ཀྲུང་གོའི་ཁེ་ལས་མཁས་ཅན་གྱི་འཐུས་མི་ཚོགས་པས་སིར་པི་ཡར་འཚམས་འདྲི་བྱས་པ།
ཤིན་ཧྭ་གསར་འགྱུར་ཁང་གྲོང་ཁྱེར་པེར་ཀེ་ལའེ་ཏེ་ནས་གློག་འཕྲིན་འབྱོར་གསལ། ཉེ་ཆར། ཀྲུང་གོ་རྒྱལ་སྤྱིའི་ཚོང་དོན་སྐུལ་སྤེལ་མཐུན་ཚོགས་ཀྱིས་ཀྲུང་གོའི་ཁེ་ལས་མཁས་ཅན་གྱི་འཐུས་མི་ཚོགས་པ་སྒྲིག་འཛུགས་བྱས་ཏེ་སིར་པི་ཡར་འཚམས་འདྲི་བྱས་པ་དང་ཀྲུང་སིར་ཁེ་ལས་ཀྱིས་རྒྱལ་སྒྲོལ་དྲ་ཐོག་ཚོང་དོན་དང་། ཞིང་ལས་ཐོན་ཟོག་ཚོང་དོན། ཆ་འཕྲིན་ལག་རྩལ་སོགས་ཐད་སྤེལ་རེས་བྱས་ནས་མཉམ་ལས་ཀྱི་འདོད་འདུན་མང་པོ་གྲུབ་པ་རེད།
དེའི་རིང་སིར་པི་ཡའི་ཙུང་ཐུང་ཝུའུ་ཆི་ཆི་ཡིས་འཐུས་མི་ཚོགས་པ་དང་མཇལ་འཛོམས་གནང་ཞིང་། ཀྲུང་གོ་རྒྱལ་སྤྱིའི་ཚོང་དོན་སྐུལ་སྤེལ་མཐུན་ཚོགས་ཀྱི་ཚོགས་གཙོ་རེན་ཧུང་པིན་གྱིས་ཚོགས་པའི་སྣེ་ཁྲིད་དེ་ས་གནས་དེ་གའི་སྲིད་གཞུང་སྡེ་ཚན་དང་། ཚོང་ལས་མཐུན་ཚོགས། འཛམ་གླིང་དངོས་མང་སྟོན་ཚོགས་སྒྲིག་གཞི་བཅས་དང་སྤེལ་རེས་བྱས་པ་དང་ཀྲུང་སིར་དཔལ་འབྱོར་ཚོང་དོན་མཉམ་ལས་གླེང་སྟེགས་ལ་ཞུགས་ནས་སིར་པི་ཡ་ཕྱོགས་དང་མཉམ་དུ་ཚོང་དོན་མ་འཇོག་མཉམ་ལས་སྔར་བས་རྒྱ་ཆེར་གཏོང་བ་དང་། ད་ཡོད་ཀྱི་ཁྱབ་ཁོངས་སུ་མཉམ་ལས་སྲ་བརྟན་གཏོང་བའི་རྨང་གཞིའི་ཐོག་ཁྱབ་ཁོངས་མང་པོར་གསར་གཏོད་མཉམ་ལས་བྱེད་པ། སིར་པི་ཡ་ཕྱོགས་ཀྱི་2027ལོའི་པེར་ཀེ་ལའེ་ཏེའི་ཆེད་ལས་རིགས་ཀྱི་འཛམ་གླིང་དངོས་མང་སྟོན་ཚོགས་གཉེར་རྒྱུར་རྒྱབ་སྐྱོར་ཧུར་ཐག་བཅས་བྱེད་འདོད་ཡོད་ལ། སིར་པི་ཡའི་ཁེ་ལས་སྐབས་གསུམ་པའི་ཀྲུང་གོ་རྒྱལ་སྤྱིའི་མཁོ་སྤྲོད་འཁོར་འབྲེལ་སྐུལ་སྤེལ་དངོས་མང་སྟོན་ཚོགས་ལ་ཞུགས་རྒྱུར་དགའ་བསུ་ཡང་ཞུ་གི་ཡིན་ཞེས་ནན་བཤད་བྱས་པ་རེད།