ཉེ་ཆར། རྒྱལ་སྤྱིའི་མི་སྣས་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས། 2025ལོའི་ཀྲུང་གོའི་དཔལ་འབྱོར་གྱི་ལོ་འགོའི“གྲུབ་འབྲས་གསལ་ཐོའི”ནང་ཀྲུང་གོའི་དཔལ་འབྱོར་གྱི་འཕར་ཤུགས་ཆེན་པོ་མངོན་བཞིན་ཡོད་ལ། ཀྲུང་གོའི་སྤུས་ཚད་མཐོ་བའི་འཕེལ་རྒྱས་ཀྱི་གསོན་ཤུགས་ལྡན་པའི་རྣམ་པའང་མངོན་ཡོད། སྲིད་ཇུས་ཀྱི་ཁེ་སྤོགས་རྒྱུན་མཐུད་བཀྲམས་པ་དང་སྤྱི་ཚོགས་ཀྱི་སྔོན་དཔག་རྒྱུན་ཆད་མེད་པར་ལེགས་སུ་ཕྱིན་པའི་ཞོར་ལ་ཀྲུང་གོའི་དཔལ་འབྱོར་གྱི་གྲུ་གཟིངས་ཆེན་པོ་དེ་མུ་མཐུད་རླབས་བཤགས་མདུན་སྐྱོད་བྱེད་ངེས་རེད་ཅེས་བརྗོད།

“ཀྲུང་གོའི་དཔལ་འབྱོར་མགྱོགས་མྱུར་སླར་གསོ་ཡོང་བཞིན་ཡོད་པ”

“གོ་ལ་ཧྲིལ་པོའི་དཔལ་འབྱོར་འཕར་ཚད་ཞན་པའི་སྤྱི་ཡོངས་རྣམ་པའི་འོག ན་ནིང་ཀྲུང་གོར་དཔལ་འབྱོར་འཕར་སྣོན་གྱི་དམིགས་ཚད་5%བདེ་བླག་མངོན་འགྱུར་བྱུང་བ་དང་། ད་ལོའི་ཟླ་དང་པོ་དང་གཉིས་པར་ཀྲུང་གོའི་དཔལ་འབྱོར་གྱི་འགོ་བརྟན་པོའི་ངང་ཚུགས་པ་དང་ལས་རིགས་ཁག་འཕེལ་རྒྱས་མགྱོགས་པོ་ཕྱིན་ཡོད། དེ་དག་ཚང་མ་ལས་ཀྲུང་གོའི་དཔལ་འབྱོར་གྱི་མཉེན་གཤིས་མཚོན་ཡོད” པར་ཙིར་གྱི་ཀྲུང་གོའི་གསར་གཏོད་དཔལ་འབྱོར་ཞིབ་འཇུག་ཁང་གི་ཀྲུའུ་ཞི་ཁེ་ལའོ་ཏི་ཡཱ·ཡཱ་ནུའུ་ཆི་ཡིས། ཉེ་བའི་ལོ་ཤས་རིང་། ཀྲུང་གོའི་མཐོ་གསར་ཚན་རྩལ་ཁྱབ་ཁོངས་སུ་རྒྱུན་ཆད་མེད་པར་ཡར་ཐོན་བྱུང་ནས་རྒྱལ་ནང་གི་དཔལ་འབྱོར་འཕེལ་རྒྱས་ལ་སྐུལ་འདེད་བཏང་བ་དང་། ཆུ་ཚད་མཐོ་བའི་ཕྱི་ཕྱོགས་སྒོ་དབྱེ་རྒྱུན་མཐུད་ངང་རྒྱ་སྐྱེད་བཏང་སྟེ་ཀྲུང་གོའི་དཔལ་འབྱོར་ལ་སྒུལ་ཤུགས་བསྣན་ཡོད། ཀྲུང་གོའི་དཔལ་འབྱོར་བརྟན་ཁྲོད་ཡར་རྒྱས་བྱུང་ནས་འཛམ་གླིང་གི་དཔལ་འབྱོར་འཕེལ་རྒྱས་ལ་བརྟན་ལྷིང་རང་བཞིན་དང་གཏན་འཁེལ་རང་བཞིན་དེ་བས་མང་བ་བསྣན་ཡོད་ཅེས་བརྗོད།

