འགན་འཁྲི་དང་བློ་སྟོབས་ཆེན་པོས་འཛམ་གླིང་གི་རེ་ཞུར་ལན་བསློགས་ནས་གོ་ལ་ཧྲིལ་པོར་བརྟན་པོའི་རང་བཞིན་དང་གཏན་འཁེལ་རང་བཞིན་མུ་མཐུད་མཁོ་འདོན་བྱེད་ཀྱི་ཡིན”ཞེས་བརྗོད།