བོད་རང་སྐྱོང་ལྗོངས་ཆབ་མདོ་གྲོང་ཁྱེར་དཔལ་འབར་རྫོང་མི་དམངས་སྨན་ཁང་དུ་རྒྱང་བསྟེན་ནད་དཔྱད་ལས་དོན་བྲེལ་འཚུབ་ངང་སྤེལ་བཞིན་འདུག རྒྱང་བསྟེན་ནད་དཔྱད་མ་ལག་ཁ་ཕྱེ་ནས་དཔལ་འབར་རྫོང་མི་དམངས་སྨན་ཁང་གི་སྨན་པ་དབྱངས་ཅན་གྱིས་ཆབ་མདོ་གྲོང་ཁྱེར་མི་དམངས་སྨན་ཁང་གི་སྨན་པ་དང་རྒྱང་བསྟེན་འབྲེལ་མཐུད་བྱས་ཏེ་ནད་པ་ཞིག་གི་སྙིང་ལ་བརྟག་དཔྱད་བྱེད་བཞིན་འདུག

ད་ཆ་དཔལ་འབར་རྫོང་མི་དམངས་སྨན་ཁང་གི་སྨན་པ་ཚོར་སྨན་བཅོས་ཐད་དཀའ་གནད་འཕྲད་ཚེ་ཚང་མས་5Gརྒྱང་བསྟེན་སྨན་བཅོས་མ་ལག་ནས་གྲོང་ཁྱེར་མི་དམངས་སྨན་ཁང་དང་མཉམ་དུ་ནད་དཔྱད་བྱེད་ཀྱི་ཡོད། དཔལ་འབར་རྫོང་ས་ཐག་རིང་བས། ནད་པ་གྲོང་ཁྱེར་མི་དམངས་སྨན་ཁང་དུ་སྨན་བཅོས་བྱེད་པར་བསྐྱོད་ན། ལམ་དུ་ཆུ་ཚོད་བདུན་བརྒྱད་ཙམ་འགོར་གྱི་ཡོད།

“བརྙན་ལམ་མ་ལག་ནས་ནད་པའི་བརྟག་དཔྱད་ཆ་འཕྲིན་ཁག་མཉམ་དུ་ལྟ་ཐུབ་པ་མ་ཟད། ང་ཚོ་འཐབ་ཕྱོགས་དང་པོའི་སྨན་པར་བསྐུར་གྱི་ཡོད”དབྱངས་ཅན་གྱིས“སྒྲིག་ཆས་དེ་དག་བོད་སྐྱོར་ལས་བྱེད་པས་སྨན་ཁང་ལ་ཞལ་འདེབས་བརྒྱབ་པ་ཞིག་རེད། རྒྱང་བསྟེན་ནད་དཔྱད་ཀྱི་འཕྲུལ་ཆས་ཡོད་པར་བརྟེན་ང་ཚོས་ས་གནས་དེ་གའི་མང་ཚོགས་ལ་སྤུས་ཚད་དེ་བས་མཐོ་བའི་སྨན་བཅོས་བྱེད་ཐུབ་ཀྱི་འདུག”ཅེས་བཤད།

“ང་ཚོས་ཆེད་ལས་ལ་གཞི་ཚུགས་ནས་དྲ་རྒྱའི་སྒྲིག་བཀོད་སྣ་ཚོགས་མུ་མཐུད་ནང་འདྲེན་བྱས་པར་བརྟེན་དཔལ་འབར་རྫོང་གི་དྲ་རྒྱའི་ཞབས་ཞུའི་ཆུ་ཚད་མཐོ་རུ་ཕྱིན་ཡོད། དྲ་རྒྱའི་རྨང་གཞིའི་སྒྲིག་བཀོད་མུ་མཐུད་འཐུས་སྒོ་ཚང་དུ་ཕྱིན་པར་བརྟེན་དཔལ་འབར་རྫོང་གི་དམངས་འཚོ་ལེགས་སུ་གཏོང་བར་རམ་འདེགས་ཐུབ་ཡོད”ཅེས་ཀྲུང་གོ་གློག་འཕྲིན་གྱི་བོད་སྐྱོར་ལས་བྱེད་པ་དང་། དཔལ་འབར་རྫོང་ཨུད་ཀྱི་རྒྱུན་ཨུ། རྫོང་དཔོན་གཞོན་པ་ཧོང་ཞུའེ་ཐེན་གྱིས་བཤད།