ཨར་ཅི་རི་ཡའི་བཟོ་ལས་མ་འཇོག་རིགས་གཅིག་མཁས་ཅན་མུའུ་ཧན་མོ་ཏེ·ས་ཡིའུ་ཏེ་ན་ནིང་ཀྲུང་གོར་འཚམས་འདྲིར་ཐེངས་བཞི་ཡོང་ནས་ཀྲུང་གོའི་ས་ཆ་མང་པོའི་བཟོ་ལས་དཔལ་འབྱོར་གྱི་འབྲེལ་ཡོད་སྡེ་ཚན་ལ་འཚམས་འདྲི་བྱས་པ་རེད། ཁོང་གིས“དངོས་ཚན་དཔལ་འབྱོར་འཕེལ་རྒྱས་གཏོང་བ་མཐའ་འཁྱོངས་དང་དམངས་ཚོགས་ཀྱི་འཛད་སྤྱོད་དགོས་མཁོར་སྐུལ་མ་གཏོང་བ་ནི་ཀྲུང་གོའི་དཔལ་འབྱོར་རྒྱུན་མཐུད་འཕར་བའི‘ཐབས་མཆོག’ཅིག་ཡིན་ལ། རྒྱལ་ཁབ་ཁག་དང་ལྷག་པར་དུ་གླིང་ཆེན་ཨ་ཧྥེ་རི་ཁའི་རྒྱལ་ཁབ་ཀྱིས་དཔྱད་གཞིར་འཛིན་འོས་པའི་ཉམས་མྱོང་ཞིག་ཀྱང་ཡིན་པའི”ངོས་འཛིན་བྱས་པ་དང་། མུའུ་ཧན་མོ་ཏེ·ས་ཡིའུ་ཏེ་ཡིས་ཀྲུང་གོའི་དཔལ་འབྱོར་བརྟན་པོའི་ངང་འཕར་བ་དེས་འཛམ་གླིང་གི་དཔལ་འབྱོར་འཕེལ་རྒྱས་ལ་སྒུལ་ཤུགས་ཤུགས་ཆེན་བསྣན་ཏེ། ཀྲུང་གོའི་དཔལ་འབྱོར་འཕེལ་རྒྱས་མགྱོགས་པོ་ཕྱིན་པ་དེས་འཛམ་གླིང་ལ་གོ་སྐབས་དེ་བས་མང་བ་བསྐྲུན་རྒྱུའི་ཡིད་ཆེས་ཡོད”ཅེས་བརྗོད།

“སྒོ་མོ་འབྱེད་རིང་རྒྱལ་སྤྱིའི་མཉམ་ལས་བར་མཐོངས་རྒྱ་སྐྱེད་བཏང་བ”

