བོད་ཀྱིས་མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་འཛུགས་གཏོད་སྲོལ་ཡིག་ལ་བཟོ་བཅོས་བརྒྱབ་པ།
ཉིན་ཤས་གོང་། གསར་འགོད་པས་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ནས་ཤེས་རྟོགས་བྱས་པར། གསར་དུ་བཟོ་བཅོས་བརྒྱབ་པའི《བོད་རང་སྐྱོང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་འཛུགས་གཏོད་སྲོལ་ཡིག》དེ་2025ལོའི་ཟླ་1ཚེས་15ཉིན་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་བཅུ་གཉིས་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་བཅུ་བཞི་པའི་ཐོག་གྲོས་འཆམ་བྱུང་བ་དང་། ཟླ་3ཚེས་1ཉིན་དངོས་སུ་ལག་ལེན་བསྟར་འགོ་ཚུགས་ཡོད།
དེ་ནི་སྲོལ་ཡིག་དེ་2020ལོའི་ཟླ་5ཚེས་1ཉིན་ལག་ལེན་བསྟར་ཚུན་བཟོ་བཅོས་རྒྱག་ཐེངས་དང་པོ་ཡིན་ཞིང་། གསར་དུ་བཟོ་བཅོས་བརྒྱབ་པའི་སྲོལ་ཡིག་ལ་ཁྱོན་ལེའུ་7དང་དོན་ཚན་50ཡོད་པ་དང་། འགན་འཁྲིའི་ལས་འགན་དང་། སྤྱི་ཚོགས་མཐུན་སྦྱོར། དྲིལ་བསྒྲགས་སློབ་གསོ། འགན་སྲུང་ལྟ་སྐུལ་སོགས་ཀྱི་ཐད་ནས་ཞིབ་ཕྲའི་ཚད་གཞི་བཟོས་ཡོད། བཟོ་བཅོས་བརྒྱབ་པའི་གཙོ་གནད་དེ་དཔེ་བཟང་ཁུལ་འཛུགས་གཏོད་བྱེད་པར་ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་པའི“ཕྱོགས་བརྒྱད”ཀྱི་གཙོ་གནད་ལས་འགན་ལ་ནུས་ཤུགས་ཡོད་རྒུས་སྐུལ་འདེད་གཏོང་དགོས་པའི་གཏན་འབེབས་ནས་མངོན་པ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་པའི་དྲིལ་བསྒྲགས་སློབ་གསོའི་རྒྱུན་རྣམ་ཅན་ལ་སྐུལ་འདེད་གཏོང་བའི་བྱེད་ཐབས་ཁ་གསལ་བཟོས་པ་དེ་ནི་ས་གནས་རང་བཞིན་གྱི་མི་རིགས་ཁྲིམས་སྲོལ་མ་ལག་འཐུས་སྒོ་ཚང་དུ་གཏོང་བ་དང་མི་རིགས་ལས་དོན་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་ལ་སྐུལ་འདེད་གཏོང་བར་ཕན་ཐོགས་ཡོད་པ་རེད།
“དུས་ཐོག་སྲོལ་ཡིག་ལ་བཟོ་བཅོས་རྒྱག་པ་ནི་རིགས་པའི་གཞུང་ལུགས་ཀྱི་གྲུབ་འབྲས་གསར་ཤོས་དང་ལག་ལེན་གསར་གཏོད་ཀྱི་ཉམས་མྱོང་དེ་དག་ཁྲིམས་སྲོལ་གྱི་རྣམ་པའི་ཐོག་ནས་གཏན་འཇགས་བཟོས་ཏེ་ཏང་གི་མི་རིགས་རིགས་པའི་གཞུང་ལུགས་དང་ལག་ལེན་གསར་གཏོད་གང་དུ་འཕེལ་རྒྱས་སོང་ན་མི་རིགས་ཀྱི་ཁྲིམས་སྐྱོང་འགན་སྲུང་དེ་གར་རྗེས་ཟིན་པ་བྱེད་དགོས”ཞེས་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་བཅུ་གཉིས་པའི་མི་རིགས་ཆོས་ལུགས་དང་ཕྱི་དོན་ཕྱིར་སྡོད་རང་མིའི་ལས་དོན་ཨུ་ལྷན་གྱི་ཀྲུའུ་རེན་ཨུ་ཡོན་བསྟན་འཛིན་ལྷུན་གྲུབ་ཀྱིས་བཤད།