ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་པ་གཞིར་བཟུང་། ཉེ་ཆར། ཀྲུང་གོའི་ཕྱི་འབྲེལ་པུས་གཉེར་བའི“མཉམ་འབྲེལ་རྒྱལ་ཚོགས་ཀྱི་ནུས་པར་ཤུགས་སྣོན་བརྒྱབ་ནས་ཕྱོགས་མང་རིང་ལུགས་དར་སྤེལ་གཏོང་དགོས”ཞེས་པའི་རྒྱལ་སྤྱིའི་བགྲོ་གླེང་ཚོགས་འདུ་པེ་ཅིང་དུ་འཚོགས་ཤིང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་ཕྱི་འབྲེལ་པུའི་པུའུ་ཀྲང་ཝང་དབྱི་ཡིས་ཡིག་ཐོག་ཤིས་ཚིག་བསྒྲོན་པ་རེད།

ཝང་དབྱི་ཡིས་གསུངས་དོན། ན་ནིང་མཉམ་འབྲེལ་རྒྱལ་ཚོགས་ཀྱི་འབྱུང་འགྱུར་དབུ་ཚོགས་ཐུགས་གྲ་ལེགས་འགྲིག་ངང་འཚོགས་པ་དེ་ཐོག་ནས་རྒྱལ་སྤྱིའི་སྤྱི་ཚོགས་ཀྱིས་ཕྱོགས་མང་རིང་ལུགས་དར་སྤེལ་གཏོང་བར་རྒྱབ་སྐྱོར་བྱེད་པ་དང་། མཉམ་འབྲེལ་རྒྱལ་ཚོགས་ཀྱི་ནུས་པར་ཤུགས་སྣོན་རྒྱག་པ། གོ་ལ་ཧྲིལ་པོའི་བཅོས་སྐྱོང་འཐུས་སྒོ་ཚང་དུ་གཏོང་བ་བཅས་ཀྱི་ཕྱོགས་ཡོངས་ཀྱི་འདུན་པ་མཚོན་ཡོད། འདི་ལོ་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ནས་ལོ་80འཁོར་བའི་ལོ་དང་ཏག་ཏག་འཁེལ་བ་མ་ཟད། མཉམ་འབྲེལ་རྒྱལ་ཚོགས་བཙུགས་ནས་ལོ་80འཁོར་བའི་ལོ་ཡང་ཡིན་པས། རྒྱལ་སྤྱིའི་སྤྱི་ཚོགས་ཀྱིས་རྒྱལ་ཁབ་ཁག་མཐུན་སྒྲིལ་མཉམ་ལས་དང་། མི་ཡུལ་གྱི་ཡང་དག་པའི་འགྲོ་ལམ་བརྟན་སྲུང་། དུས་རབས་ཀྱི་རླབས་རྒྱུན་སྟངས་འཛིན། གཞུང་དྲང་དྲང་བདེན་སྲུང་སྐྱོང་། འཛམ་གླིང་གི་ཞི་བདེ་དང་བརྟན་ལྷིང་སྲུང་སྐྱོང་བཅས་བྱས་ཏེ་གོ་ལ་ཧྲིལ་པོ་འཕེལ་རྒྱས་དང་དར་རྒྱས་ཡོང་བའི་རེ་སྒུག་བྱེད་བཞིན་ཡོད།

ཀྲུང་གོར་བཅའ་སྡོད་རྒྱལ་ཁབ་50ལྷག་ཙམ་དང་རྒྱལ་སྤྱི་དང་ས་ཁུལ་རྩ་འཛུགས་ཀྱི་འཐུས་མི་དང་། མཉམ་འབྲེལ་རྒྱལ་ཚོགས་ཀྱི་དཔོན་རིགས། འབྲེལ་ཡོད་པུའུ་ཨུད་ཀྱི་འཐུས་མི། རིགས་གཅིག་མཁས་ཅན་དང་མཁས་དབང་སོགས་ཁྱོན་མི་100ལྷག་ཙམ་བགྲོ་གླེང་ཚོགས་འདུར་ཞུགས་ཡོད་པ་རེད།