“ཀྲུང་གོའི་འཛད་སྤྱོད་པའི་ཡིད་ཆེས་སྟོན་གྲངས་ཟླ་བ་གསུམ་བསྟུད་མར་འཕར་བ་ལས་ཀྲུང་གོའི་འཛད་སྤྱོད་ཁྲོམ་རའི་གསོན་ཤུགས་མངོན་ཡོད”ལྷོ་ཨ་ཧྥེ་རི་ཁའི་ཕྱི་འབྲེལ་སློབ་ཚོགས་ཀྱི་ཚོགས་གཙོ་དང་ལྷོ་ཨ་ཧྥེ་རི་ཁའི་《ཕྱི་འབྲེལ》དུས་དེབ་ཀྱི་གཙོ་སྒྲིག་པ་ཁེ་ལི་ཐན·པ་ཧ་ནཱ་ཡིས། ཀྲུང་གོ་སྲིད་གཞུང་གིས་ནུས་ཤུགས་དེ་བས་ཆེ་བ་དང་དེ་བས་གནད་ལ་འཁེལ་བའི་བྱ་ཐབས་སྤྱད་དེ་འཛད་སྤྱོད་ལ་སྐུལ་སྤེལ་གཏོང་བཞིན་ཡོད་ཅེས་བརྗོད། ན་ནིང་ཚུན་དུ《འཛད་ཟོག་རྙིང་པ་གསར་པར་བརྗེ་བར་སྐུལ་འདེད་གཏོང་བའི་བྱ་སྤྱོད་ཇུས་གཞི》དང《འཛད་སྤྱོད་ལ་སྐུལ་སྤེལ་གཏོང་བའི་ཆེད་དོན་བྱ་སྤྱོད་ཇུས་གཞི》སོགས་སྲིད་ཇུས་རྒྱུན་ཆད་མེད་པར་བཏོན་ཏེ། འཛད་སྤྱོད་ཀྱི་མི་མངོན་པའི་སྟོབས་ཤུགས་རྒྱུན་ཆད་མེད་པར་འདོན་སྤེལ་བྱས་ནས་རྒྱལ་དམངས་དཔལ་འབྱོར་བརྟན་པོ་འཕར་བར་སྐུལ་འདེད་ཀྱི་འདེགས་སྐྱོར་ནུས་ལྡན་མཁོ་འདོན་བྱས་ཡོད། “རྒྱལ་ནང་གི་དགོས་མཁོ་རྒྱ་སྐྱེད་ཧུར་ཐག་གཏོང་བ་དང་དུས་མཚུངས་ཀྲུང་གོས་ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་སྐུལ་འདེད་གཏོང་བ་མཐའ་འཁྱོངས་བྱས་ནས་སྒོ་མོ་འབྱེད་རིང་རྒྱལ་སྤྱིའི་མཉམ་ལས་བར་མཐོངས་རྒྱ་སྐྱེད་བཏང་ཡོད”

“ཀྲུང་གོས་བཏོན་པའི་འཛད་སྤྱོད་སྐུལ་སྤེལ་དང་། ཆུ་ཚད་མཐོ་བའི་ཕྱི་ཕྱོགས་སྒོ་དབྱེ་རྒྱ་ཆེར་གཏོང་བ། ཚན་རྩལ་གསར་གཏོད་ལ་སྐུལ་འདེད་གཏོང་བ་སོགས་ཀྱི་བྱེད་ཐབས་ནི་གོ་ལ་ཧྲིལ་པོའི་དཔལ་འབྱོར་གྱི་འགྲན་སློང་ལ་ཁ་གཏད་གཅོག་པ་དང་སྤུས་ཚད་མཐོ་བའི་འཕེལ་རྒྱས་མངོན་འགྱུར་བྱེད་པའི་འགག་རྩ་རེད” ཁམ་ཕུ་ཁྲེ་གོང་མ་ཚང་གི་དཔལ་འབྱོར་དང་ནོར་སྲིད་བློན་ཆེན་ཟུར་པ་ཝ་ལཱ་ལུའུ་ཡིས། ཀྲུང་གོའི་དཔལ་འབྱོར་རྒྱུན་མཐུད་ལེགས་སུ་ཕྱིན་པ་ལས་བྱུང་བའི་ཕན་ནུས་ལ་ཧ་ཅང་དགའ་པོ་བྱེད་ཀྱི་ཡོད་པ་སྟེ། འཛད་སྤྱོད་སྐུལ་སྤེལ་གྱིས་རྒྱལ་ནང་གི་དགོས་མཁོ་ཆེ་རུ་འགྲོ་བ་མ་ཟད། གོ་ལ་ཧྲིལ་པོའི་མཁོ་སྤྲོད་འཁོར་འབྲེལ་ལེགས་སུ་འགྲོ་བར་ཡང་སྐུལ་འདེད་གཏོང་ཐུབ། ཆུ་ཚད་མཐོ་བའི་ཕྱི་ཕྱོགས་སྒོ་དབྱེ་རྒྱ་ཆེར་གཏོང་བ་དེས་རྒྱལ་སྤྱིའི་ཚོང་དོན་གྱི་མཉེན་གཤིས་ཆེ་རུ་འགྲོ་བར་ཕན་ཐོགས་ཡོད་ལ། རྒྱལ་ཁབ་ཁག་ལ་མཉམ་ལས་ཀྱི་གོ་སྐབས་ཀྱང་དེ་བས་མང་བ་བསྐྲུན་ཐུབ། རིག་ལྡན་གྲོང་ཁྱེར་འཛུགས་སྐྲུན་དང་། གྲངས་འཛིན་གཏོང་སྤྲོད། མིས་བཟོས་རིག་ནུས་བཀོལ་སྤྱོད་སོགས་ཐད་ཀྲུང་གོ་འཕེལ་རྒྱས་མགྱོགས་པོ་ཕྱིན་པ་དེས་ཐོན་སྐྱེད་ལས་ཕྱོད་དང་དམངས་ཚོགས་ཀྱི་འཚོ་བའི་སྤུས་ཚད་རྒྱུན་ཆད་མེད་པར་མཐོ་རུ་གཏོང་རྒྱུ་རེད་ཅེས་བརྗོད། “ཀྲུང་གོས་སྤུས་ཚད་མཐོ་བའི་འཕེལ་རྒྱས་ལ་རྒྱུན་ཆད་མེད་པར་སྐུལ་འདེད་བཏང་ན། གོ་ལ་ཧྲིལ་པོའི་དཔལ་འབྱོར་སྔར་བས་བསྟུན་མཁས་དང་རྒྱུན་མཐུད་ཆོག་པའི་ཕྱོགས་སུ་འཕེལ་རྒྱས་འགྲོ་བར་རམ་འདེགས་བྱེད་ཐུབ”