དཔལ་འབར་རྫོང་གྲོང་མི་རིགས་ལམ་སྡེ་ཁུལ་གྱི་གཞུང་ལས་ཁང་གི་གློག་རྡུལ་བརྙན་ཤེལ་ཆེན་པོ་དེ་ནི་ཀྲུང་གོ་གློག་འཕྲིན་གྱིས་རོགས་སྐྱོར་བྱས་པ་ཞིག་ཡིན་པ་དེས་གྲངས་འཛིན་གྲོང་གསེབ་ལས་སྟེགས་ལ་ནུས་པ་འདོན་བཞིན་ཡོད། “མིག་སྔར་སྤྱོད་མང་ཤོས་ནི་གློག་མིག་ཡིན”ཞེས་སྡེ་ཁུལ་གྱི་ལས་དོན་པ་ལི་ཉིང་གིས་གསར་འགོད་པར་བཤད།

འགན་འཁྲི་གཙོ་བོ་དང་ལས་སྒོ་གཙོ་བོར་དམིགས་ནས། ཀྲུང་གོ་གློག་འཕྲིན་བོད་སྐྱོར་ལས་བྱེད་པས་ཐོན་ལས་ཀྱི་ལེགས་ཆ་སྤྱད་དེ་དཔལ་འབར་རྫོང་གི་འཕེལ་རྒྱས་ལ་མུ་མཐུད་སྐུལ་འདེད་བཏང་ཡོད། ངོ་སྤྲོད་བྱས་པར་གཞིགས་ན། 2024ལོར་ཀྲུང་གོ་གློག་འཕྲིན་བོད་སྐྱོར་ལས་བྱེད་པ་ཚོས་འབྲེལ་གཏུག་བྱས་ནས་རག་པའི་ཞལ་འདེབས་དངུལ་སྒོར་ཁྲི་2481དེ་དག་ཆུ་བཟང་གྲོང་ཚོའི་མཛེས་སྡུག་ལྡན་པའི་གནས་འཕྲོད་གྲོང་གསེབ་རྣམ་གྲངས་ཀྱི་དུས་ཐེངས་གཉིས་པ་དང་། རིག་ལྡན་རིག་གནས་ཡུལ་སྐོར་གྱི་གསར་བསྐྲུན་ལས་སྟེགས་རྣམ་གྲངས། མཚོ་ཁ་གྲོང་རྡལ་སང་ཁ་སྡེ་ཁུལ་གྱི་རིག་ལྡན་སྡེ་ཁུལ་གྱི་གསར་བསྐྲུན་རྣམ་གྲངས། གྲངས་འཛིན་གྲོང་གསེབ་ཀྱི་གསར་བསྐྲུན་རྣམ་གྲངས་སོགས་གནད་སྨིན་རོགས་སྐྱོར་རྣམ་གྲངས་8ལ་བཏང་ཡོད། དཔལ་འབར་རྫོང་གི་སྲིད་འཛིན་གྲོང་ཚོ(གྲོང་ལྷན)86ལ་མི་རིང་བར་གྲངས་འཛིན་གྲོང་གསེབ་མངོན་འགྱུར་ཐུབ་རྒྱུ་མ་ཟད། རྫོང་དང་གྲོང་གསེབ་རིམ་གསུམ་མཉམ་འགུལ་དོ་དམ་དང་། ཐོན་ཁུངས་བསྡུ་སྒྲིལ། སྤྱི་པའི་ཞབས་ཞུ་མཉམ་འདྲེས་ཤར་གཏོང་བཅས་བྱས་ནས་སྲིད་གཞུང་གི་ལས་ཆོད་དང་ཞབས་ཞུའི་ནུས་པ་དང་གྲོང་གསེབ་ཀྱི་གྲངས་འཛིན་ཅན་གྱི་བཅོས་སྐྱོང་ནུས་པ་ཕྱོགས་ཡོངས་ནས་ཆེ་རུ་གཏོང་རྒྱུ་རེད།