ཤིན་ཧྭ་གསར་འགྱུར་ཁང་གྲོང་ཁྱེར་རི་ནེ་ཝ་ནས་གློག་འཕྲིན་འབྱོར་གསལ། ཉེ་ཆར། མཉམ་འབྲེལ་རྒྱལ་ཚོགས་རི་ནེ་ཝར་རྒྱུན་སྡོད་ཀྲུང་གོའི་དོན་གཅོད་ཁྲུའུ་དང་སུའེ་ཙེར་གྱི་རྒྱལ་སྤྱིའི་རྩ་འཛུགས་གཞན་དག་གི་འཐུས་མི་ཁྲེན་ཤུས་ཀྱིས་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལས་འཛིན་ལྷན་ཚོགས་ཀྱི་ཚོགས་འདུ་སྐབས་58པའི་རྒྱལ་ཁབ་སོ་སོའི་འགྲོ་བ་མིའི་ཐོབ་ཐང་གནད་དོན་གྱི་ལྷུ་ཚིགས་སུ་གཏམ་བཤད་སྤེལ་ནས་ཀྲུང་གོའི་འགྲོ་བ་མིའི་ཐོབ་ཐང་གི་འདུ་ཤེས་རྒྱས་བཤད་དང་འགྲོ་བ་མིའི་ཐོབ་ཐང་ཆབ་སྲིད་ཅན་ལ་འགྱུར་བར་ངོ་རྒོལ་བྱས་པ་རེད།

ཁྲེན་ཤུས་ཀྱིས། ཕྱོགས་མང་རིང་ལུགས་ངོ་མ་ལག་ལེན་བསྟར་བ་དང་། ཡང་དག་པའི་འགྲོ་བ་མིའི་ཐོབ་ཐང་གི་འདུ་ཤེས་མཐའ་འཁྱོངས་བྱེད་པ། དགེ་མཚན་ལྡན་པའི་སྐད་ཆ་ཤོད་རེས་དང་མཉམ་ལས་བཅས་བྱས་ཚེ་གཞི་ནས་འགྲོ་བ་མིའི་ཐོབ་ཐང་ལ་སྐུལ་འདེད་དང་སྲུང་སྐྱོང་བྱེད་པའི་བྱ་གཞག་ལ་སྐུལ་འདེད་གཏོང་ཐུབ། རྒྱལ་ཁབ་ཁག་གཅིག་གིས་འགྲོ་བ་མིའི་ཐོབ་ཐང་ལ་ཁ་གཡར་ནས་རྒྱལ་ཁབ་གཞན་དག་གི་ནང་སྲིད་ལ་ཐེ་ཇུས་བྱེད་པ་དང་། ཚད་གཞི་ཉིས་བརྩེགས་བཟོ་བ། གདོང་གཏུག་དང་འགྲན་རྒོལ་བཟོ་བ། ཕྱོགས་རྐྱང་པའི་བཀག་སྡོམ་གང་བྱུང་དུ་ལག་བསྟར་བཅས་བྱེད་ཀྱི་ཡོད། ཁོང་ཚོས་རང་ཉིད་ཀྱིས་འགྲོ་བ་མིའི་ཐོབ་ཐང་ལ་བཙན་གནོད་བྱས་པ་སྣང་མེད་དུ་བཞག་ནས་རང་ཉིད“འགྲོ་བ་མིའི་ཐོབ་ཐང་གི་ཁྲིམས་དཔོན”ཡིན་ལུགས་རང་བསྟོད་ཀྱིས་རྒྱལ་ཁབ་གཞན་དག་གི་འགྲོ་བ་མིའི་ཐོབ་ཐང་གི་གནས་ཚུལ་རྐང་བཙུགས་ནས་སྐྱོན་བརྗོད་བྱས་ཏེ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལམ་སྲོལ་གྱི་མཚན་སྙན་ལ་གནོད་འཚེ་ཚབས་ཆེན་བཟོས་ཡོད་ཅེས་བརྗོད།

ཁྲེན་ཤུས་ཀྱིས། ཀྲུང་གོས་ཐོག་མཐའ་བར་གསུམ་དུ་མི་དམངས་ལྟེ་བར་འཛིན་པའི་འགྲོ་བ་མིའི་ཐོབ་ཐང་གི་འདུ་ཤེས་མཐའ་འཁྱོངས་བྱས་ནས་མི་དམངས་ཀྱི་ཁེ་ཕན་སྲུང་སྐྱོང་བྱེད་པ་དེ་གཞི་རྩའི་འགོ་འཛུགས་ས་དང་དོན་ལ་བབས་སར་བརྩི་གི་ཡོད། ཀྲུང་གོའི་ཤིན་ཅང་དང་བོད་ལྗོངས་དར་རྒྱས་བརྟན་ལྷིང་དང་། མི་རིགས་མཐུན་སྒྲིལ། ཆོས་ལུགས་འཆམ་མཐུན་བཅས་ཡོད་ཅིང་། ཤང་ཀང་གི་དམངས་ཚོགས་ལ་ཁྲིམས་ལྟར་ཁེ་དབང་དང་རང་དབང་རྒྱ་ཁྱབ་ལྡན་ཡོད་པ་རེད། ཀྲུང་གོས་ཐོག་མཐའ་བར་གསུམ་དུ་རྒྱལ་ཁབ་ཁག་གི་མི་དམངས་ཀྱིས་རང་བརྟེན་ངང་བདམས་པའི་འགྲོ་བ་མིའི་ཐོབ་ཐང་གི་འཕེལ་རྒྱས་འགྲོ་ལམ་ལ་བརྩི་འཇོག་བྱེད་ཀྱི་ཡོད་ལ། རང་ངོས་ཀྱི་ལག་ལེན་ལ་བརྟེན་ནས་མིའི་རིགས་ཀྱི་ཆབ་སྲིད་ཀྱི་ཤེས་དཔལ་ཕུན་སུམ་ཚོགས་སུ་དང་འཕེལ་རྒྱས་གཏོང་ཆེད་ལེགས་སྐྱེས་ཀྱང་ཕུལ་ཡོད་ཅེས་བརྗོད།