“འཕེལ་རྒྱས་ཀྱི་ཉམས་མྱོང་ལས་རྒྱལ་ཁབ་མང་པོ་ཞིག་ལ་དཔྱད་གཞི་མཁོ་འདོན་བྱེད་ཐུབ”

“ཉེ་བའི་ལོ་ཤས་རིང་། ཀྲུང་གོས་ལག་རྩལ་གསར་པ་དང་། ཐོན་རྫས་གསར་པ། ཞབས་ཞུ་གསར་པ་བཅས་རབ་དང་རིམ་པ་བཏོན་ནས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་རྒྱུན་ཆད་མེད་པར་སྐུལ་འདེད་བཏང་ཡོད”ཕོར་ཐིའུ་ཀལ་གྱི་ཇུས་འདོན་ཚོགས་པའི“ཀྲུང་གོའི་ལྟ་ཞིབ”ཀྱི་ཀྲུའུ་ཞི་ལུའུ་དབྱི·ལུའོ་ལི་ཏུའོ་ཡིས། ཀྲུང་གོའི་ད་ལོའི《སྲིད་གཞུང་གི་ལས་དོན་སྙན་སྒྲོན》ནང“གྲོང་ཁྱེར་དང་གྲོང་རྡལ་གྱི་ལས་ཞུགས་མི་གྲངས་ཁྲི་120ཡན་གསར་དུ་འཕར་བ་དང་། གྲོང་མིའི་འཛད་སྤྱོད་རིན་གོང་2%ཙམ་འཕར་བ། གྲོང་མིའི་ཡོང་འབབ་འཕར་ཚད་དེ་དཔལ་འབྱོར་འཕར་ཚད་དང་གོམ་སྟབས་གཅིག་མཚུངས་བྱེད་རྒྱུ”སོགས་ཀྱི་དམིགས་ཚད་བཏོན་པ་དེས་ཀྲུང་གོ་གུང་ཁྲན་ཏང་དང་ཀྲུང་གོ་སྲིད་གཞུང་གིས་ཐོག་མཐའ་བར་གསུམ་དུ་མི་དམངས་ལྟེ་བར་འཛིན་ནས་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བ་ནི་མི་དམངས་ཀྱི་འཚོ་བའི་ཆུ་ཚད་རྒྱུན་ཆད་མེད་པར་མཐོ་རུ་གཏོང་ཆེད་ཡིན་པ་གསལ་པོར་མཚོན་ཡོད་ཅེས་བརྗོད།

