ཀྲུང་གོའི་ཁེ་ལས་མཁས་ཅན་གྱི་འཐུས་མི་ཚོགས་པ་དབྱི་ཐ་ལིར་འཚམས་འདྲིར་བསྐྱོད་པ།
ཉེ་ཆར། ཀྲུང་གོ་ཚོང་དོན་སྐུལ་སྤེལ་ལྷན་ཚོགས་ཀྱིས་ཀྲུང་གོའི་ཁེ་ལས་མཁས་ཅན་གྱི་འཐུས་མི་ཚོགས་པ་སྒྲིག་འཛུགས་བྱས་ནས་དབྱི་ཐ་ལིར་འཚམས་འདྲིར་བསྐྱོད་ཅིང་། རྒྱལ་ཁབ་གཉིས་པོའི་འབྲེལ་ཡོད་སྒྲིག་གཞི་དང་ཁེ་ལས་ཀྱིས་ཐོན་ལས་དང་མཁོ་སྤྲོད་འཁོར་སྦྲེལ་གྱི་རྒྱལ་སྤྱིའི་མཉམ་ལས་དང་རྒྱལ་སྒྲོལ་དྲ་ཐོག་ཚོང་དོན་སོགས་ལ་དམིགས་ནས་མཉམ་ལས་ཡིག་ཆ་མང་པོར་མིང་རྟགས་བཀོད་པ་རེད།
འཚམས་འདྲི་བྱེད་རིང་། ཀྲུང་གོ་ཚོང་དོན་སྐུལ་སྤེལ་ལྷན་ཚོགས་ཀྱི་ཚོགས་གཙོ་རེན་ཧུང་པིན་གྱིས་དབྱི་ཐ་ལིའི་བཟོ་ཚོང་ལས་རིགས་ཀྱི་མི་སྣ་དང་དེ་བཞིན་མཉམ་འབྲེལ་རྒྱལ་ཚོགས་ཀྱི་འབྲེལ་ཡོད་སྒྲིག་གཞི་དང་འབྲེལ་གཏུག་སྤེལ་རེས་རྒྱ་ཁྱབ་དང་། ས་གནས་དེ་གའི་འབྲེལ་ཡོད་ཁེ་ལས་ལ་བརྟག་ཞིབ་བྱས་པ་དང་། ཀྲུང་གོ་དང་དབྱི་ཐ་ལིའི་དཔལ་འབྱོར་ཚོང་དོན་གླེང་སྟེགས་དང་མཁོ་སྤྲོད་འཁོར་སྦྲེལ་སྐུལ་སྤེལ་དངོས་མང་སྟོན་ཚོགས་སྐབས་གསུམ་པའི་འོས་སྦྱོར་ཚོགས་འདུར་ཞུགས་པ་རེད། ཁོང་གིས། ཀྲུང་གོའི་བཟོ་ཚོང་ལས་རིགས་ཀྱིས་ཕྱོགས་ཁག་དང་མཉམ་དུ་ཕྱོགས་མང་རིང་ལུགས་དངོས་ལག་ལེན་བསྟར་ཏེ། ཚོང་དོན་མ་འཇོག་རང་མོས་ཅན་དང་སྟབས་བདེ་ཅན་ལ་སྐུལ་འདེད་གཏོང་འདོད་ཡོད་ལ། དབྱི་ཐ་ལི་ཕྱོགས་དང་སྲོལ་རྒྱུན་ཁྱབ་ཁོངས་ཀྱི་མཉམ་ལས་ལ་ཤུགས་རྒྱག་འདོད་དང་ནུས་རྒྱུ་གསར་པ་དང་གྲངས་འཛིན་དཔལ་འབྱོར་སོགས་ཁྱབ་ཁོངས་གསར་པའི་མཉམ་ལས་གསར་འབྱེད་བྱེད་འདོད་ཀྱང་ཡོད། སླད་ཕྱིན་དབྱི་ཐ་ལི་ཕྱོགས་ཀྱིས་ཀྲུང་གོའི་འཕེལ་རྒྱས་ཀྱི་གོ་སྐབས་དམ་པོར་བཟུང་ནས་ཀྲུང་གོའི་ཁྲོམ་རར་མུ་མཐུད་ཟབ་ཞུགས་བྱེད་པའི་རེ་བ་ཡོད་ལ། དབྱི་ཐ་ལིའི་ཁེ་ལས་མཁོ་སྤྲོད་འཁོར་སྦྲེལ་སྐུལ་སྤེལ་དངོས་མང་སྟོན་ཚོགས་སྐབས་གསུམ་པར་ཞུགས་པར་དགའ་བསུའང་ཞུ་གི་ཡིན་ཞེས་ནན་བཤད་བྱས་པ་རེད།
དབྱི་ཐ་ལི་ཕྱོགས་ཀྱིས། མིག་སྔར། གོ་ལ་ཧྲིལ་པོའི་དཔལ་འབྱོར་འཕེལ་རྒྱས་ལ་འགྲན་སློང་མང་པོ་འཕྲད་པས། དབྱི་ཐ་ལི་དང་ཀྲུང་གོའི་མཉམ་ལས་ལ་སྐུལ་འདེད་གཏོང་རྒྱུ་དེ་གལ་འགངས་ཤིན་ཏུ་ཆེ། དབྱི་ཐ་ལི་ཕྱོགས་ཀྱི་ཁེ་ལས་ཀྱིས་ཀྲུང་གོའི་ཁྲོམ་རར་ཚད་མཐོའི་མཐོང་ཆེན་བྱེད་ཀྱི་ཡོད་ལ། ཀྲུང་གོ་དང་དཔལ་འབྱོར་ཚོང་དོན་མཉམ་ལས་ལ་ཤུགས་སྣོན་བརྒྱབ་སྟེ། ཐུན་མོང་འཕེལ་རྒྱས་ཡོང་རེའང་བྱེད་ཀྱི་ཡོད་ཅེས་བརྗོད་པ་རེད།