ཉེ་ཆར། ཕྱི་འབྲེལ་པུའི་མགྲིན་ཚབ་པ་ཀུའོ་ཅ་ཁུན་གྱིས། ཀྲུང་གོས་བློ་བརྟན་འགྱུར་མེད་ངང་སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་སྒོ་དབྱེར་སྐུལ་འདེད་གཏོང་གི་ཡིན་ལ། རྒྱལ་ཁབ་ཁག་གི་ཁེ་ལས་ཀྱིས་གོ་སྐབས་དམ་འཛིན་གྱིས་ཀྲུང་གོར་མ་འཇོག་དང་འབྱུང་འགྱུར་བཀོད་སྒྲིག་བྱས་ཏེ། གོ་ལ་ཧྲིལ་པོའི་དཔལ་འབྱོར་འཕར་བརྟན་པོ་ཡོང་བར་མཉམ་དུ་སྐུལ་འདེད་གཏོང་རྒྱུར་དགའ་བསུ་ཞུ་གི་ཡིན་ཞེས་བརྗོད་པ་རེད།

ཉིན་དེའི་གསར་འགོད་པའི་འཆར་ཅན་ཚོགས་འདུའི་ཐོག་གསར་འགོད་པ་ཞིག་གིས། ཀྲུང་གོའི་འཕེལ་རྒྱས་མཐོ་རིམ་གླེང་སྟེགས་ཀྱི་2025ལོའི་ལོ་ཚོགས་པེ་ཅིང་དུ་འཚོགས་པ་དང་བརྗོད་དོན་གཙོ་བོ་ནི“འཕེལ་རྒྱས་ཀྱི་སྒུལ་ནུས་ཕྱོགས་ཡོངས་ནས་འཕེལ་བར་བྱས་ཏེ། གོ་ལ་ཧྲིལ་པོའི་དཔལ་འབྱོར་བརྟན་པོ་འཕར་བར་མཉམ་དུ་སྐུལ་འདེད་གཏོང་དགོས”ཞེས་པ་དེ་ཡིན་པས། རྒྱལ་ཁབ་མང་པོའི་སྲིད་ཕྱོགས་མི་སྣ་གཙོ་བོ་དང་རྒྱལ་སྒྲོལ་ཀུང་སིའི་འགན་འཁུར་བ་མང་པོ་ཀྲུང་གོར་ཚོགས་འདུར་ཞུགས་རྒྱུའི་ཡིད་དབང་བཀུག་ཡོད། མགྲིན་ཚབ་པས་དེའི་ཐད་དཔྱད་གཏམ་གང་ཞིག་སྤེལ་རྩིས་ཡོད་དམ་ཞེས་་དྲིས་པར།

ཀུའོ་ཅ་ཁུན་གྱིས། ཟླ་3ཚེས་23དང་24ཉིན། ཀྲུང་གོའི་འཕེལ་རྒྱས་མཐོ་རིམ་གླེང་སྟེགས་ཀྱི་2025ལོའི་ལོ་ཚོགས་པེ་ཅིང་དུ་འཚོགས་ཤིང་། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་འགོ་ཚུགས་མཛད་སྒོར་ཞུགས་ནས་གཙོ་དོན་གཏམ་བཤད་གནང་བ་རེད། ཙུང་ལི་ལི་ཆང་གིས་གཙོ་དོན་གཏམ་བཤད་ནང་། ཕྱོགས་ཁག་གིས“དཔྱིད་གསར་དུས་ཆེན་གྱི་དཔལ་འབྱོར” ནས་ཀྲུང་གོའི་འཕེལ་རྒྱས་ཀྱི་གསོན་ཤུགས་ལ་ལྟ་བ་དང་། རྒྱལ་ཡོངས་ཚོགས་འདུ་གཉིས་ནས་ཀྲུང་གོའི་དཔལ་འབྱོར་སྲིད་ཇུས་ལ་རྒྱུས་ལོན། རྒྱལ་སྤྱིའི་དུས་འགྱུར་ཐོག་ནས་འཛམ་གླིང་གི་འཕེལ་རྒྱས་དང་ཡར་ཐོན་གྱི་འཇིག་རྟེན་ཆོས་ཉིད་ལ་བསམ་གཞིག་བཅས་བྱ་རྒྱུའི་ལྕག་སྐུལ་བྱས་པ་དེས། དཔལ་འབྱོར་ལེགས་ཕྱོགས་སུ་འཕེལ་རྒྱས་རྒྱུན་མཐུད་འགྲོ་བར་སྐུལ་འདེད་གཏོང་བའི་ཀྲུང་གོའི་གདེང་ཚོད་དང་ཆོད་སེམས་མངོན་པ་མ་ཟད། ཀྲུང་གོས་གོ་ལ་ཧྲིལ་པོའི་ཞི་བདེའི་འཕེལ་རྒྱས་བྱ་གཞག་ལ་བརྟན་ལྷིང་རང་བཞིན་དང་གཏན་འཁེལ་རང་བཞིན་གྱི་སྟོབས་ཤུགས་ཧུར་ཐག་འབུལ་རྒྱུ་ཡིན་པའང་མཚོན་ཡོད་ཅེས་བརྗོད་པ་རེད།

ཀུའོ་ཅ་ཁུན་གྱིས། ད་ལོའི་ལོ་ཚོགས་ཐོག་ཕྱི་རྒྱལ་གྱི་འཐུས་མི་750ལྷག་ཙམ་ཞུགས་རྒྱུའི་ཡིད་དབང་བཀུག་པ་དང་། ཚོགས་འདུར་ཞུགས་མཁན་རྒྱལ་སྒྲོལ་ཁེ་ལས་ཀྱི་རྒྱལ་ཁབ་ཀྱི་ཁྱབ་ཁོངས་དེ་བས་རྒྱ་ཆེ་བ། ཚོགས་འདུར་ཐོག་མར་ཞུགས་མཁན་རྒྱལ་སྒྲོལ་ཁེ་ལས་ཀྱི་གྲངས་འབོར་དེ་བས་མང་བ། ལས་རིགས་སྣ་ཚོགས་ཡོད་པ་བཅས་ཀྱི་ཐོག་ནས། ཕྱི་རྒྱལ་གྱི་མ་འཇོག་ཁེ་ལས་ཀྱིས་ཀྲུང་གོར་མུ་མཐུད་ལྟ་སྟངས་ཡག་པོ་འཛིན་པ་དང་མ་དངུལ་མང་པོ་གཏོང་བ་དེས་ཀྲུང་གོའི་དཔལ་འབྱོར་འཕེལ་རྒྱས་ཀྱི་མདུན་ལྗོངས་ལ་ཡིད་ཆེས་ཀྱི་འདེམས་ཤོག་འཕངས་པ་མཚོན་གྱི་ཡོད་ཅེས་ངོ་སྤྲོད་བྱས།