“ཀྲུང་གོའི་མིས་བཟོས་རིག་ནུས་དཔེ་དབྱིབས་ཆེན་པོ་ＤｅｅｐＳｅｅｋཡིས་གོ་ལ་ཧྲིལ་པོའི་གསར་སྤེལ་བྱེད་མཁན་ལ་ལག་རྩལ་གྱི་ཁེ་སྤོགས་མཉམ་སྤྱོད་བྱེད་དུ་བཅུག་པ་དང་ཀྲུང་གོའི་ནུས་རྒྱུ་གསར་པའི་རླངས་འཁོར་ཁེ་ལས་ཀྱིས་གློག་སྒུལ་རླངས་འཁོར་ཁྱབ་གདལ་གཏོང་བར་སྐུལ་འདེད་གཏོང་བ་དང་ཆབས་ཅིག་གོ་ལ་ཧྲིལ་པོའི་ཐོན་ལས་འཁོར་འབྲེལ་མཐུན་སྦྱོར་ངང་འཕེལ་རྒྱས་འགྲོ་བར་སྐུལ་འདེད་བཏང་ཡོད”ཅེས་དང་། མོ་ཞི་ཁོའི་རྒྱལ་ཕྲན་མཉམ་འབྲེལ་གྱི་གྲོས་མི་ཟུར་པ་པུའུ་ལཱ་ཞིར·ཨ་ཁོ་སི་ཐར·ཕེ་ཉི་ཡ་ཡིས། ཉེ་བའི་ལོ་ཤས་རིང་། ཀྲུང་གོའི་ཐོན་སྐྱེད་ནུས་ཤུགས་གསར་མ་འཕེལ་རྒྱས་ཀྱི་གྲུབ་འབྲས་ལས་མི་རྣམས་ལ་བག་ཆགས་ཟབ་མོ་བཞག་ཡོད། “ཀྲུང་གོ་སྲིད་གཞུང་གིས་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་ཆེད་བརྒྱུད་རིམ་རང་བཞིན་གྱི་བྱེད་ཐབས་སྤྱད་ཡོད། དེའི་ནང་ཚན་རྩལ་ཞིབ་འཇུག་གསར་སྤེལ་ལ་མ་དངུལ་གཏོང་ཤུགས་ཆེ་རུ་གཏོང་བ་དང་། ཐོན་ལས་སྲིད་ཇུས་འཐུས་ཚང་དུ་གཏོང་བ། རྨང་གཞིའི་སྒྲིག་བཀོད་འཛུགས་སྐྲུན་ལ་ཤུགས་སྣོན་རྒྱག་པ། ཚོང་གཉེར་ཁོར་ཡུག་ལེགས་སུ་གཏོང་བ་སོགས་ཚུད་ཡོད། བྱེད་ཐབས་དེ་དག་ལ་ཕན་འབྲས་མངོན་ནས་ཀྲུང་གོའི་ཚན་རྩལ་ཐོན་ལས་ཀྱི་འགྲན་རྩོད་ནུས་པ་རྒྱུན་ཆད་མེད་པར་ཆེ་རུ་འགྲོ་བཞིན་ཡོད”ཅེས་བརྗོད།

“ན་ནིང་ངས་ཀྲུང་གོའི་ཚན་རྩལ་ཁེ་ལས་ཁག་གཅིག་ལ་ལྟ་སྐོར་བྱས་ནས་མིས་བཟོས་རིག་ནུས་སོགས་ཁྱབ་ཁོངས་ཀྱི་ཀྲུང་གོའི་གསར་གཏོད་ཀྱི་ཚད་བརྒལ་དངོས་སུ་བདེན་དཔང་དང་མྱོང་ཚོར་བྱས་པ་ཡིན”ཞེས་ཁམ་ཕུ་ཁྲེའི་གོང་མ་ཚང་ཚན་རིག་ཁང་རྒྱལ་སྤྱིའི་འབྲེལ་བ་ཞིབ་འཇུག་སུའོ་ཡི་སུའོ་ཀྲང་ཅིན་ཕིང་གིས་བརྗོད་པ་དང་། ཁོང་གིས“གོ་ལ་ཧྲིལ་པོའི་དཔལ་འབྱོར་འཕར་བའི་སྐུལ་འདེད་སྟོབས་ཤུགས་གལ་ཆེན་ཞིག་ཡིན་པའི་ཀྲུང་གོའི་འཕེལ་རྒྱས་ཀྱི་ཉམས་མྱོང་ལ་རྒྱལ་ཁབ་མང་པོ་ཞིག་གིས་དཔྱད་གཞིར་འཛིན་རིན་ཡོད”ཅེས་བརྗོད།